Nǔnywɛ́xó 26 - MAWUXÓWÉMA

¹ É jɛ xá ɖɔ avuvɔ ní gbɛ́ akú mɛ ǎ; é jɛ xá ɖɔ jǐ ní ja jinukún sɔ́ hwenu ǎ; mɔ̌ ɖokpó ɔ́, é jɛ xá ɖɔ è nǐ kpa susu nú xlonɔ ǎ.

² Mɛ e nɔ yǎyá kpowun bó dó nu mɛ ɔ́, xó wɛ é ɖɔ dó jɔhɔn mɛ; nudómɛ énɛ́ cí xɛ ɖo jɔhɔn mɛ ɖɔhun; é cí azɔnxɛ e ɖo yiyi wɛ kpowun ɔ́ ɖɔhun.

³ Sɔ́ ɔ́, lanbá wɛ è nɔ dó xo; tócí ɔ́, gan wɛ è nɔ dó nu n'i; xlonɔ ɔ́, è ka nɔ ɖó kpo nú éyɛ́ dó nɛgbé.

⁴ Xlonɔ bɛ́ yɛyinɔ xó tɔn kpan ta we hǔn, ma ná ɛ sin yɛyinɔ ɖɔhun ó; a táá wá cí étɔn ɖɔhun.

⁵ Xlonɔ ɖɔ yɛyinɔ xó tɔn hǔn, gbɛ́ n'i lě e é jɛ xá gbɔn é; é má nyí mɔ̌ ǎ ɔ́, é táá wá mɔ éɖée dó mɔ nǔnywɛ́tɔ́.

⁶ Mɛ e sɛ́ xlonɔ dó wɛn dó gbé ɔ́, xlohwɛ wɛ élɔ́ zɛ; é cí mɛ e sɛ́n afɔ éɖée ɔ́ ɖɔhun; tagba ɖaxó wɛ é ba nyi ayǐ.

⁷ Xlonɔ ná dó lǒ dó ɖɔ xó ɔ́, xó tɔn ná vɔ́ da sékúnɔ sín afɔ ɖɔhun.

⁸ Susu kpa nú xlonɔ ɔ́, é cí awǐnnya blá dó klohwán mɛ ɖɔhun; nǔ yǎyá wɛ.

⁹ Xlonɔ ná dó lǒ dó ɖɔ xó ɔ́, wuntín e ahannumúnɔ sɔ́ dó jǐ é jɛ́n ná nyí.

¹⁰ Gǎn e mɔ xlonɔ ɖé, abǐ mɛ ɖé kpowun ɔ́, é nɔ yí dó azɔ̌ mɛ ɔ́, nǔ wɛ é nɔ wa dó to wú.

¹¹ Xlonɔ fɔ́n ɔ́ yɛyizɔ́ tɔn wa wɛ jɛ́n é nɔ́ ɖe; é cí cukú e nɔ́ vi bó nɔ́ lɛ́ bɛ́ ɖu ɔ́ ɖɔhun.

¹² Nú a mɔ mɛɖé bɔ é ɖésú kó mɔ ɖɔ émí nyɔ́ nǔ i hǔn, tunwun ɖɔ è nǎ ɖó nukún nǔ ɖo mɛ e nyí xlonɔ ɔ́ gɔ́n hú éyɛ́ gɔ́n.

Fɔnlínnɔ gbɛ

¹³ Fɔnlínnɔ nɔ́ ɖɔ: “Kinnikínní ɖo alixo, adǎnkanlin ɖo toxo ɔ́ mɛ.”

¹⁴ Lě e hɔn nɔ ɖo lǐlɛ́lílɛ́ wɛ ɖo hɔnsóswé jí ɔ́, mɔ̌ wɛ fɔnlínnɔ nɔ ɖo aja húzú wɛ ɖo zan tɔn jí.

¹⁵ Fɔnlínnɔ zé alɔ dó nǔɖuká mɛ ɔ́, alɔ ná sɔ́ yi nu ɔ́, azɔ̌ wɛ é nɔ́ lɛ́ nyí n'i.

¹⁶ Fɔnlínnɔ nɔ mɔ ɖɔ émí nyɔ́ nǔ i hú gbɛtɔ́ ayiɖotenánɔ tɛ́nwe.

Nǔnywɛ́xó ɖěvo lɛ́ɛ

¹⁷ Alitanu e kɛ nu dó jlɛ e ma kan ɛ ǎ é mɛ ɔ́, cí mɛ e ja cukú wlí gbé bó hɛn tó tɔn é ɖɔhun.

^18-19 Mɛ e nɔ táfú nɔzo tɔn, bó nɔ́ wá ɖɔ: “Ayihún da xá ɛ wɛ un ka ɖe sín” ɔ́, mɛ mɔ̌hun cí taɖunɔ e nɔ ɖo myɔtín nyi dó mɛ wɛ, gǎ da dó hu mɛ wɛ ɔ́ ɖɔhun.

²⁰ Nakí vɔ ɖo ado mɛ ɔ́, myɔ nɔ cí; mɔ̌ ɖokpó ɔ́, mɛnúɖɔtɔ́ má sɔ́ ɖo mɛ tɛ́ntin ǎ ɔ́ tagba nɔ xwɛ.

²¹ È kɔn akán dó myɔ mɛ ɔ́, myɔ nɔ wlí; è sɛ myɔ dó ɔ́, myɔ nɔ wlí; mɔ̌ ɖokpó ɔ́, gbɛtɔ́ tagbanɔ nɔ sɛ́ hun dó.

²² Mɛnúɖɔtɔ́ sín xó nɔ́ víví wǐin ɖɔhun; è nɔ nu, bɔ é nɔ́ kpé kan mɛ nú mɛ.

²³ Wǔ yá dó mɛ, bɔ vo ka ɖo mɛ xomɛ ɔ́, é cí kpatágan sínsín dó kozɛ́n wú ɖɔhun.

²⁴ Mɛ e gbɛ́ wǎn nú gbɛtɔ́ ɔ́ ɖo xó ɖɔ wɛ ɔ́, a nǎ ɖɔ é wɛ yí wǎn nú gbɛtɔ́ hú mɛ bǐ; vo wɛ ka ɖo xo tɔn mɛ.

²⁵ É ɖo xó ɖagbe ɖɔ wɛ hǔn, ma ɖi ó; ɖó ayixa nyanya mɔ̌kpán wɛ ɖo xo tɔn mɛ.

²⁶ Ayixa nyanya e ɖo xo tɔn mɛ dó gbɛtɔ́ wú ɔ́, é ná bó sɔ́ hwlá káká ɔ́, mɛ bǐ nɔ́ wá mɔ nǔ jɛ lě e é dá gbɔn é wú.

²⁷ Mɛ e kun do ɔ́, é ɖésúnɔ ná wá jɛ mɛ; mɛ e ɖó mɔ ɔ́, é ɖésúnɔ ná wá jɛ mɛ.

²⁸ Mɛ e nɔ ɖó adingban dó hɛn mɛ gblé ɔ́, wǎn wɛ é gbɛ́ nú mɛ; mɛ e nɔ klɔ́ mɛ ɔ́, mɛ wɛ é nɔ́ zín dó do.