Kɛ́nsísɔ́ 1 - MAWUXÓWÉMA

TOGUN IZLAYƐ́LI TƆN Ɔ́ ƉO GBĚTÓTLÓ SINAYÍI TƆN MƐ ( 1.1—10.10 ) Nukɔn nukɔntɔn e Mɔyízi sɔ́ Izlayɛ́li ví lɛ́ɛ sín kɛ́n é

¹ Xwe e bɔ dó xwe e mɛ Izlayɛ́li ví lɛ́ɛ gosín Ejípu ɔ́ wú ɔ́, ɖo sun tɔn wegɔ́ ɔ́ sín azǎn nukɔn tɔn ɔ́ gbe ɔ́, Mɔyízi ɖo Goxɔ ɔ́ mɛ, bɔ Mawu Mavɔmavɔ ɖɔ xó n'i ɖo gbětótló Sinayíi tɔn mɛ; é ɖɔ n'i ɖɔ:

² “Hwi kpó Aalɔ́ɔn kpó ní sɔ́ togun Izlayɛ́li tɔn ɔ́ bǐ sín kɛ́n. Mi ná xwedó hɛ̌nnu yětɔn lɛ́ɛ, bó ná xwedó xwédo tɔ́ yětɔn lɛ́ɛ tɔn, bó ná ylɔ́ súnnu lɛ́ɛ ɖokpó ɖokpó sín nyǐkɔ bó sɔ́ kɛ́n yětɔn.

³ Mi ná sɔ́ súnnu e ko ɖó xwe bɛ́ sín ko, kpódó ée kó ɖó hú mɔ̌, bó sixú fun ahwan lɛ́ɛ kpó sín kɛ́n; hwi kpódó Aalɔ́ɔn kpó ná xwedó ahwangɔnu yětɔn yětɔn, bó dó sɔ́ kɛ́n yětɔn.

⁴ Hɛ̌nnugán akɔta ɖokpó ɖokpó tɔn ná dó alɔ mi.

⁵ Mɛ e ná dó alɔ mi lɛ́ɛ sín nyǐkɔ ɖíe: Elisúu, Cedewúu ví ɔ́ akɔta Hwlibɛ́ni tɔn mɛ wɛ é ɖe;

⁶ Celumiyɛ́li, Sulicadáyi ví ɔ́, akɔta Sinmɛnyɔ́ɔ tɔn mɛ wɛ é ɖe;

⁷ Naxicɔ́ni, Aminadabu ví ɔ́, ɖo akɔta Judáa tɔn mɛ

⁸ Nɛtanɛli, Suwáa ví ɔ́; akɔta Isakáa tɔn mɛ wɛ é ɖe.

⁹ Eliavu, Helɔ́ni ví ɔ́; akɔta Zabulɔ́ɔn tɔn mɛ wɛ é ɖe.

¹⁰ Elicama Amumihudi ví ɔ́; Eflayímu Jozɛ́fu ví ɔ́ sín akɔta mɛ wɛ é ɖe. Gamɛliyɛ́li, Pedasúu ví ɔ́; Manasée Jozɛ́fu ví ɔ́ sín akɔta mɛ wɛ é ɖe.

¹¹ Avidáni, Gideóni ví ɔ́; akɔta Bɛnjamɛ́ɛ tɔn mɛ wɛ é ɖe.

¹² Axiezɛ́ɛ, Amumicadayi ví ɔ́; akɔta Dan tɔn mɛ wɛ é ɖe.

¹³ Pagiyɛ́li, Ɔkláni ví ɔ́; akɔta Acɛ́ɛ tɔn mɛ wɛ é ɖe.

¹⁴ Eliyasáfu, Dewúɛli ví ɔ́; akɔta Gadi tɔn mɛ wɛ é ɖe.

¹⁵ Axila, Eyináni ví ɔ́; akɔta Nɛfutali tɔn mɛ wɛ é ɖe.”

