Nǔnywɛ́xó 4 - MAWUXÓWÉMA

¹ Vǐ ce lɛ́ɛ mi, mi ɖótó nǔ e kplɔ́n mi wɛ tɔ́ mitɔn ɖe é. Mi ɖótó te ganjí bó ná dó mɔ nukúnnú jɛ nǔ mɛ,

² ɖó nǔ ɖagbe kplɔ́n mi wɛ un ɖe. Mi ma hɔn xó ce lɛ́ɛ nyi gbě ó.

³ Hwenu e un ɖo vǔ ɔ́, nɔ ce yí wǎn nú mì ɖésú vǐ ɖokpónɔ ɖɔhun; tɔ́ ce nɔ́ ɖo nǔ kplɔ́n mì wɛ;

⁴ é nɔ́ ɖɔ: “Hɛn xó ce lɛ́ɛ ayi mɛ, xwedó nǔ e un ɖɔ nú we lɛ́ɛ; énɛ́ ɔ́, a nǎ nɔ gbɛ.

⁵ Yǐ nǔnywɛ́, ɖǒ nukúnnú mɔ jɛ nǔ mɛ. Ma wɔn xó e ɖɔ nú we wɛ un ɖe lɛ́ɛ ó. Ma dó vɛ̌ nú xó e nɔ́ gosín nu ce mɛ lɛ́ɛ ó.

⁶ Ma jó nǔnywɛ́ dó ó, é ná hɛn we; yí wǎn nú nǔnywɛ́, é ná nya xɛ ɖo jǐ we.

⁷ Fí e nǔnywɛ́ bɛ́ sín ɔ́ ɖíe: Nɔ yí nǔnywɛ́, bɛ̌ nǔ e ɖo así towe lɛ́ɛ bǐ jó dó yí nukúnnú mɔ jɛ nǔ mɛ.

⁸ Sɔ́ nǔnywɛ́ ɖó tɛn ɖaxó mɛ; énɛ́ ɔ́, é ná sɔ́ we d'aga. A kplá así kɔ n'i ɔ́, é ná wlí yɛ̌yi nú we.

⁹ É ná sɔ́ jɛ̌gbákún ɖo ta nú we; é ná sɔ́ axɔ́súwuntun ɖó ta nú we.”

Hɔn nú mɛdídá lɛ́ɛ sín ali

¹⁰ Vǐ ce, ɖǒtó mì, se xó ce lɛ́ɛ; énɛ́ ɔ́, xwe ná jɛ xwe jí nú we.

¹¹ Un xlɛ́ nǔnywɛ́ sín ali we, un kplá we ɖó nǔjlɔ́jlɔ́wiwa sín ali jí.

¹² A ɖo yiyi wɛ ɔ́, a nǎ klɛ́n afɔ ǎ; a ɖo wezun jí ɔ́, a nǎ nyi afɔ dǎmɛ ǎ.

¹³ Hɛn nǔ e a kplɔ́n é, ma jó dó ó; hɛn dó wǔ syɛ́nsyɛ́n, ɖó é wɛ nyí gbɛ towe.

¹⁴ Ma sɔ́ mɛdídá lɛ́ɛ sín ali ó; ma gbɔn mɛ nyanya lɛ́ɛ sín ali jí ó.

¹⁵ Ma lɔn bo sɔ́ ali énɛ́ gbeɖé ó, gbɔn zɔ ná.

¹⁶ Mɛ énɛ́ lɛ́ɛ má dó nǔ nyanya sin ǎ ɔ́, yě nɔ́ dɔ́ amlɔ ǎ. Gbɛtɔ́ má jɛ ayǐ dó alɔ yětɔn kɔ ǎ ɔ́, adɔ̌ wɛ nɔ vɛ́ yě.

¹⁷ Adǎka e yě nɔ́ xo ɔ́ wɛ nyí nǔɖuɖu yětɔn; alǎnnú e yě nɔ́ wa ɔ́ wɛ nyí vɛ̌ɛn bɔ yě nɔ́ nu.

¹⁸ Mɛ e nɔ wa nǔ jlɔ́jlɔ́ lɛ́ɛ sín ali cí wěziza zǎnzǎn tɔn ɖɔhun; é nɔ́ ɖo hǐnhɔ́n wɛ, é nɔ́ ɖo hǐnhɔ́n wɛ káká bó nɔ́ wá hɔ́n bǐ, bó nɔ́ cí wěziza hwemɛ tɔn ɖɔhun.

¹⁹ Mɛdídá lɛ́ɛ sín ali ka cí ablu ɖɔhun; yě nɔ́ tunwun nǔ e ɖo yě ná zindɛ́ wɛ é ǎ.

Nɔ mlɛ́ ali e ɖó gǎnjɛwú é

²⁰ Vǐ ce, ɖǒtó xó ce; xó e ɖɔ wɛ un ɖe lɛ́ɛ ɔ́, ɖǒtó te ganjí bó se.

²¹ Ma nú xó énɛ́ lɛ́ɛ nɔ zɔ nú we ó, hɛn yě dó ayi towe mɛ syɛ́nsyɛ́n,

²² ɖó xó énɛ́ lɛ́ɛ wɛ nɔ ná gbɛ mɛ e nɔ yí yě lɛ́ɛ, bó nɔ́ hɛn lanmɛ yětɔn ɖó ganjí.

²³ Hɛn ayi towe hú nǔ bǐ, ɖó fí e gbɛ towe sín azinkan ɖe ɔ́ nɛ́.

²⁴ Ma dó nu adingbanxó mɛ ó, ma nɔ ɖɔ mɛ nǔ ó;

²⁵ a ɖo gbɛtɔ́ ná kpɔ́n wɛ hǔn, nɔ kpɔ́n nukún tɔn mɛ tlɔlɔ, nɔ́ kpan nukɔn mɛ ɔ́ ganjí bó nɔ́ kpɔ́n ɛ.

²⁶ Cóbónú a nǎ sɔ́ ali ɖé hǔn, nɔ lin tamɛ kpɔ́n ganjí; ali e ɖó gǎnjɛwú é wɛ a nǎ mlɛ́.

²⁷ Ma zɛ dó aɖisí ó, ma ka zɛ dó amyɔ ó. Nɔ zɔ nú nǔ nyanya.