Kɛ́nsísɔ́ 18 - MAWUXÓWÉMA

¹ Mawu Mavɔmavɔ ɖɔ nú Aalɔ́ɔn ɖɔ: “Bɛ́ sín din ɔ́, è wa nǔɖé nyi do ɖo Goxɔ ɔ́ mɛ ɔ́, hwi kpó vǐ towe lɛ́ɛ kpó, kpódó nɔví towe súnnu e ɖo akɔta Levíi tɔn ɔ́ mɛ lɛ́ɛ kpó wɛ agban tɔn ná kpɛn. Amɔ̌, ényí hwi kpó vǐ towe lɛ́ɛ kpó ɖo vɔ̌sánú-xwlémawutɔ́ sín azɔ̌ mitɔn wa wɛ ɖo Goxɔ ɔ́ mɛ bó wa nǔɖé nyi do ɔ́, hwi kpó vǐ towe lɛ́ɛ kpó wɛ agban tɔn ná kpɛn.

² A nǎ ylɔ́ nɔví towe súnnu e ɖo akɔta Levíi tɔn ɔ́ mɛ lɛ́ɛ, bɔ yě ná wá gɔ̌n towe. Hwenu e hwi kpó vǐ towe lɛ́ɛ kpó ná ɖo azɔ̌ wa wɛ ɖo Goxɔ ɔ́ nukɔn ɔ́, yě ná xo kpó ɖó nú mi, bo ná wa azɔ̌ xá mi.

³ Mi zɔ́n nǔ ɖěbǔ yě ɔ́, yě ná wa; yě ná nɔ́ wa azɔ̌ e kan Goxɔ ɔ́ lɛ́ɛ bǐ. Lo ɔ́, yě ná sɛkpɔ́ nǔ mímɛ́ lɛ́ɛ ǎ; yě ná sɛkpɔ́ vɔ̌sákpe ɔ́ ǎ; é má nyí mɔ̌ ǎ ɔ́, mi kpó yě kpó bǐ ná kú.

⁴ Yě ná xo kpó ɖó nú mi, bó ná wa sinsɛnzɔ́ lɛ́ɛ bǐ kpó azɔ̌ e è nǎ wa ɖo Goxɔ ɔ́ mɛ lɛ́ɛ kpó. Mɛ e ma nyí Levíi ví ǎ ɖěbǔ ká ná sɛkpɔ́ mi ǎ.

⁵ Midɛɛ lɛ́ɛ ká ná nɔ́ wa azɔ̌ e nyí azɔ̌ mitɔn ɔ́ ɖo tɛn mímɛ́ ɔ́ mɛ, bó ná nɔ́ wa ɖo vɔ̌sákpe ɔ́ kɔn, bónú Mawu Mavɔmavɔ ní má sɔ́ sin xomɛ ɖě dó Izlayɛ́li ví lɛ́ɛ ó.

⁶ Éɖíe! Un ɖe nɔví mitɔn Levíi ví lɛ́ɛ sín Izlayɛ́li ví ɖě lɛ́ɛ mɛ. Yě nyí ce bɔ un sɔ́ yě dó así nú mi, bónú yě ná nɔ́ wa azɔ̌ lɛ́ɛ ɖo Goxɔ ɔ́ mɛ.

⁷ Amɔ̌, Aalɔ́ɔn, hwɛ kpó vǐ towe lɛ́ɛ kpó ɔ́, mi ná nɔ́ wa vɔ̌sánú-xwlémawutɔ́ zɔ́ ɖo vɔ̌sákpe ɔ́ kɔn, bó ná nɔ́ wa ɖo tɛn mímɛ́ bǐ ɔ́ mɛ, ɖo xɔmɛgbovɔ ɔ́ gúdo. Nyɛ wɛ ná azɔ̌ énɛ́ ɔ́ mi. Ényí mɛ ɖěvo séé sɛkpɔ́ mi ɔ́, é ná kú.”

