Kɛ́nsísɔ́ 19 - MAWUXÓWÉMA

¹ Mawu Mavɔmavɔ ɖɔ xó nú Mɔyízi kpó Aalɔ́ɔn kpó.

² É ɖɔ yɛsu e sɛ́n ɔ́ zɔ́n ɖɔ è nǐ fɔ lɛ́ɛ nú yě; é ɖɔ: “Mi ɖɔ nú Izlayɛ́li ví lɛ́ɛ ɖɔ yě ní hɛn nyibú asi vɔvɔ ɖokpó wá nú mì; é ná ɖó blɔ̌ ɖěbǔ ǎ; è ka ná kó sin mɔ e è nɔ dó lɛ gle ná ɔ́ dó kɔ n'i kpɔ́n ǎ.

³ Mi ná zé nyibú ɔ́ nú vɔ̌sánú-xwlémawutɔ́ Eleazáa, bɔ é ná dɔn ɛ tɔ́n sín fí e mi ɖó gɔnu ɖó é, bɔ è nǎ gbo gbe e ɖo nukún tɔn mɛ.

⁴ Bɔ vɔ̌sánú-xwlémawutɔ́ Eleazáa ná sɔ́ alɔví dó nyibú ɔ́ sín hun mɛ, bó ná mì azɔn tɛ́nwe sɛ́ dó Goxɔ ɔ́ li nu.

⁵ Énɛ́ ɔ́ gúdo ɔ́, è nǎ fyɔ́ nyibú ɔ́ ɖo nukún tɔn mɛ: è nǎ dó anyǔ tɔn kpó lan tɔn kpó hun tɔn kpó, kpódó mǐ tɔn kpó zo.

⁶ Vɔ̌sánú-xwlémawutɔ́ ɔ́ ná zé sɛ́dlukpo kpó izɔ́puma kpó, kpódó avɔ vɔvɔ cɛ́cɛ́ kpó, bó ná bɛ́ yě kɔn nyi myɔ e mɛ è ɖo nyibú ɔ́ fyɔ́ ɖe wɛ ɔ́ mɛ.

⁷ Énɛ́ ɔ́ gúdo ɔ́, vɔ̌sánú-xwlémawutɔ́ ɔ́ ná nya avɔ tɔn lɛ́ɛ, bó ná lɛ wǔ, cóbó ná byɔ́ fí e mi ɖó gɔnu ɖó ɔ́. É ná nyí mɛ blíblí káká jɛ gbadanu.

⁸ Mɛ e ná fyɔ́ nyibú asi ɔ́ ná nya avɔ tɔn lɛ́ɛ, bó ná lɛ wǔ, bó ná nyí mɛ blíblí káká jɛ gbadanu.

⁹ Súnnu e nyí mɛ mímɛ́ ɔ́ ɖokpó ná bɛ́ nyibú asi ɔ́ sín afín, bó ná ɖe sín fí e Izlayɛ́li ví lɛ́ɛ ɖó gɔnu ɖó ɔ́, bó ná kɔn nyi tɛn mímɛ́ ɖé mɛ; è nǎ zé afín énɛ́ ɔ́ ɖ'ayǐ nú Izlayɛ́li ví lɛ́ɛ, bɔ yě ná dó bló wǔsláslá sin ná. Yɛsu énɛ́ ɔ́ cí hwɛsɔ́kɛmɛ sín yɛsu ɖɔhun, bɔ è nɔ fɔ.

¹⁰ Mɛ e ná bɛ́ nyibú ɔ́ sín afín ɔ́ ná nya avɔ tɔn lɛ́ɛ, bó ká ná nyí mɛ blíblí káká jɛ gbadanu. Sɛ́n ɖé wɛ sɛ́n énɛ́ ɔ́ nyí, bó ná ɖo te káká sɔ́yi nú Izlayɛ́li ví lɛ́ɛ kpó jǒnɔ e ɖo yě mɛ lɛ́ɛ kpó.”

Sɛ́n e ɖɔ xó dó wǔsláslá wú é

¹¹ Mawu Mavɔmavɔ lɛ́ ɖɔ: “Mɛ e ná ɖó alɔ cyɔ wú ɔ́ ná nyí mɛ blíblí xɔ azǎn tɛ́nwe.

¹² Azǎn atɔngɔ́ ɔ́ kpó tɛ́nwegɔ́ ɔ́ kpó gbe ɔ́, mɛ ɔ́ ná mì wǔsláslá sin ɔ́ dó wǔ dó slá wǔ, bó ná nyí mɛ mímɛ́. Lo ɔ́, nú mɛ ɔ́ má mì sin ɔ́ dó wǔ dó slá wǔ ɖo azǎn énɛ́ lɛ́ɛ gbe ǎ ɔ́, é ná nyí mɛ mímɛ́ ǎ.

