Nǔɖexlɛ́mɛ 6 - MAWUXÓWÉMA

Lɛ̌ngbɔ́ví ɔ́ gba wuntun ayizɛ́n nukɔntɔn lɛ́ɛ

¹ Énɛ́ ɔ́ gúdo ɔ́, wuntun tɛ́nwe lɛ́ɛ ɔ́, un mɔ Lɛ̌ngbɔ́ví ɔ́ gba nukɔntɔn ɔ́, bɔ un se nǔɖogbɛ ɛnɛ lɛ́ɛ ɖokpó dó gbe jǐ dó gbe ɖɔhun, bó ɖɔ: “Wǎ!”

² Un kpɔ́n lobo mɔ sɔ́ wěwé ɖokpó; mɛ e ɖo sɔ́ ɔ́ jí ɔ́ hɛn gǎ ɖokpó, bɔ è nǎ ɛ axɔ́súgbákún ɖokpó. É ɖidó mɛ ko ɖu ɖ'é jí ɖɔhun, bó ná ɖu ɖ'é jí.

³ Énɛ́ ɔ́ gúdo ɔ́, Lɛ̌ngbɔ́ví ɔ́ gba wuntun wegɔ́ ɔ́, bɔ un se nǔɖogbɛ wegɔ́ ɔ́ ɖo ɖiɖɔ wɛ ɖɔ: “Wǎ!”

⁴ Bɔ sɔ́ ɖěvo tɔ́n, bó nyí sɔ́ vɔvɔ; è nǎ acɛ mɛ e ɖo sɔ́ ɔ́ jí ɔ́ ɖɔ é ní bló bónú ahwanfunfun ní gba kpé ayǐkúngban ɔ́ jí, bónú gbɛtɔ́ lɛ́ɛ ɖě ná nɔ hu ɖě. È sɔ́ hwǐ ɖaxó ɖokpó dó así n'i.

⁵ Énɛ́ ɔ́ gúdo ɔ́, Lɛ̌ngbɔ́ví ɔ́ gba wuntun atɔngɔ́ ɔ́, bɔ un se nǔɖogbɛ atɔngɔ́ ɔ́ ɖo ɖiɖɔ wɛ ɖɔ: “Wǎ!” Un kpɔ́n, lobo mɔ sɔ́ wiwi ɖokpó; mɛ e ɖo sɔ́ ɔ́ jí ɔ́ hɛn nǔdagan ɖokpó alɔ mɛ.

⁶ Un se gbe ɖé gosín nǔɖogbɛ ɛnɛ lɛ́ɛ tɛ́ntin, bó ɖɔ: “Blěe kilóo ɖokpó géé jɛ́n è nɔ zé azɔ̌kwɛ́ gbe ɖokpó tɔn ɔ́ bǐ dó xɔ ná; ɔ́ji kilóo atɔn wɛ è nɔ zé azɔ̌kwɛ́ gbe ɖokpó tɔn ɔ́ bǐ dó xɔ ná. Amɔ̌, ma ɖ'alɔ ami kpó vɛ̌ɛn kpó wú ó.”

⁷ Énɛ́ ɔ́ gúdo ɔ́, Lɛ̌ngbɔ́ví ɔ́ gba wuntun ɛnɛgɔ́ ɔ́, bɔ un se nǔɖogbɛ ɛnɛgɔ́ ɔ́ ɖo ɖiɖɔ wɛ ɖɔ: “Wǎ!”

⁸ Un kpɔ́n bó mɔ sɔ́ amamú ɖokpó; mɛ e ɖo sɔ́ ɔ́ jí ɔ́ nɔ nyí Kú, bɔ kútomɛ xwedó e. È nǎ acɛ yě, bónú yě ná hu gbɛtɔ́ lɛ́ɛ ɖó hwǐ wú; yě ná ɖó adɔ nú yě, bɔ yě ná kú; yě ná ɖó azɔn nú yě, bɔ yě ná kú; yě ná zɔ́n bɔ gběkanlin e ɖo ayǐkúngban jí lɛ́ɛ ná hu gbɛtɔ́ lɛ́ɛ ɖo ayǐkúngban ɔ́ sín ɛnɛvlɔ́ɖó jí.

