Nǔnywɛ́xó 20 - MAWUXÓWÉMA

¹ Vɛ̌ɛn nɔ zɔ́n goyíyí mɛ; ahan syɛ́nsyɛ́n nɔ́ zɔ́n zǐngídiɖúɖú mɛ; mɛ e nɔ nu mú é ɖě ná ɖó nǔnywɛ́ gbeɖé ǎ.

² Axɔ́sú e ɖo xomɛsin jí é dó xɛsi kinnikínní e ɖo adǎn jí é ɖɔhun; mɛɖé dó xomɛsin xomɛ nú axɔ́sú hǔn, mɛ ɔ́ sɔ́ gbɛ éɖée tɔn dó da ayihún.

³ Mɛ e hɔn nú jlɛ ɔ́, wi wɛ é nyí bó ɖo ta n'i; xlonɔ ka nɔ jɛ kú d'é jí.

⁴ Fɔnlínnɔ nɔ́ sí avuvɔ bó nɔ́ gɔn gle lɛ, é ká su nǔkún-yiya hwenu ɔ́, é nɔ́ ba ná ya nǔkún; é ká nɔ́ mɔ nǔɖé ǎ.

⁵ Nǔ e lin dó ayi mɛ wɛ gbɛtɔ́ ɖe ɔ́ cí sin e ɖo ayǐkúngban glɔ́ é ɖɔhun; gbɛtɔ́ e ɖó nǔnywɛ́ ɔ́ nɔ́ mɔ ayi e é ná dó ɖe sin ɔ́ tɔ́n ná é.

⁶ Gbɛtɔ́ gěgé nɔ́ ɖo lě e yě nyɔ́ xomɛ gbɔn ɔ́ ɖó hǎ wɛ; è ka sixú mɔ gbɛtɔ́ e wú è nǎ ɖeji dó ɔ́ nǔgbó a?

⁷ Gbɛtɔ́ hwɛjijɔnɔ nɔ sɔ́ ayi ɖó wɛn dó wa nǔ; nǔ nyɔ́ nú vǐ e é ji lɛ́ɛ.

⁸ Axɔ́sú jínjɔ́n ayǐ bó ɖo hwɛ ɖɔ wɛ ɔ́, tlóló jɛ́n nukún tɔn nɔ́ mɔ nǔ e jɛ do é.

⁹ Mɛ ɖé sixú glá ɖɔ émí bló ayi émítɔn ɖó bɔ é mɛ́, bɔ hwɛ ɖěbǔ kún ɖo kɔ nú émí ó a?

¹⁰ Mawu Mavɔmavɔ gbɛ́ wǎn nú mɛ e ɖó nǔdagan e má sɔgbe ǎ é kpó mɛ e ɖó nǔjlɛ́ká e má sɔgbe ǎ é kpó.

¹¹ Ényí vǐ ɖé ɖo walɔ ɖé lɛ́ɛ zán wɛ ɔ́, è nɔ ko tunwun vǐ alɔkpa e é nyí é; é ɖo gbɛ ɖagbe, gbɛ jlɔ́jlɔ́ zán wɛ kpó é gbɔ kpó ɔ́, è nɔ ko tunwun.

¹² Tó e ɖo nǔ se wɛ ɔ́ kpó nukún e ɖo nǔ mɔ wɛ ɔ́ kpó ɔ́, Mawu Mavɔmavɔ wɛ bló bǐ.

¹³ Ma yí wǎn nú amlɔ ó, a táá wá ji ya; nukún towe ní nɔ́ ɖo te ganjí; énɛ́ ɔ́, a nǎ mɔ nǔ ɖu bó gɔ́ xo.

¹⁴ Nǔxɔtɔ́ nɔ ɖɔ: “É vɛ́ axi dín.” É ka xɔ bó yi lo ɔ́, é nɔ́ víví n'i, bɔ é nɔ́ ɖɔ é kpé tawun.

¹⁵ Siká ɖe, jɛ̌nana tɛnmɛ tɛnmɛ ɖe; amɔ̌, nǔ e nyí nǔ xɔ akwɛ́ nǔgbó ɔ́ wɛ nyí xó e nɔ́ ná nǔnywɛ́ mɛ é.

