Kɛ́nsísɔ́ 15 - MAWUXÓWÉMA

Nǔníná linfín tɔn kpó ami tɔn kpó

¹ Mawu Mavɔmavɔ ɖɔ nú Mɔyízi ɖɔ

² é ní ɖɔ nú Izlayɛ́li ví lɛ́ɛ ɖɔ: “Hwenu e mi ná byɔ́ to e un ná mi bɔ mi ná nɔ mɛ ɔ́ mɛ ɔ́,

³ mi ná nɔ́ sá vɔ̌ e è nɔ dó zo é abǐ kɔnɖókpɔ́ vɔ́ nú Mawu Mavɔmavɔ; é sixú nyí vɔ̌ e è nǎ dó ɖe akpá e è dǒ lɛ́ɛ, é ká sixú nyí ɖɔ mɛ ɖésúnɔ kpɔ́n mɛɖée xomɛ bó sá; é sixú nyí xwe ɖé sín hwenu. Mi ja vɔ̌ mɔ̌hunkɔtɔn lɛ́ɛ sá gbé ɔ́, nyibú ɖokpó, lɛ̌ngbɔ́ ɖokpó, abǐ gbɔ̌ ɖokpó wɛ mi ná nɔ́ sɔ́ dó sá, bɔ wǎn tɔn ná nyɔ́ se nú nyɛ Mawu Mavɔmavɔ.

⁴ Mɛ e ná hɛn kanlin ɔ́ wá nú mì ɔ́, ná sɔ́ nǔníná jinukún tɔn lɛ́ɛ gɔ́ ná: é ná ná linfín kilóo atɔn bɔ è nǎ zé ami lǐtli ɖokpó adaɖé dó nya ná,

⁵ bó ná ná vɛ̌ɛn lǐtli ɖokpó adaɖé; é ná bɛ́ nǔ énɛ́ lɛ́ɛ bǐ dó lɛ̌ngbɔ́ví e ná sá vɔ̌ e è nɔ dó zo ɔ́, abǐ kɔnɖókpɔ́ vɔ́ ɔ́ ná wɛ è ɖe ɔ́ jí.

⁶ Ényí agbo ɖokpó ná dó sá vɔ̌ ɔ́ ná wɛ è ɖe ɔ́, è nǎ ná linfín kilóo ayizɛ́n, bó ná zé ami lǐtli we dó nya ná, bɔ é ná jɛ kanlin ɔ́ jí.

⁷ Mɛ ɔ́ ná lɛ́ ná vɛ̌ɛn lǐtli we d'é jí. Ényí è blǒ gbɔn mɔ̌ ɔ́, wǎn tɔn nɔ́ nyɔ́ se nú nyɛ Mawu Mavɔmavɔ.

⁸ É ká nyí nyibú wɛ è nǎ dó sá vɔ̌ e è nɔ dó zo ɔ́, abǐ kɔnɖókpɔ́ vɔ́ ná dó ɖe akpá e è dǒ ɔ́, abǐ è nǎ dó sá vɔ̌ yǎyá ɖé kpowun ɔ́,

⁹ è ɖǒ ná ná vɔ̌sánú ɖé dó kanlin ɔ́ jí: è nǎ ná linfín kilóo tɛ́nnɛ, bó ná zé ami lǐtli atɔn dó nya ná,

¹⁰ bó ná lɛ́ ná vɛ̌ɛn lǐtli atɔn d'é jí. Vɔ̌ e è nɔ dó zo é wɛ, bɔ wǎn tɔn nɔ́ nyɔ́ se nú nyɛ Mawu Mavɔmavɔ.

¹¹ “Ényí è jlǒ ná zé nyibú abǐ agbo, abǐ lɛ̌ngbɔ́ví, abǐ gbɔ̌ dó sá vɔ̌ ɔ́, mɔ̌ wɛ è nǎ bló gbɔn.

¹² Kanlin e ná dó sá vɔ̌ ɔ́ wɛ mi ɖe lɛ́ɛ ná bó sukpɔ́ gbɔn ɖěbǔ ɔ́, nǔníná énɛ́ lɛ́ɛ e è xa lɛ́ɛ ɖó ná jɛ kanlin lɛ́ɛ ɖokpó ɖokpó jí.

¹³ Izlayɛ́li ví ɖěbǔ jló ná sá vɔ̌ nú nyɛ Mawu Mavɔmavɔ bónú wǎn tɔn ná nyɔ́ se nú mì ɔ́, tito énɛ́ lɛ́ɛ wɛ è ɖǒ ná xwedó.

¹⁴ Jǒnɔ e ɖo to mitɔn mɛ nú hwenu kpɛɖé abǐ éé kó ɖo to mitɔn mɛ bɔ xwe ko sɛ yi lɛ́ɛ ɔ́, nú yě jló ná sá vɔ̌ e è nɔ dó zo bɔ wǎn tɔn nɔ́ nyɔ́ se nú nyɛ Mawu Mavɔmavɔ ɔ́, nǔ ɖokpó ɔ́ jɛ́n yě lɔmɔ̌ ná bló.

