Kɛ́nsísɔ́ 13 - MAWUXÓWÉMA

¹ Mawu Mavɔmavɔ ɖɔ nú Mɔyízi ɖɔ:

² “Sɛ́ mɛ dó nú yě ní yi ba do nú Kanáa, to e ná ná Izlayɛ́li ví lɛ́ɛ wɛ un ɖe ɔ́. A nǎ ɖe mɛ ɖokpó ɖokpó ɖo gǎn lɛ́ɛ mɛ, ɖo akɔta ɖokpó ɖokpó mɛ.”

³ Mɔyízi xwedó nǔ e Mawu Mavɔmavɔ ɖɔ ɔ́, bó sɛ́ mɛ dó sín gbětótló Paláni tɔn mɛ. Mɛ e Mɔyízi sɛ́ dó lɛ́ɛ bǐ wɛ nyí Izlayɛ́li ví lɛ́ɛ sín gǎn.

⁴ Nyǐkɔ yětɔn lɛ́ɛ ɖíe: Camumúa, Zakúu ví súnnu ɔ́; akɔta Hwlibɛ́ni tɔn mɛ wɛ é ɖe.

⁵ Cafáti, Holi ví súnnu ɔ́; akɔta Sinmɛnyɔ́ɔ tɔn mɛ wɛ é ɖe;

⁶ Kalɛ́bu, Yefunnɛ́ɛ ví súnnu ɔ́; akɔta Judáa tɔn mɛ wɛ é ɖe;

⁷ Yigealu, Jozɛ́fu ví súnnu ɔ́, ɖo akɔta Isakáa tɔn mɛ;

⁸ Hocea, Nuni ví súnnu ɔ́, ɖo akɔta Eflayímu tɔn mɛ,

⁹ Paluti, Hlafu ví súnnu ɔ́, ɖo akɔta Bɛnjamɛ́ɛ tɔn mɛ,

¹⁰ Gadiyɛ́li, Sodi ví súnnu ɔ́, ɖo akɔta Zabulɔ́ɔn tɔn mɛ,

¹¹ Gaadu, Súsi ví súnnu ɔ́, ɖo Manasée Jozɛ́fu ví súnnu ɔ́ sín akɔta mɛ,

¹² Amumiyɛli, Gemali ví súnnu ɔ́, ɖo akɔta Dan tɔn mɛ,

¹³ Setúu, Mikaɛli ví súnnu ɔ́, ɖo akɔta Acɛ́ɛ tɔn mɛ,

¹⁴ Naxibi, Wɔfúsi ví súnnu ɔ́, ɖo akɔta Nɛfutali tɔn mɛ,

¹⁵ Gewuyɛ́li, Maki ví súnnu ɔ́, ɖo akɔta Gadi tɔn mɛ.

¹⁶ Mɛ e Mɔyízi sɛ́ dó bɔ yě yi ba do nú to ɔ́ lɛ́ɛ sín nyǐkɔ lɛ́ɛ nɛ́. Mɔyízi sun nyǐ Hocea, Nuni ví súnnu ɔ́ ɖɔ Jozuwée.

¹⁷ Mɔyízi sɛ́ yě dó, bónú yě ná yi ba do nú Kanáa to ɔ́. É ɖɔ nú yě ɖɔ: “Mi gbɔn afɔligbé fí, bó tɔ́n jɛ sókan mɛ byɔ́ Kanáa to ɔ́ mɛ.

¹⁸ Mi ná kpɔ́n lě e to ɔ́ ɖe gbɔn ɔ́; mi ná kpɔ́n mɛ e ɖo to ɔ́ mɛ lɛ́ɛ ɖɔ yě dó hlɔ̌nhlɔ́n, abǐ yě vɔ́ wɛ a jí; mi ná kpɔ́n ɖɔ yě sukpɔ́ abǐ yě hwe wɛ a jí.

¹⁹ Mi ná kpɔ́n ɖɔ to ɖagbe wɛ nyí to ɔ́, abǐ to nyanya wɛ a jí; mi ná kpɔ́n ɖɔ è mɛ ahohó lɛ́ lɛ̌ dó toxo lɛ́ɛ, abǐ nuvo wɛ yě ɖe a jí.

²⁰ Mi ná kpɔ́n ɖɔ ayǐkúngban ɔ́ ná nyɔ́ jinukún, abǐ é má ná nyɔ́ jinukún a jí. Mi ná kpɔ́n ɖɔ atín wú ɖo to ɔ́ mɛ, abǐ atín má wú a jí. Mi kpan akɔ́n. Mi hɛn atínsínsɛ́n to ɔ́ mɛ tɔn ɖě wǎ.” Vǐwun nukɔntɔn lɛ́ɛ sín hwenu ka lɛ́ wɛ.

²¹ Énɛ́ ɔ́, mɛ lɛ́ɛ yi bó ba do nú to ɔ́; yě bɛ́ sín gbětótló Síni tɔn mɛ, káká yi Hlexɔ́vu ɖo Lɛbo-Hamáti toxo ɔ́ nukɔn.

