Nǔnywɛ́xó 29 - MAWUXÓWÉMA

¹ Mɛ e è gbɛ́ nǔ ná ɔ́, é nɔ́ ɖo ta syɛ́n wɛ é ɔ́, è nǎ gblé gbɛ dó n'i ɖo nukún xwixwe ɖokpó mɛ, bɔ ɖě wa gbɔn ná hán.

² Hwɛjijɔnɔ kpa acɛ ɖo to mɛ ɔ́, toví lɛ́ɛ nɔ́ j'awǎ; é ká nyí mɛdídá wɛ ɖo tonu ɔ́, toví lɛ́ɛ nɔ́ sa vo.

³ Mɛ e yí wǎn nú nǔnywɛ́ ɔ́ nɔ́ dó xomɛhunhun nú tɔ́ tɔn. Mɛ e ka nɔ dó agalɛtɔ́ gbɛ́ ɔ́, nǔ tɔn bǐ wɛ é nɔ́ hɛn fúnfún.

⁴ Axɔ́sú e nɔ́ xwedó sɛ́n dó hɛn to ɔ́, to tɔn nɔ yi nukɔn; axɔ́sú e ká nɔ́ ɖo nǔjɔ yí dó nǔjɔ jí wɛ ɖo toví lɛ́ɛ sí ɔ́ ká nɔ́ zin to ɔ́ dɛ́.

⁵ Mɛ e nɔ klɔ́ nɔzo tɔn ɔ́, mɔ wɛ é ɖó n'i.

⁶ Nǔ e dó sin wɛ mɛdídá nɔ́ ɖe ɔ́ wɛ nyí mɔ bɔ é nɔ́ jɛ mɛ; lo ɔ́, hwɛjijɔnɔ lɛ́ɛ nɔ́ ɖo awǎjijɛ mɛ, bó nɔ́ ɖo we ɖú wɛ.

⁷ Hwɛjijɔnɔ tunwun acɛ e nyí wamamɔnɔ tɔn é; énɛ́ ká myá nukún nú mɛdídá ǎ.

⁸ Todɔnfúnlɛ̌ntɔ́ lɛ́ɛ nɔ́ flɔ́ zo dó to mɛ; nǔnywɛ́tɔ́ lɛ́ɛ ká nɔ́ xo zo cí.

⁹ Nú nǔnywɛ́tɔ́ kpó xlonɔ kpó yi hwɛgun ɔ́, nǔnywɛ́tɔ́ ɔ́ sin xomɛ oo, é ko nǔ oo, xlonɔ ɖo agbɔ̌n na ná ɛ wɛ gbeɖé ǎ.

¹⁰ Mɛ e nɔ kɔn kanjɔ kɔn nyi ayǐ lɛ́ɛ nɔ́ gbɛ́ wǎn nú gbejínɔtɔ́; lo ɔ́, mɛ e nɔ wa nǔ ɖó sɛ́nxwi jí lɛ́ɛ nɔ́ nya xɛ ɖo gbejínɔtɔ́ jí.

¹¹ Xlonɔ sin xomɛ ɔ́, é nɔ́ ɖe xlɛ́ kpó zǐngídi kpó; mɛ e ɖó nǔnywɛ́ ɔ́ ká nɔ yi agbɔ̌n jí, bó nɔ́ ɖe xomɛsin tɔn xlɛ́ ǎ.

¹² Ényí mɛ e ɖo gǎn jí ɔ́ nɔ́ ɖótó adingbanxó ɔ́, mɛ e ɖo glɔ̌ tɔn lɛ́ɛ bǐ wɛ nɔ́ húzú mɛ nyanya.

¹³ Acɛgannaganna-kpanúmɛtɔ́ kpó gbɛ̌dónánɔ kpó ɔ́, nǔɖé tíin bɔ yě mɛ we lɛ́ɛ bǐ ɖǒ: Mawu Mavɔmavɔ ná nukún yě mɛ we lɛ́ɛ bǐ bɔ yě nɔ́ dó mɔ nǔ.

