Kɛ́nsísɔ́ 33 - MAWUXÓWÉMA

¹ Fí tɛnmɛ tɛnmɛ e Izlayɛ́li ví lɛ́ɛ gbɔn hwenu e yě gosín Ejípu kpó ahwangɔnu yětɔn lɛ́ɛ kpó, bɔ Mɔyízi kpó Aalɔ́ɔn kpó nɔ nukɔn nú yě lɛ́ɛ ɖíe:

² Mɔyízi wlán fí e yě nɔ te ɖe lɛ́ɛ ɖokpó ɖokpó lě e Mawu Mavɔmavɔ ná gbe tɔn ɛ gbɔn é. Hǔn fí e yě nɔ te ɖe lɛ́ɛ ɖíe:

³ Yě gosín Hlamusɛ́si toxo ɔ́ mɛ ɖo Ejípu, sun nukɔntɔn e ɖo xwe ɔ́ mɛ ɔ́ sín azǎn afɔtɔngɔ́ ɔ́ gbe. È ɖu Dǐndínwáyixwe ɔ́, ayǐhɔ́ngbe tɔn wɛ Izlayɛ́li ví lɛ́ɛ tɔ́n ɖo Ejípunu lɛ́ɛ bǐ nukún mɛ ma ɖi xɛsi nú nǔɖé.

⁴ Énɛ́ ɔ́, Ejípunu lɛ́ɛ ɖo nukɔngbéví yětɔn e wú Mawu Mavɔmavɔ sín alɔ jɛ ɖo tɛ́ntin yětɔn, bɔ yě bǐ kú lɛ́ɛ sín cyɔ ɖi wɛ. Mawu Mavɔmavɔ ɖo hwɛ ɖó nú Ejípunu lɛ́ɛ sín vodún lɛ́ɛ lɔmɔ̌ wɛ.

⁵ Izlayɛ́li ví lɛ́ɛ gosín Hlamusɛ́si bo yi ɖó gɔnu ɖó Sukɔ́tu.

⁶ Yě gosín Sukɔ́tu bó ɖó gɔnu ɖó Etámu ɖo gbětótló ɔ́ tó.

⁷ Yě gosín Etámu bo lɛ́ kɔ ɖidó Pi-Haxilɔ́ti e ɖo Baalu-Cefɔ́ni nukɔn é, bó ɖó gɔnu ɖó Migidɔ́lu nukɔn.

⁸ Yě gosín Pi-Haxilɔ́ti nukɔn bo gbɔn xu ɔ́ tɛ́ntin ɖidó gbětótló mɛ. Yě zun zɔnlin nú azǎn atɔn ɖo Etámu sín gbětótló mɛ, bó ɖó gɔnu ɖó Mala.

⁹ Yě gosín Mala bo wá Elimu. Tɔjɔtɛn wěwe kpó dětín kanɖé gban (70) kpó wɛ ɖo Elimu fínɛ́; fínɛ́ wɛ yě ɖó gɔnu ɖó.

¹⁰ Yě gosín Elimu bo ɖó gɔnu ɖó Xu Vɔvɔ ɔ́ kpá.

¹¹ Yě gosín Xu Vɔvɔ ɔ́ kpá, bó ɖó gɔnu ɖó Sínu sín gbětótló ɔ́ mɛ.

¹² Yě gosín Sínu sín gbětótló mɛ bó ɖó gɔnu ɖó Dɔfuka.

¹³ Yě gosín Dɔfuka, bó ɖó gɔnu ɖó Aluci.

¹⁴ Yě gosín Aluci, bó ɖó gɔnu ɖó Hlefidímu; yě ká mɔ sin nu ɖo fínɛ́ ǎ.

¹⁵ Yě gosín Hlefidímu, bó ɖó gɔnu ɖó gbětótló Sinayíi tɔn mɛ.

¹⁶ Yě gosín gbětótló Sinayíi tɔn mɛ, bó ɖó gɔnu ɖó Kivlɔti-Taawa.

¹⁷ Yě gosín Kivlɔti-Taawa, bó ɖó gɔnu ɖó Haselɔ́ti.

