Kɛ́nsísɔ́ 26 - MAWUXÓWÉMA

¹ Mawu Mavɔmavɔ ɖɔ nú Mɔyízi kpó vɔ̌sánú-xwlémawutɔ́ Eleazáa, Aalɔ́ɔn ví ɔ́ kpó ɖɔ:

² “Mi sɔ́ Izlayɛ́li ví lɛ́ɛ bǐ sín kɛ́n; mi ná xwedó hɛ̌nnu yětɔn lɛ́ɛ, bó ná sɔ́ súnnu e kó ɖó xwe ko lɛ́ɛ kpódó éé kó ɖó hú mɔ̌ bó sixú fun ahwan lɛ́ɛ bǐ kpó sín kɛ́n.”

³ Énɛ́ ɔ́, Mɔyízi kpó vɔ̌sánú-xwlémawutɔ́ Eleazáa kpó ɖɔ xó nú Izlayɛ́li ví lɛ́ɛ ɖo ayǐkúngban wɛnjɛ Mɔwabu tɔn lɛ́ɛ jí, ɖo Judɛ́ɛn tɔ ɔ́ kpá, ɖo Jeliko nukɔn. Yě ɖɔ nú yě ɖɔ

⁴ Mawu Mavɔmavɔ ɖɔ nú Mɔyízi ɖɔ è nǐ sɔ́ súnnu e kó ɖó xwe ko lɛ́ɛ kpó éé kó ɖó hú mɔ̌ lɛ́ɛ bǐ kpó sín kɛ́n. Akɔta Izlayɛ́li tɔn e gosín Ejípu lɛ́ɛ ɖíe:

⁵ Akɔta Hwlibɛ́ni tɔn ɔ́ wɛ jɛ nukɔn; nukɔngbéví Jakɔ́bu tɔn wɛ é nyí. Vǐ súnnu e ɖo akɔta Hwlibɛ́ni tɔn ɔ́ mɛ lɛ́ɛ ɖíe: Hanɔki kpó vǐ tɔn lɛ́ɛ kpó; Palúu kpó vǐ tɔn lɛ́ɛ kpó;

⁶ Ɛslɔ́ni kpó vǐ tɔn lɛ́ɛ kpó;

⁷ Hwlibɛ́ni ví lɛ́ɛ sín xwédo lɛ́ɛ nɛ́. Yě bló súnnu adɔ̌kpo we afɔwó-afatɔ́n nǔwɔntɔn kantɔn wǒ (43.730).

⁸ Palúu ví súnnu lɛ́ɛ ɖokpó nɔ́ nyí Eliavu.

⁹ Eliavu ví súnnu lɛ́ɛ ɖíe: Nɛmuwɛ́li, Datáni kpódó Abilámu kpó. Datáni kpó Abilámu kpó ɔ́, gbɛtɔ́ nukúnɖéjí Izlayɛ́li tɔn lɛ́ɛ mɛ wɛ yě ɖe. Yědɛɛ lɛ́ɛ wɛ fɔ́n gǔ dó Mɔyízi kpó Aalɔ́ɔn kpó jí. Hwenu e Kolée kpó ahwan tɔn lɛ́ɛ kpó fɔ́n gǔ dó Mawu Mavɔmavɔ jí ɔ́, yě wɛ nɔ jǐ yětɔn.

¹⁰ Hwenɛ́nu ɔ́, ayǐkúngban kɛ nu bo mi yě kpó Kolée kpó. Gbe énɛ́ gbe wɛ Kolée kpó ahwan tɔn lɛ́ɛ kpó bǐ kú, bɔ súnnu afɔɖé kanɖé wǒ (250) fyɔ́ gbɛɖe gbɛɖe ɖo myɔ mɛ, bɔ énɛ́ kplɔ́n nǔ mɛ e kpo lɛ́ɛ.

¹¹ É ká ɖo mɔ̌ có Kolée ví lɛ́ɛ ɖě kú hwenɛ́nu ǎ.