¹⁶ Hɛ̌nnugán énɛ́ lɛ́ɛ e è sɔ́ ɖo togun ɔ́ mɛ lɛ́ɛ lɛ́ nyí ahwangán Izlayɛ́li tɔn.

¹⁷ Mɔyízi kpódó Aalɔ́ɔn kpó sɔ́ mɛ énɛ́ lɛ́ɛ e è ɖe lɛ́ɛ gɔ́ nú yěɖée.

¹⁸ Énɛ́ ɔ́ gúdo ɔ́, yě ylɔ́ togun Izlayɛ́li tɔn ɔ́ bǐ kplé, ɖo sun wegɔ́ ɔ́ sín azǎn nukɔn tɔn ɔ́ gbe, bó sɔ́ mɛ e ko ɖó xwe ko lɛ́ɛ, kpódó mɛ ko ɖó hú mɔ̌ lɛ́ɛ kpó sín kɛ́n. Yě sɔ́ hɛ̌nnu nabí e ɖo akɔta ɖokpó ɖokpó mɛ ɔ́ sín kɛ́n, bó sɔ́ gbɛtɔ́ nabí e ɖo hɛ̌nnu ɖokpó ɖokpó mɛ ɔ́ sín kɛ́n,

¹⁹ lě e Mawu Mavɔmavɔ ɖɔ nú Mɔyízi ɖɔ è nǐ bló gbɔn é. Gbětótló Sinayíi tɔn mɛ wɛ è xa mɛ lɛ́ɛ ɖe.

²⁰ Mɔyízi kpó Aalɔ́ɔn kpó, kpódó gǎn lɛ́ɛ kpó sɔ́ Hwlibɛ́ni, nukɔngbéví Izlayɛ́li tɔn ɔ́ sín vǐ súnnu lɛ́ɛ sín kɛ́n. Yě sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu ɖokpó ɖokpó mɛ lɛ́ɛ sín kɛ́n. Súnnu e kó ɖó xwe ko kpódó ée ɖó hú mɔ̌, bó kó su ahwan fun lɛ́ɛ kpó ɖokpó ɖokpó sín kɛ́n wɛ yě sɔ́.

²¹ Súnnu e sín kɛ́n yě sɔ́ ɖo akɔta Hwlibɛ́ni tɔn mɛ lɛ́ɛ bló súnnu adɔ̌kpo we děgba ɖě afɔwó-afɔwe kanwe ko (46.500).

²² Yě sɔ́ Sinmɛnyɔ́ɔ sín vǐ súnnu lɛ́ɛ sín kɛ́n. Yě sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu lɛ́ɛ ɖokpó ɖokpó mɛ lɛ́ɛ sín kɛ́n. Súnnu e kó ɖó xwe ko kpódó ée kó ɖó hú mɔ̌, bó kó su ahwan fun lɛ́ɛ kpó ɖokpó ɖokpó sín kɛ́n wɛ yě sɔ́.

²³ Súnnu e sín kɛ́n yě sɔ́ ɖo Sinmɛnyɔ́ɔ sín akɔta mɛ lɛ́ɛ bǐ bló súnnu adɔ̌kpo we děgba ɛnɛ afɔwó-afayizɛ́n kanwe ko (59.300).

²⁴ Yě sɔ́ Gadi sín vǐ súnnu lɛ́ɛ sín kɛ́n. Yě sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu lɛ́ɛ kpó ɖokpó ɖokpó mɛ lɛ́ɛ sín kɛ́n. Súnnu e kó ɖó xwe ko, kpódó éé kó ɖó hú mɔ̌, bó ko su ahwan fun lɛ́ɛ ɖokpó ɖokpó sín kɛ́n wɛ yě sɔ́.

²⁵ Súnnu e sín kɛ́n yě sɔ́ ɖo Gadi sín akɔta mɛ lɛ́ɛ bló súnnu adɔ̌kpo we děgba ɖě afɔtántɔn kanɖé wǒ (45.650).

