Kɛ́nsísɔ́ 2 - MAWUXÓWÉMA

¹ Mawu Mavɔmavɔ lɛ́ ɖɔ nú Mɔyízi kpó Aalɔ́ɔn kpó ɖɔ:

² “Akɔta Izlayɛ́li ví lɛ́ɛ tɔn ɖokpó ɖokpó ɖó ná nɔ ahwansyá tɔn kpá, bɔ hɛ̌nnu ɖokpó ɖokpó ná nɔ asyá tɔn glɔ́. Yě ná nɔ fínɛ́ lɛ́ lɛ̌ dó Mawu xwé ɔ́, bó ná nɔ zɔ nú Mawu xwé ɔ́.

³ “Ahwangɔnu Judáa tɔn ɔ́ kpódó ahwansyá tɔn kpó ná nɔ zǎnzǎnhwe jí. Naxicɔ́ni e nyí Aminadabu sín vǐ, bó nyí akɔta Judáa tɔn ɔ́ sín gǎn ɔ́ ná nɔ yě nu ɖo fínɛ́.

⁴ Súnnu adɔ̌kpo atɔn děgba atɔn afɔwó nǔwɔntɔn (74.600) wɛ è xa bɔ yě nyí ahwanfuntɔ́ tɔn lɛ́ɛ.

⁵ Akɔta Isakáa tɔn sín ahwangɔnu ɔ́ ná bɔ dó wǔ tɔn. Nɛtanɛli e nyí Suwáa sín vǐ, bó nyí akɔta Isakáa tɔn sín gǎn ɔ́ ná nɔ yě nu.

⁶ Súnnu adɔ̌kpo we děgba atɔn afɔwó-afɔwe (54.400) wɛ nyí ahwanfuntɔ́ tɔn lɛ́ɛ.

⁷ Akɔta Zabulɔ́ɔn tɔn sín ahwangɔnu ɔ́ jɛ fínɛ́. Eliavu e nyí Helɔ́ni ví, bó nyí akɔta Zabulɔ́ɔn tɔn sín gǎn ɔ́ ná nɔ yě nu.

⁸ Súnnu adɔ̌kpo we děgba ɛnɛ afɔtɛ́nwe (57.400) wɛ nyí ahwanfuntɔ́ tɔn lɛ́ɛ.

⁹ Énɛ́ ɔ́, ahwanfuntɔ́ e sín kɛ́n è sɔ́ bɔ yě ɖo ahwansyá Judáa tɔn ɔ́ kpá lɛ́ɛ bǐ bló súnnu adɔ̌kpo tɛ́nnɛ děgba ɖě afɔwó-afɔwe (186.400). Togun ɔ́ jɛ ali ɔ́, Judáa sín mɛ lɛ́ɛ wɛ ná nɔ nukɔn.

¹⁰ “Ahwangɔnu Hwlibɛ́ni tɔn ɔ́ kpódó ahwansyá tɔn kpó ná nɔ tofɔligbé. Elisúu e nyí Cedewúu sín vǐ, bó nyí akɔta Hwlibɛ́ni tɔn sín gǎn ɔ́ ná nɔ yě nu.

¹¹ Súnnu adɔ̌kpo we děgba ɖě afɔwó-afɔwe kanwe ko (46.500) sín kɛ́n wɛ è sɔ́, bɔ yě nyǐ ahwanfuntɔ́ tɔn lɛ́ɛ.

¹² Akɔta Sinmɛnyɔ́ɔ tɔn sín ahwangɔnu ɔ́ ná bɔ dó wǔ tɔn. Celumiyɛ́li e nyí Sulicadáyi sín vǐ, bó nyí akɔta Sinmɛnyɔ́ɔ tɔn sín gǎn ɔ́ ná nɔ yě nu.

¹³ Súnnu adɔ̌kpo we děgba ɛnɛ afɔwó-afayizɛ́n kanwe ko (59.300) sín kɛ́n wɛ è sɔ́, bɔ yě nyǐ ahwanfuntɔ́ tɔn lɛ́ɛ.

