Nǔnywɛ́xó 11 - MAWUXÓWÉMA

¹ Nǔdagan e má sɔgbe ǎ é nɔ́ vɛ́ mɔ nú Mawu Mavɔmavɔ, nǔdagan e ka sɔgbe é nɔ́ nyɔ́ mɔ n'i.

² Goyíyí ɔ́, tɛ́ hu nú mɛ wɛ é nɔ́ dɔn wá. Amɔ̌, nǔwaɖójlɛ̌jí ɔ́, nǔnywɛ́tɔ́ lɛ́ɛ sí wɛ è nɔ mɔ ɖe.

³ Ayi ɖo wɛn ɖíɖó wɛ nɔ́ xlɛ́ ali ayijlɔ́jlɔ́nɔ lɛ́ɛ; nǔhízíhízí wɛ ká nɔ́ dɔn adingbannɔ lɛ́ɛ yi bú.

⁴ Hwɛɖɔzán gbe su ɔ́, dɔkun nɔ gɔ́ alɔ nú mɛ ǎ, nǔ wa ɖó sɛ́nxwi jí kɛ́ɖɛ́ jɛ́n nɔ́ hwlɛ́n mɛ ɖo kú sí.

⁵ Nǔjlɔ́jlɔ́wiwa gbejínɔtɔ́ tɔn wɛ nɔ bló ali tɔn ɖó; amɔ̌, mɛdídá ɔ́, dǎka e é nɔ́ xo ɔ́ wɛ nɔ́ zin i dɛ́.

⁶ Ayijlɔ́jlɔ́nɔ ɔ́, nǔ wa ɖó sɛ́nxwi jí tɔn wɛ nɔ́ hwlɛ́n ɛ. Amɔ̌, ahizinɔ lɛ́ɛ ɔ́, nǔ e ba wɛ yě ɖe lɛ́ɛ wɛ nɔ́ nyí mɔ bɔ yě nɔ́ jɛ mɛ.

⁷ Mɛdídá kú ɔ́, nǔ e ɖó nukún wɛ é ɖe é lɔ nɔ kú; gǎnjɛwú e é ɖó dó dɔkun tɔn lɛ́ɛ wú ɔ́ nɔ́ húzú nǔ yǎyá.

⁸ Mɛ e nɔ wa nǔ ɖó sɛ́nxwi jí ɔ́, è nɔ hwlɛ́n ɛ sín adǎngbomɛ mɛ, bɔ mɛdídá nɔ́ jɛ tɛn tɔn mɛ.

⁹ Mɛ nyanya nɔ sɔ́ nu tɔn dó hɛn nɔzo tɔn sín gbɛ gblé; amɔ̌, mɛ e nɔ wa nǔ ɖó sɛ́nxwi jí lɛ́ɛ ɔ́, nǔtunwuntunwun yětɔn wɛ nɔ́ hwlɛ́n yě sín mɛ.

¹⁰ Nú nǔ nyɔ́ nú mɛ e nɔ wa nǔ ɖó sɛ́nxwi jí ɔ́, xwe wɛ é nɔ́ nyí nú toví lɛ́ɛ. Nú mɛdídá ká kú ɔ́, awǎ wɛ è nɔ jɛ kpó xósúsú kpó.

¹¹ Đagbewiwa ayijlɔ́jlɔ́nɔ tɔn nɔ́ bló to ɖó. Mɛdídá ká nɔ́ sɔ́ nu tɔn dó gba to.

¹² Mɛ e ma ɖo lugbe ǎ ɔ́ nɔ hu tɛ́ nú nɔzo tɔn; mɛ e ka bí ɔ́ nɔ́ kɛ nu ǎ.

¹³ Mɛnúɖɔtɔ́ nɔ́ hɛn xó xomɛ ǎ, gbɛtɔ́ ɖeji d'é wú ká nɔ hɛn xó xomɛ.

¹⁴ To e ma ɖó nusú ǎ ɔ́, gba wɛ é nɔ gba; mɛ e ná ɖe wě dó to wú lɛ́ɛ sukpɔ́ ɔ́, to nɔ́ nɔ te.

¹⁵ Mɛ e nɔ te nú mɛ e é má tunwun ǎ bɔ é ɖu axɔ́ ɔ́, xó wɛ é ba dó kɔ; mɛ e ayi tɔn ka ɖo te bɔ é gbɛ́ ɔ́, nɔ́ nɔ vivo mɛ.

¹⁶ Nyɔ̌nu e nyɔ́ xomɛ ɔ́, è nɔ sɔ́ ɛ su; súnnu e nɔ́ ván kan bó nɔ́ wa nǔɖé ɔ́ nɔ jɛ dɔkun.

