Nǔnywɛ́xó 31 - MAWUXÓWÉMA

¹ Nǔnywɛ́xó e axɔ́sú Masa tɔn Lemuwɛ́li sín nɔ ɖɔ dó kplɔ́n nǔ i lɛ́ɛ ɖíe:

² “Vǐ ce, xó tɛ́ un ka ná ɖɔ nú we din? Aɖiví ce, étɛ́ un ka ná kplɔ́n we? Hwi mɛ e un byɔ́ Mawu bó ji é, xó tɛ́ un ná ɖɔ nú we!

³ Ma zán hlɔ̌nhlɔ́n towe dó nyɔ̌nu wú ó; nyɔ̌nu e nɔ́ bú axɔ́sú lɛ́ɛ ɔ́, ma jó hwiɖée dó nú yě ó.

⁴ Lemuwɛ́li, axɔ́sú lɛ́ɛ ɖó ná nu vɛ̌ɛn ǎ. Gǎn e ɖo to nu ɔ́ ɖó ná nu ahan syɛ́nsyɛ́n ǎ.

⁵ Yě ɖo ahan nu wɛ ɔ́, yě táá wá wɔn gbeta e è ɖe tɔ́n lɛ́ɛ, bó ná gba lelenɔ lɛ́ɛ sín acɛ.

⁶ Mi ná ahan syɛ́nsyɛ́n mɛ e ɖo kúkú wɛ é, bó ná vɛ̌ɛn mɛ e ɖo wǔvɛ́ mɔ wɛ ɖo ayi mɛ é,

⁷ ní nu, bó wɔn ya e ji wɛ é ɖe é, bó má sɔ́ flín wǔvɛ́ e mɔ wɛ é ɖe ɔ́ ɖě ó.

⁸ Mɛ e ma ɖó gbe ǎ lɛ́ɛ ɔ́, nɔ ɖɔ xó dó jɛ ahwan yě jí; mɛ e ma ɖó mɛɖé ǎ lɛ́ɛ ɔ́, nɔ nya xɛ ɖo yě jí.

⁹ Đɔ xó, xwedó sɛ́n dó ɖɔ hwɛ; jɛ ahwan lelenɔ kpó wamamɔnɔ kpó jí.”

Nyɔ̌nu jɔ nyɔ̌nu

¹⁰ Nǔ nyɔ́ nú mɛ e mɔ nyɔ̌nu jɔ nyɔ̌nu é. Nyɔ̌nu jɔ nyɔ̌nu xɔ akwɛ́ hú jɛ̌ nana.

¹¹ Asú tɔn nɔ ɖeji dó wǔ tɔn; nǔɖé nɔ́ hwedó e ǎ.

¹² Ayǐ hɔ́n tɛgbɛ ɔ́, ɖagbe wa nú asú tɔn wɛ jɛ́n é nɔ́ ɖe; é nɔ́ wa nyanya n'i ǎ.

¹³ É nɔ́ yi ba gbɔ̌fún kpó lɛ̌ɛnkan kpó, bó nɔ́ zé dó lɔn avɔ; alɔ tɔn nu nɔ nɔ vɔ̌ gbeɖé ǎ.

¹⁴ Tɔjíhún e nɔ́ bɛ́ agban sín zɔ é ɖɔhun wɛ é ɖe; é nɔ́ yi ba nǔɖuɖu sín zɔ.

¹⁵ É nɔ́ fɔ́n zǎn bó nɔ́ ɖa nǔ e mɛ tɔn lɛ́ɛ ná ɖu é; é nɔ́ ná azɔ̌ nyɔ̌nu mɛsɛntɔ́ tɔn lɛ́ɛ.

¹⁶ É mɔ ayǐkúngban ɖé bónú é jló e ɔ́, é nɔ́ ɖe wě d'é wú, bó nɔ́ xɔ; é nɔ́ sɔ́ akwɛ́ tɔn dó tun vǐwuntín ɖ'é jí.

¹⁷ É nɔ́ ván kan dó azɔ̌ wǔ; é nɔ́ blá alɔ dó wǔ ǎ.

¹⁸ É nɔ́ mɔ ɖɔ azɔ̌ émítɔn ɖo nukɔn yi wɛ; zǎn xóxó mɛ ɔ́, zogbɛ́n tɔn nɔ kpo ɖo te.

¹⁹ É nɔ́ sɛ́ kɛkɛ́ dó gbɛ avɔkan, lobo nɔ lɔn avɔ.

²⁰ É nɔ́ hun alɔ bó nɔ́ ná nǔ lelenɔ lɛ́ɛ; é nɔ́ hɛn sɔ wamamɔnɔ lɛ́ɛ.

²¹ É su avuvɔ hwenu ɔ́, é nɔ́ lin nǔ ǎ, ɖó awu we we wɛ mɛ e ɖo xwé tɔn gbe lɛ́ɛ ɖokpó ɖokpó ɖó.

²² É nɔ́ lɔn jɔhɔnmɛvɔ tlitli; é ɖó awu e è zě kanvɔ mímɛ́, kanvɔ vɔvɔ cɛ́cɛ́ dó tɔ ná lɛ́ɛ.

²³ Asú tɔn ɔ́, gbɛtɔ́ nukúnɖéjí wɛ; è nɔ ɖó sísí n'i; é nɔ́ yi tomɛxó lɛ́ɛ sín kplé.

²⁴ Nyɔ̌nu jɔ nyɔ̌nu nɔ́ lɔn awu bó nɔ́ sa; é nɔ́ lɔn aɖɔkɛn bó nɔ́ sa xá axisinɔ lɛ́ɛ.

²⁵ Hlɔ̌nhlɔ́n kpódó susu kpó nyí acɔ́ɖónú tɔn; é flín sɔ e ja ɔ́, é nɔ́ ɖeji.

²⁶ É ɖɔ xó ɔ́, nǔnywɛ́xó wɛ nɔ́ tɔ́n sín nu tɔn mɛ; é nɔ́ kplɔ́n nǔ mɛ kpó xomɛ ɖagbe kpó.

²⁷ É nɔ́ kpé nukún dó nǔ e ɖo jijɛ ɖo xwé tɔn gbe wɛ é bǐ wú; azɔ̌ wa wɛ jɛ́n é nɔ́ ɖe.

²⁸ Vǐ tɔn lɛ́ɛ nɔ́ kpa ɛ; asú tɔn nɔ́ mlá ɛ.

²⁹ Asú tɔn nɔ́ ɖɔ: “Nyɔ̌nu gěgé ɖó zǐnzán ɖagbe, amɔ̌, towe hú yě bǐ tɔn.”

³⁰ Nǔ e nyɔ́ kpɔ́n ɔ́, nɔ́ blɛ́ mɛ; ɖɛkpɛ nɔ wá cá. Nyɔ̌nu e ɖó sísí nú Mawu Mavɔmavɔ ɔ́, nyɔ̌nu e è ɖǒ ná sɔ́ su ɔ́ nɛ́.

³¹ Azɔ̌ e nyɔ̌nu mɔ̌hun nɔ́ wa ɔ́, è nǐ bó ná ɛ ajɔ tɔn; to ɔ́ bǐ ní kpa azɔ̌ tɔn.