Nǔnywɛ́xó 30 - MAWUXÓWÉMA

¹ Nǔnywɛ́xó élɔ́ lɛ́ɛ ɔ́, Agúu, Yakɛ ví ɔ́ wɛ ɖɔ. Ityɛ́li wɛ é ɖɔ xó élɔ́ lɛ́ɛ ná; Ityɛ́li kpódó Wukáli kpó wɛ é ɖɔ ná. É ɖɔ:

² “Nǔgbó wɛ, un gú hú mɛ bǐ. Un nɔ lin tamɛ gbɛtɔ́ ɖɔhun ǎ.

³ Un ɖó nǔnywɛ́ ǎ; un tunwun mɛ e nyí mɛ mímɛ́ é ǎ.

⁴ Mɛ̌ ká yi jǐxwé, bó wá kpɔ́n? Mɛ̌ ká myɔ́ alɔ dó jɔhɔn kpɔ́n? Mɛ̌ ká wún sin bó blá dó avɔ mɛ kpɔ́n? Mɛ̌ ká ɖó dogbó ayǐkúngban ɔ́ tɔn lɛ́ɛ? Nɛ̌ mɛ ɔ́ ká nyí? Nɛ̌ vǐ tɔn ká nyí? A tunwun hǔn, ɖɔ nú mì.

⁵ “Xó e Mawu ɖɔ lɛ́ɛ bǐ wɛ sɔgbe. Mawu nɔ́ cyɔ́n alɔ mɛ e nɔ gán jɛ wǔ tɔn lɛ́ɛ jí gǎglónú ɖɔhun.

⁶ Ma gɔ́ xó ɖé nú xó tɔn ó. É má nyí mɔ̌ ǎ ɔ́, é táá wá gbɛ́ nú we, bɔ è nǎ mɔ ɖɔ hwi nyí adingbannɔ.

⁷ “Mawu ce, un ɖo nǔ we byɔ́ we wɛ; ma gɔn yě ná mì cóbónú má kú ó.

⁸ Sɛ ahizi kpó adingban kpó dó zɔ nú mì; ma ná ya mì ó, ma ka ná dɔkun mì ó; nǎ nǔɖuɖu e un nǎ ɖu bó nɔ gbɛ é mì kpowun.

⁹ Ényí un ɖó nǔ dín ɔ́, un táá wá hu tɛ́ nú we bó ɖɔ: ‘Mawu Mavɔmavɔ tɛ́! Mɛ̌ wɛ nyí mɔ̌?’ Un ka ɖo ya mɛ ɔ́, un táá ja ajo, bó ná dó hɛ̌n hwi Mawu ce.

¹⁰ “Ma ɖɔ mɛsɛntɔ́ sín nǔ ɖo gǎn tɔn gɔ́n ó; é má nyí mɔ̌ ǎ ɔ́, é ná dó nu we, bɔ a nǎ mɔ wǔvɛ́ ɖó nǔ e a wa nyi do ɔ́ wú.

¹¹ “Mɛ ɖé lɛ́ɛ tíin, bó nɔ́ nylá nu dó tɔ́ yětɔn, bó nɔ́ ɖɔ nɔ yětɔn sín xó ɖagbe ǎ.

¹² “Mɛ ɖé lɛ́ɛ tíin, bó nɔ́ mɔ ɖɔ émí nyí mɛ mímɛ́, yě ká lɛ nǔ kwíji e ɖo wǔtu yětɔn lɛ́ɛ síin vɔ́vɔ́ ǎ.

¹³ “Mɛ ɖé lɛ́ɛ tíin, bó nɔ́ mɔ ɖɔ émí ɖokpó jɛ́n tíin, bó nɔ́ hu tɛ́ nú mɛ bǐ.

¹⁴ “Mɛ ɖé lɛ́ɛ tíin, bɔ aɖǔ yětɔn nyí hwǐ, aglanká yětɔn nyí jǐví; yě ná tlɛ́n lelenɔ lɛ́ɛ ɖu, yě ná ɖe yě sín ayǐkúngban ɔ́ jí, yě ná sú wamamɔnɔ lɛ́ɛ sín kún dó sín gbɛtɔ́ lɛ́ɛ mɛ.”

Nǔnywɛ́xó e mɛ nǔlínlɛ́n ɖe lɛ́ɛ

¹⁵ Asán ɖó vǐ nyɔ̌nu we; yě nɔ́ nyí: “Nǎ mì nǎ mì”. Nǔ atɔn tíin; nǔ ɛnɛ wɛ lɔ; yě nɔ́ ɖɔ é kpé émí gbeɖé ǎ:

¹⁶ kútomɛ ɖíe; nyɔ̌nu wɛnsinɔ ɖíe; ayǐkúngban e ɖo sin ba wɛ é ɖíe; myɔ ɖíe; myɔ nɔ ɖɔ é kpé émí gbeɖé ǎ.