¹⁷ Mɛ e nɔ́ nyɔ́ xomɛ dó mɛ wú ɔ́, éɖée wɛ é wa ɖagbe ná; mɛ e ká nɔ́ xo dǎka ɔ́, éɖée wú wa nyanya dó wɛ é ɖe.

¹⁸ Nǔ e mɛdídá nɔ mɔ ɔ́ nɔ́ ɖó ta ɖé ǎ; mɛ e ka nɔ vlɔ́n kan nú nǔ wa ɖó sɛ́nxwi jí ɔ́, tunwun ɖɔ émí ná ɖu le tɔn dandan.

¹⁹ Mɛ e zin alɔ dó akɔ́n ɖɔ émí ná nɔ́ wa nǔ jlɔ́jlɔ́ ɔ́, é ná nɔ gbɛ; mɛ e ka nɔ ɖo nǔ nyanya wiwa gúdo ɔ́ ná kú.

²⁰ Mɛ e ɖó ayi hízíhízí lɛ́ɛ nɔ́ vɛ́ mɔ nú Mawu Mavɔmavɔ; mɛ e ɖo gbejí lɛ́ɛ ká nɔ́ nyɔ́ mɔ n'i.

²¹ Mawu Mavɔmavɔ ná dɔn tó nú mɛdídá, é ɖó gblǎ ǎ; é ká ná hwlɛ́n mɛ e nɔ wa nǔ ɖó sɛ́nxwi jí lɛ́ɛ bǐ gán.

²² Nyɔ̌nu e nyɔ́ ɖɛkpɛ bó má ká ɖo lugbe ǎ ɔ́, ɖɛkpɛ tɔn ɔ́, sikálɔkɛ́ wɛ bɔ è dǒ awɔntín nú aglǔza.

²³ Nǔ ɖagbe wiwa kɛ́ɖɛ́ wɛ mɛ e nɔ wa nǔ ɖó sɛ́nxwi jí é nɔ́ ba; xomɛsin wɛ ka ɖo te kpɔ́n mɛdídá lɛ́ɛ.

²⁴ Mɛ e nɔ hun alɔ bó nɔ́ ná nǔ mɛ ɔ́ nɔ́ jɛ dɔkun dó dɔkun jí; mɛ e ka nɔ sɛ nǔ xwe zɛ xwé wú ɔ́, ya wɛ é nɔ́ ji.

²⁵ Mɛ e nɔ ná nǔ mɛ ɔ́, è nǎ ná nǔ i bɔ é ná sukpɔ́; mɛ e nɔ ná sin mɛ ɔ́, è nǎ ná é lɔmɔ̌, bɔ é ná nu bó ɖi kɔ.

²⁶ Mɛ e nɔ kplé jinukún dó agɔ̌ mɛ, bó nɔ́ gbɛ́ sisa ɔ́, to wɛ nɔ dó nu i; mɛ e ka nɔ sa ɔ́, to nɔ xo ɖɛ n'i.

²⁷ Mɛ e ɖagbewiwa nɔ myá nukún ná ɔ́, nǔ tɔn nɔ́ nyɔ́ gbɛtɔ́ lɛ́ɛ sín nukún mɛ; mɛ e nǔ nyanya wiwa ka nɔ myá nukún ná ɔ́, awě wɛ nɔ xo e.

²⁸ Mɛ e nɔ gán jɛ dɔkun tɔn lɛ́ɛ wú ɔ́, ayǐ wɛ é nɔ́ jɛ; mɛ e nɔ wa nǔ ɖó sɛ́nxwi jí lɛ́ɛ ɔ́, nǔ wɛ nɔ́ ɖo nyǐnyɔ́ nú yě wɛ atín e ɖo zǐnzɔ́n wɛ é ɖɔhun.

²⁹ Mɛ e hɛn xwé tɔn nyi do ɔ́ nɔ́ mɔ nǔɖé sɔ́ ɖ'é mɛ ǎ; mɛ énɛ́ e jɔ xlo ɔ́ mɔ̌ ɔ́, kannumɔ wɛ é ná wá nyí nú mɛ e ɖó nǔnywɛ́ é.

³⁰ Mɛ e nɔ wa nǔ ɖó sɛ́nxwi jí ɔ́, nǔ e é nɔ́ wa ɔ́, atín e nɔ́ ná gbɛ mɛ ɔ́ wɛ; mɛ e ɖó nǔnywɛ́ ɔ́, gbɛtɔ́ nɔ ɖeji dó wǔ tɔn.

³¹ Mɛ e nɔ wa nǔ ɖó sɛ́nxwi jí ɔ́ nɔ́ ɖu nǔ e é wa ɔ́ sín le ɖo ayǐkúngban jí fí; hǔn mɛdídá kpó hwɛhutɔ́ kpó lɔ ná ɖu nǔ e yě wa ɔ́ sín le dandan.