Ozée 10 - MAWUXÓWÉMA

Vodún sinsɛn kpó axɔ́súɖuɖu kpó sín vivɔnu

¹ Izlayɛ́li to ɔ́, vǐwungbo ɖé wɛ bɔ ayǐ nyɔ́ n'i ɖ'ayǐ; é nɔ́ sɛ́n kpɔ́ gégé ɖ'ayǐ. Lo ɔ́, lě e sínsɛ́n tɔn lɛ́ɛ ɖo kpɔ́ su gbɔn wɛ ɔ́, mɔ̌ jɛ́n é nɔ́ ɖo vɔ̌sákpe lɛ́ɛ mɛ gbɔn wɛ. Lě e nǔ bǐ ɖo nyǐnyɔ́ nú to ɔ́ gbɔn wɛ ɔ́, mɔ̌ jɛ́n é nɔ́ ba acɔ́ nú awǐnnya e yě sɔ́ dó ɖó vodún bó nɔ sɛn lɛ́ɛ gbɔn.

² Ayixa yětɔn nɔ́ nɔ fí ɖokpó ǎ: hwɛ e yě hu lɛ́ɛ ji nǔɖé ɔ́, yě ná kpan. Mawu Mavɔmavɔ ná flí vɔ̌sákpe yětɔn lɛ́ɛ xwe, é ná gba awǐnnya e yě sɔ́ dó ɖó vodún ná, bó nɔ sɛn lɛ́ɛ.

³ Bɔ din ɔ́, yě ná ɖɔ: “Mǐ sɔ́ ɖó axɔ́sú ɖě ǎ, ɖó mǐ ɖó sísí nú Mawu Mavɔmavɔ ǎ; lě e nǔ wá ɖe gbɔn nú mǐ din ɔ́, étɛ́ wɛ axɔ́sú ɖé ká sixú wa nú mǐ?”

⁴ Yě ɖo akɔ jɛ wɛ ɔ́, xó gbló wɛ yě nɔ́ ɖɔ, adingban wɛ yě nɔ́ ɖó bó nɔ́ xwlé nǔ d'é jí. Mɔ̌ ɖokpó ɔ́, nǔjlɔ́jlɔ́wiwa ɔ́, gběhan aɖǐvɛ́nɔ e wú ɖo hwɛnxlo mɛ ɔ́ ɖɔhun wɛ é cí nú yě.

⁵ Wǔ ná kú Samalíinu lɛ́ɛ ɖó siká nyibúví Bɛti-Awɛni tɔn lɛ́ɛ wú. Togun tɔn ná nɔ aluwɛ mɛ nú vodún ɔ́, bɔ xɛsi ná jɛ vodúnnɔ tɔn lɛ́ɛ jí, ɖó susu tɔn e ná gosín tɛ́ntin yětɔn ɔ́ wú.

⁶ È nǎ zé vodún ɔ́ yi Asilíi, bó ná ná Axɔ́sú Đaxó. Eflayímu ná flú, winnyá ná hu Izlayɛ́li ɖó ali énɛ́ ɔ́ e é sɔ́ ɔ́ wú.

⁷ Acɔnkwín! È blǒ xá Samalíi nɛ́, è blǒ xá axɔ́sú tɔn nɛ́, é ɖo sisa yi wɛ afúntúnkplɔ̌ ɖo sin nukún mɛ ɖɔhun.

⁸ È nǎ gba vodún xwé e ɖo Bɛti-Awɛni lɛ́ɛ hánnyá. Fí énɛ́ lɛ́ɛ wɛ Izlayɛ́linu lɛ́ɛ hu hwɛ ɖe. Kpɔvɛwun kpó wunkan kpó ná wú ɖó vɔ̌sákpe yětɔn lɛ́ɛ jí. Yě ná ɖɔ nú só ɖaxó lɛ́ɛ ɖɔ: “Mi cyɔ́n mǐ!” Bó ná ɖɔ nú só kpɛví lɛ́ɛ ɖɔ: “Mi mu kɔn nyi mǐ jí!”

Izlayɛ́li ná ya nǔ e é dó ɔ́

⁹ Mawu Mavɔmavɔ ɖɔ: “Sín nǔ e jɛ ɖo Giveya ɔ́ hwenu ɔ́, Izlayɛ́linu lɛ́ɛ wa nǔ e yě ɖó ná wa lɛ́ɛ ǎ. Yě húzú ǎ. É nyí ganjí wɛ ɔ́, ahwan wɛ mɛhutɔ́ énɛ́ lɛ́ɛ ná kó cí ɖo Giveya.

¹⁰ Hwenu e è nǎ dǒ wlɔ yě ɖó hwɛ e yě nɔ́ fɔ́n bó nɔ ɖo huhu wɛ ɔ́ wú ɔ́, un ná dɔn tó nú yě lě e é jló mì gbɔn é; togun gěgé ná ɖó gbe kpɔ́ bó húzú kpan nukɔn yě.

¹¹ Eflayímu ɔ́, nyibúsixwɛ e è dě ganjí, bɔ é yí wǎn nú jinukún cicɔ é ɖɔhun wɛ é cí ɖ'ayǐ. Bɔ nyɛ ɔ́, ée un mɔ ɖɔ kɔ tɔn tlí ganjí ɔ́, un sin mɔ e è nɔ dó lɛ gle ná ɔ́ dó kɔ n'i. Énɛ́ ɔ́, Judáa ná nɔ́ lɛ gle ɔ́, bɔ Izlayɛ́li ná nɔ́ dɔn nǔ e è nɔ dó gba kɔ́gó ná é.

¹² Mi dó wǎn yíyí ɔ́, mi ná ya gbejíninɔ. Mi xo gle yɔ̌yɔ́ ɖé nú miɖée: hwenu su bɔ mi ná ba nyɛ Mawu Mavɔmavɔ ɔ́ káká jɛ hwenu e un ná wá kɔn hwlɛngán ɔ́ nyi mi jí dó é.

¹³ Lo ɔ́, nǔ nyanya sín gle wɛ mi lɛ, hǔn hwɛhuhu wɛ mi ná ya, ayi ɖó nú mɛ ka nyí sínsɛ́n e mi ɖu é. Đó Izlayɛ́linu lɛ́ɛ mi, mi ɖeji dó tito mi ɖésúnɔ tɔn lɛ́ɛ kpó ahwanfuntɔ́ gěgé e mi ɖó lɛ́ɛ kpó wú.

¹⁴ Énɛ́ ɔ́ wú wɛ ahwan zǐngídi ɖé ná wɔ́ ɖo togun mitɔn tɛ́ntin, bɔ è nǎ gba toxo ɖaxó mitɔn e mi mɛ ahohó lɛ́ lɛ̌ dó lɛ́ɛ bǐ hánnyá. Lě e axɔ́sú Calumani gba Bɛti-Aavɛ́li hánnyá gbɔn, bó hu vǐ kpó nɔ kpó gbɔn ɔ́, mɔ̌ wɛ un nǎ gba toxo ɖaxó mitɔn lɛ́ɛ gbɔn.

¹⁵ Adǎnú ɖaxó ɖaxó e mi yi wa ɖo Betɛ́li ɔ́, nǔ e mi mɔ ɖ'é mɛ ɔ́ nɛ́. Ayǐtéhɔ̌nnu su lě tlóló ɔ́, axɔ́sú Izlayɛ́li tɔn ɔ́ sín xó ná fó.”