Nǔnywɛ́xó 2 - MAWUXÓWÉMA

¹ Vǐ ce, hɛn xó ce lɛ́ɛ ayi mɛ, hɛn nǔ e un kplɔ́n we lɛ́ɛ dó wǔ.

² Đǒtó nǔnywɛ́xó, nɔ́ tɛ́nkpɔ́n, bó nɔ́ mɔ nǔ jɛ mɛ.

³ Ylɔ̌ nǔtunwuntunwun ɖɔ é ní wá gɔ́ alɔ nú émí, sú xó ylɔ́ tamɛbibɔ.

⁴ Ba tamɛbibɔ ɔ́ akwɛ́ ɖɔhun; nya gbě tɔn dɔkun ɖɔhun.

⁵ Énɛ́ ɔ́, a nǎ mɔ nǔ jɛ nǔ e nyí sísí ɖó nú Mawu Mavɔmavɔ ɔ́ mɛ, bó ná mɔ nǔ jɛ lě e è nɔ tunwun Mawu gbɔn é wú.

⁶ Đó Mawu Mavɔmavɔ wɛ nɔ ná nǔnywɛ́, nu tɔn mɛ wɛ nǔtunwuntunwun kpó tamɛbibɔ kpó nɔ́ gosín.

⁷ É nɔ́ dó alɔ hwɛjijɔnɔ lɛ́ɛ, é nɔ́ gló nǔ nú mɛ e wú è ma nɔ mɔ nǔɖé bó nɔ́ ɖɔ dó ǎ lɛ́ɛ gǎglónú ɖɔhun;

⁸ é nɔ hɛn mɛ e nɔ wa nǔ ɖó sɛ́nxwi jí lɛ́ɛ, é nɔ́ kpé nukún dó mɛ e nɔ nɔ gbejí n'i lɛ́ɛ wú.

⁹ Vǐ ce, nú a ɖǒtó mì ɔ́, a nǎ tunwun nǔ e nyí hwɛjijɔ é, nǔ e nyí nǔ jlɔ́jlɔ́ é, nǔ e sɔgbe é; a tunwun nǔ énɛ́ lɛ́ɛ ɔ́, a ɖo nyɔ̌ná li ɔ́ jí.

¹⁰ Énɛ́ ɔ́, nǔnywɛ́ ná wá ayi towe mɛ, nǔtunwuntunwun wɛ ná nyí nǔ e nɔ́ víví nú we é;

¹¹ tamɛlinlin ná hɛn we; tamɛbibɔ ná nya xɛ ɖo jǐ we;

¹² nǔ énɛ́ lɛ́ɛ ná ɖe we sín nǔ nyanya li jí; yě ná ɖe we sín adingbannɔ lɛ́ɛ sín fɛn mɛ;

¹³ yě ná hwlɛ́n we gán ɖo mɛ e nɔ jó nǔjlɔ́jlɔ́wiwa sín ali ɔ́ dó, bó nɔ́ wlí ablu mɛ li lɛ́ɛ sí.

¹⁴ Mɛ énɛ́ lɛ́ɛ ɔ́, nǔ nyanya wiwa nɔ víví nú yě, dǎka xixo nɔ hun xomɛ nú yě.

¹⁵ Walɔ yětɔn hízí; yě nɔ́ ɖɔ vo, bó ka nɔ wa vo.

¹⁶ Énɛ́ ɔ́, a nǎ gló nyɔ̌nu mɛsi e nɔ ɖɔ xó víví dó flú mɛ é, a nǎ gló nyɔ̌nu e ma nyí asi towe ǎ é.

¹⁷ A nǎ gló nyɔ̌nu e nɔ jó asú e é da ɖo wínnyáwínnyá mɛ é dó e, é wɔn akpá e é ko dó ɖo Mawu nukɔn é.

¹⁸ Nyɔ̌nu mɔ̌hun ɔ́, xwé tɔn ɔ́, kú lixo wɛ é ɖe, zǐnzán tɔn ɔ́, kútomɛ wɛ é nɔ́ dɔn mɛ yi.

¹⁹ Mɛ e yi gɔ̌n tɔn lɛ́ɛ ɖě sɔ́ nɔ́ lɛ́ kɔ wá ǎ, ɖě sɔ́ nɔ́ mɔ ali e è nɔ gbɔn bo nɔ wá gbɛ é ǎ.

²⁰ Nú a ɖǒtó nǔ e kplɔ́n we wɛ un ɖe lɛ́ɛ ɔ́, a nǎ nɔ mɛ ɖagbe lɛ́ɛ sín ali jí, a nǎ nɔ mɛ e nɔ wa nǔ jlɔ́jlɔ́ lɛ́ɛ sín ali jí.

²¹ Đó mɛ e nɔ wa nǔ ɖó sɛ́nxwi jí lɛ́ɛ wɛ ná nɔ to ɔ́ mɛ, mɛ e ɖo gbejí lɛ́ɛ ná nɔ fínɛ́.

²² Amɔ̌, mɛdídá lɛ́ɛ ɔ́, è nǎ ɖe yě sín to ɔ́ mɛ; ahizinɔ lɛ́ɛ ɔ́, è nǎ nya yě tɔ́n sín to ɔ́ mɛ.