Kɛ́nsísɔ́ 34 - MAWUXÓWÉMA

¹ Mawu Mavɔmavɔ ɖɔ nú Mɔyízi ɖɔ

² é ní ɖɔ nú Izlayɛ́li ví lɛ́ɛ ɖɔ: “Ényí mi byɔ́ Kanáa to ɔ́ mɛ ɔ́, to ɔ́ ná húzú mitɔn. Dogbó Kanáa to ɔ́ tɔn lɛ́ɛ ɖíe:

³ Gbětótló Síni tɔn ɔ́ kpó Edɔ́mu tɔn ɔ́ kpó wɛ ná nyí ayǐkúngban mitɔn sín dogbó, ɖo afɔligbé. Đo zǎnzǎnhwe jí ɔ́, dogbó mitɔn ná gosín Xu Kúkú ɔ́ sín afɔligbé.

⁴ É ná xá gbɔn Aklabímu kpó ɔ́ sín afɔligbé, bó ná gbɔn Síni bó ná hun káká yi Kadɛ́ci-Baanɛ́ya sín afɔligbé; é ná dlɛ́n d'é nu gbɔn Hasáa-Adáa, bo ná dín gbɔn Asemɔ́ni.

⁵ Bɛ́ sín Asemɔ́ni ɔ́, é ná xá káká yi tɔsisa Ejípu tɔn ɔ́ kɔn, bó ná yi fó dó Mɛditɛlanɛ́ɛ xu ɔ́ tó.

⁶ Mɛditɛlanɛ́ɛ xu ɔ́ wɛ ná nyí ayǐkúngban mitɔn sín dogbó ɖo gbadahwe jí.

⁷ Đo totaligbé ɔ́, mi ná ɖó dogbó sín Mɛditɛlanɛ́ɛ xu ɔ́ kɔn káká yi Hɔ́ɔ só ɔ́ kɔn.

⁸ Sín Hɔ́ɔ só ɔ́ kɔn ɔ́, mi ná gbɔn Lɛbo-Hamáti bó ná wá Sedádi.

⁹ Mi ná gosín fínɛ́, bó ná tunta Ziflɔ́ni bó ná wá Hasáa-Ɛnáni. Dogbó mitɔn taligbé tɔn ɔ́ nɛ́.

¹⁰ Đo zǎnzǎnhwe jí ɔ́, mi ná ɖó dogbó sín Hasáa-Ɛnáni yi Cefámu,

¹¹ bó ná gosín Cefámu ɖidó Hlivla ɖo Ayini sín zǎnzǎnhwe jí; é ná gosín fínɛ́ bó ná dlɛ́n d'é nu gbɔn Jenɛzalɛ́ti xu ɔ́ tó.

¹² É ná lɛ́ gosín fínɛ́, bó ɖidó Judɛ́ɛn tɔ ɔ́ tó, bó ná fó dó Xu Kúkú ɔ́ kɔn. To mitɔn sín dogbó lɛ́ɛ nɛ́.”

¹³ Mɔyízi ɖɔ xó énɛ́ e Mawu Mavɔmavɔ ɖɔ ɔ́ nú Izlayɛ́li ví lɛ́ɛ. Énɛ́ gúdo ɔ́, é ɖɔ nú yě ɖɔ: “To e mi ná nyi akɔ bo má ɔ́ nɛ́. Mawu Mavɔmavɔ wɛ ná akɔta tɛ́nnɛ adaɖé lɛ́ɛ.

¹⁴ Đó akɔta Hwlibɛ́ni ví lɛ́ɛ tɔn kpó Gadi ví lɛ́ɛ tɔn lɛ́ɛ kpó, kpódó akɔta vlɔ́ Manasée tɔn ɔ́ kpó kó yí ayǐkúngban yědɛɛ lɛ́ɛ tɔn.

¹⁵ Ayǐkúngban e nyí akɔta we adaɖé énɛ́ lɛ́ɛ tɔn, ɖo Jeliko nukɔn, ɖo Judɛ́ɛn tɔ ɔ́ gúdo ɖo zǎnzǎnhwe jí é nɛ́.”

Gǎn e ná má ayǐkúngban ɔ́ lɛ́ɛ sín nyǐkɔ

¹⁶ Mawu Mavɔmavɔ ɖɔ nú Mɔyízi ɖɔ:

¹⁷ “Vɔ̌sánú-xwlémawutɔ́ Eleazáa kpó Jozuwée Nuni ví ɔ́ kpó wɛ ná má to ɔ́ nú mi.

¹⁸ Mi ná lɛ́ sɔ́ gǎn ɖokpó ɖokpó ɖo akɔta ɖokpó ɖokpó mɛ, bɔ yě ná dó alɔ yě.

¹⁹ Gǎn énɛ́ lɛ́ɛ sín nyǐkɔ ɖíe: Kalɛ́bu Yefunnɛ́ɛ ví ɔ́; akɔta Judáa tɔn mɛ wɛ è sɔ́ ɛ ɖe;

²⁰ Cemuyɛlu, Amumihudi ví ɔ́, akɔta Sinmɛnyɔ́ɔ tɔn mɛ wɛ è sɔ́ ɛ ɖe.

²¹ Elidadi, Kisilɔ́ni ví ɔ́, akɔta Bɛnjamɛ́ɛ tɔn mɛ wɛ è sɔ́ ɛ ɖe.

²² Buki, Yogli ví ɔ́, akɔta Dan tɔn mɛ wɛ è sɔ́ ɛ ɖe.

²³ Hanniyɛ́li, Efódi ví ɔ́, akɔta Manasée Jozɛ́fu ví ɔ́ tɔn mɛ wɛ è sɔ́ ɛ ɖe.

²⁴ Kemuwɛ́li, Cifutáni ví ɔ́, akɔta Eflayímu tɔn mɛ wɛ è sɔ́ ɛ ɖe.

²⁵ Elisafáni, Panaki ví ɔ́, akɔta Zabulɔ́ɔn tɔn mɛ wɛ è sɔ́ ɛ ɖe.

²⁶ Palutiyɛ́li, Azani ví ɔ́, akɔta Isakáa tɔn mɛ wɛ è sɔ́ ɛ ɖe.

²⁷ Axiwudi, Celomi ví ɔ́, akɔta Acɛ́ɛ tɔn mɛ wɛ è sɔ́ ɛ ɖe.

²⁸ Pedaxɛli, Amumihudi ví ɔ́, akɔta Nɛfutali tɔn mɛ wɛ è sɔ́ ɛ ɖe.”

²⁹ Mɛ e Mawu Mavɔmavɔ ná gbe ɖɔ yě nǐ má Kanáa to ɔ́ nú Izlayɛ́li ví lɛ́ɛ ɔ́ nɛ́.