Nǔɖexlɛ́mɛ 9 - MAWUXÓWÉMA

¹ Énɛ́ ɔ́ gúdo ɔ́, wɛnsagun Mawu tɔn atɔ́ɔ́ngɔ́ ɔ́ kún kpɛn. Sunví ɖokpó j'ayǐ sín jǐxwé wá jɛ ayǐkúngban jí bɔ un mɔ; è sɔ́ dotɔ domaɖó-azan ɔ́ tɔn sín cávi jó nú sunví ɔ́.

² Sunví ɔ́ hun hɔn dotɔ domaɖó-azan ɔ́ tɔn, bɔ azizɔ ɖé tɔ́n sín mɛ, bó cí kpómɛmyɔ ɖaxó sín azizɔ ɖɔhun. Azizɔ e tɔ́n sín dotɔ ɔ́ mɛ ɔ́ hɛn hwesivɔ́ kpódó gbɛ ɔ́ mɛ kpán wi.

³ Kle lɛ́ɛ tɔ́n sín azizɔ ɔ́ mɛ, bó gba kpé ayǐkúngban ɔ́ jí; è nǎ acɛ yě, bɔ é cí acɛ e hɔnkéklě lɛ́ɛ ɖó é ɖɔhun.

⁴ È ɖɔ nú yě ɖɔ yě ní ma wa nǔ nyanya nú gběhan ó, yě ní ma wa nǔ nyanya nú ama e ɖo mǔ lɛ́ɛ ɖěbǔ ó; yě ní ma ka wa nǔ nyanya nú atín ɖěbǔ ó. Lo ɔ́, gbɛtɔ́ e sín nukɔn wuntun Mawu tɔn ma ɖe ǎ lɛ́ɛ kɛ́ɖɛ́ wɛ yě ná wa nǔ nyanya ná.

⁵ È nǎ gbe kle lɛ́ɛ ɖɔ yě ní hu gbɛtɔ́ énɛ́ lɛ́ɛ ǎ; lo ɔ́, yě ní dó ya nú yě kpowun nú sun atɔ́ɔ́n. Wǔvɛ́ e è nɔ mɔ ɖo ya e kle lɛ́ɛ nɔ dó nú mɛ é mɛ ɔ́ cí hɔnkéklě mɛ mɛ ɔ́, wǔvɛ́ e è nɔ mɔ é ɖɔhun.

⁶ Đo sun atɔ́ɔ́n énɛ́ lɛ́ɛ gbla mɛ ɔ́, gbɛtɔ́ lɛ́ɛ ná ba kú, yě ka ná mɔ ǎ; yě ná jló ɖɔ émí ní kú, kú ka ná hɔn yi zɔ nú yě.

⁷ Kle énɛ́ lɛ́ɛ cí sɔ́ e ɖo gbesisɔ mɛ, bó ná fun ahwan é ɖɔhun; nǔ axɔ́súgbákún e è sɔ́ siká dó bló ná é ɖɔhun ɖé lɛ́ɛ ɖo ta nú yě; nukún mɛ yětɔn lɛ́ɛ cí gbɛtɔ́ nukún mɛ ɖɔhun.

⁸ Đa yětɔn lɛ́ɛ cí nyɔ̌nu lɛ́ɛ sín ɖa ɖɔhun; aɖǔ yětɔn lɛ́ɛ cí kinnikínní lɛ́ɛ sín aɖǔ ɖɔhun.

⁹ Nǔ gǎglónú e è sɔ́ gan dó bló ná é ɖɔhun ɖé ɖo akɔ́nta nú yě; awa yětɔn lɛ́ɛ sín zǐngídi cí kɛkɛ́ví gěgé e sɔ́ ɖo dindɔn wɛ, bó ɖo wezun jí xwe ahwangbénu lɛ́ɛ sín zǐngídi ɖɔhun.

¹⁰ Sí e yě ɖó lɛ́ɛ cí hɔnkéklě lɛ́ɛ tɔn ɖɔhun, bɔ nu yětɔn xwíɖí. Sí yětɔn lɛ́ɛ mɛ wɛ acɛ e yě ná dó wa nǔ nyanya dó gbɛtɔ́ lɛ́ɛ wú nú sun atɔ́ɔ́n ɔ́ ɖe.

¹¹ Axɔ́sú ɖokpó ɖo yě nu; é wɛ nyí wɛnsagun dotɔ domaɖó-azan ɔ́ tɔn; nyǐkɔ tɔn nɔ nyí “Abadɔ́ɔn” ɖo Ebléegbe mɛ, bó nɔ nyí “Apolyɔ́ni” ɖo Glɛ̌sigbe mɛ.

¹² Awě nukɔntɔn ɔ́ nɛ́ wá yi nɛ́; énɛ́ ɔ́ gúdo ɔ́, nyladó we ɖěvo ɖó ná lɛ́ jɛ.

