Kɛ́nsísɔ́ 23 - MAWUXÓWÉMA

¹ Baláamu ɖɔ nú Balaki ɖɔ: “Mɛ vɔ̌sákpe tɛ́nwe ɖó fí nú mì, bó hɛn nyibúsú tɛ́nwe kpódó agbo tɛ́nwe kpó wá nú mì.”

² Balaki bló nǔ e Baláamu ɖɔ é; énɛ́ ɔ́, Balaki kpó Baláamu kpó sɔ́ nyibúsú ɖokpó ɖokpó, agbo ɖokpó ɖokpó dó sá vɔ̌ ná ɖo vɔ̌sákpe lɛ́ɛ ɖokpó ɖokpó jí.

³ Baláamu ɖɔ nú Balaki ɖɔ: “Nɔ vɔ̌ towe kɔn fí, nú nyɛ má yi nɔ zɔ. Afɔ nyɔ́ ɔ́, Mawu Mavɔmavɔ sixú wá ɖe éɖée xlɛ́ mì. Énɛ́ ɔ́, un ná ɖɔ xó e é ná ɖɔ nú mì ɔ́ nú we.” Ée Baláamu ɖɔ mɔ̌ ɔ́, é yi xá só kpɛví ɖé jí,

⁴ bɔ Mawu wá ɖe éɖée xlɛ́ ɛ ɖo fínɛ́, bɔ Baláamu ɖɔ n'i ɖɔ: “Un mɛ vɔ̌sákpe tɛ́nwe lɛ́ɛ, bó sɔ́ nyibúsú ɖokpó, agbo ɖokpó dó sá vɔ̌ ná ɖo vɔ̌sákpe lɛ́ɛ ɖokpó ɖokpó jí.”

⁵ Mawu Mavɔmavɔ ka ɖɔ xó e Baláamu ɖó ná ɖɔ lɛ́ɛ n'i. Énɛ́ ɔ́ gúdo ɔ́, é ɖɔ n'i ɖɔ ní lɛ́ kɔ yi Balaki gɔ́n, bó yi ɖɔ xó e émí ɖɔ n'i ɔ́ n'i.

⁶ Baláamu ka lɛ́ kɔ yi Balaki gɔ́n nǔgbó, bó mɔ ɛ ɖo vɔ̌ tɔn kɔn, é kpó Mɔwabu sín gǎn lɛ́ɛ bǐ kpó.

⁷ Bɔ Baláamu ɖɔ xó e Mawu Mavɔmavɔ ɖɔ n'i lɛ́ɛ; é ɖɔ: “Balaki wɛ ylɔ́ mì sín Silíi wá; axɔ́sú Mɔwabu tɔn Balaki wɛ ylɔ́ mì sín só ɖaxó zǎnzǎnhwe jí tɔn lɛ́ɛ jí wá. É ɖɔ nú mì ɖɔ: ‘Wǎ dó nu Jakɔ́bu nú mì! Wǎ gblɔ́n adǎn nú Izlayɛ́li nú mì!’

⁸ Nɛ̌ un ka ná dó nu mɛ e Mawu má dó nu ǎ é gbɔn? Mawu Mavɔmavɔ gblɔ́n adǎn nú Izlayɛ́li ǎ, bɔ nyɛ ka ná gblɔ́n adǎn n'i a?

⁹ Un ɖo awǐnnya jí aga bo ɖo togun ɔ́ mɔ sɛ́ dó wɛ. Un ɖo só jí aga bo ɖo togun ɔ́ kpɔ́n sɛ́ dó wɛ. Togun ɖé wɛ bó ɖo vo. É ɖo akɔta ɖě lɛ́ɛ mɛ ǎ.

¹⁰ Mɛ̌ ká sixú xa Jakɔ́bu ví wɔ̌buwɔ́bú énɛ́ lɛ́ɛ, bó ná ɖɔ mɛ nabí e ɛnɛvlɔ́ɖó Izlayɛ́li ví lɛ́ɛ tɔn nyí é? Un byɔ́ ɖɔ má kú kú e hwɛjijɔnɔ lɛ́ɛ kú é. Un byɔ́ ɖɔ gbɛzán ce ní fó yědɛɛ lɛ́ɛ tɔn ɖɔhun.”

¹¹ Balaki ɖɔ nú Baláamu ɖɔ: “Étɛ́ a ka wa nú mì nɛ́? A nǎ dó nu kɛntɔ́ ce lɛ́ɛ wú wɛ un kplá we wá fí, bɔ a ka jɛ ɖɛ xo dó yě jí jí a?”

¹² Baláamu ka kanbyɔ́ ɛ ɖɔ: “Xó e Mawu Mavɔmavɔ ɖɔ nú mì ɔ́ kɛ́ɖɛ́ wɛ un ɖó ná nɔ́ ɖɔ a cé?”

Baláamu xo ɖɛ dó togun Izlayɛ́li tɔn ɔ́ jí azɔn wegɔ́

¹³ Balaki lɛ́ yí xó, bó ɖɔ: “Wǎ nú mǐ nǎ yi tɛn ɖěvo mɛ; a nǎ mɔ Izlayɛ́li ví lɛ́ɛ bǐ ɖo fínɛ́. Fí élɔ́ e mǐ ɖe ɔ́, Izlayɛ́li ví lɛ́ɛ hǎbǔ jɛ́n mɔ wɛ a ɖe. Nú mǐ jɛ fí ɔ́, a nǎ dó nu yě nú mì.”

