Kɛ́nsísɔ́ 11 - MAWUXÓWÉMA

Izlayɛ́li ví lɛ́ɛ jɛ Taveéla

¹ É wá su gbe ɖokpó, bɔ Izlayɛ́li ví lɛ́ɛ jɛ gbɛvíhan dó sɛ́ dó Mawu Mavɔmavɔ jí, bɔ é nyɔ́ nukún tɔn mɛ ǎ. Ée Mawu Mavɔmavɔ se gbɛvíhan e dó wɛ yě ɖe ɔ́, xomɛ sin i, bɔ é sɛ́ myɔ dó yě, bɔ sin ɖa nǔ ɖo fí e yě ɖǒ gɔnu ɖó ɔ́ ɖo akpá ɖokpó.

² Bɔ togun ɔ́ sú xó ylɔ́ Mɔyízi, bɔ Mɔyízi sa vo nú Mawu Mavɔmavɔ, bɔ myɔ ɔ́ cí.

³ È sun nyǐ tɛn énɛ́ ɔ́ mɛ ɖɔ Taveéla, tínmɛ tɔn wɛ nyí “zo ji nǔ”, ɖó myɔ Mawu Mavɔmavɔ tɔn fyɔ́ nǔ ɖo tɛ́ntin yětɔn.

Izlayɛ́li togun ɔ́ byɔ́ lan

⁴ É su gbe ɖěvo gbe bɔ lan ɖuɖu jɛ nǔvɔ́nɔ e ɖo Izlayɛ́li ví lɛ́ɛ tɛ́ntin lɛ́ɛ jló jí. Izlayɛ́li ví lɛ́ɛ ɖésú lɛ́ jɛ nǔ hlún ɖɔ jí ɖɔ: “Mɛ̌ wɛ ná ná lan mǐ bɔ mǐ ná ɖu?

⁵ Mǐ ɖo nǔ e mǐ nɔ́ ɖu vɔ̌nu ɖ'ayǐ ɖo Ejípu lɛ́ɛ flín wɛ: hweví, kɔnkɔ́nbu, ayǐkpɛn, mǎ, ayomása, áyo.

⁶ Nǔ énɛ́ lɛ́ɛ ɖě ɖo fí ǎ; din ɔ́, lan ɖo mǐ jló wɛ, mǐ ká sɔ́ nɔ mɔ nǔɖé ɖu zɛ mǎna wú ǎ.”

⁷ Mǎna ɔ́ cí kolyandli sín kwín ɖɔhun, bó wé budeliyɔ́mu sín hǐnhɔ́n ɖɔhun.

⁸ Togun ɔ́ nɔ́ gbadó, bó nɔ́ yi bɛ́ mǎna zǎnzǎn. Yě nɔ́ li ɖo sé jí, abǐ yě nɔ́ só ɖo tomɛ; yě nɔ́ ɖa ɖo zɛ̌n mɛ, bó nɔ́ dó bló atá ná. Atá e è sɔ ɖo ami mɛ ɔ́ ɖɔhun wɛ mǎna ɔ́ nɔ́ cí ɖo nu mɛ.

⁹ Hwenu e ahǔn nɔ́ ɖo jija wɛ zǎn mɛ kɔn nyi fí e yě ɖó gɔnu ɖó ɔ́, mǎna ɔ́ lɔ nɔ kɔn nyi ayǐ.

¹⁰ Mɛ ɖokpó ɖokpó ɖo hɛ̌nnu tɔn mɛ, ɖo Goxɔ tɔn lihɛ́nnu, bó ɖo nǔ hlún ɖɔ wɛ, bɔ Mɔyízi se. Énɛ́ ɔ́, xomɛ sin Mawu Mavɔmavɔ ɖésú. Wǔ kú Mɔyízi,

¹¹ bɔ é ɖɔ nú Mawu Mavɔmavɔ ɖɔ: “Nɛ̌ wɛ ká gbɔn bɔ a ɖo ya dó nú nyɛ mɛsɛntɔ́ towe wɛ gbɔn lě? Aniwú wɛ a ma nyɔ́ xomɛ dó wǔ ce ǎ? Aniwú wɛ a jǒ togun élɔ́ bǐ sín agban nyi kɔ jí nú mì?

¹² Nyɛ wɛ hɛn togun élɔ́ sín adɔgo a? Nyɛ wɛ ji i, bɔ a nɔ ɖɔ nú mì ɖɔ nyɛ ní hɛn ɛ akɔ́nnu vǐnɔ ɖɔhun káká yi to e sín akpá a dǒ nú togun élɔ́ ɔ́ mɛ a?

¹³ Fítɛ́ un ka ná ba lan sín nú mɛ tobutóbú élɔ́ lɛ́ɛ e ɖo lan ví ya dó kɔ nú mì wɛ é?