¹⁸ Yě gosín Haselɔ́ti, bó ɖó gɔnu ɖó Hlitúma.

¹⁹ Yě gosín Hlitúma, bó ɖó gɔnu ɖó Hlimumɔ́ni-Pɛlɛ́si.

²⁰ Yě gosín Hlimumɔ́ni-Pɛlɛ́si, bó ɖó gɔnu ɖó Livuna.

²¹ Yě gosín Livuna bó ɖó gɔnu ɖó Hlisa.

²² Yě gosín Hlisa, bó ɖó gɔnu ɖó Kexelata.

²³ Yě gosín Kexelata bó ɖó gɔnu ɖó Cɛfɛ́ɛ só ɔ́ kpá.

²⁴ Yě gosín Cɛfɛ́ɛ só ɔ́ kpá, bó ɖó gɔnu ɖó Halada.

²⁵ Yě gosín Halada, bó ɖó gɔnu ɖó Makexelɔ́ti.

²⁶ Yě gosín Makexelɔ́ti, bó ɖó gɔnu ɖó Taxati.

²⁷ Yě gosín Taxati, bó ɖó gɔnu ɖó Tɛláxi.

²⁸ Yě gosín Tɛláxi, bó ɖó gɔnu ɖó Mitika.

²⁹ Yě gosín Mitika, bó ɖó gɔnu ɖó Hacimɔ́na.

³⁰ Yě gosín Hacimɔ́na, bó ɖó gɔnu ɖó Mɔselɔ́ti.

³¹ Yě gosín Mɔselɔ́ti, bó ɖó gɔnu ɖó Benɛ-Yakáni.

³² Yě gosín Benɛ-Yakáni, bó ɖó gɔnu ɖó Hɔ́ɔ-Gidugadi.

³³ Yě gosín Hɔ́ɔ-Gidugadi, bó ɖó gɔnu ɖó Yotivata.

³⁴ Yě gosín Yotivata, bó ɖó gɔnu ɖó Avlona.

³⁵ Yě gosín Avlona, bó ɖó gɔnu ɖó Esiɔ́ni-Gevɛ́ɛ.

³⁶ Yě gosín Esiɔ́ni-Gevɛ́ɛ, bó ɖó gɔnu ɖó gbětótló Síni tɔn mɛ: Kadɛ́ci xó ɖɔ wɛ è ɖe.

³⁷ Yě gosín Kadɛ́ci, bó ɖó gɔnu ɖó Hɔ́ɔ só ɔ́ kpá, ɖo Edɔ́mu tɔ ɔ́ tó.

³⁸ Vɔ̌sánú-xwlémawutɔ́ Aalɔ́ɔn xá Hɔ́ɔ só ɔ́ jí lě e Mawu Mavɔmavɔ ɖɔ n'i gbɔn é. Fínɛ́ wɛ é kú ɖe; Izlayɛ́li ví lɛ́ɛ gosín Ejípu ɔ́, xwe tɔn kanɖégɔ́ ɔ́ (40) mɛ wɛ é kú ɖo sun atɔ́ɔ́ngɔ́ ɔ́ sín azǎn nukɔntɔn ɔ́ gbe.

³⁹ Xwe kantɔn-nukún-atɔn (123) wɛ Aalɔ́ɔn ɖó hwenu e é kú ɖo Hɔ́ɔ só ɔ́ jí é.

⁴⁰ Hwenɛ́nu wɛ axɔ́sú Aladi tɔn, Kanáanu ɔ́ se ɖɔ Izlayɛ́li ví lɛ́ɛ wá. Kanáa to ɔ́ sín afɔligbé wɛ é nɔ́ nɔ.

⁴¹ Izlayɛ́li ví lɛ́ɛ gosín Hɔ́ɔ só ɔ́ jí, bó ɖó gɔnu ɖó Salumɔ́na.

⁴² Yě gosín Salumɔ́na bó ɖó gɔnu ɖó Punɔni.

⁴³ Yě gosín Punɔni, bó ɖó gɔnu ɖó Ovɔ́ti.

⁴⁴ Yě gosín Ovɔ́ti, bó ɖó gɔnu ɖó Iyé-Avalímu, ɖo Mɔwabu sín dogbó jí.