²⁶ Yě sɔ́ Judáa sín vǐ súnnu lɛ́ɛ sín kɛ́n. Yě sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu ɖokpó ɖokpó mɛ ɔ́ sín kɛ́n. Súnnu e ko ɖó xwe ko, kpódó éé kó ɖó hú mɔ̌, bó ko su ahwan fun lɛ́ɛ kpó ɖokpó ɖokpó sín kɛ́n wɛ yě sɔ́.

²⁷ Súnnu e sín kɛ́n yě sɔ́ ɖo akɔta Judáa tɔn mɛ ɔ́ bló súnnu adɔ̌kpo atɔn děgba atɔn afɔwó nǔwɔntɔn (74.600).

²⁸ Yě sɔ́ Isakáa sín vǐ súnnu lɛ́ɛ sín kɛ́n. Yě sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu lɛ́ɛ ɖokpó ɖokpó mɛ ɔ́ sín kɛ́n. Súnnu e ko ɖó xwe ko lɛ́ɛ kpódó éé kó ɖó hú mɔ̌, bó kó su ahwan fun lɛ́ɛ kpó ɖokpó ɖokpó sín kɛ́n wɛ yě sɔ́.

²⁹ Súnnu e sín kɛ́n yě sɔ́ ɖo Isakáa sín akɔta mɛ ɔ́ bló súnnu adɔ̌kpo we děgba atɔn afɔwó-afɔwe (54.400).

³⁰ Yě sɔ́ Zabulɔ́ɔn sín vǐ súnnu lɛ́ɛ sín kɛ́n. Yě sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu lɛ́ɛ ɖokpó ɖokpó mɛ lɛ́ɛ sín kɛ́n. Súnnu e kó ɖó xwe ko kpódó éé kó ɖó hú mɔ̌, bó kó su ahwan fun lɛ́ɛ kpó bǐ sín kɛ́n wɛ yě sɔ́.

³¹ Súnnu e sín kɛ́n yě sɔ́ ɖo Zabulɔ́ɔn sín akɔta mɛ lɛ́ɛ bló súnnu adɔ̌kpo we děgba ɛnɛ afɔtɛ́nwe (57.400).

³² Yě sɔ́ Eflayímu sín vǐ súnnu lɛ́ɛ sín kɛ́n, ɖo Jozɛ́fu ví lɛ́ɛ mɛ. Yě sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu ɖokpó ɖokpó mɛ ɔ́ sín kɛ́n. Súnnu e kó ɖó xwe ko, kpódó éé kó ɖó hú mɔ̌, bó ko su ahwan fun lɛ́ɛ kpó ɖokpó ɖokpó sín kɛ́n wɛ yě sɔ́.

³³ Súnnu e sín kɛ́n yě sɔ́ ɖo Eflayímu sín akɔta mɛ lɛ́ɛ bló súnnu adɔ̌kpo we afɔwe kanwe ko (40.500).

³⁴ Yě sɔ́ Manasée sín vǐ súnnu lɛ́ɛ sín kɛ́n; yě sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu ɖokpó ɖokpó mɛ ɔ́ sín kɛ́n. Súnnu e kó ɖó xwe ko lɛ́ɛ kpódó éé kó ɖó hú mɔ̌, bó kó su ahwan fun lɛ́ɛ kpó sín kɛ́n wɛ yě sɔ́.

³⁵ Súnnu e sín kɛ́n yě sɔ́ ɖo Manasée sín akɔta mɛ lɛ́ɛ bló súnnu adɔ̌kpo ɖě děgba atɔn afɔɖé (32.200).