Nǔ e ná nyí vɔ̌sánú-xwlémawutɔ́ lɛ́ɛ tɔn é

⁸ Mawu Mavɔmavɔ ɖɔ nú Aalɔ́ɔn ɖɔ: “Đǒtó mì; un zé nǔníná e Izlayɛ́li ví lɛ́ɛ ɖe ɖó vo nú mì lɛ́ɛ dó así nú we. Un ná yě we; yě ná nyí kanta towe, bó ná nyí kanta vǐ towe lɛ́ɛ tɔn káká sɔ́yi.

⁹ Nǔ e ná nyí towe ɖo nǔ mímɛ́ titewungbe e è ma dó zo ǎ lɛ́ɛ mɛ é ɖíe: nǔníná jinukún tɔn lɛ́ɛ bǐ, hwɛxɔ́súsú vɔ́ lɛ́ɛ bǐ kpódó hwɛsɔ́kɛmɛvɔ́ lɛ́ɛ kpó. Nǔ énɛ́ lɛ́ɛ e nyí nǔ mímɛ́ titewungbe lɛ́ɛ ná nyí towe, bó ná nyí vǐ towe lɛ́ɛ tɔn.

¹⁰ Nǔ e mi ná nɔ́ ɖu lɛ́ɛ nɛ́; súnnu lɛ́ɛ bǐ ná nɔ́ ɖu. A nǎ mɔ nǔ énɛ́ lɛ́ɛ dó mɔ nǔ mímɛ́ titewungbe, bo ná nɔ́ ɖu.

¹¹ Nǔ ɖěvo e ná lɛ́ nyí towe lɛ́ɛ ɖíe: nǔ e è nǎ jɔ ɖo nǔníná e Izlayɛ́li ví lɛ́ɛ ná mì lɛ́ɛ mɛ, bɔ è xwlé mì lě e è nɔ xwlé vɔ̌sánú mì gbɔn lɛ́ɛ ɔ́, bǐ wɛ ná nyí towe, bo ná nyí vǐ towe súnnu kpó nyɔ̌nu kpó tɔn. Sɛ́n ɖé wɛ nyí sɛ́n énɛ́ ɔ́, bó ná nɔ ayǐ káká sɔ́yi. Mɛ e ná nyí mɛ mímɛ́ ɖo xwédo towe mɛ lɛ́ɛ bǐ wɛ ná ɖu.

¹² Un ná we nǔ nukɔn tɔn e nyɔ́ ɖo gle yětɔn mɛ bɔ yě wá ná nyɛ Mawu Mavɔmavɔ lɛ́ɛ; nǔ lɛ́ɛ wɛ nyí: ami e nyɔ́ hú ami ɖě lɛ́ɛ bǐ é, vɛ̌ɛn kpó jinukún kpó e nyɔ́ hú ɖě lɛ́ɛ bǐ é.

¹³ Nǔ énɛ́ lɛ́ɛ e yě ná hɛn wá nú nyɛ Mawu Mavɔmavɔ lɛ́ɛ ná nyí towe. Mɛ e ná nyí mɛ mímɛ́ ɖo xwédo towe mɛ lɛ́ɛ bǐ wɛ ná ɖu.

¹⁴ Nǔ e Izlayɛ́li ví lɛ́ɛ ná ɖe ɖó vo nú mì lɛ́ɛ bǐ ná nyí towe.

¹⁵ Nukɔngbéví yětɔn súnnu e yě ná xwlé mì lɛ́ɛ kpó kanlin yětɔn lɛ́ɛ sín nukɔngbéví asú e yě ná xwlé mì lɛ́ɛ kpó bǐ wɛ ná nyí towe. Lo ɔ́, a nǎ xɔ gbɛ nú nukɔngbéví yětɔn lɛ́ɛ bǐ, bó ná xɔ nú kanlin yětɔn e nyí kanlin blíblí lɛ́ɛ sín nukɔngbéví lɛ́ɛ.

