Nǔnywɛ́xó 17 - MAWUXÓWÉMA

¹ È ɖu wɔ̌ flú ɖo fí e ayi jɛ ayǐ ɖe ɔ́ nyɔ́ hú è ɖu wɔ̌ kpó lan kpó ɖo fí e jlɛ ɖe é.

² Mɛsɛntɔ́ e bí ganjí ɔ́ ná yí vǐ e nɔ́ dó winnyá mɛ ɔ́ sín tɛnmɛ, bó ná ɖu gǔ xá vǐ winnyádómɛtɔ́ ɔ́ sín nɔví lɛ́ɛ.

³ Siká kpó kpatágan kpó ɔ́, zo wɛ è nɔ xo dó, bó nɔ́ tunwun ɖagbe kpó nyanya kpó. Amɔ̌, gbɛtɔ́ lɛ́ɛ ɔ́, Mawu Mavɔmavɔ wɛ nɔ mɔ nǔ jɛ ayixa yětɔn mɛ, bó nɔ́ tunwun ayixa ɖagbe kpó ayixa nyanya kpó.

⁴ Gbɛtɔ́ e nɔ́ xo dǎka ɔ́ nɔ́ wlí tó dǎkaxotɔ́ lɛ́ɛ sín xó wú; adingbannɔ nɔ ɖótó xó e nɔ hɛn mɛ gblé lɛ́ɛ.

⁵ Mɛ e nɔ ko wamamɔnɔ ɔ́, agɔ tawun wɛ é jɛ dó mɛ e bló wamamɔnɔ ɔ́ é. Mɛ e nǔ wa mɛ ɔ́, é nɔ́ víví n'i ɔ́, è nǎ gɔn tó dɔn n'i ǎ.

⁶ Vǐvú lɛ́ɛ wɛ nyí jɛ̌gbákún ɖo ta nú degénɔ kpikpoe lɛ́ɛ, bɔ tɔ́ lɛ́ɛ nyí susu vǐ yětɔn lɛ́ɛ tɔn.

⁷ Xó mímɛ́ sɔgbe xá xlonɔ ǎ; mɔ̌ ɖokpó ɔ́, adingban jɛ xá mɛ e nyí gǎn é ǎ.

⁸ Mɛ e nɔ dó nǔ nu nú mɛ ɔ́ nɔ́ mɔ ɖɔ nǔ xɔ akwɛ́ ɖaxó ɖokpó wa wɛ émí ɖe; é nɔ́ mɔ ɖɔ è dǒ nǔ nu nú mɛ ɔ́, è nɔ mɔ nǔ e ba wɛ è ɖe ɔ́.

⁹ Mɛ e sɔ́ hwɛ kɛ mɛ ɔ́, xɔ́ntɔn ba wɛ é ɖe; mɛ e ka fɔ́n ɔ́, é nɔ ɖo flínflín wɛ é ɖo xɔ́ntɔn tɔn lɛ́ɛ nya wɛ.

¹⁰ È gbɛ̌ nǔ nú mɛ e nɔ mɔ nukúnnú jɛ nǔ mɛ ɔ́ azɔn ɖokpó géé ɔ́, é xɔ akwɛ́ hú è sɛ́n bǎ nú xlonɔ azɔn kanwe ko (100).

¹¹ Mɛdídá ɔ́, gǔ fɔ́n wɛ jɛ́n é nɔ́ ɖe, káká bɔ mɛ e ma nɔ kú nǔbláwǔ nú mɛ ǎ ɔ́ nɔ́ jɛ gbě tɔn mɛ.

¹² È yi kpé lɔnmɔ e ba vǐ tɔn kpo ɔ́, é nyɔ́ hú è yi kpé xlonɔ e ɖo xlohwɛ zɛ wɛ é.

¹³ Mɛ e nɔ sɔ́ nyanya dó sú ɖagbe xɔ́ ɔ́, nǔ nyanya nɔ hán ɖo xwé tɔn gbe ǎ.

¹⁴ È bɛ̌ jlɛ hǔn, è hun ali nú tagba nɛ́; è bo yá wǔ ɖe afɔ sín mɛ cóbónú hun ná bɛ́.

¹⁵ Mɛ e yí hwɛ dó mɛdídá jí é, kpó mɛ e ɖó hwɛ nú hwɛjijɔnɔ é kpó bǐ wɛ Mawu Mavɔmavɔ gbɛ́ wǎn ná.

¹⁶ Akwɛ́ jɛ xlonɔ lɔ mɛ ɔ́, ani wɛ é ná dó wa? Nǔnywɛ́ wɛ é ná sɔ́ dó yí ná a? Ayi tɔn sixú mɔ mɔ̌ ǎ.

¹⁷ Xɔ́ntɔn nyɔ́ hwebǐnu. È nɔ ɖó nɔví bɔ é ná dó alɔ mɛ adǎngbomɛ hwenu.

¹⁸ Xlonɔ wɛ mɛ ɖěvo nɔ ja axɔ́ ɖu gbé, bɔ é nɔ́ nɔ te n'i bó nɔ́ zin alɔ dó akɔ́n ɖɔ émí ná sú.

¹⁹ Mɛ e yí wǎn nú jlɛ ɔ́, yí wǎn nú hwɛhuhu; lo ɔ́, mɛ e nɔ yí go ɔ́ ná hɛn gbɛ éɖée tɔn gblé.

²⁰ Mɛ e ɖó ayi hízíhízí ɔ́, nǔɖé nɔ nyɔ́ n'i ǎ; mɛ e nɔ ɖó adingban ɔ́, nǔ wɛ nɔ́ gbo e.

²¹ Mɛ e ji vǐ xlonɔ ɔ́ nɔ mɔ akpɔ. Mɛ e ji taɖunɔ ɔ́ sixú j'awǎ gbeɖé ǎ.

²² Ayi jɛ ayǐ nú mɛ ɔ́, azɔn nɔ yá wǔ gbɔ; wǔ ká kú mɛ ɔ́, gǎn wɛ nɔ hwedó mɛ.

²³ Mɛdídá nɔ ɖu kpa ɖo nǔglɔ́, lobo nɔ húzú hwɛjijɔ xwe.

²⁴ Gbɛtɔ́ e nɔ́ mɔ nǔ jɛ nǔ mɛ ɔ́, nǔnywɛ́ yíyí wɛ nɔ myá nukún n'i; lo ɔ́, xlonɔ sín nukún nɔ́ ɖo ma ná xɔ xi xwlé wɛ.

²⁵ Vǐ xlonɔ nɔ ɖó akpɔ nú tɔ́ tɔn; é nɔ́ nyí linkpɔ́n nú mɛ e zɛn bó ji i é.

²⁶ É nyɔ́ ɖɔ è nǐ dɔn tó nú xomɛvɔ́nɔ ǎ; è dɔn tó nú gbɛtɔ́ e mɛ lɛ́ɛ nɔ sí ɔ́, acɛ wɛ é nyí bɔ è gba.

²⁷ Mɛ e tunwun nǔ ɔ́ nɔ ɖɔ xó dín ǎ; mɛ e sín ayi ɖo te ɔ́ nɔ yi agbɔ̌n jí.

²⁸ Mɛ ɖé ná bó nyí taɖunɔ bó ká nɔ́ cí xwíí ɔ́, è nɔ mɔ ɛ dó mɔ gbɛtɔ́ nǔnywɛ́tɔ́; mɛ e bɔ nu dó aɖǔ ɔ́, è nɔ mɔ ɛ dó mɔ gbɛtɔ́ bíbí.