¹³ Énɛ́ ɔ́ gúdo ɔ́, wɛnsagun ayizɛ́ngɔ́ ɔ́ kún kpɛn, bɔ un se gbe ɖé ɖo nǔ ɖɔ wɛ sín vɔ̌sákpe e è sɔ́ siká dó bló ná, bɔ é ɖo Mawu nukɔn ɔ́ sín zo ɛnɛ lɛ́ɛ kɔn jǎwe.

¹⁴ Gbe ɔ́ ɖɔ nú wɛnsagun ayizɛ́ngɔ́ e hɛn kpɛn ɔ́ ɖɔ: “Đe wɛnsagun ɛnɛ e ɖo wlɔ mɛ ɖo Efláti, tɔsisa ɖaxó ɔ́ kpá lɛ́ɛ nyi te.”

¹⁵ Đe wɛnsagun ɛnɛ lɛ́ɛ nyi te; è ko sɔ́ nǔ nú yě ɖ'ayǐ nú gan énɛ́ ɔ́ mɛ pɛ́pɛ́pɛ́, ɖo azǎn énɛ́ ɔ́ gbe, nú azǎn énɛ́ ɔ́ ɖo sun énɛ́ ɔ́ mɛ, nú sun énɛ́ ɔ́ ɖo xwe énɛ́ ɔ́ mɛ, bónú yě ná hu gbɛtɔ́ lɛ́ɛ sín atɔnvlɔ́ɖó.

¹⁶ È ɖɔ ahwanfuntɔ́ nabí e ɖo sɔ́ jí lɛ́ɛ nú mì: yě mɛ lǐvi afɔɖé (200.000.000) wɛ.

¹⁷ Lě e un mɔ sɔ́ lɛ́ɛ kpódó sɔ́xátɔ́ lɛ́ɛ kpán ɖo nǔmimɔ ce mɛ gbɔn ɔ́ ɖíe: sɔ́xátɔ́ lɛ́ɛ hɛn gǎglónú vɔvɔ myɔ ɖɔhun; yě hɛn gǎglónú fɛ́sinnɔ awǐnnya ɖagbe ɖagbe e è nɔ ylɔ́ ɖɔ Safíi ɔ́ ɖɔhun; yě hɛn gǎglónú koklójónɔ hwemí ɖɔhun; sɔ́ lɛ́ɛ sín ta cí kinnikínní lɛ́ɛ sín ta ɖɔhun; myɔ kpó azizɔ kpó, kpódó hwemí kpó nɔ tɔ́n sín nu yětɔn mɛ.

¹⁸ Nǔ nyanya atɔn énɛ́ lɛ́ɛ hu gbɛtɔ́ lɛ́ɛ sín atɔnvlɔ́ɖó: nǔ nyanya énɛ́ lɛ́ɛ wɛ nyí myɔ kpódó azizɔ kpó, kpódó hwemí kpán e ɖo tíntɔ́n sín sɔ́ lɛ́ɛ nu mɛ wɛ é.

¹⁹ Đó hlɔ̌nhlɔ́n sɔ́ lɛ́ɛ tɔn ɔ́, nu yětɔn mɛ wɛ é ɖe, bó lɛ́ ɖo sí yětɔn lɛ́ɛ mɛ; sí yětɔn cí dan ɖɔhun bó ɖó ta bɔ yě nɔ sɔ́ dó wa nǔ nyanya nú gbɛtɔ́ lɛ́ɛ.

²⁰ Gbɛtɔ́ e kpo bɔ nǔ nyanya énɛ́ lɛ́ɛ ma hu ǎ lɛ́ɛ lɛ́ kɔ sín nǔ e yě sɔ́ alɔ yě ɖésúnɔ tɔn dó bló ná lɛ́ɛ sinsɛn gúdo ǎ. Yě nɔ gɔn yɛ nyanya lɛ́ɛ sɛn ǎ; yě ka nɔ gɔn vodún e è sɔ́ siká dó bló ná lɛ́ɛ, ée è sɔ́ kpatágan dó bló ná lɛ́ɛ, ée è sɔ́ ganvɔ dó bló ná lɛ́ɛ, ée è sɔ́ awǐnnya dó bló ná lɛ́ɛ kpó ée è sɔ́ atín dó bló ná lɛ́ɛ kpán sɛn ǎ; nǔ énɛ́ lɛ́ɛ ka sixú mɔ nukúnnú ǎ; yě ka sixú se tónú ǎ; yě ka sixú ɖi zɔnlin ǎ.

²¹ Gbɛtɔ́ énɛ́ lɛ́ɛ ka lɛ́ lɛ́ kɔ sín mɛhuhu, majíkiblóbló, agalilɛ kpó ajojija kpó gúdo ǎ.