Nǔnywɛ́xó 3 - MAWUXÓWÉMA

¹ Vǐ ce, ma wɔn nǔ e un kplɔ́n we lɛ́ɛ ó; ayi towe ní nɔ nǔ e un ɖɔ hwi ní bló lɛ́ɛ jí.

² Đó yě wɛ ná dó azǎn azǎn jí nú we, bó dó xwe xwe jí nú we; yě ná zɔ́n bɔ nǔ ná nyɔ́ nú we.

³ Ma gɔn xomɛ nyɔ́ gbeɖé ó, ma gɔn gbejí nɔ gbeɖé ó; sin yě dó kɔ kɔjɛ́ ɖɔhun, wlǎn yě dó ayi towe mɛ.

⁴ Énɛ́ ɔ́, Mawu kpó gbɛtɔ́ lɛ́ɛ kpó ná yí wǎn nú we, bó ná mɔ ɖɔ hwi nɔ lin tamɛ kpɔ́n ganjí.

⁵ Đe ji dó Mawu Mavɔmavɔ wú kpó ayixa towe bǐ kpó. Ma gán jɛ nǔnywɛ́ hwi ɖésúnɔ tɔn wú ó.

⁶ Ba jlǒ Mawu Mavɔmavɔ tɔn ɖo nǔ e a nɔ wa lɛ́ɛ bǐ mɛ; énɛ́ ɔ́, é ná xlɛ́ ali we.

⁷ Ma nɔ mɔ hwiɖée dó mɔ nǔnywɛ́tɔ́ ó; lo ɔ́, nɔ ɖó sísí nú Mawu Mavɔmavɔ bó jó nǔ nyanya wiwa dó.

⁸ Énɛ́ wɛ ná nyí amasin nú agbaza towe, bó ná ná fífá xú e ɖo lan towe mɛ lɛ́ɛ.

⁹ Sɔ́ dɔkun towe lɛ́ɛ dó sɔ́ Mawu Mavɔmavɔ su, nǎ ɛ nǔkún nukɔn nukɔntɔn e nyɔ́ ɖo gle towe mɛ lɛ́ɛ.

¹⁰ Énɛ́ ɔ́, jinukún ná gɔ́ agɔ̌ towe lɛ́ɛ túnflá, bɔ vɛ̌ɛn ná gɔ́ vɛ̌ɛnhɛnnú towe túnflá.

¹¹ Vǐ ce, Mawu Mavɔmavɔ dɔn tó nú we hǔn, ma hu tɛ́ ná ó; é gbɛ́ nǔɖé nú we hǔn, ma nú é kpé agbɔ̌n nú we ó.

¹² Đó Mawu Mavɔmavɔ nɔ gbɛ́ nǔ nú mɛ e é yí wǎn ná é, lě e tɔ́ nɔ́ gbɛ́ nǔ nú vǐ e é yí wǎn ná é.

Nǔnywɛ́ kpó nyɔ̌ná kpó

¹³ Nǔ nyɔ́ nú mɛ e húzú nǔnywɛ́tɔ́ é! Nǔ nyɔ́ nú mɛ e ɖó tamɛbibɔ é!

¹⁴ Nǔnywɛ́ ɖíɖó nyɔ́ hú akwɛ́ ɖíɖó; le e nɔ tɔ́n sín nǔnywɛ́ mɛ é xɔ akwɛ́ hú siká.

¹⁵ Nǔnywɛ́ xɔ akwɛ́ hú jɛ̌. È xo nǔ e nɔ́ jló we lɛ́ɛ bǐ kplé ɔ́, yě xɔ akwɛ́ sɔ nǔnywɛ́ ǎ.

¹⁶ Jidɔ́ ɖo alɔ tɔn ɖokpó mɛ, bɔ dɔkun kpó susu kpó ɖo alɔ tɔn wegɔ́ mɛ.

¹⁷ Ali e nǔnywɛ́ nɔ́ kplá mɛ gbɔn lɛ́ɛ bǐ wɛ nyí ali ɖagbe. Ali tɔn lɛ́ɛ bǐ wɛ nɔ́ ná fífá mɛ.