³⁶ Yě sɔ́ Bɛnjamɛ́ɛ sín vǐ súnnu lɛ́ɛ sín kɛ́n. Yě sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu ɖokpó ɖokpó mɛ ɔ́ sín kɛ́n. Súnnu e kó ɖó xwe ko lɛ́ɛ kpódó éé kó ɖó hú mɔ̌, bó kó su ahwan fun lɛ́ɛ kpó ɖokpó ɖokpó sín kɛ́n wɛ yě sɔ́.

³⁷ Súnnu e sín kɛ́n yě sɔ́ ɖo Bɛnjamɛ́ɛ sín akɔta mɛ lɛ́ɛ bló súnnu adɔ̌kpo ɖě děgba atɔn afɔwó-afɔtɛ́nwe (35.400).

³⁸ Yě sɔ́ Dan sín vǐ súnnu lɛ́ɛ sín kɛ́n. Yě sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu ɖokpó ɖokpó mɛ ɔ́ sín kɛ́n. Súnnu e kó ɖó xwe ko lɛ́ɛ kpódó éé kó ɖó hú mɔ̌, bó kó su ahwan fun lɛ́ɛ kpó ɖokpó ɖokpó sín kɛ́n wɛ yě sɔ́.

³⁹ Súnnu nabí e sín kɛ́n yě sɔ́ ɖo Dan sín akɔta mɛ lɛ́ɛ bló súnnu adɔ̌kpo atɔn afɔwó nǔwɔntɔn kanwe ko (62.700).

⁴⁰ Yě sɔ́ Acɛ́ɛ sín vǐ súnnu lɛ́ɛ sín kɛ́n. Yě sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu ɖokpó ɖokpó mɛ ɔ́ sín kɛ́n. Súnnu e kó ɖó xwe ko lɛ́ɛ kpódó éé kó ɖó hú mɔ̌, bó kó su ahwan fun lɛ́ɛ kpó sín kɛ́n wɛ yě sɔ́.

⁴¹ Súnnu e sín kɛ́n yě sɔ́ ɖo Acɛ́ɛ sín akɔta mɛ ɔ́ bló súnnu adɔ̌kpo we afɔtɛ́nwe kanwe ko (41.500).

⁴² Yě sɔ́ Nɛfutali sín vǐ súnnu lɛ́ɛ sín kɛ́n. Yě sɔ́ hɛ̌nnu nabí e ɖo akɔta ɔ́ mɛ lɛ́ɛ sín kɛ́n, bó sɔ́ gbɛtɔ́ nabí e ɖo hɛ̌nnu ɖokpó ɖokpó mɛ ɔ́ sín kɛ́n. Súnnu e ko ɖó xwe ko lɛ́ɛ kpódó éé kó ɖó hú mɔ̌, bó kó su ahwan fun lɛ́ɛ kpó ɖokpó ɖokpó sín kɛ́n wɛ yě sɔ́.

⁴³ Súnnu e sín kɛ́n yě sɔ́ ɖo Nɛfutali sín akɔta mɛ lɛ́ɛ bló súnnu adɔ̌kpo we děgba atɔn afɔtɛ́nwe (53.400).

⁴⁴ Mɛ e sín kɛ́n Mɔyízi kpó Aalɔ́ɔn kpó, kpódó hɛ̌nnugán wěwe e yě ɖe ɖo togun ɔ́ mɛ lɛ́ɛ kpó sɔ́ lɛ́ɛ nɛ́. Yě mɛ wěwe énɛ́ lɛ́ɛ wɛ sɔ́ akɔta wěwe lɛ́ɛ sín afɔ ɖó te.

⁴⁵ Lě e Mɔyízi kpó Aalɔ́ɔn kpó, kpódó gǎn lɛ́ɛ kpó sɔ́ Izlayɛ́linu lɛ́ɛ sín kɛ́n ɖo akɔta lɛ́ɛ ɖokpó ɖokpó mɛ, hɛ̌nnu lɛ́ɛ ɖokpó ɖokpó mɛ, bɛ́ sín súnnu e kó ɖó xwe ko lɛ́ɛ jí, yi éé kó ɖó hú mɔ̌ lɛ́ɛ jí gbɔn ɔ́ nɛ́. Yě mɛ énɛ́ lɛ́ɛ bǐ wɛ kó su ahwan fun.