¹² Vǐ súnnu e ɖo akɔta Sinmɛnyɔ́ɔ tɔn mɛ lɛ́ɛ ɖíe: Nɛmuwɛ́li kpó vǐ tɔn lɛ́ɛ kpó; Yamini kpó vǐ tɔn lɛ́ɛ kpó; Yakíni kpó vǐ tɔn lɛ́ɛ kpó.

¹³ Zeláxi kpó vǐ tɔn lɛ́ɛ kpó; Cawúlu kpó vǐ tɔn lɛ́ɛ kpó.

¹⁴ Sinmɛnyɔ́ɔ ví lɛ́ɛ sín xwédo lɛ́ɛ nɛ́. Yě bló súnnu adɔ̌kpo ɖě afɔwó-afɔɖé (22.200).

¹⁵ Vǐ súnnu e ɖo akɔta Gadi tɔn ɔ́ mɛ lɛ́ɛ ɖíe: Sefɔ́ni kpó vǐ tɔn lɛ́ɛ kpó, Hagíi kpó vǐ tɔn lɛ́ɛ kpó, Cúni kpó vǐ tɔn lɛ́ɛ kpó,

¹⁶ Ozini kpo vǐ tɔn lɛ́ɛ kpó, Ehli kpó vǐ tɔn lɛ́ɛ kpó.

¹⁷ Alodu kpó vǐ tɔn lɛ́ɛ kpó, Aleli kpó vǐ tɔn lɛ́ɛ kpó,

¹⁸ Gadi ví lɛ́ɛ sín xwédo lɛ́ɛ nɛ́. Yě bló súnnu adɔ̌kpo we afɔwe kanwe ko (40.500).

¹⁹ Vǐ súnnu e ɖo akɔta Judáa tɔn mɛ lɛ́ɛ ɖíe: Ɛ́ɛ kpó Ɔɔnáni kpó. Kanáa tomɛ wɛ Ɛ́ɛ kpó Ɔɔnáni kpó kú ɖe.

²⁰ Vǐ súnnu e kpo ɖo akɔta Judáa tɔn ɔ́ mɛ lɛ́ɛ ɖíe: Cela kpó vǐ tɔn lɛ́ɛ kpó, Pɛlɛ́si kpó vǐ tɔn lɛ́ɛ kpó, Zeláxi kpó vǐ tɔn lɛ́ɛ kpó.

²¹ Vǐ súnnu e ɖo xwédo Pɛlɛ́si tɔn ɔ́ mɛ lɛ́ɛ ɖíe: Ɛslɔ́ni kpó vǐ tɔn lɛ́ɛ kpó, Hamúlu kpó vǐ tɔn lɛ́ɛ kpó.

²² Judáa ví lɛ́ɛ sín xwédo lɛ́ɛ nɛ́. Yě bló súnnu adɔ̌kpo atɔn děgba ɛnɛ afɔwe kanwe ko (76.500).

²³ Vǐ súnnu e ɖo akɔta Isakáa tɔn ɔ́ mɛ lɛ́ɛ ɖíe: Tola kpó vǐ tɔn lɛ́ɛ kpó, Púwa kpó vǐ tɔn lɛ́ɛ kpó.

²⁴ Yacúvu kpó vǐ tɔn lɛ́ɛ kpó, Cimulɔ́ni kpó vǐ tɔn lɛ́ɛ kpó,

²⁵ Isakáa ví lɛ́ɛ sín xwédo lɛ́ɛ nɛ́. Yě bló súnnu adɔ̌kpo atɔn děgba ɖě afɔɖé kanwe ko (64.300).

²⁶ Vǐ súnnu e ɖo akɔta Zabulɔ́ɔn tɔn ɔ́ mɛ lɛ́ɛ ɖíe: Sɛlɛ́di kpó vǐ tɔn lɛ́ɛ kpó, Elɔ́ni kpó vǐ tɔn lɛ́ɛ kpó, Yaxileɛ́li kpó vǐ tɔn lɛ́ɛ kpó.