¹⁵ Sɛ́n ɖokpó ɔ́ wɛ togun ɔ́ bǐ ná xwedó, toví kpó jǒnɔ kpó bǐ. Sɛ́n ɖé wɛ, bó ná nɔ ayǐ káká sɔ́yi. Mi kpó jǒnɔ kpó bǐ wɛ ɖó ná nyi sɛ́n énɛ́ ɔ́, ɖo nyɛ Mawu Mavɔmavɔ nukɔn.

¹⁶ Sɛ́n e mi ná nɔ́ nyi lɛ́ɛ kpó tito e mi ná nɔ́ xwedó lɛ́ɛ kpó wɛ jǒnɔ lɛ́ɛ lɔ ná nɔ́ xwedó.”

Izlayɛ́li ví lɛ́ɛ ná nɔ xwlé jinukún nukɔntɔn sín wɔ̌xúxú Mawu Mavɔmavɔ

¹⁷ Mawu Mavɔmavɔ ɖɔ nú Mɔyízi ɖɔ

¹⁸ é ní ɖɔ nú Izlayɛ́li ví lɛ́ɛ ɖɔ: “Hwenu e mi ná byɔ́ to e mɛ un ná kplá mi yi ɔ́ mɛ,

¹⁹ bó ná ɖu wɔ̌xúxú to énɛ́ ɔ́ mɛ tɔn ɔ́, mi ná ɖe ɖě ɖ'é mɛ, bó ná xwlé nyɛ Mawu Mavɔmavɔ.

²⁰ Mi ná wún jinukún mitɔn nukɔn nukɔntɔn ɔ́, bó ná li, lobo ná nya, bó ná ɖa acɔnmɔ ná, bó xwlé nyɛ Mawu Mavɔmavɔ lě e è nɔ xwlé nǔníná jinukún tɔn mì gbɔn é, bɔ é ná nyí nǔníná jinukún tɔn e è ya jinukún ɔ́, è nɔ xwlé mì é.

²¹ Énɛ́ ɔ́, mi ná xwlé acɔnmɔ e mi ná zé jinukún nukɔntɔn dó ɖa ná ɔ́ nyɛ Mawu Mavɔmavɔ. Sɛ́n énɛ́ ɔ́ lɔmɔ̌ ná nɔ ayǐ káká sɔ́yi.”

Hwɛ e è ma tunwun ǎ bó hu lɛ́ɛ sín vɔ̌

²² Mawu Mavɔmavɔ lɛ́ ɖɔ nú Mɔyízi ɖɔ: “Ényí mi ma tunwun ǎ bó hu hwɛ, abǐ mi ma tunwun ǎ bó gba sɛ́n e un dó nú mi gbɔn Mɔyízi jí lɛ́ɛ ɖě ɔ́,

²³ nǔ e nyɛ Mawu Mavɔmavɔ zɔ́n mi sín gbe e gbe un ná sɛ́n mi gbɔn Mɔyízi jí, bɔ mi ná nɔ wa, bɔ midɛɛ lɛ́ɛ gúdo ɔ́, vǐ mitɔn lɛ́ɛ lɔ ɖó ná nɔ wa ɔ́,

²⁴ ényí mɛɖé má tunwun ǎ, bó gba ɖě, bɔ togun ɔ́ lɔ ma ka tunwun ǎ ɔ́, togun ɔ́ bǐ wɛ ná zé nyibúsú wínnyáwínnyá ɖokpó dó sá vɔ̌ e è nɔ dó zo ɔ́ ná nú nyɛ Mawu Mavɔmavɔ, bɔ wǎn tɔn ná nyɔ́ se nú mì. Mɛ ɔ́ ná ná nǔníná vɛ̌ɛn tɔn kpó jinukún tɔn kpó gɔ́ ná lě e è nɔ bló gbɔn é; gbɔ̌sú ɖokpó ná jɛ jí, bɔ è nǎ dó sá hwɛxɔ́súsú vɔ́ ná.

²⁵ Vɔ̌sánú-xwlémawutɔ́ ɔ́ ná sá hwɛxɔ́súsú vɔ́ dó Izlayɛ́li ví lɛ́ɛ bǐ tamɛ, bɔ nyɛ Mawu Mavɔmavɔ ná sɔ́ hwɛ kɛ yě; ɖó yě tunwun ǎ, bó hu hwɛ, bo ká hɛn vɔ̌sánú yětɔn wá nú vɔ̌ e è nɔ dó zo nú nyɛ Mawu Mavɔmavɔ ɔ́, bó hɛn kanlin e è nɔ dó sá hwɛxɔ́súsú vɔ́ ná ɖo nukɔn ce ɔ́ wá, ɖó hwɛ e yě má tunwun ǎ bó hu ɔ́ wú.

²⁶ Nyɛ Mawu Mavɔmavɔ ná sɔ́ hwɛ kɛ Izlayɛ́li ví lɛ́ɛ bǐ, kpódó jǒnɔ e ɖo yě mɛ lɛ́ɛ kpó, ɖó yě tunwun cóbó hu hwɛ ǎ.

