Nǔnywɛ́xó 8 - MAWUXÓWÉMA

¹ Nǔnywɛ́ ɖo xó sú ylɔ́ we wɛ, nukúnnú mɔ jɛ nǔ mɛ zé gbe dó jǐ bó ɖo xó ɖɔ wɛ; mi se ǎ cé?

² Nǔnywɛ́ ɖo te só e ɖo alitó alitó lɛ́ɛ jí, é ɖo alikpléhɔ̌ntɛn lɛ́ɛ.

³ É ɖo hɔntogbó jí, fí e è nɔ gbɔn byɔ́ toxo ɔ́ mɛ é, é ɖo xó sú wɛ ɖɔ:

⁴ “Gbɛtɔ́ lɛ́ɛ e mi, mi sú xó ylɔ́ wɛ un ɖe! Xó e ɖɔ wɛ un ɖe ɔ́, mɛ bǐ ɖɔ ná wɛ un ɖe.

⁵ Gɔgɔnɔ e mi, mi kplɔ́n tamɛlinkpɔ́n! Xlonɔ e mi, mi kplɔ́n nukúnnú mɔ jɛ nǔ mɛ!

⁶ Mi ɖótó, ɖó un ɖó xó jɔ xó bó ná ɖɔ; un ná kɛ nu bó ná ɖɔ xomɛ nú mi.

⁷ Xó nǔgbó wɛ nɔ tɔ́n sín nu ce mɛ; nu ce gbɛ́ wǎn nú adingban ɖíɖó.

⁸ Xó e nɔ tɔ́n sín nu ce mɛ lɛ́ɛ bǐ wɛ sɔgbe, adingbanxó ɖě ɖ'é mɛ ǎ, mɛblɛ́blɛ́ xó ɖě ká ɖ'é mɛ ǎ.

⁹ Xó ce bǐ wɛ ɖo wɛn nú mɛ e nɔ mɔ nukúnnú jɛ nǔ mɛ lɛ́ɛ, yě sɔgbe nú mɛ e mɔ nǔ jɛ nǔ mɛ lɛ́ɛ.

¹⁰ Nǔ e un kplɔ́n mi lɛ́ɛ ní myá nukún nú mi, kpatágan ní má myá nukún nú mi ó; nǔtunwuntunwun ní myá nukún nú mi, siká akú ní má myá nukún nú mi ó.

¹¹ Đó nyɛ nǔnywɛ́ ɔ́, un xɔ akwɛ́ hú jɛ̌nana, un xɔ akwɛ́ hú nǔ e nɔ́ jló mɛ lɛ́ɛ bǐ sín kplékplé.”

Nǔnywɛ́ sɔ́ éɖée xlɛ́

¹² “Nyɛ nǔnywɛ́ ɔ́, un ɖo kpɔ́ xá tamɛlinkpɔ́n; un nɔ lin tamɛ kpɔ́n cóbó nɔ́ wa nǔ.

¹³ Sísí ɖó nú Mawu Mavɔmavɔ wɛ nyí wǎn gbɛ́ nú nǔ nyanya; un gbɛ́ wǎn nú jimakplɔ́ngbedídó, un gbɛ́ wǎn nú goyíyí, un gbɛ́ wǎn nú alǎnnúwiwa, un gbɛ́ wǎn nú adingban ɖíɖó.

¹⁴ Azɔ̌ e nyí ce ɔ́ wɛ nyí nǔ kplɔ́n mɛ bónú è lɛ̌n nǔ dó nukɔn mɛ. Nyɛ wɛ nyí nukúnnú mɔ jɛ nǔ mɛ; nyɛ wɛ nɔ ná hlɔ̌nhlɔ́n mɛ.

¹⁵ Nyi wɛ nyí tɔn axɔ́sú lɛ́ɛ nɔ ɖu axɔ́sú; nyi wɛ nyí tɔn nukɔntɔ́ lɛ́ɛ nɔ zɔ́n nǔ e sɔgbe é.

¹⁶ Nyi wɛ nyí tɔn gǎn lɛ́ɛ nɔ́ kpa acɛ; nyi wɛ nyí tɔn gbɛtɔ́ nukúnɖéjí lɛ́ɛ kpó hwɛɖɔtɔ́ e ɖo ayǐkúngban jí lɛ́ɛ bǐ kpó nɔ́ kpa acɛ.

¹⁷ Nyɛ ɔ́, un yí wǎn nú mɛ e yí wǎn nú mì lɛ́ɛ; mɛ e ɖo biba mì wɛ lɛ́ɛ nɔ mɔ mì.

¹⁸ Nyi wɛ nɔ ná dɔkun kpó susu kpó mɛ, nyi wɛ nɔ ná nǔ ɖagbe e nɔ nɔ ayǐ lɛ́ɛ kpódó nukɔn yiyi kpó mɛ.

