Nǔnywɛ́xó 22 - MAWUXÓWÉMA

¹ È mlǎ nyǐkɔ ɖagbe mɛɖé ɔ́, é nyɔ́ hú mɛ ɔ́ jɛ dɔkun gbɔn tókɔ awɔnkɔ. Wǎn yí nú mɛ xɔ akwɛ́ hú kpatágan; é xɔ akwɛ́ hú siká.

² Dɔkunnɔ kpó wamamɔnɔ kpó kpé dó nǔ ɖokpó: Mawu Mavɔmavɔ e bló dɔkunnɔ ɔ́ jɛ́n bló wamamɔnɔ lɔ.

³ Gbɛtɔ́ e ayi tɔn ɖo te ɔ́ mɔ nǔ nyanya ja ɔ́, é nɔ́ hɔn bɛ; xlonɔ ka nɔ zɔn mɔ̌ bó nɔ́ yi zɔn mɛ.

⁴ Sɔ́ hwiɖée hwe, bó ɖó sísí nú Mawu Mavɔmavɔ; énɛ́ ɔ́, a nǎ jɛ dɔkun, a nǎ xɔ susu, a nǎ dɔ́ ji.

⁵ Mɛdídá ɔ́, wunkan kpó fɛ́ca kpó ɖo ali tɔn jí; mɛ e ma jló ná sɔ́ gbɛ éɖée tɔn nyi gbě ǎ ɔ́, é nɔ́ hɔn nú ali énɛ́.

⁶ Vǐ e ɖo kpɛví ɔ́, sɔ́ ɛ ɖó ali e jí é ɖó ná nɔ é; énɛ́ ɔ́, é ná bo kpo ɔ́, é ná ɖo ali ɔ́ jí.

⁷ Dɔkunnɔ nɔ kpa acɛ nú wamamɔnɔ lɛ́ɛ; axɔ́ɖutɔ́ ká nyí kannumɔ nú axɔ́tɔ́nɔ.

⁸ Nǔ e è dǒ é wɛ è nɔ ya: è dǒ ahizi ɔ́, è nǎ ya awě, bɔ acɛ gannaganna e kpa wɛ è ɖe ɔ́ nɔ́ vɔ.

⁹ Mɛ e nɔ sɔ́ nukún ɖagbe dó kpɔ́n mɛ ɔ́, Mawu ná dó n'i; ɖó é nɔ ná nǔɖuɖu tɔn ɖě wamamɔnɔ.

¹⁰ È nya goyítɔ́ ɔ́, è nɔ sú nǔ dó jlɛ; adɔndindɔn kpó mɛzunzun kpó nɔ́ yi xɔ.

¹¹ Mɛ e ayi tɔn ɖo wɛn, bɔ xó tɔn nɔ́ jɛ gan ɔ́, axɔ́sú nɔ́ zun xɔ́ntɔn xá ɛ.

¹² Mawu Mavɔmavɔ nɔ kpé nukún dó mɛ e tunwun nǔ ɔ́ wú; lo ɔ́, é nɔ́ ɖe mɛ baɖabaɖa lɛ́ɛ sín xó gba.

¹³ Fɔnlínnɔ nɔ ɖɔ: “Kinnikínní ɖo kɔ́xo; é táá wá wlí mì ɖu ɖo ali jí agbawungba.”

¹⁴ Xó e nɔ́ tɔ́n sín nyɔ̌nu banáwatɔ́ lɛ́ɛ nu mɛ ɔ́, do gɔngɔn wɛ; mɛ e Mawu Mavɔmavɔ sin xomɛ dó ɔ́ ná jɛ mɛ.

¹⁵ Yɔkpɔ́vú ɔ́, xlonɔnú wɛ é nɔ́ wa; bǎ wɛ ká nɔ́ wlí ayi dó xomɛ n'i.

¹⁶ Mɛ e nɔ táfú wamamɔnɔ dó jɛ dɔkun abǐ mɛ e nɔ ná nǔ dɔkunnɔ ɔ́, ya wɛ é nɔ́ wá ji.

Nǔkplɔ́nmɛ tɛnmɛ tɛnmɛ lɛ́ɛ

¹⁷ Đǒtó te bó se nǔnywɛ́tɔ́ lɛ́ɛ xó; sɔ́ ayi towe ɖó te, bó se nǔ e kplɔ́n we wɛ un ɖe é.

¹⁸ Đó é nyɔ́ bɔ a nǎ hɛn bǐ dó ayi mɛ, bó ná ɖo gbesisɔ mɛ bó ná ɖɔ hwebǐnu.

¹⁹ Un jló ɖɔ a nǐ sɔ́ jiɖiɖe towe bǐ ɖó Mawu Mavɔmavɔ jí; énɛ́ wú wɛ un jló ná kplɔ́n nǔ élɔ́ lɛ́ɛ we égbé. Un ba ɖɔ hwi lɔ ní tunwun.

²⁰ Nǔ tɛnmɛ tɛnmɛ gban (30) wɛ un wlán ɖ'ayǐ nú we: lě e a ɖǒ ná wa nǔ gbɔn lɛ́ɛ kpó nǔ e jí a nǎ lin tamɛ dó lɛ́ɛ kpó wɛ,

²¹ bɔ a nǎ dó tunwun xó e wú a nǎ gǎn jɛ é, xó e nyí xó jɔ xó ɔ́ é; énɛ́ ɔ́, mɛɖé sɛ́ we dó nǔgbó ɔ́ ba gbé ɔ́, a nǎ sixú mɔ, bó ɖɔ n'i, bɔ é ná gán jɛ wú.

²² Ma kpɔ́n ɖɔ wamamɔnɔ kún ɖó mɛɖé ó, bó blɛ́ ɛ ɖu, bó yí nǔ tɔn lɛ́ɛ ó. A yi hwɛgun hǔn, ma kpɔ́n ɖɔ mɛ ɖě ɔ́ kún ɖó mɛɖé ó, bó táfú i ó.

²³ Đó Mawu Mavɔmavɔ wɛ ná jɛ ahwan yě jí; mɛ e yí nǔ yětɔn lɛ́ɛ ɔ́, Mawu ná yí gbɛ yětɔn sín yě sí.

²⁴ Ma zun xɔ́ntɔn xá xomɛsinnɔ ó; ma dó mɛ e aɖi nɔ ɖo ɖǐɖó wɛ ɔ́ sín gbɛ̌ ó.

²⁵ É má nyí mɔ̌ ǎ ɔ́, a táá wá cí étɔn ɖɔhun, bó ná jɛ kú sín mɔ mɛ.

²⁶ Ma nú mɛ ɖé ja axɔ́ ɖu gbé bónú a nɔ te nú mɛ ɔ́, bó zin alɔ dó akɔ́n ɖɔ émí ná sú ó.

²⁷ A ma wá kpé wú bó sú axɔ́ ɔ́ ǎ ɔ́, adɔ̌zan towe wɛ è nǎ wá mlá sín glɔ̌ towe.

²⁸ Awǐnnya e tɔ́gbó towe lɛ́ɛ dó ɖó wuntun fí e ayǐkúngban mitɔn sín dogbó gbɔn lɛ́ɛ ɔ́, ma sɛ do nú yě ó.

²⁹ Kpɔ́n mɛ e nɔ wa azɔ̌ ganjí lɛ́ɛ; axɔ́sú lɛ́ɛ wɛ yě nɔ́ wa azɔ̌ ná; yě nɔ́ wa azɔ̌ nú gbɛtɔ́ kpaa ǎ.