¹⁴ Nyɛ ɖokpónɔ sixú hɛn togun élɔ́ sín agban ǎ, ɖó é ɖo kpinkpɛn mì wɛ dín.

¹⁵ Nú mɔ̌ jɛ́n a nǎ wa nǔ ce gbɔn hǔn, gbɔ bo hu mì; énɛ́ ɔ́, un ná mɔ ɖɔ a nyɔ̌ xomɛ dó wǔ ce, bɔ un sɔ́ ná ɖo gbɛ bo ná ɖo wǔvɛ́ élɔ́ mɔ wɛ ǎ.”

¹⁶ Ée Mɔyízi ɖɔ mɔ̌ ɔ́, Mawu Mavɔmavɔ ɖɔ n'i ɖɔ: “Kplé tomɛxó Izlayɛ́li tɔn e a tunwun ɖɔ yě nyí tomɛxó, bó ɖó acɛ ɖo togun ɔ́ jí lɛ́ɛ kanɖé gban (70). A nǎ kplá yě wá Goxɔ ɔ́ kɔn, bɔ yě kpódó hwi kpó ná nɔ nukɔn ce fínɛ́.

¹⁷ Un ná jɛ te, bó ná ɖɔ xó nú we ɖo fínɛ́; un ná yí yɛ e ɖo jǐ towe ɔ́ ɖě, bó ná sɔ́ ɖó yě jǐ, bónú yě ná hɛn togun ɔ́ sín agban xá we, bónú hwi ɖokpónɔ ní má hɛn ó.

¹⁸ A nǎ ɖɔ nú togun ɔ́ ɖɔ: ‘Mi slá wǔ nú sɔ! Mi ná mɔ lan ɖu; Mawu Mavɔmavɔ se nǔ e hlún ɖɔ wɛ mi ɖe é, bó ɖɔ: mɛ̌ wɛ ná ná mǐ lan bɔ mǐ nǎ ɖu? Đó hwenu e mǐ ɖo Ejípu ɔ́, mǐ ɖo ganjí.’ Mawu Mavɔmavɔ ná ná lan mi bɔ mi ná ɖu.

¹⁹ É ká nyí ɖɔ azǎn ɖokpó géé, abǐ we, abǐ atɔ́ɔ́n, abǐ wǒ, abǐ ko wɛ mi ná ɖu lan ɔ́ xɔ ǎ;

²⁰ lo ɔ́, mi ná ɖu xɔ sun ɖokpó kpíkpé; mi ná ɖu káká bɔ é ná kpé kɔ nú mi; mi ná ɖu káká bɔ é ná nɔ́ tɔ́n gbɔn awɔntín mɛ nú mi, ɖó mi gbɛ́ wǎn nú nyɛ Mawu Mavɔmavɔ e ɖo tɛ́ntin mitɔn ɔ́; mi hlún nǔ ɖɔ ɖo nukɔn ce, bó ɖɔ: ‘Aniwú wɛ mǐ ká tɔ́n sín Ejípu tawun?’ ”

²¹ Mɔyízi ɖɔ: “Togun e tɛ́ntin un ɖe ɔ́ bló súnnu adɔ̌kpo gban (600.000), bɔ a ka ɖɔ émí ná ná yě lan bɔ yě ná ɖu xɔ sun ɖokpó kpíkpé a!

²² Gbɔ̌ kpó nyibú kpó wɛ è nǎ hu nú yě, bɔ é ná kpé yě a, abǐ hweví e ɖo xu mɛ lɛ́ɛ bǐ wɛ è nǎ bɛ́ kplé nú yě bɔ é ná kpé yě a?”

²³ Mawu Mavɔmavɔ ka yí gbe nú Mɔyízi ɖɔ: “Nyɛ Mawu Mavɔmavɔ ɔ́, un hwe dó nǔ wú wɛ a? Nú nǔ e un ɖɔ nú we ɔ́ ná jɛ kpódó é má ná jɛ kpó ɔ́, a nǎ mɔ din.”

Mawu ná Yɛ tɔn ɖě tomɛxó kanɖé gban lɛ́ɛ

²⁴ Mɔyízi gosín Mawu Mavɔmavɔ nukɔn, bó yi ɖɔ xó e Mawu Mavɔmavɔ ɖɔ ɔ́ nú togun ɔ́. É kplé tomɛxó togun ɔ́ tɔn lɛ́ɛ kanɖé gban (70), bo to yě lɛ́ lɛ̌ dó Goxɔ ɔ́.