¹⁸ Nǔnywɛ́ ɔ́, atín e nɔ́ ná gbɛ mɛ é wɛ é nyí nú mɛ e ɖó lɛ́ɛ; nǔ nɔ́ nyɔ́ nú mɛ e nɔ hɛn nǔnywɛ́ majómájó lɛ́ɛ.

¹⁹ Nǔnywɛ́ wɛ Mawu Mavɔmavɔ dó ɖó ayǐkúngban ɔ́ ná, bó sɔ́ nukúnnú mɔ jɛ nǔ wú tɔn dó ɖó jǐnukúnsin ɔ́ ná.

²⁰ Mawu Mavɔmavɔ ɔ́, do mɔ nú nǔ tɔn wɛ é zán bɔ sin e ɖo domaɖó-azan mɛ ɔ́ gba wu kɔn nyi ayǐkúngban ɔ́ jí bɔ akpɔ́kpɔ́ húzú jǐ.

Mawu nɔ cyɔ́n alɔ nǔnywɛ́tɔ́ jí

²¹ Vǐ ce, ma nú ayi ɖo te kpó tamɛ lin cóbó wa nǔ kpó nɔ zɔ nú we ó; hɛn yě.

²² Yě wɛ ná nyí gbɛ towe, bó nyí acɔ́nú nú kɔ towe.

²³ Énɛ́ ɔ́, a ɖo ali towe jí bó ɖo yiyi wɛ ɔ́, a nǎ ɖeji, a nǎ klɛ́n afɔ ǎ.

²⁴ A xwe xɔ ɔ́, a nǎ ɖi xɛsi ǎ, amlɔ towe ná víví.

²⁵ Ma ɖi xɛsi nú adǎn e nɔ́ wá gbo mɛ ajijimɛ ɔ́ ó; ma ɖi xɛsi ɖɔ mɛdídá ná wá tɔ́n ahwan émí ó.

²⁶ Đó Mawu Mavɔmavɔ wɛ ná nyí gǎnjɛwú towe; é ná lɔn bónú afɔ towe ná tɛ mɔ ɖé mɛ ǎ.

Wǎn yí nú nɔzo

²⁷ Ényí nǔɖé hu dó mɛ ɖé, bɔ a ɖǒ hlɔ̌nhlɔ́n tɔn bó ná bló n'i hǔn, ma gbɛ́ ó.

²⁸ Nǔ e ba wɛ nɔzo towe ɖe ɔ́ ɖo así towe bɔ a hɛn ɔ́ a nǎ ná ɛ azɔn ɖokpó hǔn, ma ɖó sɔ n'i ó.

²⁹ Nɔzo towe e kpó hwi kpó ɖo kpɔ́ bɔ é ɖeji dó wǔ towe ɔ́, ma lin nyanya tɔn ó.

³⁰ Mɛ e ma wa nǔɖé nú we ǎ ɔ́, ma ba jlɛ ɛ ó.

³¹ Ma nú dǎkaxotɔ́ sín gbɛ jló we ó; ma kpɔ́n dó walɔ tɔn lɛ́ɛ wú dó wa nǔ ɖěbǔ ó.

³² Đó Mawu Mavɔmavɔ gbɛ́ wǎn nú mɛdídá lɛ́ɛ, bó ká nɔ́ zun xɔ́ntɔn xá mɛ e nɔ wa nǔ jlɔ́jlɔ́ lɛ́ɛ.

³³ Nu wɛ Mawu Mavɔmavɔ nɔ dó mɛdídá lɛ́ɛ sín xwédo, bó ká nɔ xo ɖɛ dó mɛ e nɔ wa nǔ jlɔ́jlɔ́ lɛ́ɛ sín xwédo jí.

³⁴ Mawu Mavɔmavɔ nɔ ko mɛcákotɔ́ lɛ́ɛ, bó ká nɔ ná fɛ́nú mɛ e nɔ sɔ́ yěɖée hwe lɛ́ɛ.

³⁵ Mɛ e ɖó mɛxóyixa lɛ́ɛ ɔ́, Mawu Mavɔmavɔ ná sɔ́ yě su; amɔ̌, xlonɔ lɛ́ɛ ɔ́, winnyá wɛ ɖo te kpɔ́n yě.