²⁷ “Ényí mɛ ɖokpó géé wɛ má tunwun ǎ bó hu hwɛ ɔ́, mɛ ɔ́ ná zé gbɔ̌ e kó ɖó xwe ɖokpó ɔ́ dó sá vɔ̌ ná ɖó hwɛ e é hu ɔ́ tamɛ.

²⁸ Vɔ̌sánú-xwlémawutɔ́ ɔ́ ná sá hwɛxɔ́súsú vɔ́ ɔ́ ɖo nukɔn ce, dó mɛ e ma tunwun ǎ bó hu hwɛ ɔ́ tamɛ. Ényí é kó sá hwɛxɔ́súsú vɔ́ ɔ́ dó ta tɔn mɛ ɔ́, un ná sɔ́ hwɛ kɛ ɛ.

²⁹ Mɛ ɔ́ sixú nyí Izlayɛ́li ví, é sixú nyí toví, é ká sixú nyí jǒnɔ ɖo yě gɔ̌n; sɛ́n ɖokpó ɔ́ wɛ è nǎ zé bɔ dó mɛ e ma tunwun ǎ bó hu hwɛ lɛ́ɛ bǐ wú.

³⁰ “Lo ɔ́, nú mɛ ɔ́ nyí Izlayɛ́li ví abǐ jǒnɔ, bó tunwun gaan bo hu hwɛ ɔ́, nyɛ Mawu Mavɔmavɔ wɛ mɛ ɔ́ zun, bɔ è nǎ ɖe e sín togun ɔ́ mɛ.

³¹ Wǎn wɛ mɛ ɔ́ gbɛ́ nú xó ce, bó gba sɛ́n ce; è ɖǒ ná ɖe e sín togun ɔ́ mɛ. Hwɛ e é hu ɔ́ ji nǔɖé ɔ́, é ná kpan.”

Gbɔjɛzán ɔ́

³² Hwenu e Izlayɛ́li ví lɛ́ɛ ɖo gbětótló mɛ ɔ́, nya ɖé ɖo nakí ba wɛ gbɔjɛzán gbe, bɔ yě gbo e dó.

³³ Yě kplá ɛ yi Mɔyízi kpó Aalɔ́ɔn kpódó togun ɔ́ bǐ kpó nukɔn,

³⁴ bɔ è sɔ́ ɛ ɖó fí ɖé bó nɔ cɔ́ ɛ, bó ɖo te kpɔ́n sɛ́n e Mawu Mavɔmavɔ ná bɔdó wú tɔn é.

³⁵ Mawu Mavɔmavɔ ka ɖɔ nú Mɔyízi ɖɔ: “È ɖǒ ná hu nya ɔ́; è nǎ kplá ɛ sín fí e mi ɖó gɔnu ɖó ɔ́, bɔ togun ɔ́ bǐ ná nyi awǐnnyaglo dó hu i.”

³⁶ Ée Mawu Mavɔmavɔ ɖɔ mɔ̌ ɔ́, togun ɔ́ bǐ dɔn nya ɔ́ tɔ́n sín fí e yě ɖó gɔnu ɖó ɔ́, bó nyi awǐnnyaglo dó e bɔ é kú, lě e Mawu Mavɔmavɔ ɖɔ nú Mɔyízi gbɔn é.

Awu sín kɛyɛ lɛ́ɛ

³⁷ Mawu Mavɔmavɔ ɖɔ nú Mɔyízi ɖɔ

³⁸ é ní ɖɔ nú Izlayɛ́li ví lɛ́ɛ ɖɔ: “Mi kpó vǐ mitɔn lɛ́ɛ kpó ɔ́, mi ná xo kɛyɛ dó awu mitɔn lɛ́ɛ tó, bó ná sin kan fɛ́sinnɔ ɖó kɛyɛ lɛ́ɛ nu.

³⁹ Hǔn mi ná nɔ́ dó awu e dó kɛyɛ lɛ́ɛ é. Nú mi kpɔ́n kɛyɛ énɛ́ lɛ́ɛ ɔ́, mi ná nɔ́ flín sɛ́n ce lɛ́ɛ, bó ná nɔ́ nyi. Énɛ́ ɔ́, mi sɔ́ ná nɔ́ xwedó nǔ e ayi mitɔn ɖɔ nú mi lɛ́ɛ kpó nǔ e mɔ wɛ nukún mitɔn lɛ́ɛ ɖe ɔ́ kpó, bó ná jɛ nǔ ɖěvo lɛ́ɛ sɛn jí ǎ.

⁴⁰ Mi ná nɔ́ flín sɛ́n ce lɛ́ɛ, bó ná nɔ́ nyi; mi ná bló mɔ̌ bó ná nyí mɛ e è zě ɖó vo nú nyɛ Mawu mitɔn é.

⁴¹ Nyɛ wɛ nyí Mawu Mavɔmavɔ, Mawu mitɔn; nyɛ wɛ kplá mi tɔ́n sín Ejípu; nyɛ wɛ nyí Mawu mitɔn. Mawu Mavɔmavɔ, Mawu mitɔn wɛ un nyí.”