²⁷ Zabulɔ́ɔn ví lɛ́ɛ sín xwédo lɛ́ɛ nɛ́. Yě bló súnnu adɔ̌kpo atɔn afɔwe kanwe ko (60.500).

²⁸ Vǐ súnnu e ɖo Jozɛ́fu ví Manasée kpó Eflayímu kpó sín akɔta mɛ lɛ́ɛ ɖíe:

²⁹ Vǐ súnnu e ɖo akɔta Manasée tɔn ɔ́ mɛ lɛ́ɛ ɖíe: Makíi kpó vǐ tɔn lɛ́ɛ kpó; Galadi kpó vǐ tɔn lɛ́ɛ kpó, Galadi ɔ́ Makíi ví wɛ.

³⁰ Galadi ví súnnu lɛ́ɛ sín nyǐkɔ ɖíe: Iezɛ́ɛ kpó vǐ tɔn lɛ́ɛ kpó, Helɛ́ki kpó vǐ tɔn lɛ́ɛ kpó,

³¹ Asiliɛ́li kpó vǐ tɔn lɛ́ɛ kpó, Cɛkɛ́mu kpó vǐ tɔn lɛ́ɛ kpó,

³² Cemida kpó vǐ tɔn lɛ́ɛ kpó, Hefɛ́ɛ kpó vǐ tɔn lɛ́ɛ kpó.

³³ Selofɛxádi Hefɛ́ɛ ví súnnu ɔ́ ji vǐ súnnu ɖě ǎ; nyɔ̌nu kɛ́ɖɛ́ wɛ é ji. Vǐ lɛ́ɛ sín nyǐkɔ ɖíe: Maxla, Nɔwa, Hogla, Miluka kpódó Tíisa kpó.

³⁴ Manasée sín xwédo lɛ́ɛ nɛ́. Yě bló súnnu adɔ̌kpo we děgba atɔn nǔwɔntɔn kanwe ko (52.700).

³⁵ Vǐ súnnu e ɖo akɔta Eflayímu tɔn ɔ́ mɛ lɛ́ɛ ɖíe: Cutɛláxi kpó vǐ tɔn lɛ́ɛ kpó. Bɛkɛ́ɛ kpó vǐ tɔn lɛ́ɛ kpó, Taxáni kpó vǐ tɔn lɛ́ɛ kpó,

³⁶ Ɛláni kpó vǐ tɔn lɛ́ɛ kpó. Ɛláni ɔ́, Cutɛláxi ví wɛ.

³⁷ Eflayímu ví súnnu lɛ́ɛ sín xwédo lɛ́ɛ nɛ́. Yě bló súnnu adɔ̌kpo ɖě děgba atɔn afɔwe kanwe ko (32.500). Jozɛ́fu sín vǐ lɛ́ɛ bǐ wɛ ɖo akɔta we énɛ́ lɛ́ɛ mɛ.

³⁸ Vǐ súnnu e ɖo akɔta Bɛnjamɛ́ɛ tɔn ɔ́ mɛ lɛ́ɛ ɖíe: Bɛ́la kpó vǐ tɔn lɛ́ɛ kpó, Acibɛ́li kpó vǐ tɔn lɛ́ɛ kpó, Axilámu kpó vǐ tɔn lɛ́ɛ kpó,

³⁹ Cefufámu kpó vǐ tɔn lɛ́ɛ kpó, Hufamu kpó vǐ tɔn lɛ́ɛ kpó,

⁴⁰ Aadi kpó vǐ tɔn lɛ́ɛ kpó; Naamáni kpó vǐ tɔn lɛ́ɛ kpó. Aadi kpó Naamáni kpó ɔ́, Bɛ́la ví wɛ yě nyǐ.

⁴¹ Bɛnjamɛ́ɛ ví súnnu lɛ́ɛ sín xwédo lɛ́ɛ nɛ́. Yě bló súnnu adɔ̌kpo we děgba ɖě afɔtántɔn (45.600).

⁴² Xwédo ɖokpó géé wɛ ɖo akɔta Dan tɔn ɔ́ mɛ; é wɛ nyí Cuxámu kpó vǐ tɔn lɛ́ɛ kpó. Dan ví súnnu lɛ́ɛ sín xwédo ɔ́ nɛ́.

