Kɛ́nsísɔ́ 9 - MAWUXÓWÉMA

Gbe e gbe è nǎ ɖu Dǐndínwáyixwe ɔ́ é

¹ Mawu Mavɔmavɔ ɖɔ xó nú Mɔyízi ɖo gbětótló Sinayíi tɔn mɛ. Izlayɛ́li ví lɛ́ɛ gosín Ejípu ɔ́ xwe e bɔ dó xwe énɛ́ ɔ́ wú ɔ́ sín sun nukɔn tɔn ɔ́ mɛ wɛ é ɖɔ xó n'i; é ɖɔ n'i ɖɔ:

² “Izlayɛ́li ví lɛ́ɛ ní nɔ ɖu Dǐndínwáyixwe ɔ́ ɖo hwenu e un ɖó dó é.

³ Mi ná nɔ́ ɖu xwe ɔ́ ɖo hwenu e un ɖó dó é. Hwe ɔ́ nu wɛ nyí sun élɔ́ sín azǎn wǒ-ɛnɛgɔ́ ɔ́ gbe gbadanu. Mi ná xwedó sɛ́n e ɖɔ xó dó xwé ɔ́ wú é kpódó tito e ɖɔ xó dó xwe ɔ́ wú é kpó lɛ́ɛ, bó dó ɖu.”

⁴ Mɔyízi ɖɔ xó énɛ́ ɔ́ nú Izlayɛ́li ví lɛ́ɛ.

⁵ Énɛ́ ɔ́, yě ɖu Dǐndínwáyixwe ɔ́ ɖo sun nukɔn tɔn ɔ́ sín azǎn wǒ-ɛnɛgɔ́ ɔ́ gbe gbadanu, ɖo gbětótló Sinayíi tɔn mɛ. Lě e Mawu Mavɔmavɔ ɖɔ gbɔn nú Mɔyízi ɔ́ bǐ wɛ yě xwedó bó dó ɖu xwe ɔ́.

⁶ Mɛ ɖé lɛ́ɛ ká tíin bó sixú ɖu xwe ɔ́ gbe énɛ́ ɔ́ gbe ǎ, ɖó yě ɖ'alɔ cyɔ wú, bó dó hɛn yěɖée blí. Mɛ énɛ́ lɛ́ɛ yi mɔ Mɔyízi kpó Aalɔ́ɔn kpó,

⁷ bó ɖɔ nú Mɔyízi ɖɔ: “Mǐ hɛn mǐɖée blí, ɖó mǐ ɖó alɔ cyɔ wú; étɛ́wú è ka dó sɛ́n nú mǐdɛɛ lɛ́ɛ ɖɔ mǐ kún ná hɛn nǔníná wá nú Mawu Mavɔmavɔ Izlayɛ́li ví ɖě lɛ́ɛ ɖɔhun, ɖo azǎn e Mawu Mavɔmavɔ ɖó ɔ́ gbe ó?”

⁸ Mɔyízi ka ɖɔ nú yě ɖɔ: “Mi nɔ te nú má se nǔ e Mawu Mavɔmavɔ ná ɖɔ dó xó mitɔn wú é.”

⁹ Bɔ Mawu Mavɔmavɔ ɖɔ nú Mɔyízi ɖɔ

¹⁰ é ní ɖɔ nú Izlayɛ́li ví lɛ́ɛ ɖɔ: “Nú mɛ ɖé ɖo mi mɛ égbé, abǐ jijimɛ mitɔn e ná wá lɛ́ɛ ɖě mɛ, bó nyí mɛ blíblí ɖó é ɖó alɔ cyɔ wú wútu, abǐ é yi to mɛ aga ɔ́, é sixú wá ɖu Dǐndínwáyixwe ɔ́ dó kpa susu nú nyɛ Mawu Mavɔmavɔ.

¹¹ Amɔ̌, sun wegɔ́ ɔ́ sín azǎn wǒ-ɛnɛgɔ́ ɔ́ gbe gbadanu wɛ é ná ɖu. Wɔ̌xúxú e mɛ è ma dó tɔ́n ǎ é kpódó amavívɛ́ kpó wɛ é ná dó ɖu.

¹² É ná ɖu nǔɖé kpo bɔ ayǐ ná hɔ́n dó ǎ; é ká ná gba xú ɖěbǔ ǎ. Yě ná xwedó lě e nyɛ Mawu Mavɔmavɔ ɖɔ gbɔn lɛ́ɛ bǐ, bó dó ɖu.

¹³ Nú mɛ ɔ́ má nyí mɛ blíblí ǎ, bó má ká yi tomɛ ǎ, bó gbɛ́ Dǐndínwáyixwe ɔ́ ɖu ɔ́, è ɖǒ ná ɖe mɛ énɛ́ ɔ́ sín togun ɔ́ mɛ, ɖó é ná nǔníná nyɛ Mawu Mavɔmavɔ dó hwe tɔn nu ǎ. Mɛ énɛ́ ɔ́ sín hwɛgban ná nɔ kɔ n'i.