¹⁴ Bɔ akɔta Gadi tɔn sín ahwangɔnu ɔ́ ná jɛ fínɛ́. Eliyasáfu e nyí Hlewuyɛ́li sín vǐ, bó nyí akɔta Gadi tɔn sín gǎn ɔ́ ná nɔ yě nu.

¹⁵ Súnnu adɔ̌kpo we děgba ɖě afɔtántɔn kanɖé wǒ (45.650) sín kɛ́n wɛ è sɔ́, bɔ yě nyí ahwanfuntɔ́ tɔn lɛ́ɛ.

¹⁶ Énɛ́ ɔ́, ahwanfuntɔ́ e sín kɛ́n è sɔ́, bɔ yě ɖo ahwansyá Hwlibɛ́ni tɔn kpá lɛ́ɛ bǐ bló súnnu adɔ̌kpo tɛ́nwe děgba we afɔwó-afɔtɛ́nwe kanɖé wǒ (151.450) jɛ jí. Yědɛɛ lɛ́ɛ wɛ ná jɛ ahwangɔnu Judáa tɔn ɔ́ gúdo.

¹⁷ “Énɛ́ ɔ́ gúdo ɔ́, Levíi ví lɛ́ɛ ná ɖíɖá Goxɔ ɔ́ ɖidó; yě xweyǐgbe ɔ́, yě ná nɔ ahwangbɛ́ we nukɔntɔn lɛ́ɛ kpódó we gǔdo tɔn lɛ́ɛ kpó tɛ́ntin. Yě lɔ ná nɔ tito jí yi fí e yě ná nɔ ɔ́; súnnu ɖokpó ɖokpó ná nɔ tɛn tɔn mɛ, ɖo fí e xwédo tɔn sín ahwansyá ɖe é.

¹⁸ “Akɔta Eflayímu tɔn sín ahwangɔnu ɔ́, kpódó ahwansyá tɔn kpó ná nɔ gbadahwe jí. Elicama e nyí Amumihudi sín vǐ, bó nyí akɔta Eflayímu tɔn sín gǎn ɔ́ ná nɔ yě nu ɖo fínɛ́.

¹⁹ Súnnu adɔ̌kpo we afɔwe kanwe ko (40.500) sín kɛ́n wɛ è sɔ́, bɔ yě nyí ahwanfuntɔ́ tɔn lɛ́ɛ.

²⁰ Akɔta Manasée tɔn sín ahwangɔnu ɔ́ ná bɔ dó wǔ tɔn. Gamɛliyɛ́li e nyí Pedasúu sín vǐ, bó nyí akɔta Manasée tɔn sín gǎn ɔ́ ná nɔ yě nu.

²¹ Súnnu adɔ̌kpo ɖě děgba atɔn afɔɖé (32.200) sín kɛ́n wɛ è sɔ́, bɔ yě nyí ahwanfuntɔ́ tɔn lɛ́ɛ.

²² Akɔta Bɛnjamɛ́ɛ tɔn sín ahwangɔnu ɔ́ jɛ gǔdo tɔn. Avidáni e nyí Gideóni sín vǐ, bó nyí akɔta Bɛnjamɛ́ɛ tɔn sín gǎn ɔ́ ná nɔ yě nu.

²³ Súnnu adɔ̌kpo ɖě děgba atɔn afɔwó-afɔtɛ́nwe (35.400) sín kɛ́n wɛ è sɔ́, bɔ yě nyí ahwanfuntɔ́ tɔn lɛ́ɛ.

²⁴ Énɛ́ ɔ́, ahwanfuntɔ́ e sín kɛ́n è sɔ́, bɔ yě ɖo ahwansyá Eflayímu tɔn ɔ́ mɛ lɛ́ɛ bǐ bló adɔ̌kpo atɔ́ɔ́n děgba we kanwe ko (108.100). Yědɛɛ lɛ́ɛ wɛ ná jɛ ahwangɔnu Hwlibɛ́ni tɔn ɔ́ gúdo.

