Nǔnywɛ́xó 9 - MAWUXÓWÉMA

¹ Nǔnywɛ́ kpa dotín tɛ́nwe, bó dó bló xɔ tɔn.

² É hu kanlin, é ɖa vɛ̌ɛn, bó tɛ́ távo.

³ É sɛ́ mɛsɛntɔ́ tɔn nyɔ̌nu lɛ́ɛ dó, bónú yě ná yi xá fí e yi jǐ ganjí ɖo toxo ɔ́ mɛ lɛ́ɛ jí, bó ná sú xó, bó da mɛ lɛ́ɛ ɖɔ:

⁴ “Mi nǔmanywɛ́tɔ́ e mi, mi wá fí!” Yě nɔ́ ɖɔ nú xlonɔ lɛ́ɛ ɖɔ:

⁵ “Mi wá bó wá ɖu nǔ e un ɖa ɔ́, bó nu vɛ̌ɛn e un ɖa é!

⁶ Mi gosín gɔgɔnɔ lɛ́ɛ tɛ́ntin bó ná nɔ gbɛ! Mi wá ɖi zɔnlin gbɔn nukúnnú mɔ jɛ nǔ mɛ sín ali ɔ́ jí!”

Nǔnywɛ́tɔ́ kpó goyítɔ́ kpó

⁷ Mɛ e nɔ kɛ nu dó nǔ wú nú mɛ e nɔ yí go ɔ́, wǎn wɛ è nɔ gbɛ́ n'i. Mɛ e nɔ gbɛ́ nǔ nú mɛdídá ɔ́, xó wɛ é nɔ́ ba do kɔ.

⁸ Ma gbɛ́ nǔ nú mɛ e nɔ yí go ɔ́ ó; é táá wá gbɛ́ wǎn nú we. Lo ɔ́, gbɛ̌ nǔ nú mɛ e ɖó nǔnywɛ́ é; énɛ́ ɔ́, é ná yí wǎn nú we.

⁹ Đɔ xó nú nǔnywɛ́tɔ́, énɛ́ ɔ́, é ná lɛ́ nyɔ́ nǔ i d'é jí. Kplɔ́n nǔ mɛ e nɔ wa nǔ ɖó sɛ́nxwi jí é, bónú é ná lɛ́ tunwun nǔ d'é jí.

¹⁰ Sísí ɖó nú Mawu Mavɔmavɔ wɛ nyí fí e nǔnywɛ́ bɛ́ sín é; mɛ e tunwun Mawu mɛ mímɛ́ ɔ́, Mawu nɔ ná mɛ ɔ́ nukúnnú mɔ jɛ nǔ mɛ.

¹¹ Đó nyɛ nǔnywɛ́ ɔ́, nyi wɛ ná dó azǎn azǎn jí nú we, un ná dó xwe xwe jí nú we.

¹² A nyɔ̌ nǔ i ɔ́, a nǎ nyɔ́ nǔ i nú hwiɖée. A ka nɔ yí go ɔ́, hwi ɖokpónɔ wɛ ná mɔ nǔ e ɖo goyíyí mɛ é.

Xlo ylɔ́ mɛ e ma ɖó nǔnywɛ́ ǎ lɛ́ɛ

¹³ Xlojijɔ cí nyɔ̌nu tagbanɔ ɖɔhun, nyɔ̌nu yɛyinɔ ɖɔhun, nyɔ̌nu e má tunwun nǔɖé ǎ é ɖɔhun.

¹⁴ É nɔ́ jínjɔ́n zinkpo jí ɖo xwé tɔn sín alihɛ́nnu, ɖo fí e yi jǐ ganjí ɖo toxo ɔ́ mɛ é;

¹⁵ é nɔ́ nɔ fínɛ́ bó nɔ́ sú xó ylɔ́ mɛ e ɖo ali yětɔn jí tlélé bó ɖo yiyi wɛ lɛ́ɛ ɖɔ:

¹⁶ “Mɛ e ma ɖó nǔywɛ́ ǎ é ní wá fí!” É nɔ́ sú xó ylɔ́ xlonɔ lɛ́ɛ ɖɔ:

¹⁷ “Sin e è fin ɔ́ nɔ́ nyɔ́ nu tawun! Nǔ e è nɔ nɔ nǔglɔ́ bó nɔ ɖu ɔ́ nɔ víví tawun!”

¹⁸ Lo ɔ́, mɛ énɛ́ lɛ́ɛ tunwun ɖɔ kú wɛ ɖo fínɛ́ ǎ; yě tunwun ɖɔ mɛ e xlojijɔ ylɔ́ lɛ́ɛ ɔ́, kútomɛ wɛ yě kó ɖe ǎ.