Kɛ́nsísɔ́ 30 - MAWUXÓWÉMA

¹ Mɔyízi ɖɔ nǔ e Mawu Mavɔmavɔ ɖɔ n'i lɛ́ɛ bǐ nú Izlayɛ́li ví lɛ́ɛ.

Sɛ́n e ɖɔ xó dó akpádídó wú é

² Énɛ́ ɔ́ gúdo ɔ́, Mɔyízi ɖɔ xó ɖěvo e Mawu Mavɔmavɔ ɖɔ n'i lɛ́ɛ nú akɔta Izlayɛ́li tɔn sín gǎn lɛ́ɛ. É ɖɔ:

³ “Súnnu ɖé dó akpá ɖɔ émí ná xwlé nǔníná ɖé Mawu Mavɔmavɔ, abǐ é xwlé nǔ ɖɔ émí kún ná bló nǔɖé ó ɔ́, é ná bló nǔ e é ɖɔ é; ɖě ná hwe ɖ'é mɛ ǎ.

⁴ “Mǐ ní ɖɔ ɖyɔ̌vǐ ɖé tíin, bɔ hwenu e é kpo ɖo tɔ́ tɔn xwé ɔ́, é dó akpá ɖé ɖɔ émí ná xwlé nǔníná ɖé Mawu Mavɔmavɔ, abǐ é xwlé nǔ ɖɔ émí kún ná bló nǔɖé ó ɔ́,

⁵ ényí tɔ́ tɔn se bó má ɖɔ xó ɖěbǔ n'i d'é wú ǎ ɔ́, nyɔ̌nu énɛ́ ɔ́ ɖó ná ɖe akpá e é dó lɛ́ɛ.

⁶ Lo ɔ́, nú tɔ́ tɔn se bó gbɛ́ n'i gbe e gbe é se ɔ́, é sɔ́ ná ɖe akpá e é dó lɛ́ɛ ǎ. Mawu Mavɔmavɔ ka ná sɔ́ hwɛ kɛ ɛ, ɖó tɔ́ tɔn wɛ gbɛ́ n'i.

⁷ “Din ɔ́, mǐ ní ɖɔ ɖyɔ̌vǐ ɖé tíin, bó dó akpá, abǐ é xwlé nǔ, bó ké ya ná ǎ. Ée é bló énɛ́ ɔ́ gúdo ɔ́, é wá da asú.

⁸ Ényí asú tɔn wá se, bó má ɖɔ xó ɖěbǔ n'i d'é wú gbe e gbe é se ɔ́ ǎ ɔ́, é ní tunwun ɖɔ akpá e émí dó ɔ́ kpó nǔ e émí xwlé ɔ́ kpó kpo ɖo te.

⁹ Lo ɔ́, nú asú tɔn se bó gbɛ́ n'i gbe e gbe é se ɔ́, akpá e é dó ɔ́ kpó nǔ e é xwlé ɔ́ kpó sɔ́ ná wa azɔ̌ ǎ, bɔ Mawu Mavɔmavɔ ka ná sɔ́ akpá e má ɖe ǎ ɔ́ sín hwɛ kɛ ɛ.

¹⁰ “Asúkúsi ɖé abǐ nyɔ̌nu e asú tɔn gbɛ́ ɛ ɔ́ dó akpá ɖé ɔ́, é ɖó ná ɖe akpá e é dó ɔ́.

¹¹ “Ényí nyɔ̌nu ɖé ɖo asúxwé, bó dó akpá abǐ é xwlé nǔ,

¹² bɔ asú tɔn se, bó má gbɛ́ n'i ǎ ɔ́, nyɔ̌nu ɔ́ ɖó ná ɖe akpá e é dó lɛ́ɛ.

¹³ Lo ɔ́, nú asú tɔn gbɛ́ n'i gbe e gbe é se ɔ́, é sɔ́ ná ɖe akpá e é dó lɛ́ɛ ǎ, Mawu Mavɔmavɔ ka ná sɔ́ hwɛ kɛ ɛ, ɖó asú tɔn gbɛ́ n'i.

¹⁴ Hǔn ényí nyɔ̌nu ɖé dó akpá ɖé abǐ é xwlé nǔ ɖɔ émí ná bló nǔɖé ɔ́, asú tɔn sixú yí gbe ná, é ká sixú gbɛ́.

¹⁵ Ényí nyɔ̌nu ɔ́ sín asú se, bó má ɖɔ xó ɖěbǔ d'é wú n'i ǎ, bɔ azǎn jɛ dó ɔ́, gbe wɛ é yí nú akpá e nyɔ̌nu ɔ́ dó ɔ́, abǐ nǔ e é xwlé ɔ́, ɖó é kɛ nu d'é wú n'i gbe e gbe é se ɔ́ ǎ.

¹⁶ Lo ɔ́, nú gbe e gbe é se xó ɔ́ kó dín cóbɔ é wá gbɛ́ n'i ɔ́, kɔ tɔn wɛ hwɛ e asi tɔn hu ɔ́ ná nɔ.”

¹⁷ Sɛ́n e Mawu Mavɔmavɔ dó nú Mɔyízi, bɔ yě ɖɔ xó dó akpádídó e ɖo asú kpó asi kpó tɛ́ntin ɔ́ wú, abǐ tɔ́ kpó vǐ kpó tɛ́ntin hwenu e vǐ ɔ́ kpo ɖo tɔ́ tɔn xwé ɔ́ wú lɛ́ɛ nɛ́.