¹⁴ Ée Balaki ɖɔ mɔ̌ ɔ́, é kplá Baláamu yi káká Sofimu sín gle ɔ́ mɛ, ɖo Pisiga kpó ɔ́ ta. É mɛ vɔ̌sákpe tɛ́nwe ɖó fí énɛ́ lɔmɔ̌, bó sɔ́ nyibúsú ɖokpó, agbo ɖokpó dó sá vɔ̌ ná ɖo vɔ̌sákpe lɛ́ɛ ɖokpó ɖokpó jí.

¹⁵ Baláamu ɖɔ nú Balaki ɖɔ: “Nɔ vɔ̌ towe kɔn fí, nú nyɛ má yi ɖótó Mawu.”

¹⁶ Mawu Mavɔmavɔ wá ɖe éɖée xlɛ́ Baláamu, bó ɖɔ xó e é ɖó ná ɖɔ lɛ́ɛ n'i. Énɛ́ ɔ́ gúdo ɔ́, é ɖɔ n'i ɖɔ é ní lɛ́ kɔ yi Balaki gɔ́n, bó ɖɔ xó e émí ɖɔ n'i ɔ́ n'i.

¹⁷ Baláamu lɛ́ kɔ yi Balaki gɔ́n nǔgbó, bó mɔ ɛ ɖo vɔ̌ tɔn kɔn, é kpódó Mɔwabu sín gǎn lɛ́ɛ bǐ kpó. Bɔ Balaki kanbyɔ́ ɛ ɖɔ: “Xó tɛ́ Mawu Mavɔmavɔ ɖɔ?”

¹⁸ Bɔ Baláamu ɖɔ xó e Mawu Mavɔmavɔ ɖɔ n'i é ɖɔ: “Balaki, sí te, ɖǒtó mì! Sipɔ́ɔ ví, ɖǒtó mì ganjí!

¹⁹ Mawu nyí gbɛtɔ́ bó ná ɖó adingban ǎ. É nyí gbɛtɔ́ví, bó ná lɛ́ kɔ sín nǔ e ná wa wɛ é ɖe ɔ́ gúdo ǎ. Nǔ e é ɖɔ ɔ́, é ná bló ɖ'é jí a cé? Xó e é ɖɔ ɔ́, é ná bló ɖ'é jí a cé?

²⁰ Mawu Mavɔmavɔ wɛ ná gbe mì ɖɔ má xo ɖɛ dó togun ɔ́ jí. Mawu Mavɔmavɔ wɛ xo ɖɛ dó togun ɔ́ jí. Un sixú ɖyɔ́ nǔ ɖěbǔ ɖ'é mɛ ǎ.

²¹ Mawu Mavɔmavɔ mɔ hwɛ ɖě ɖo Jakɔ́bu ví lɛ́ɛ tɛ́ntin ǎ. É mɔ tagba ɖěbǔ ɖo Izlayɛ́li ví lɛ́ɛ tɛ́ntin ǎ. Mawu Mavɔmavɔ, Mawu yětɔn ɖo kpɔ́ xá yě. É wɛ nyí axɔ́sú Izlayɛ́li togun ɔ́ tɔn. É wɛ nyí axɔ́sú e yě bǐ nɔ́ kpa awǒbóbó ná é.

²² Mawu wɛ ɖe yě tɔ́n sín Ejípu. Hlɔ̌nhlɔ́n agbo tɔn wɛ é dó ɖe yě tɔ́n.

²³ Bǒ sixú kpé Jakɔ́bu ví lɛ́ɛ wú ǎ Vodún sixú wa nǔ ɖěbǔ nú yě ǎ. Hwe tɔn nu ko wá su ɔ́, è nǎ ɖɔ nǔ e Mawu wa ɔ́ nú yě.

²⁴ Togun ɖé wɛ bó sí te kinnikínní asi ɖɔhun. É nɔ te kinnikínní ɖɔhun. É má vún kanlin e é hu ɔ́ ɖu ǎ ɔ́, é nɔ́ mlɔ́ ayǐ ǎ. É má nu kanlin e é wlí ɔ́ sín hun ǎ ɔ́, é nɔ́ mlɔ́ ayǐ ǎ.”

²⁵ Balaki ɖɔ nú Baláamu ɖɔ: “Ényí a ma ná dó nu yě ǎ hǔn, bó ma sɔ́ xo ɖɛ ɖě dó yě jí ó.”

²⁶ Bɔ Baláamu ɖɔ n'i ɖɔ: “Un ma ka ko ɖɔ nú we ɖ'ayǐ ɖɔ nǔ e Mawu Mavɔmavɔ ɖɔ nyɛ ní wa lɛ́ɛ bǐ wɛ un ná wa a?”

Baláamu xo ɖɛ dó togun Izlayɛ́li tɔn ɔ́ jí azɔn atɔngɔ́

²⁷ Balaki ka ɖɔ nú Baláamu ɖɔ: “Bo wá nú má lɛ́ kplá we yi tɛn ɖěvo mɛ. Afɔ nyɔ́ ɔ́, Mawu sixú yí gbe ɖɔ a nǐ dó nu togun élɔ́ nú mì ɖo fínɛ́.”

²⁸ Ée Balaki ɖɔ mɔ̌ ɔ́, é kplá Baláamu yi Peɔ́ɔ só ɔ́ ta, ɖo akpáxwé e kpan nukɔn gbětótló é mɛ.

²⁹ Baláamu ɖɔ nú Balaki ɖɔ: “Mɛ vɔ̌sákpe tɛ́nwe ɖó fí nú mì, bó hɛn nyibúsú tɛ́nwe kpódó agbo tɛ́nwe kpó wá nú mì.”

³⁰ Bɔ Balaki bló nǔ e Baláamu ɖɔ é, bɔ é sɔ́ nyibúsú ɖokpó, agbo ɖokpó dó sá vɔ̌ ná ɖo vɔ̌sákpe lɛ́ɛ ɖokpó ɖokpó jí.