⁹ Énɛ́ ɔ́ gúdo ɔ́, Lɛ̌ngbɔ́ví ɔ́ gba wuntun atɔ́ɔ́ngɔ́ ɔ́, bɔ un mɔ mɛ e è hu, ɖó yě jlá Mawuxó ɔ́, bó nɔ gbejí ɖo kúnnuɖiɖe yětɔn mɛ lɛ́ɛ é sín lǐndɔ̌n ɖo vɔ̌sákpe ɔ́ glɔ́.

¹⁰ Yě nɔ sú xó tlílí, bó nɔ ɖɔ: Aklúnɔ mímɛ́, Aklúnɔ nǔgbó nǔgbó, káká hwetɛ́nu wɛ a nǎ nɔ te yi jɛ, bó ná ɖɔ hwɛ xá mɛ e ɖo ayǐkúngban jí lɛ́ɛ, bó ná ba hlɔn nú mǐ, ɖó hu e yě hu mǐ ɔ́ wútu?

¹¹ È nǎ awu gaga wěwé yě mɛ ɖokpó ɖokpó, bó ɖɔ nú yě ɖɔ yě ní lɛ́ gbɔjɛ́ nú hwenu kpɛɖé, káká jɛ hwenu e azɔ̌gbɛ́ yětɔn kpó nɔví yětɔn e è ɖǒ ná hu yě ɖɔhun lɛ́ɛ kpó ná sɔgbe dó é.

¹² Énɛ́ ɔ́ gúdo ɔ́, un mɔ Lɛ̌ngbɔ́ví ɔ́ gba wuntun ayizɛ́ngɔ́ ɔ́. Énɛ́ ɔ́, ayǐkúngban dán wǔ kpó zǐngídi kpó, hwe húzú nǔ wiwi lutuvɔ ɖɔhun; sun ɔ́ bǐ húzú vɔvɔ hun ɖɔhun.

¹³ Sunví lɛ́ɛ jɛ ayǐ sín jǐnukúnsin lě e jɔhɔn ɖaxó nɔ nyi, bó nɔ dán fígitín, bɔ sínsɛ́n tɔn mazin mazin lɛ́ɛ nɔ jɛ ayǐ gbɔn é.

¹⁴ Jǐnukúnsin mlá lě e è nɔ mlá wěma gbɔn é, bó bú; è ɖe só lɛ́ɛ bǐ kpódó ayǐkúngban e ɖo tɔ tɛ́ntin lɛ́ɛ bǐ kpán sín tɛn yětɔn yětɔn lɛ́ɛ mɛ.

¹⁵ Axɔ́sú e ɖo ayǐkúngban jí lɛ́ɛ, nukɔntɔ́ lɛ́ɛ, ahwangán lɛ́ɛ, dɔkunnɔ lɛ́ɛ, hlɔ̌nhlɔ́nnɔ lɛ́ɛ, kpódó gbɛtɔ́ ɖě lɛ́ɛ bǐ kpó; kannumɔ lɛ́ɛ oo, mɛ e ɖo yě ɖésúnɔ sí lɛ́ɛ oo, yě bǐ hɔn hwlá cí sónu lɛ́ɛ mɛ bó hɔn hwlá cí awǐnnya lɛ́ɛ gúdo ɖo sókan mɛ,

¹⁶ bó nɔ ɖɔ nú só lɛ́ɛ kpódó awǐnnya lɛ́ɛ kpán ɖɔ: “Mi mu kɔn nyi mǐ jǐ, bó sɔ́ mǐ hwlá, bónú mɛ e jínjɔ́n axɔ́súzinkpo ɔ́ jí ɔ́ má mɔ mǐ ó; énɛ́ ɔ́, mǐ ná nɔ zɔ nú xomɛsin Lɛ̌ngbɔ́ví ɔ́ tɔn.

¹⁷ Đó xomɛsin yětɔn sín azǎn ɖaxó ɔ́ wá; mɛ̌ ka sixú nɔ te ɖo azǎn énɛ́ nukɔn?”