¹⁶ Nabí e è nǎ dó xɔ gbɛ nú vǐ súnnu e ɖó sun ɖokpó ɔ́ wɛ nyí gankwɛ́ atɔ́ɔ́n. Gankwɛ́ e è nɔ zán ɖo sinsɛnxɔ mɛ, bɔ é nɔ́ da glǎmu wǒ ɔ́ wɛ è nǎ zán.

¹⁷ Lo ɔ́, a nǎ xɔ gbɛ nú lɛ̌ngbɔ́ kpódó gbɔ̌ kpó sín nukɔngbéví ǎ; è ko ɖe kanlin énɛ́ lɛ́ɛ ɖó vo nú mì. A nǎ kɔn hun yětɔn kɔn nyi vɔ̌sákpe ɔ́ jí, bó ná dó jǒ yětɔn zo, bɔ é ná nyí vɔ̌ e è nɔ dó zo ɔ́; wǎn tɔn nɔ́ nyɔ́ se nú nyɛ Mawu Mavɔmavɔ.

¹⁸ Lan yětɔn ná nyí towe lě e akɔ́n lɛ́ɛ kpó asá ɖisíxwé tɔn lɛ́ɛ e yě nǎ xwlé mì lɛ́ɛ ná nyí towe gbɔn é.

¹⁹ Nǔníná mímɛ́ e Izlayɛ́li ví lɛ́ɛ ná xwlé mì lɛ́ɛ bǐ ɔ́, un ná yě we, bó ná vǐ towe súnnu kpó nyɔ̌nu kpó; sɛ́n ɖé wɛ nyí sɛ́n énɛ́ ɔ́, bó ná nɔ ayǐ káká sɔ́yi. Akɔ ɖé wɛ é nyí bɔ un jɛ xá hwi kpó kúnkan towe lɛ́ɛ kpó; è ɖǒ nǎ gba gbeɖé ǎ.”

²⁰ Mawu Mavɔmavɔ lɛ́ ɖɔ nú Aalɔ́ɔn ɖɔ: “A nǎ ɖǒ ayǐkúngban ɖě ɖo to ɔ́ mɛ ǎ; kanta ɖěbǔ ná nyí towe ɖo yě mɛ ǎ; nyɛ wɛ nyí kanta towe, bó nyí nǔ e ná nyí towe ɖo Izlayɛ́li ví lɛ́ɛ tɛ́ntin é.”

Nǔ e ná nyí Levíi ví lɛ́ɛ tɔn é

²¹ Mawu Mavɔmavɔ lɛ́ ɖɔ nú Aalɔ́ɔn ɖɔ: “Un ná ná nǔ e nyɔ́ ɖo Izlayɛ́li lɛ́ɛ bǐ sín mǎɖówǒ Levíi ví súnnu lɛ́ɛ, ɖó azɔ̌ e wa wɛ yě ɖe ɖo Goxɔ ɔ́ mɛ ɔ́ nu.

²² Izlayɛ́li ví ɖě lɛ́ɛ sɔ́ ná nɔ́ sɛkpɔ́ Goxɔ ɔ́ ǎ; é má nyí mɔ̌ ǎ ɔ́, yě táá hu hwɛ, bó ná kú.

²³ Levíi ví lɛ́ɛ kɛ́ɖɛ́ wɛ ná wa sinsɛnzɔ́ ɔ́ ɖo Goxɔ ɔ́ mɛ, bɔ hwɛ e yě ná hu ɖo Goxɔ ɔ́ mɛ lɛ́ɛ ná nɔ kɔ nú yě. Levíi ví lɛ́ɛ ná ɖó gǔ ɖě, akɔta Izlayɛ́li ví lɛ́ɛ tɔn ɖě lɛ́ɛ ɖɔhun ǎ; sɛ́n ɖé wɛ nyí sɛ́n énɛ́ ɔ́, bó ná nɔ ayǐ káká sɔ́yi.