⁴⁶ Yě mɛ e sín kɛ́n Mɔyízi kpó Aalɔ́ɔn kpó, kpódó gǎn lɛ́ɛ kpó sɔ́ lɛ́ɛ bǐ bló adɔ̌kpo gban afɔwó-afɔtɛ́nwe kantɔn gban (603.550).

Azɔ̌ e nyí akɔta Levíi tɔn ɔ́ tɔn é.

⁴⁷ Mɔyízi kpó Aalɔ́ɔn kpó, kpódó gǎn lɛ́ɛ kpó sɔ́ mɛ e ɖo akɔta Levíi tɔn ɔ́ mɛ lɛ́ɛ sín kɛ́n kɛ́nsísɔ́ élɔ́ hwenu ǎ,

⁴⁸ ɖó Mawu Mavɔmavɔ ko ɖɔ nú Mɔyízi ɖɔ:

⁴⁹ “Ma sɔ́ Levíi ví lɛ́ɛ sín kɛ́n dó Izlayɛ́li ví ɖě lɛ́ɛ mɛ ó.

⁵⁰ A nǎ zé azɔ̌ e nyí Goxɔ ɔ́ tɔn lɛ́ɛ dó alɔ mɛ nú Levíi ví lɛ́ɛ; fínɛ́ wɛ akɔjijɛgbá ɔ́ ɖe. Nǔ e è dǒ bló Goxɔ ɔ́ ná lɛ́ɛ kpó nǔ e è nɔ zán ɖo xwé ɔ́ gbe lɛ́ɛ kpó sín azɔ̌ lɛ́ɛ ɔ́, a nǎ zé dó alɔ mɛ nú yě. Yě wɛ ná nɔ́ zé Goxɔ ɔ́ kpó nǔ e è nɔ zán ɖ'é mɛ lɛ́ɛ bǐ kpó. Yě wɛ ná nɔ wa azɔ̌ ɖo xwé ɔ́ gbe; yě wɛ ná nɔ́ ɖó gɔnu lɛ́ lɛ̌ dó Goxɔ ɔ́.

⁵¹ Nú è ɖo tɛn ná sɛ nú Goxɔ ɔ́ wɛ hweɖěbǔnu ɔ́, Levíi ví lɛ́ɛ wɛ ná nɔ́ tún; nú è nǎ nɔ te fí ɖé bó ɖó gɔnu ɖó fínɛ́ ɔ́, yědɛɛ lɛ́ɛ wɛ ná nɔ́ ján Goxɔ ɔ́. Nú mɛ ɖěvo ɖé sɛkpɔ́ ɔ́, è ná hu i.

⁵² Izlayɛ́li ví ɖě lɛ́ɛ ɔ́, yě ɖó ná nɔ tɛn yětɔn mɛ, ɖo ahwangɔnu yětɔn yětɔn mɛ, ɖo ahwansyá yětɔn yětɔn kpá.

⁵³ Amɔ̌, kúnkan Levíi tɔn lɛ́ɛ kɛ́ɖɛ́ wɛ ná nɔ́ ɖó gɔnu lɛ́ lɛ̌ dó Goxɔ ɔ́, bó ká ná nɔ́ ɖo azɔ̌ yětɔn wa wɛ. Énɛ́ ɔ́, Izlayɛ́li ví lɛ́ɛ ná dɔn xomɛsin nyɛ Mawu Mavɔmavɔ tɔn dó yěɖée jí ǎ.”

⁵⁴ Izlayɛ́li ví lɛ́ɛ wa nǔ, bɔ é sɔgbe xá lě e Mawu Mavɔmavɔ ɖɔ nú Mɔyízi gbɔn é pɛ́pɛ́pɛ́.