¹⁹ Đagbe e un nɔ wa nú mɛ ɔ́ nyɔ́ hú siká, é nyɔ́ hú siká akú; nǔ e un nɔ ná mɛ ɔ́ nyɔ́ hú kpatágan akú.

²⁰ Hwɛjijɔ sín ali wɛ un nɔ gbɔn, un nɔ ɖi zɔnlin gbɔn nǔ jlɔ́jlɔ́ sín ali jí;

²¹ un nɔ bló mɔ̌ dó wa ɖagbe nú mɛ e yí wǎn nú mì lɛ́ɛ, un nɔ dó dɔkun nú yě bɔ xwé yětɔn nɔ gɔ́.

²² Nyi wɛ Mawu Mavɔmavɔ ɖó jɛ nukɔn nú nǔ e é bló lɛ́ɛ bǐ; é kó ɖó mì cóbó wá jɛ nǔ e é kó bló sín dodó donu lɛ́ɛ bló jí.

²³ É ɖó mì sín do, é ɖó mì sín bǐbɛ́mɛ, é ɖó mì có ayǐkúngban ɔ́ wá tíin.

²⁴ Hwenu e è ji mì ɔ́, xu ɖě kó tíin ǎ, tɔjɔtɛn ɖě tíin bɔ sin nɔ tɔ́n sín mɛ ǎ.

²⁵ Cóbónú só lɛ́ɛ ná tíin, bɔ kpó lɛ́ɛ ná wá tíin ɔ́, un ko tíin.

²⁶ Mawu kó bló ayǐkúngban ɔ́ hwenɛ́nu ǎ, é kó bló gle lɛ́ɛ ǎ; è ko bló ayǐkúngban ɔ́ sín kɛ́n kwín ɖokpó vɔ́vɔ́ ǎ.

²⁷ Hwenu e é ɖo jǐnukúnsin sɔ́ ɖ'ayǐ wɛ ɔ́, un ɖo fínɛ́; hwenu e é ɖo fí e jǐnukúnsin kpó ayǐkúngban kpó kplé ɖe é bló ɖó xu nukún mɛ wɛ ɔ́, un ɖo fínɛ́;

²⁸ hwenu e é ɖo akpɔ́kpɔ́ lɛ́ɛ kplé ɖó jǐ wɛ ɔ́, un ɖo fínɛ́; hwenu e é ɖo sin ɖe tɔ́n sín tɔjɔtɛn e ɖo xu glɔ́ lɛ́ɛ wɛ kpó hlɔ̌nhlɔ́n kpó ɔ́, un ɖo fínɛ́;

²⁹ hwenu e é ɖó dogbó é wú xu ma na zɛ ǎ é ɔ́, un ɖo fínɛ́; hwenu e é bló ayǐkúngban sín dodó lɛ́ɛ ɔ́, un ɖo fínɛ́.

³⁰ Un ɖo azɔ̌ wú ɖo akpá tɔn hwebǐnu azɔ̌gán ɖɔhun, bɔ ayǐhɔ́ngbe ayǐhɔ́ngbe ɔ́, un nɔ dó xomɛhunhun n'i; un nɔ ɖo ayihún da wɛ ɖo gɔ̌n tɔn hwebǐnu.

³¹ Un nɔ ɖo ayihún da wɛ ɖo ayǐkúngban e é bló ɔ́ jí, un nɔ ɖo gbɛ ɖu wɛ ɖo gbɛtɔ́ lɛ́ɛ tɛ́ntin.”

Nǔ nyɔ́ nú mɛ e nɔ ɖótó nǔnywɛ́ é

³² “Din ɔ́, vǐ ce lɛ́ɛ mi, mi ɖótó mì. Nǔ nyɔ́ nú mɛ e nɔ́ bló nǔ e un ɖɔ nú yě lɛ́ɛ é.

³³ Mi ɖótó nǔ e un kplɔ́n mi lɛ́ɛ; énɛ́ ɔ́, mi ná nyɔ́ nǔ i; mi ma dó vɛ̌ nú kplɔ́n ce lɛ́ɛ ó.

³⁴ Nǔ ná nyɔ́ nú mɛ e nɔ ɖótó mì lɛ́ɛ é, mɛ e nɔ wá dɔ́ wunzɛn ɖo hɔn ce ta ayǐhɔ́ngbe ayǐhɔ́ngbe lɛ́ɛ é, mɛ e nɔ wá cí hɔntogbó ce jí lɛ́ɛ é.

³⁵ Đó mɛ e mɔ mì ɔ́ mɔ gbɛ, Mawu Mavɔmavɔ nɔ yí gbe nú xó tɔn.

³⁶ Mɛ e ma se tónú nú mì ǎ ɔ́, éɖée nú wɛ é wa; mɛ e gbɛ́ wǎn nú mì ɔ́, kú wɛ é yí wǎn ná.”