¹³ Mɛ e ná ɖó alɔ cyɔ wú, bó má ná mì sin énɛ́ ɔ́ dó wǔ dó slá wǔ ǎ ɔ́, mɛ ɔ́ ná ɖu su nú nɔtɛn Mawu Mavɔmavɔ tɔn; è nǎ ɖe mɛ ɔ́ sín togun Izlayɛ́li tɔn ɔ́ mɛ. È ma ko mì wǔsláslá sin ɔ́ dó wǔtu tɔn ǎ ɔ́, mɛ ɔ́ kpo ɖo mɛ blíblí nyí wɛ, bɔ nǔblíblí e é wa ɔ́ kpo ɖo te.

¹⁴ “Sɛ́n ɔ́ ɖěvo ɖíe: ényí gbɛtɔ́ kú ɖo Goxɔ ɖé mɛ ɔ́, mɛ e ná byɔ́ Goxɔ énɛ́ ɔ́ mɛ ɔ́ kpó mɛ e kó ɖ'é mɛ ɔ́ kpó ná nyí mɛ blíblí xɔ azǎn tɛ́nwe.

¹⁵ Zɛ̌n abǐ gannú ɖé ɖo fínɛ́ bɔ è ma sú ganjí ǎ ɔ́, nǔ e ɖ'é mɛ ɔ́ húzú nǔ blíblí.

¹⁶ Ényí mɛɖé ɖo zunkan mɛ gbɔn wɛ, bó ɖó alɔ mɛ e è hu, abǐ mɛ e nɔ é ɖóɖó bó kú ɔ́ ɖě sín cyɔ wú ɔ́, mɛ ɔ́ ná nyí mɛ blíblí xɔ azǎn tɛ́nwe; mɔ̌ ɖokpó ɔ́, ényí mɛɖé ɖó alɔ gbɛtɔ́ xú wú, abǐ yɔdo wú ɔ́, mɛ ɔ́ ná nyí mɛ blíblí xɔ azǎn tɛ́nwe.

¹⁷ Nú è nǎ slá wǔ nú mɛ blíblí ɔ́, è nǎ wún nyibú asi e è dǒ sá hwɛsɔ́kɛmɛvɔ́ ná ɔ́ sín afín bó kɔn dó zɛ̌n abǐ gannú mɛ, bó wún tɔsisa sin d'é jí.

¹⁸ Súnnu e nyí mɛ mímɛ́ ɔ́ ɖokpó ná zé izɔ́puma bó sɔ́ dó sin ɔ́ mɛ, bó ná mi dó Goxɔ e mɛ mɛ kú ɖe ɔ́ wú, bó ná mi dó nǔ e ɖo Goxɔ ɔ́ mɛ lɛ́ɛ bǐ wú, bó ná mi dó mɛ e ɖo Goxɔ ɔ́ mɛ lɛ́ɛ bǐ wú, abǐ é ná mi dó mɛ e ɖó alɔ gbɛtɔ́ xú wú é wú, abǐ mɛ e ɖó alɔ cyɔ wú é wú, abǐ mɛ e ɖ'alɔ yɔdo wú é wú.

¹⁹ Mɛ e nyí mɛ mímɛ́ ɔ́ ná mì sin ɔ́ dó mɛ e nyí mɛ blíblí ɔ́ wú azǎn atɔngɔ́ ɔ́ kpó azǎn tɛ́nwegɔ́ ɔ́ kpó gbe. Azǎn tɛ́nwegɔ́ ɔ́ gbe wɛ é ná slá wǔ nú mɛ ɔ́ bǐ, bɔ mɛ ɔ́ ná nya avɔ tɔn lɛ́ɛ, bó ná lɛ wǔ, bɔ gbadanu su ɔ́, mɛ ɔ́ ná nyí mɛ mímɛ́.

²⁰ “Súnnu e ná nyí mɛ blíblí, bó má ná slá wǔ ǎ ɔ́, Mɔyízi kpó Aalɔ́ɔn kpó ná ɖe e sín togun Izlayɛ́li tɔn ɔ́ mɛ, ɖó é ɖu su nú Mawu xwé ɔ́. È ma mì wǔsláslá sin ɔ́ dó wǔtu tɔn ǎ ɔ́, é kpo ɖo mɛ blíblí nyí wɛ.

²¹ “Sɛ́n ɖé wɛ sɛ́n énɛ́ ɔ́ nyí, bó ná nɔ te káká sɔ́yi nú Izlayɛ́li ví lɛ́ɛ. Mɛ e ná mì wǔsláslá sin ɔ́ dó mɛ wú ɔ́, ná nya avɔ tɔn lɛ́ɛ. Mɛ e ka ná ɖó alɔ sin ɔ́ wú ɔ́ ná nyí mɛ blíblí káká jɛ gbadanu.

²² Mɛ e nyí mɛ blíblí ɔ́ ɖó alɔ nǔ ɖěbǔ wú ɔ́, nǔ ɔ́ ná nyí nǔ blíblí. Mɛ ɖěbǔ ɖó alɔ mɛ e nyí mɛ blíblí ɔ́ wú ɔ́, mɛ ɔ́ lɔmɔ̌ ná nyí mɛ blíblí káká jɛ gbadanu.”