Ozée 1 - MAWUXÓWÉMA

¹ Wěma élɔ́ ɔ́, xó e Mawu Mavɔmavɔ ɖɔ nú Ozée Beeli ví ɔ́ lɛ́ɛ wɛ ɖ'é mɛ. Jelobowámu, Yexoázi ví ɔ́ wɛ nyí Izlayɛ́li xɔ́sú hwenɛ́nu. Hwenɛ́nu ɖokpó ɔ́ wɛ Oziyási kpó Yotámu kpó, kpó Akázi kpó, kpódó Ezekiyási kpó ɖu axɔ́sú ɖo Judáa.

Gbeyíɖɔ Mawu tɔn Ozée sín hɛ̌nnu ɔ́

² Azɔn nukɔn nukɔntɔn e Mawu Mavɔmavɔ ɖɔ xó nú Ozée ɔ́, é ɖɔ n'i ɖɔ: “Yi da agalɛtɔ́ ɖokpó . Vǐ e é ná ji nú we lɛ́ɛ ná nyí agaví, ɖó mɛ e ɖo to ɔ́ mɛ lɛ́ɛ bǐ ɖo aga lɛ wɛ, yě jó nyɛ Mawu Mavɔmavɔ ɔ́ dó!”

³ Ozée yi nǔgbó bó da Gomɛ́ɛ Divlayímu vǐ ɔ́. Nyɔ̌nu ɔ́ mɔ xo, bó ji vǐ súnnu ɖokpó n'i.

⁴ Bɔ Mawu Mavɔmavɔ ɖɔ nú Ozée ɖɔ: “Sun nyǐ vǐ ɔ́ ɖɔ Izleyɛ́li, ɖó é nɔ zaanɖé din ɔ́, un ná dɔn tó nú Jehu sín kúnkan lɛ́ɛ, ɖó mɛ e yě hu ɖo Izleyɛ́li lɛ́ɛ é wú; un ná ɖó xwédo Izlayɛ́li tɔn ɔ́ sín axɔ́súɖuɖu te.

⁵ Gbe énɛ́ ɔ́ gbe ɔ́, un ná hu acɛ nú ahwangɔnu Izlayɛ́li tɔn ɔ́ sín hlɔ̌nhlɔ́n ɖo tɔdo Izleyɛ́li tɔn ɔ́ mɛ.”

⁶ Nyɔ̌nu ɔ́ lɛ́ mɔ xo bó ji vǐ nyɔ̌nu ɖokpó. Bɔ Mawu Mavɔmavɔ ɖɔ nú Ozée ɖɔ: “Sun nyǐ vǐ ɔ́ ɖɔ Lo-Hluxáma, tínmɛ tɔn wɛ nyí mɛ e è ma yí wǎn ná ǎ é, ɖó un sɔ́ ná yí wǎn nú Izlayɛ́linu lɛ́ɛ ǎ. Un ná ɖó wǎn e un yí nú yě ɔ́ te.

⁷ Lo ɔ́, un ná yí wǎn nú Judáanu lɛ́ɛ; nyɛ Mawu Mavɔmavɔ, Mawu yětɔn ná hwlɛ́n yě gán. Un ka ba gǎ abǐ hwǐ ǎ; un ba ná fun ahwan ǎ, un ba ahwan-yisɔ́sú ǎ, un ka ba sɔ́xátɔ́ cóbó ná hwlɛ́n yě gán ǎ.”

⁸ Ée Gomɛ́ɛ ɖe anɔ̌ nú Lo-Hluxáma ɔ́, tínmɛ tɔn wɛ nyí mɛ e è ma yí wǎn ná ǎ é, é lɛ́ mɔ xo bó ji vǐ súnnu ɖokpó.

⁹ Bɔ Mawu Mavɔmavɔ ɖɔ nú Ozée ɖɔ: “Sun nyǐ vǐ ɔ́ ɖɔ Lo-Ami, tínmɛ tɔn wɛ nyí mɛ e ma nyí togun ce ǎ é, ɖó mi sɔ́ nyí togun ce ǎ, nyɛ ka sɔ́ nyí Mawu mitɔn ǎ.”