¹⁴ Axɔ́sú e nɔ́ nɔ xó jí dó gbo hwɛ nú wamamɔnɔ lɛ́ɛ ɔ́, axɔ́súɖuɖu tɔn ná jínjɔ́n ayǐ káká sɔ́yi.

¹⁵ Bǎ kpó nǔgbɛ́númɛ kpó nɔ́ wlí ayi dó xomɛ nú mɛ; amɔ̌, vǐ e è jǒ dó nyi gbawunjo mɛ ɔ́, winnyá wɛ é nɔ́ dó nɔ tɔn.

¹⁶ Mɛdídá sukpɔ́ ɔ́, nǔ dó sin nɔ kpé tókɔ awɔnkɔ; amɔ̌, hwɛjijɔnɔ lɛ́ɛ ná mɔ lě e yě ná jɛ ayǐ gbɔn é.

¹⁷ Kplɔ́n vǐ towe ganjí, énɛ́ ɔ́, ayi towe ná jɛ ayǐ dó wǔ tɔn; xomɛ ná hun we dó wǔ tɔn.

¹⁸ Mawu ma ɖo nǔ ɖe xlɛ́ to ɖé wɛ gbɔn nǔmimɔ mɛ ǎ ɔ́, toví lɛ́ɛ ɔ́, gbɛ hannyahannya wɛ yě nɔ́ zán. Nǔ nyɔ́ nú mɛ e nɔ nyi sɛ́n é.

¹⁹ È nɔ sɔ́ xó dó kplɔ́n mɛsɛntɔ́ ná ǎ, ɖó é ná bó mɔ nukúnnú jɛ nǔ e ɖɔ wɛ a ɖe ɔ́ mɛ ɔ́, é ná bló ǎ.

²⁰ Ényí a mɔ mɛ e ma nɔ lin tamɛ cóbó nɔ́ ɖɔ xó ǎ ɔ́ ɖo xó ɖɔ wɛ hǔn, tunwun ɖɔ è nǎ ɖó nukún nǔ ɖo mɛ e nyí xlonɔ ɔ́ gɔ́n hú éyɛ́ gɔ́n.

²¹ Mɛsɛntɔ́ e è hɛn vǐbóɖó tɔn sín vǔ ɔ́ sɔ́ nɔ́ sí mɛɖé ǎ.

²² Gbɛtɔ́ xomɛsinnɔ nɔ dɔn hun wá; mɛ e nɔ ɖo adǎn jí hwebǐnu ɔ́, é nɔ́ hu hwɛ gěgé.

²³ Mɛ e nɔ yí go ɔ́, goyíyí tɔn ná sɔ́ ɛ kɔn nyi ayǐ; mɛ e ka nɔ sɔ́ éɖée hwe ɔ́, è nǎ sɔ́ ɛ su.

²⁴ Mɛ e nɔ dó ajotɔ́ gbɛ́ ɔ́ yí wǎn nú éɖée ǎ; é tunwun nǔ e ɖo te kpɔ́n mɛ e mɔ do nú ajo bo má ká ɖɔ ǎ é, cóbó ká gbɛ́ ajotɔ́ ɖe gba.

²⁵ Mɛ e nɔ ɖi xɛsi nú gbɛtɔ́ ɔ́ dɔn éɖée dó kɔ́blúmánya mɛ; mɛ e ka nɔ gán jɛ Mawu Mavɔmavɔ wú ɔ́ nɔ́ vo.

²⁶ Mɛ gěgé nɔ ba wǔjɔmɛ ɖo gǎn yětɔn lɛ́ɛ gɔ́n; a ka ɖo hwɛjijɔ towe ba wɛ ɔ́ Mawu Mavɔmavɔ ɖokpónɔ gɔ́n wɛ a na mɔ ɖe.

²⁷ Hwɛjijɔnɔ ɔ́, é nɔ́ gbɛ́ wǎn nú nǔhízítɔ́; lo ɔ́, mɛdídá ɔ́, éyɛ́ ká nɔ́ gbɛ́ wǎn nú nǔ e wa wɛ nǔjlɔ́jlɔ́watɔ́ ɖe é.