⁴³ Súnnu adɔ̌kpo atɔn děgba ɖě afɔwe (64.400) wɛ ɖo xwédo énɛ́ ɔ́ mɛ.

⁴⁴ Vǐ súnnu e ɖo akɔta Acɛ́ɛ tɔn ɔ́ mɛ lɛ́ɛ ɖíe: Yimuna kpó vǐ tɔn lɛ́ɛ kpó, Yicíwi kpó vǐ tɔn lɛ́ɛ kpó, Beliya kpó vǐ tɔn lɛ́ɛ kpó,

⁴⁵ Hebɛ́ɛ kpó vǐ tɔn lɛ́ɛ kpo, Malukiyɛ́li kpó vǐ tɔn lɛ́ɛ kpó. Hebɛ́ɛ kpó Malukiyɛ́li kpó ɔ́, Beliya ví wɛ yě nyǐ.

⁴⁶ Acɛ́ɛ ji vǐ nyɔ̌nu ɖokpó, bɔ è nɔ ylɔ́ ɛ ɖɔ Sɛláxi.

⁴⁷ Acɛ́ɛ ví súnnu lɛ́ɛ sín xwédo lɛ́ɛ nɛ́. Yě bló súnnu adɔ̌kpo we děgba atɔn afɔtɛ́nwe (53.400).

⁴⁸ Vǐ súnnu e ɖo akɔta Nɛfutali tɔn ɔ́ mɛ lɛ́ɛ ɖíe: Yaxiseɛ́li kpó vǐ tɔn lɛ́ɛ kpó, Gúni kpó vǐ tɔn lɛ́ɛ kpó,

⁴⁹ Yesɛ́ɛ kpó vǐ tɔn lɛ́ɛ kpó, Cilɛ́mu kpó vǐ tɔn lɛ́ɛ kpó,

⁵⁰ Nɛfutali ví súnnu lɛ́ɛ sín xwédo lɛ́ɛ nɛ́. Yě bló súnnu adɔ̌kpo we děgba ɖě afɔtɛ́nwe (45.400).

⁵¹ Izlayɛ́li ví e sín kɛ́n è sɔ́ lɛ́ɛ nɛ́. Yě bǐ bló súnnu adɔ̌kpo gban afɔtántɔn kantɔn wǒ (601.730).

Lě e Mɔyízi ná má to ɔ́ gbɔn é

⁵² Mawu Mavɔmavɔ ɖɔ nú Mɔyízi ɖɔ:

⁵³ “È nǎ má to ɔ́ nú akɔta énɛ́ lɛ́ɛ, bɔ é ná nyí yětɔn; è nǎ xwedó lě e gbɛtɔ́ sukpɔ́ ɖo akɔta ɖokpó ɖokpó mɛ gbɔn ɔ́ bó má nú yě.

⁵⁴ Akɔta lɛ́ɛ ɖokpó ɖokpó ná yí ayǐkúngban e jɛ xá mɛ nabí e è mɔ ɖo akɔta ɔ́ mɛ lɛ́ɛ é; akɔta e mɛ gbɛtɔ́ sukpɔ́ ɖe lɛ́ɛ ná yí ayǐkúngban bɔ é ná gbló hú akɔta e mɛ gbɛtɔ́ má sukpɔ́ ɖe ǎ lɛ́ɛ.

⁵⁵ Lo ɔ́, akɔ wɛ è nǎ nyi dó má to ɔ́; è nǎ kpɔ́n lě e gbɛtɔ́ sukpɔ́ ɖo akɔta ɖokpó ɖokpó mɛ gbɔn ɔ́ bó dó nyi akɔ ɔ́.

⁵⁶ Akɔ wɛ è nǎ nyi bó ná ná ayǐkúngban e jɛ xá akɔta e mɛ gbɛtɔ́ sukpɔ́ ɖe lɛ́ɛ kpó akɔta e mɛ gbɛtɔ́ má sukpɔ́ ɖe ǎ é kpó.”