¹⁷ Mɛ e nɔ ko tɔ́ tɔn ɔ́, mɛ e ma nɔ se tónú nú nɔ tɔn ǎ ɔ́, avǔnsákɔwó tɔdo mɛ tɔn lɛ́ɛ ná tɔ́n nukún i, bɔ gangan lɛ́ɛ ná vún lan tɔn ɖu.

¹⁸ Nǔ atɔn tíin bó hú gǎn mì; nǔ ɛnɛ wɛ lɔ:

¹⁹ un sixú dó mɔ̌ nú gangan gbɔn jɔhɔn mɛ ǎ, un sixú dó mɔ̌ nú dan gbɔn sókan mɛ ǎ, un sixú dó mɔ̌ nú tɔjíhún gbɔn xuzan mɛ ǎ, un sixú dó mɔ̌ nú súnnu e ɖo nyɔ̌nu gúdo é ǎ.

²⁰ Nyɔ̌nu e nɔ́ dó afɔ gbě ɔ́, lě e é nɔ́ wa nǔ gbɔn ɔ́ ɖíe: é nɔ́ ɖu nǔ bó nɔ́ súnsún nu, bó nɔ́ ɖɔ: “Un wa nǔ nyanya ɖé ǎ!”

²¹ Nǔ atɔn tíin bó nɔ́ húnhún ayǐkúngban ɔ́; nǔ ɛnɛ wɛ lɔ, bɔ ayǐkúngban ɔ́ sixú hɛn ǎ:

²² kannumɔ ná wá ɖu axɔ́sú, taɖunɔ ná ɖu nǔ, bɔ é ná kpé e kpo,

²³ nyɔ̌nu e mɛ bǐ sɔ́ wǎn ná ɔ́, ná mɔ asú, nyɔ̌nu mɛsɛntɔ́ ná yí gǎn tɔn sín tɛnmɛ.

²⁴ Kanlin ɛnɛ tíin ɖo ayǐkúngban ɔ́ jí; yě hwe ɖésú, yě ká ɖó nǔnywɛ́ bɔ é vɛ́ jlɛ́:

²⁵ Ayǐsínzɛn lɛ́ɛ, yě ɖó gǎn ǎ; é ká su nǔkún-yiya hwenu ɔ́, yě nɔ́ ba nǔ e yě ná ɖu ɔ́ ɖ'ayǐ.

²⁶ Agidigbǎnwún lɛ́ɛ, yě ɖó hlɔ̌nhlɔ́n ǎ; lo ɔ́, yě nɔ́ sá xwé nyi sóxo mɛ.

²⁷ Bɔkle lɛ́ɛ, axɔ́sú ɖě ɖo yě nu ǎ, yě ká nɔ to yěɖée lyɛ̌ngbe lyɛ̌ngbe bó nɔ́ ɖo yiyi wɛ.

²⁸ Alɔ̌tlɔ lɛ́ɛ, è hɛn ɔ́, è nǎ wlí yě kpó alɔ kpó; é ɖo mɔ̌ có yě nɔ́ yi axɔ́sú xwé gbe.

²⁹ Nǔɖíɖó e ɖó funfún lɛ́ɛ atɔn tíin, ɛnɛ wɛ lɔ, bɔ zɔnlin yětɔn nyɔ́ kpɔ́n, afɔɖiɖe yětɔn wlí yɛ̌yi:

³⁰ kinnikínní, é wɛ kpan akɔ́n hú lan lɛ́ɛ bǐ; é nɔ́ hɔn ɖo nǔɖé nukɔn ǎ;

³¹ koklósú, é ɖo yiyi wɛ ɔ́, é nɔ́ gó; gbǎgbá kpó, axɔ́sú e ɖo ahwangɔnu tɔn nukɔn, bó ɖo yiyi wɛ ɔ́ kpó.

³² Ényí a ko wa xlonɔnú bó kó yí nugo, abǐ a ɖǒ tito nyanya lɛ́ɛ hǔn, tunwun ɖɔ bɛ́ sín din ɔ́, émí ná nɔ abwɛ̌;

³³ ɖó è xo anɔ̌sin ɔ́, é nɔ́ húzú bɔ̌ta; è dó nǔ awɔntín jí ɔ́, kanjɔ nɔ tɔ́n; xomɛsin dó xomɛ nú mɛ wɛ nɔ dɔn jlɛ wá.