²⁵ “Akɔta Dan tɔn ɔ́ sín ahwangɔnu ɔ́, kpódó ahwansyá tɔn kpó ná nɔ totaligbé. Axiezɛ́ɛ e nyí Amumicadayi ví, bó nyí akɔta Dan tɔn sín gǎn ɔ́ ná nɔ yě nu ɖo fínɛ́.

²⁶ Súnnu adɔ̌kpo atɔn afɔwó nǔwɔntɔn kanwe ko (62.700) sín kɛ́n wɛ è sɔ́, bɔ yě nyí ahwanfuntɔ́ tɔn lɛ́ɛ.

²⁷ Akɔta Acɛ́ɛ tɔn sín ahwangɔnu ɔ́ ná bɔ dó wǔ tɔn. Pagiyɛ́li e nyí Ɔkláni sín vǐ, bó nyí akɔta Acɛ́ɛ tɔn sín gǎn ɔ́ ná nɔ yě nu.

²⁸ Súnnu adɔ̌kpo we afɔtɛ́nwe kanwe ko (41.500) sín kɛ́n wɛ è sɔ́, bɔ yě nyǐ ahwanfuntɔ́ tɔn lɛ́ɛ.

²⁹ Akɔta Nɛfutali tɔn ɔ́ sín ahwangɔnu ɔ́ ná jɛ gǔdo tɔn. Axila e nyí Eyináni sín vǐ, bó nyí akɔta Nɛfutali tɔn sín gǎn ɔ́ ná nɔ yě nu.

³⁰ Súnnu adɔ̌kpo we děgba atɔn afɔtɛ́nwe (53.400) sín kɛ́n wɛ è sɔ́, bɔ yě nyí ahwanfuntɔ́ tɔn lɛ́ɛ.

³¹ Énɛ́ ɔ́, ahwanfuntɔ́ e sín kɛ́n Mɔyízi kpó Aalɔ́ɔn kpó, kpódó gǎn lɛ́ɛ kpó sɔ́, bɔ yě ɖo ahwangɔnu Dan tɔn ɔ́ mɛ lɛ́ɛ bǐ bló adɔ̌kpo tɛ́nwe děgba ɛnɛ afɔtántɔn (157.600). Yědɛɛ lɛ́ɛ wɛ ná nyí ahwangɔnu e ná gbɔn gǔdo é bó ná hɛn ahwansyá yětɔn.”

³² Izlayɛ́li ví e sín kɛ́n è sɔ́, ɖo hɛ̌nnu ɖokpó ɖokpó mɛ lɛ́ɛ nɛ́. Yě mɛ e sín kɛ́n è sɔ́, bɔ yě nyí ahwanfuntɔ́, bó ɖo ahwangɔnu ɔ́ mɛ lɛ́ɛ bǐ bló adɔ̌kpo gban afɔwó-afɔtɛ́nwe kantɔn gban (603.550).

³³ Lě e Mawu Mavɔmavɔ ko ɖɔ gbɔn nú Mɔyízi ɔ́, è sɔ́ Levíi ví lɛ́ɛ sín kɛ́n ɖo hwe ɖokpó ɔ́ nu kpódó Izlayɛ́li ví ɖě lɛ́ɛ kpó ǎ.

³⁴ Izlayɛ́li ví lɛ́ɛ wa nǔ, bɔ é sɔgbe xá lě e Mawu Mavɔmavɔ ɖɔ nú Mɔyízi gbɔn é pɛ́pɛ́pɛ́. Yě ɖó gɔnu ɖó fí ɖé ɔ́, yě kpó ahwansyá yětɔn kpó nɔ́ ɖo fí ɔ́. Yě ɖo yiyi wɛ ɔ́, hɛ̌nnu ɖokpó ɖokpó nɔ́ ɖo tɛn tɔn mɛ, bɔ mɛ ɖokpó ɖokpó nɔ́ ɖo xwédo tɔn mɛ.