Kɛ́nsísɔ́ 25 - MAWUXÓWÉMA

¹ Izlayɛ́li ví lɛ́ɛ ɖó gɔnu ɖó Citímu. Ée yě ɖó gɔnu ɖó fínɛ́ ɔ́, yě jɛ aga lɛ xá ɖyɔ̌vǐ Mɔwabu tɔn lɛ́ɛ jí.

² Đyɔ̌vǐ lɛ́ɛ dɔn yě bɔ yě jɛ vɔ̌sánú xwlé vodún Mɔwabu tɔn lɛ́ɛ jí bó nɔ́ ɖu nǔ e yě xwlé vodún yětɔn lɛ́ɛ é. Yě nɔ́ sɛn vodún yětɔn lɛ́ɛ xá yě.

³ Yě nɔ́ sɛn vodún Baalu e ɖo Peɔ́ɔ é, bɔ Mawu Mavɔmavɔ sin xomɛ dó yě,

⁴ bó ɖɔ nú Mɔyízi ɖɔ: “Kplé togun Izlayɛ́li tɔn ɔ́ sín gǎn lɛ́ɛ bǐ, bó dó kan kɔ nú yě ɖo nyɛ Mawu Mavɔmavɔ nukɔn ɖo hwesivɔ́nu cíɖíɖí. Énɛ́ ɔ́, xomɛ ɖaxó e un sin dó mi ɔ́ ná fá.”

⁵ Mɔyízi ɖɔ nú gǎn Izlayɛ́li tɔn lɛ́ɛ ɖɔ: “Mi mɛ ɖokpó ɖokpó ní hu mɛ tɔn e ɖo vodún Baalu Peɔ́ɔ tɔn sɛn wɛ lɛ́ɛ.”

⁶ Hwenu e Mɔyízi ɖo xó énɛ́ lɛ́ɛ ɖɔ nú gǎn lɛ́ɛ wɛ ɔ́, Izlayɛ́li ví ɖokpó kplá Madiáani ví nyɔ̌nu ɖokpó wá mɛ tɔn lɛ́ɛ mɛ, bɔ Mɔyízi kpó Izlayɛ́li ví ɖě lɛ́ɛ kpó mɔ ɛ. Yě bǐ kó kplé ɖo Goxɔ ɔ́ sín ali nu bo ɖo avǐ ya wɛ hwenɛ́nu.

⁷ Ée yě mɔ yě ɔ́, vɔ̌sánú-xwlémawutɔ́ Pínxási, Eleazáa ví, Aalɔ́ɔn vívú ɔ́ sí te sín agun ɔ́ mɛ; é zé hwǎn tɔn,

⁸ bó jɛ nya Izlayɛ́li ví ɔ́ gúdo byɔ́ Goxɔ tɔn mɛ, bó sɔ́ hwǎn yě mɛ we lɛ́ɛ. É sɔ́ hwǎn adɔ mɛ nú nya Izlayɛ́li ví ɔ́ kpó nyɔ̌nu Madiáani ɔ́ kpó bó hu yě. Ée é bló mɔ̌ tlóló ɔ́, nǔ nyanya e ɖo jijɛ dó Izlayɛ́li ví lɛ́ɛ jí wɛ ɔ́ nɔ te.

⁹ Nǔ nyanya énɛ́ e jɛ dó yě jí ɔ́, gbɛtɔ́ adɔ̌kpo ɖě děgba (24.000) wɛ kú ɖ'é mɛ.

¹⁰ Mawu Mavɔmavɔ ɖɔ nú Mɔyízi ɖɔ:

¹¹ “Vɔ̌sánú-xwlémawutɔ́ Pínxási, Eleazáa ví, Aalɔ́ɔn vívú ɔ́ ɖó xomɛ e sin dó Izlayɛ́li ví lɛ́ɛ wɛ un ɖe ɔ́ te, ɖó hun e é jɛ dó jǐ ce ɖo tɛ́ntin yětɔn ɔ́ syɛ́n ɖésú. Nǔgbó ɔ́, un ɖɔ nyɛ ɖokpónɔ géé wɛ nyí Mawu e yě ná nɔ́ sɛn é. Amɔ̌, lě e Pínxási jɛ hun dó jǐ ce gbɔn ɔ́ zɔ́n bɔ un sú kún yětɔn dó ǎ.

¹² Din ɔ́, a nǎ ɖɔ n'i ɖɔ un ná jɛ fífá sín akɔ xá ɛ.

¹³ Akɔjijɛ énɛ́ ɔ́ e un ná jɛ xá ɛ ɔ́ ná nyí é kpó kúnkan tɔn lɛ́ɛ kpó tɔn, bó ná zɔ́n bɔ yě ná nyí vɔ̌sánú-xwlémawutɔ́ káká sɔ́yi. É ɖe wǎn yíyí e é ɖó nú nyɛ Mawu tɔn ɔ́ xlɛ́, bɔ é sín énɛ́ ɔ́ wú, bɔ un sɔ́ hwɛ kɛ Izlayɛ́li ví lɛ́ɛ.”

¹⁴ Izlayɛ́li ví e è hu kpó nyɔ̌nu Madiáani ɔ́ kpó ɔ́ nɔ́ nyí Zimuli, bo nyí Salu ví. Hɛ̌nnugán ɖokpó wɛ é nyí ɖo akɔta Sinmɛnyɔ́ɔ tɔn mɛ.

¹⁵ Nyɔ̌nu Madiáani e è hu ɔ́ nɔ́ nyí Kɔzibi, bo nyí Súu ví. Súu ɔ́, hɛ̌nnugán xwédo gěgé tɔn wɛ é nyí, ɖo akɔta Madiáani lɛ́ɛ tɔn ɖokpó mɛ.

¹⁶ Mawu Mavɔmavɔ ɖɔ nú Mɔyízi ɖɔ:

¹⁷ “Tɔ́n ahwan Madiáani lɛ́ɛ, bó sú kún yětɔn dó.

¹⁸ Yě sɔ́ sísɛ́ ɖó nukɔn nú mi, bo flú mi ɖo Peɔ́ɔ xó ɔ́ kpó Kɔzibi xó ɔ́ kpó mɛ, bó dó ɖe lě e yě sɛ́ gbɔn ɔ́ xlɛ́. Kɔzibi xó ɔ́, gǎn Madiáani tɔn lɛ́ɛ ɖokpó sín vǐ nyɔ̌nu wɛ; nɔví yětɔn nyɔ̌nu wɛ é nyí. É wɛ è hu, hwenu e nǔ nyanya ɖo jijɛ ɖo Peɔ́ɔ wɛ é.”

È sɔ́ Izlayɛ́li ví lɛ́ɛ sín kɛ́n azɔn wegɔ́

¹⁹ Ée nǔ nyanya énɛ́ ɔ́ jɛ wá yi ɔ́,