²⁵ Mawu Mavɔmavɔ jɛ te ɖo akpɔ́kpɔ́ mɛ, bó ɖɔ xó nú Mɔyízi. É yí Yɛ e ɖo Mɔyízi jí ɔ́ ɖě, bó sɔ́ ɖó tomɛxó kanɖé gban (70) lɛ́ɛ jí, bɔ ée Yɛ ɔ́ jɛ yě jí lě tlóló ɔ́, yě jɛ xó e Mawu sɔ́ dó nu nú yě ɔ́ ɖɔ jí; yě ká ɖɔ sɔ́ yi nukɔn ǎ.

²⁶ Mɛ we ɖo tomɛxó kanɖé gban (70) lɛ́ɛ mɛ, Ɛlidádi kpó Mɛdadi kpó. Yědɛɛ lɛ́ɛ yi Goxɔ Mawu tɔn ɔ́ kɔn ɖě ǎ, yě cí fí e Izlayɛ́li ví lɛ́ɛ ɖó gɔnu ɖó é. Yɛ Mawu tɔn jɛ yě lɔ jí, bɔ yě jɛ xó e Mawu sɔ́ dó nu nú yě ɔ́ ɖɔ jí ɖo fí e yě ɖǒ gɔnu ɖó é.

²⁷ Nyaví dɔ̌nkpɛvú ɖokpó kán wezun yi ɖɔ nú Mɔyízi ɖɔ: “Ɛlidádi kpó Mɛdadi kpó ɖo Mawuxó ɖɔ wɛ ɖo fí e mǐ ɖó gɔnu ɖó ɔ́.”

²⁸ Jozuwée e nyí Nuni sín vǐ súnnu, bo nyí mɛsɛntɔ́ Mɔyízi tɔn sín dɔ̌nkpɛvú mɛ tɔn ɖokpóó ɔ́ yí xó, bó ɖɔ nú Mɔyízi ɖɔ: “Gǎn ce, yi gbɛ́ nú yě!”

²⁹ Mɔyízi ka yí gbe n'i ɖɔ: “Wǔ hwan dó ta ce mɛ wɛ a ɖe a? É jló mì ɖɔ Mawu Mavɔmavɔ ní gba Yɛ tɔn kɔn nyi togun tɔn bǐ jǐ, bɔ yě bǐ ná húzú gbeyíɖɔ tɔn.”

³⁰ Ée Mɔyízi ɖɔ mɔ̌ ɔ́, é kpó tomɛxó Izlayɛ́li tɔn kanɖé gban lɛ́ɛ kpó lɛ́ kɔ yi fí e yě ɖǒ gɔnu ɖó é.

Izlayɛ́li ví lɛ́ɛ jɛ Kivlɔti-Taawa

³¹ Mawu Mavɔmavɔ bló bɔ jɔhɔn ɖé jɛ nyinyi sín xu mɛ jí, bó dɔn káyi lɛ́ɛ wá kɔn nyi fí e Izlayɛ́li ví lɛ́ɛ ɖó gɔnu ɖó ɔ́. Yě lɛ́ lɛ̌ dó fí e yě ɖǒ gɔnu ɖó ɔ́ káká yi fó dó fí ɖé, bɔ è nǎ gosín fí e yě ɖǒ gɔnu ɖó ɔ́ yi fí ɔ́, è nǎ ɖi zɔnlin nú kéze ɖokpó. Jǐ yiyi yětɔn ná ɖó mɛ̌tlu ɖokpó mɔ̌.

³² Gbe énɛ́ ɔ́ gbe bǐ kpó zǎn tɔn mɛ bǐ kpó, kpódó ayǐhɔ́ngbe tɔn bǐ kpó ɔ́, káyi cyán wɛ jɛ́n togun ɔ́ nɔ́ ɖe. Mɛ e bɛ́ kpɛɖé ɖo yě mɛ ɔ́ tɔn hú kilóo afɔwó-afatɔ́n (3.000). È xyá yě lɛ́ lɛ̌ dó fí e yě ɖǒ gɔnu ɖó ɔ́, bónú yě ná xú.

³³ Izlayɛ́li ví lɛ́ɛ sɔ́ xɛ nɛ́ lɛ́ɛ sín lan dó nu mɛ ɔ́, yě kó tɛ aɖǔ jí cóbónú Mawu Mavɔmavɔ sin xomɛ ɖaxó ɖé dó yě, bó dɔn jɛmɛjí baɖabaɖa ɖé dó yě jǐ ǎ.

³⁴ È sun nyǐ tɛn énɛ́ ɔ́ mɛ ɖɔ Kivlɔti-Taawa, tínmɛ tɔn wɛ nyí “Yɔdo nǔ jló mɛ díngan tɔn”, ɖó fínɛ́ wɛ è ɖi mɛ e ɖó lan ɖuɖu sín jlǒ díngan lɛ́ɛ ɖó.

³⁵ Togun ɔ́ gosín Kivlɔti-Taawa, bo yi Haselɔ́ti, bó ɖó gɔnu ɖó fínɛ́.