²⁴ Mǎɖówǒ e Izlayɛ́li ví lɛ́ɛ ná ɖe ɖó vo nú mì lɛ́ɛ wɛ un ná Levíi ví lɛ́ɛ. Énɛ́ ɔ́ wú wɛ un ɖɔ nú yě ɖɔ yě kún ná ɖó gǔ ɖěbǔ ɖo Izlayɛ́li ví lɛ́ɛ tɛ́ntin ó.”

²⁵ Mawu Mavɔmavɔ ɖɔ nú Mɔyízi ɖɔ

²⁶ é ní ɖɔ nú Levíi ví lɛ́ɛ ɖɔ: “Hwenu e mi ná yí mǎɖówǒ e Izlayɛ́li ví lɛ́ɛ ná ná, bɔ un ná mi bɔ é nyí kanta mitɔn ɔ́, mi lɔmɔ̌ ná ɖe mǎɖówǒ ɖo mǎɖówǒ énɛ́ lɛ́ɛ mɛ, bó xwlé nyɛ Mawu Mavɔmavɔ.

²⁷ Bɔ nǔníná mitɔn lɛ́ɛ ná cí ée nɔví mitɔn Izlayɛ́li ví ɖě lɛ́ɛ nɔ́ ɖe ɖo jinukún yětɔn kpó vɛ̌ɛn yɔ̌yɔ́ yětɔn kpó mɛ, bó nɔ́ xwlé nyɛ Mawu Mavɔmavɔ ɔ́ ɖɔhun.

²⁸ Lě e mi lɔ ná hɛn nǔníná mitɔn lɛ́ɛ wá nú nyɛ Mawu Mavɔmavɔ gbɔn ɔ́ nɛ́. Mi ná ɖe ɖo mǎɖówǒ e nɔví mitɔn lɛ́ɛ hɛn wá nú mì lɛ́ɛ mɛ, bó ná zé nú vɔ̌sánú-xwlémawutɔ́ Aalɔ́ɔn, bɔ é ná xwlé mì.

²⁹ Nǔ e è nǎ ná mi lɛ́ɛ bǐ mɛ ɔ́, ée nyɔ́ hú ɖě lɛ́ɛ bǐ sésé lɛ́ɛ mɛ wɛ mi ná ɖe ɖe, bɔ è nǎ sɔ́ ɖó vo nú mì.

³⁰ A nǎ lɛ́ ɖɔ nú yě ɖɔ: ‘Nú mi ɖe éé ná ná Mawu Mavɔmavɔ wɛ mi ɖe lɛ́ɛ ɔ́, éé kpo ɔ́ ná nyí mitɔn, lě e nɔví mitɔn ɖě lɛ́ɛ ná mǎɖówǒ yětɔn lɛ́ɛ ɔ́, jinukún e kpo ɔ́ kpó vɛ̌ɛn e kpo ɔ́ kpó nɔ́ nyí yětɔn gbɔn é.

³¹ Mi kpó xwédo mitɔn kpó ná ɖu ɖo fí e jló mi é, ɖó axɔ́ e è sú mi ɖó azɔ̌ e mi wa ɖo Goxɔ ɔ́ mɛ ɔ́ nu ɔ́ nɛ́.

³² Mi ɖe éé nyɔ́ hú ɖě lɛ́ɛ bǐ ɔ́ nú Mawu Mavɔmavɔ hwɛ̌ cóbó ɖu ée kpo ɔ́; é ná nyí hwɛ bɔ mi ná hu ǎ, é ká ná nyí su bɔ mi ɖu nú nǔníná mímɛ́ e Izlayɛ́li ví lɛ́ɛ ná lɛ́ɛ é ǎ; mi ka ná kú ǎ.’ ”