Mɔyízi kpó Eleazáa kpó sɔ́ Levíi ví lɛ́ɛ sín kɛ́n azɔn wegɔ́

⁵⁷ Vǐ súnnu e sín kɛ́n è sɔ́ ɖo akɔta Levíi tɔn ɔ́ mɛ lɛ́ɛ ɖíe: Gɛɛcɔ́ni kpó vǐ tɔn lɛ́ɛ kpó, Kexáti kpó vǐ tɔn lɛ́ɛ kpó, Mɛlali kpó vǐ tɔn lɛ́ɛ kpó.

⁵⁸ Levíi sín hɛ̌nnu lɛ́ɛ ɖíe: hɛ̌nnu Livuni tɔn, hɛ̌nnu Eblɔ́n tɔn, hɛ̌nnu Maxli tɔn, hɛ̌nnu Muci tɔn, hɛ̌nnu Kolée tɔn; Kexáti wɛ nyí Amulámu sín tɔ́.

⁵⁹ Amulámu sín asi ɔ́ nyí Yokɛvɛ́di; Levíi ví wɛ, bɔ è ji i ɖo Ejípu. Vǐ atɔn wɛ Yokɛvɛ́di ji nú Amulámu; yě wɛ nyí Aalɔ́ɔn, Mɔyízi kpó Miliamu kpó. Miliamu ɔ́, nyɔ̌nu wɛ.

⁶⁰ Vǐ súnnu ɛnɛ wɛ Aalɔ́ɔn ji. Vǐ tɔn lɛ́ɛ sín nyǐkɔ ɖíe: Nadavu, Avihu, Eleazáa kpó Itamáa kpó.

⁶¹ Lo ɔ́, Nadavu kpó Avihu kpó hɛn myɔ yi Mawu Mavɔmavɔ nukɔn bó kú.

⁶² Levíi ví súnnu e kó ɖó sun ɖokpó, kpó éé kó ɖó hú mɔ̌ lɛ́ɛ kpó sín kɛ́n wɛ è sɔ́, bɔ bǐ bló adɔ̌kpo ɖě afɔwó-afatɔ́n (23.000). È xa yědɛɛ lɛ́ɛ dó Izlayɛ́li ví ɖě lɛ́ɛ mɛ ǎ, ɖó è ɖó ná ná ayǐkúngban ɖě yědɛɛ lɛ́ɛ mɛ ɖě lɛ́ɛ ɖɔhun ǎ.

È sɔ́ kɛ́n ɔ́ fó

⁶³ Hwenu e Mɔyízi kpó vɔ̌sánú-xwlémawutɔ́ Eleazáa kpó sɔ́ Izlayɛ́li ví lɛ́ɛ sín kɛ́n ɖo ayǐkúngban wɛnjɛ Mɔwabu tɔn lɛ́ɛ jí, ɖo Judɛ́ɛn tɔ ɔ́ kpá, ɖo Jeliko nukɔn ɔ́, Izlayɛ́li ví nabí e sín kɛ́n è sɔ́ lɛ́ɛ nɛ́.

⁶⁴ Izlayɛ́li ví e sín kɛ́n Mɔyízi kpó vɔ̌sánú-xwlémawutɔ́ Aalɔ́ɔn kpó sɔ́ ɖo gbětótló Sinayíi tɔn ɔ́ mɛ lɛ́ɛ ɖěbǔ ɖo Izlayɛ́li ví énɛ́ lɛ́ɛ mɛ ǎ.

⁶⁵ É sɔ́ kpo yě ɖě ǎ, ɖó Mawu Mavɔmavɔ ko ɖɔ nú yě ɖ'ayǐ ɖɔ yě bǐ ná kú ɖo gbětótló mɛ, bɔ é kún sɔ́ ná kpo mɛ ɖé zɛ Kalɛ́bu Yefunnɛ́ɛ ví ɔ́ kpó Jozuwée Nuni ví ɔ́ kpó wú ó.