²² Yě byɔ́ to ɔ́ mɛ gbɔn afɔligbé, bó yi káká Eblɔ́n, fí e Aximani kpó Cecáyi kpó, kpódó Talumayi kpó kó nɔ ɖ'ayǐ é; mɛ énɛ́ lɛ́ɛ ɔ́, Anáki ví wɛ yě nyǐ. È ɖǒ Eblɔ́n toxo ɔ́ ayǐ ɔ́, é kó ɖó xwe tɛ́nwe cóbɔ è wǎ ɖó Sowáan toxo ɔ́ ayǐ ɖo Ejípu.

²³ Yě wǎ káká tɔdo Ɛcikɔ́lu tɔn mɛ, bó sɛ́n vǐwunkan e nu vǐwun ɖé ɔ́ ɖokpó ɖo fínɛ́. Yě lɛ́ gbɛ glenádi kpó fígi kpó bó dó bǐ kpɔn, bɔ mɛ we hɛn.

²⁴ È sun nyǐ tɛn énɛ́ ɔ́ mɛ ɖɔ: “Tɔdo Ɛcikɔ́lu tɔn”, ɖó vǐwun sín kan e Izlayɛ́li ví lɛ́ɛ sɛ́n ɖo fínɛ́ ɔ́ wútu.

Mɛ e Mɔyízi sɛ́ dó lɛ́ɛ wá ɖó gbe

²⁵ Azǎn kanɖé wɛ Izlayɛ́li ví lɛ́ɛ ba do nú to ɔ́ xɔ, bó lɛ́ kɔ wá.

²⁶ Ée yě wá ɔ́, yě yi Mɔyízi kpó Aalɔ́ɔn kpó, kpódó togun Izlayɛ́li tɔn ɔ́ bǐ kpó gɔ́n, ɖo Kadɛ́ci, ɖo gbětótló Paláni tɔn mɛ. Yě ɖǒ nǔ e yě mɔ ɖo dɔ̌n ɔ́ sín gbe nú yě bǐ, bó xlɛ́ atínsínsɛ́n to ɔ́ mɛ tɔn yě.

²⁷ Yě ɖɔ nú Mɔyízi ɖɔ: “Mǐ yi to e mɛ a sɛ́ mǐ dó ɔ́ mɛ. Anɔ̌sin kpó wǐin kpó nɔ́ sa ɖo to ɔ́ mɛ nǔgbó. Atínsínsɛ́n to ɔ́ mɛ tɔn ɖě ɖíe.

²⁸ Amɔ̌, nǔ ɖokpó e ɖ'é mɛ ɔ́ wɛ nyí ɖɔ mɛ e ɖo to ɔ́ mɛ lɛ́ɛ ɖó hlɔ̌nhlɔ́n; toxo e ɖo to ɔ́ mɛ lɛ́ɛ d'agba ɖésú, bɔ è mɛ ahohó lɛ́ lɛ̌ dó yě ganjí. Mǐ tlɛ mɔ Anáki ví lɛ́ɛ ɖo dɔ̌n.

²⁹ Amalɛ́ki ví lɛ́ɛ ɖo to ɔ́ sín afɔligbé; Hitíti lɛ́ɛ, Jebuzinu lɛ́ɛ, kpódó Amɔliti ví lɛ́ɛ kpó ɖo sókan mɛ, bɔ Kanáanu lɛ́ɛ ɖo xu ɔ́ kpódó Judɛ́ɛn tɔ ɔ́ kpó kpá.”

³⁰ Ée yě ɖǒ gbe ɔ́ fó ɔ́, Kalɛ́bu ɖɔ nú mɛ lɛ́ɛ ɖo Mɔyízi nukún mɛ ɖɔ yě ní nɔ abwɛ̌. É ɖɔ nú yě ɖɔ: “Mi wá mǐ yi; mi wá mǐ yi yí to énɛ́; é sixú gló mǐ ǎ.”

³¹ Lo ɔ́, mɛ e kpó Kalɛ́bu kpó yi to ɔ́ mɛ lɛ́ɛ ɖɔ: “Mǐ sixú yi tɔ́n ahwan mɛ énɛ́ lɛ́ɛ ǎ; yě hú gǎn mǐ dín.”

³² Bɔ yě jɛ nǔ e to e yě yi ba do ná ɔ́ nyí ɔ́ xó ɖɔ jí, ɖo Izlayɛ́li ví lɛ́ɛ nukɔn; yě ɖɔ: “To e mɛ mǐ yi gbɔn, bó ba do ná ɔ́, to ɖé wɛ é nyí, bɔ mɛ ɖé nɔ́ yi mɛ bó nɔ́ gán ǎ; mɛ e mǐ mɔ ɖo to ɔ́ mɛ lɛ́ɛ bǐ wɛ jɔ asú.

³³ Mǐ mɔ Anáki ví lɛ́ɛ; gbɛtɔ́ jangan jangan wɛ yě nyǐ. Ayǐsínzɛn ɖɔhun wɛ mǐ cí ɖo akpá yětɔn; mɔ̌ jɛ́n yě lɔ ka ná kó mɔ mǐ ɖó ɖo akpá yětɔn.”