¹⁶ Ényí mɛ ɖé ná nɔ te nú mɛ e a ma tunwun ǎ bɔ mɛ ɔ́ ná nya akwɛ́ ɖo gɔ̌n towe hǔn, yǐ awu tɔn ɖó gbanu, ɖó é nɔ te nú mɛ e a ma tunwun ǎ é bɔ é ɖu axɔ́.

¹⁷ Ényí mɛ ɖé fin nǔɖuɖu bó zé dó nu mɛ tlóló ɔ́, é nɔ́ víví ɖo nu tɔn mɛ, é ká wá gɔ́ nu tɔn mɛ ɔ́, é nɔ́ cí kɛ́n ɖɔhun.

¹⁸ Mɛ ɖé lin nǔɖé ná wa bónú è kplɔ́n ɛ nǔ ɖagbe d'é wú ɔ́, é ná kpé nǔ ɔ́ wú bó ná wa; mɛ ɖé xwe ahwan fun gbé hǔn, é ní sɔ́ nǔ tɔn ganjí cóbó yi.

¹⁹ Mɛ e nɔ ɖo mɛ nú ɖɔ kpé wɛ ɔ́ nɔ́ hɛn xó xomɛ ǎ; bo nɔ hɔn nú mɛ e xó hú gǎn lɛ́ɛ.

²⁰ Mɛ ɖé dó nu tɔ́ tɔn abǐ nɔ tɔn ɔ́, gbɛ tɔn ná cí zogbɛ́n cí ɖo zǐnflú gɔngɔn mɛ ɖɔhun.

²¹ Dɔkun e è jɛ zogbe é ɔ́, è nɔ mɔ nu tɔn sɔ́yi ǎ.

²² Ma ɖɔ: “Un ná sɔ́ nyanya dó sú nyanya xɔ́” ó; nɔ te kpɔ́n Mawu Mavɔmavɔ, é ná hwlɛ́n we gán.

²³ Mawu Mavɔmavɔ gbɛ́ wǎn nú nǔjlɛ́ká e má sɔgbe ǎ lɛ́ɛ; nǔdagan e má sɔgbe ǎ é nyí nǔ ɖagbe ǎ.

²⁴ Mawu Mavɔmavɔ wɛ sɔ́ mɛ ɖokpó ɖokpó ɖó ali e jí é ɖe é; nɛ̌ gbɛtɔ́ sixú tunwun ali e ná gbɔn wɛ é ɖe é gbɔn?

²⁵ È ma lin tamɛ kpɔ́n ǎ, bó dó akpá ɖɔ émí ná sɔ́ nǔɖé ɖó vo nú Mawu, abǐ è ko dó akpá ɔ́ cóbó wá jɛ tamɛ lin jí ɔ́, nǔ nyanya wɛ.

²⁶ Axɔ́sú e ɖó nǔnywɛ́ ɔ́ nɔ́ mɔ nǔ jɛ mɛdídá lɛ́ɛ wú, bó nɔ́ nyínyɛ́ yě.

²⁷ Ayixa e ɖo gbɛtɔ́ xomɛ é wɛ nyí zogbɛ́n e Mawu Mavɔmavɔ ná ɛ é; zogbɛ́n ɔ́ nɔ́ mɔ nǔ káká yi jɛ gbɛtɔ́ xomɛ.

²⁸ Xomɛnyínyɔ́ kpó gbejíninɔ kpó wɛ nɔ́ hɛn axɔ́sú ɖó zinkpo jí; xomɛnyínyɔ́ wɛ nɔ sɔ́ acɛkpikpa tɔn jínjɔ́n ayǐ.

²⁹ Hlɔ̌nhlɔ́n zínzán mɛ wɛ dɔ̌nkpɛvú lɛ́ɛ nɔ́ xɔ susu ɖe; hwa ká nyí acɔ́ nú mɛ kpikpo lɛ́ɛ.

³⁰ È ɖǒ bǎ nú mɛ ɔ́, bǎkpa lɛ́ɛ nɔ́ dó hunnylánylá do nú mɛ; è xo mɛ ganjí ɔ́, é nɔ́ wlí ayi dó xomɛ nú mɛ.