Nǔɖexlɛ́mɛ 5 - MAWUXÓWÉMA

Wěma ɔ́ kpó Lɛ̌ngbɔ́ví ɔ́ kpó

¹ Énɛ́ ɔ́ gúdo ɔ́, un mɔ wěma ɖé ɖo mlǎmlá ɖo mɛ e jínjɔ́n axɔ́súzinkpo jí ɔ́ sín alɔ ɖisí ɔ́ mɛ; è wlán nǔ dó wěma énɛ́ sín akpáxwé we lɛ́ɛ bǐ; è tlɛ́ wěma ɔ́ ɖo fí tɛ́nwe, bó ɖó wuntun jí.

² Un mɔ wɛnsagun hlɔ̌nhlɔ́nnɔ ɖokpó ɖo xó sú wɛ tlílí, bó nɔ ɖɔ: “Mɛ̌ é ka jɛ xá ɖɔ é nǐ gba wuntun lɛ́ɛ, bó hun wěma ɔ́.”

³ Lo ɔ́, mɛ ɖěbǔ ɖe ɖo jǐxwé ǎ; mɛɖé ɖe ɖo ayǐkúngban jí ǎ; mɛɖé ka ɖe ɖo ayǐkúngban glɔ́, bó ná sixú hun wěma ɔ́, abǐ bó ná sixú kpɔ́n xo tɔn mɛ ǎ.

⁴ Énɛ́ ɔ́, un ya avǐ ɖésú, ɖó è mɔ mɛ e jɛ xá ɖɔ é ní hun wěma ɔ́, abǐ ní kpɔ́n xo tɔn mɛ é ɖěbǔ ǎ.

⁵ Lo ɔ́, mɛxó lɛ́ɛ ɖokpó ɖɔ nú mì ɖɔ: “Ma ya avǐ ó, kpɔ́n: kinnikínní e ɖo akɔta Judáa tɔn mɛ, bó nyí axɔ́sú Davídi ví ɔ́ ɖu ɖ'é jí, bó ná gba wuntun tɛ́nwe lɛ́ɛ, bó ná hun wěma ɔ́.”

⁶ Un mɔ Lɛ̌ngbɔ́ví ɖokpó ɖo te ɖo axɔ́súzinkpo ɔ́ tɛ́ntin; nǔɖogbɛ ɛnɛ lɛ́ɛ kpó mɛxó lɛ́ɛ kpó lɛ́ lɛ̌ dó e. Lɛ̌ngbɔ́ví ɔ́ cí hu wɛ è hu i ɖɔhun; é ɖó zo tɛ́nwe, bó ɖó nukún tɛ́nwe; nukún tɛ́nwe lɛ́ɛ wɛ nyí Yɛ Mawu tɔn tɛ́nwe e è sɔ́ sɛ́ dó ayǐkúngban ɔ́ bǐ jí é.

⁷ Lɛ̌ngbɔ́ví ɔ́ sɛ yi nukɔn, bó yí wěma ɔ́ ɖo mɛ e jínjɔ́n axɔ́súzinkpo ɔ́ jí ɔ́ sín alɔ ɖisí ɔ́ mɛ.

⁸ Ée é yí wěma ɔ́ é ɔ́, nǔɖogbɛ ɛnɛ lɛ́ɛ kpó mɛxó ko-nukún-ɛnɛ lɛ́ɛ kpán jɛ kpoli ɖo nukɔn tɔn. Yě mɛ ɖokpó ɖokpó hɛn agǐdigbo ɖokpó ɖokpó, bó lɛ́ hɛn sikákɔ́fu, bɔ zǎlínkpɔ́n gɔ́. Zǎlínkpɔ́n ɔ́ wɛ nyí ɖɛ e mɛɖeɖóvo Mawu tɔn lɛ́ɛ nɔ xo lɛ́ɛ.

⁹ Yě ɖo han yɔ̌yɔ́ ɖé ji wɛ ɖɔ: “A nyǐ mɛ e jɛ xá bó ná yí wěma ɔ́, bó gba wuntun lɛ́ɛ é; ɖó è hu we, bɔ gbɔn hun towe gbla mɛ ɔ́, a xɔ gbɛ nú gbɛtɔ́ lɛ́ɛ nú Mawu, ɖo gbe lɛ́ɛ bǐ mɛ, ɖo togun lɛ́ɛ bǐ mɛ, ɖo to lɛ́ɛ bǐ mɛ.

¹⁰ A sɔ́ yě dó bló axɔ́súɖuto, bó sɔ́ yě dó bló vɔ̌sánú-xwlémawutɔ́ lɛ́ɛ sín axɔ́súɖuto ná, bónú yě ná wa azɔ̌ nú Mawu mǐtɔn, bó ná ɖu axɔ́sú ɖo ayǐkúngban jí.”

¹¹ Un lɛ́ kpɔ́n bó se wɛnsagun wɔ̌buwɔ́bú ɖé lɛ́ɛ sín gbe; wɛnsagun wɔ̌bliwɔ̌va wɛ; yě lɛ́ lɛ̌ dó axɔ́súzinkpo ɔ́ kpó nǔɖogbɛ lɛ́ɛ kpó, kpódó mɛxó lɛ́ɛ kpán.

¹² Yě zé gbe dó jǐ bó ɖo ɖiɖɔ wɛ ɖɔ: “Lɛ̌ngbɔ́ví e è hu ɔ́ wɛ nyí mɛ e é jɛ xá bɔ é ná yí acɛ, dɔkun, nǔnywɛ́, hlɔ̌nhlɔ́n, yɛ̌yi, susu kpó kpikpa kpó é.”

¹³ Un lɛ́ se nǔɖíɖó e ɖo jǐxwé lɛ́ɛ bǐ, ée ɖo ayǐkúngban jí lɛ́ɛ bǐ, ée ɖo ayǐkúngban glɔ́ lɛ́ɛ bǐ, ée ɖo xu mɛ lɛ́ɛ bǐ; nǔɖíɖó e gbɔn wɛ̌kɛ́zo ɛnɛ lɛ́ɛ mɛ lɛ́ɛ bǐ ɖo ɖiɖɔ wɛ ɖɔ: “Kpikpa, yɛ̌yi, susu, kpódó hlɔ̌nhlɔ́n kpó ní nyí mɛ e ɖo ayǐjínjɔ́n ɖo axɔ́súzinkpo ɔ́ jí é kpódó Lɛ̌ngbɔ́ví ɔ́ kpó tɔn káká sɔ́yi!”

¹⁴ Nǔɖogbɛ ɛnɛ lɛ́ɛ yí gbe ɖɔ: “Amǐ!” Bɔ mɛxó lɛ́ɛ jɛ kpoli bó ɖe kɔ́.