⁴⁵ Yě gosín Iyé-Avalímu, bó ɖó gɔnu ɖó Divɔ́ni-Gadi.

⁴⁶ Yě gosín Divɔ́ni-Gadi, bó ɖó gɔnu ɖó Alumɔ́ni-Divlatayima.

⁴⁷ Yě gosín Alumɔ́ni-Divlatayima, bó ɖó gɔnu ɖó Avalímu sín sókan lɛ́ɛ mɛ, ɖo Nɛbo nukɔn.

⁴⁸ Yě gosín Avalímu sín sókan lɛ́ɛ mɛ, bó ɖó gɔnu ɖó ayǐkúngban wɛnjɛ Mɔwabu tɔn lɛ́ɛ jí, ɖo Judɛ́ɛn tɔ ɔ́ kpá, ɖo Jeliko nukɔn.

⁴⁹ Yě ɖǒ gɔnu ɖó Judɛ́ɛn tɔ ɔ́ kpá, bɛ́ sín Bɛti-Yesimɔ́ti káká yi Avɛ́li-Citímu, ɖo ayǐkúngban wɛnjɛ Mɔwabu tɔn lɛ́ɛ jí.

Mawu ná gbe ɖɔ Izlayɛ́li ví lɛ́ɛ ní má Kanáa to

⁵⁰ Mawu Mavɔmavɔ ɖɔ xó nú Mɔyízi ɖo ayǐkúngban wɛnjɛ Mɔwabu tɔn lɛ́ɛ jí, ɖo Judɛ́ɛn tɔ ɔ́ kpá, ɖo Jeliko nukɔn. É ɖɔ n'i ɖɔ

⁵¹ ní ɖɔ nú Izlayɛ́li ví lɛ́ɛ ɖɔ: “Ényí mi dó asá Judɛ́ɛn tɔ ɔ́, bó byɔ́ Kanáa to mɛ ɔ́,

⁵² mi ná nya mɛ e ɖo to ɔ́ mɛ lɛ́ɛ bǐ; mi ná gba awǐnnya e yě sɔ́ dó lí vodún ná lɛ́ɛ bǐ; mi ná gba bǒcyɔ yětɔn e yě sínsín gan dó bló ná lɛ́ɛ bǐ, bó ná gba vodún xwé yětɔn lɛ́ɛ bǐ.

⁵³ Mi ná yí to ɔ́, bó ná jɛ fínɛ́. Đó nyɛ wɛ ná to ɔ́ mi, bɔ é ná nyí mitɔn.

⁵⁴ Mi ná nyi akɔ dó to ɔ́, bó ná má nú hɛ̌nnu mitɔn lɛ́ɛ ɖokpó ɖokpó. Hɛ̌nnu e mɛ gbɛtɔ́ sukpɔ́ ɖe lɛ́ɛ ná yí ayǐkúngban bɔ é ná gbló hú hɛ̌nnu e mɛ gbɛtɔ́ má sukpɔ́ ɖe ǎ lɛ́ɛ. Mɛ ɖokpó ɖokpó ɖó ná yí ayǐkúngban e è nǎ nyi akɔ bo ná ná ɛ é. Mi ná yí ayǐkúngban ɔ́, bɔ é ná nyí mitɔn, lě e tɔ́ mitɔn lɛ́ɛ sín akɔta lɛ́ɛ ɖe gbɔn é.

⁵⁵ Lo ɔ́, nú mi ma nya mɛ e ɖo to ɔ́ mɛ lɛ́ɛ bǐ ǎ ɔ́, mɛ e mi ná jó dó ɖo yě mɛ lɛ́ɛ ná cí nǔ wɛ jɛ nukún jí nú mi ɖɔhun, nyɛ̌ví wɛ ɖo adaja mɛ nú mi ɖɔhun. Yě ná nyí kɛntɔ́ mitɔn, ɖo to e mɛ mi ná yi jɛ é mɛ.

⁵⁶ Ényí é jɛ mɔ̌ ɔ́, nǔ e un ɖɔ un ná wa xá yě ɔ́, midɛɛ lɛ́ɛ wɛ un ná wa xá.”