¹⁴ Nú tomɛyitɔ́ ɖé ɖo mi gɔ́n, bó jló ná ɖu Dǐndínwáyixwe ɔ́ xá mi ɔ́, é ɖó ná bló lě e nyɛ Mawu Mavɔmavɔ ɖɔ gbɔn ɔ́, bó ná xwedó lě e é ɖe gbɔn ɖo sɛ́n ɔ́ mɛ ɔ́ dó ɖu. Lě e mi Izlayɛ́li ví lɛ́ɛ ɖu gbɔn ɔ́ wɛ tomɛyitɔ́ lɛ́ɛ ná ɖu gbɔn.”

Akpɔ́kpɔ́ cyɔ́n Goxɔ ɔ́

¹⁵ Gbe e gbe Mɔyízi kɛ́ Goxɔ ɔ́, akpɔ́kpɔ́ cyɔ́n ɛ bǐ. Goxɔ ɔ́ mɛ wɛ akɔjijɛgbá ɔ́ ɖe. Akpɔ́kpɔ́ ɔ́ cí myɔ ɖɔhun ɖo Goxɔ ɔ́ jí sín gbadanu káká bɔ ayǐ hɔ́n.

¹⁶ Bɛ́ sín gbe énɛ́ gbe ɔ́, akpɔ́kpɔ́ ɔ́ nɔ́ ɖo Goxɔ ɔ́ jí; akpɔ́kpɔ́ nɔ́ cyɔ́n Goxɔ ɔ́, bɔ é jɛ gbadanu ɔ́, é nɔ́ cí myɔ ɖɔhun.

¹⁷ Nú akpɔ́kpɔ́ ɔ́ sí te sín Goxɔ ɔ́ jí hweɖěbǔnu ɔ́, Izlayɛ́li ví lɛ́ɛ nɔ́ jɛ ali. Yě ɖo yiyi wɛ bónú akpɔ́kpɔ́ ɔ́ lɛ́ nɔ te ɖo fí ɖé ɔ́, yě nɔ́ ɖó gɔnu ɖó fí ɔ́.

¹⁸ Mawu Mavɔmavɔ wɛ nɔ́ ɖe gbe bɔ Izlayɛ́li ví lɛ́ɛ nɔ́ jɛ ali; é wɛ nɔ́ lɛ́ ɖe gbe bɔ yě nɔ́ ɖó gɔnu ɖó fí e yě jɛ ɔ́. Nú akpɔ́kpɔ́ ɔ́ kpo ɖo Goxɔ ɔ́ jí jɛ́n wɛ ɔ́, yě nɔ́ sɛ tɛn ǎ.

¹⁹ Nú akpɔ́kpɔ́ ɔ́ nɔ Goxɔ ɔ́ jí nú hwenu gěgé ɔ́, Izlayɛ́li ví lɛ́ɛ nɔ́ se tónú nú Mawu Mavɔmavɔ bó nɔ́ sɛ tɛn ǎ.

²⁰ É ná bó lɛ́ nɔ nú hwenu kpɛɖé ɔ́, Izlayɛ́li ví lɛ́ɛ nɔ́ se tónú nú Mawu Mavɔmavɔ bó nɔ́ sɛ tɛn ǎ; Mawu Mavɔmavɔ wɛ nɔ́ ɖe gbe nú yě cóbɔ yě nɔ́ jɛ ali.

²¹ Hwe ɖé lɛ́ɛ nu ɔ́, akpɔ́kpɔ́ ɔ́ nɔ́ nɔ te ɖo fí ɖokpó sín gbadanu káká bɔ ayǐ nɔ́ hɔ́n, abǐ nú kéze ɖokpó zǎn ɖokpó. Nú é sí te hweɖěbǔnu ɔ́, Izlayɛ́li ví lɛ́ɛ nɔ́ jɛ ali.

²² Amɔ̌, nú akpɔ́kpɔ́ ɔ́ nɔ Goxɔ ɔ́ jí nú azǎn we, abǐ nú sun ɖokpó, abǐ nú xwe ɖokpó ɔ́, Izlayɛ́li ví lɛ́ɛ nɔ́ cí fínɛ́; yě nɔ́ jɛ ali ǎ. Nú akpɔ́kpɔ́ ɔ́ wá sí te ɔ́, yě nɔ́ jɛ ali.

²³ Mawu Mavɔmavɔ wɛ nɔ́ ɖe gbe bɔ yě nɔ́ nɔ te; é wɛ nɔ́ lɛ́ ɖe gbe bɔ yě nɔ́ jɛ ali; yě nɔ́ se tónú nú Mawu Mavɔmavɔ lě e Mawu Mavɔmavɔ ɖɔ nú Mɔyízi gbɔn é.