Nǔɖexlɛ́mɛ 4 - MAWUXÓWÉMA

¹ Énɛ́ ɔ́ gúdo ɔ́, un ɖo nǔ kpɔ́n wɛ bó mɔ hɔn ɖé ɖo hunhun ɖo sɛ́xwé. Gbe e ɖo nǔ ɖɔ wɛ kpɛn ɖaxó ɖé ɖɔhun, bó ɖo xó ɖɔ nú mì wɛ ɖ'ayǐ ɔ́ ɖɔ nú mì ɖɔ: “Xá jǐ fí, un ná xlɛ́ nǔ e ɖó ná jɛ énɛ́ ɔ́ gúdo ɔ́ we.”

² Tlóló ɔ́, Yɛ wá jǐ ce, bɔ un mɔ axɔ́súzinkpo ɖokpó ɖo sɛ́xwé, bɔ mɛ ɖokpó ɖo ayǐjínjɔ́n ɖo axɔ́súzinkpo énɛ́ jí.

³ Mɛ e ɖo ayǐjínjɔ́n ɖ'é jí ɔ́ sín ninɔmɛ cí awǐnnya xɔ akwɛ́ e è nɔ ylɔ́ ɖɔ jasipée ɔ́ kpódó ée è nɔ ylɔ́ ɖɔ sadwáni ɔ́ kpán ɖɔhun. Nyǐ ɖi lɛ́ lɛ̌ dó zinkpo ɔ́, bó nɔ kɔ́n awǐnnya e è nɔ ylɔ́ ɖɔ emɛlodu ɔ́ ɖɔhun.

⁴ Axɔ́súzinkpo ko-nukún-ɛnɛ ɖěvo lɛ́ lɛ̌ dó axɔ́súzinkpo énɛ́, bɔ mɛxó ko-nukún-ɛnɛ ɖo ayǐjínjɔ́n ɖo axɔ́súzinkpo énɛ́ lɛ́ɛ jí. Yě dǒ awu wěwé, bó xwe axɔ́súgbákún e è sɔ́ siká dó bló ná é.

⁵ Jǐ nɔ kɛ wun, è nɔ se gbe ɖé lɛ́ɛ; jǐ nɔ dó gbe sín axɔ́súzinkpo ɔ́ kɔn. Zohwín tɛ́nwe ɖo jiji wɛ ɖo axɔ́súzinkpo ɔ́ nukɔn; zohwín tɛ́nwe énɛ́ lɛ́ɛ ɔ́, Yɛ Mawu tɔn tɛ́nwe lɛ́ɛ wɛ.

⁶ Xu wěkpɛ́n ɖɔhun ɖé ɖo faɖaɖa ɖo axɔ́súzinkpo ɔ́ nukɔn, lobo cí awǐnnya e è nɔ ylɔ́ ɖɔ klísutalu ɔ́ ɖɔhun. Nǔɖogbɛ ɛnɛ ɖo tɛ́ntin, lɛ́ lɛ̌ dó axɔ́súzinkpo ɔ́. Nǔɖogbɛ énɛ́ lɛ́ɛ ɔ́, nukún kpé gǔdo kpó nukɔn kpó nú yě.

⁷ Nǔɖogbɛ nukɔntɔn ɔ́ ɖi kinnikínní; nǔɖogbɛ wegɔ́ ɔ́ ɖi nyibúsú wínnyáwínnyá. Nǔɖogbɛ atɔngɔ́ ɔ́ sín nukún mɛ ɖi gbɛtɔ́ sín nukún mɛ, bɔ nǔɖogbɛ ɛnɛgɔ́ ɔ́ ɖi gangan e ɖo zinzɔn wɛ é.

⁸ Nǔɖogbɛ lɛ́ɛ ɖokpó ɖokpó ɖó awa ayizɛ́n; nukún kpé fí bǐ nú yě ɖo wěxo kpódó xomɛ kpó. Yě nɔ gɔn han ji zǎn kéze ǎ; yě nɔ ɖɔ: “Mǐmɛ́! Mǐmɛ́! Mǐmɛ́ wɛ Aklúnɔ Mawu ɔ́ nyí; é tíin ɖ'ayǐ, bó tíin din; é ná wá.”

⁹ Nǔɖogbɛ ɛnɛ lɛ́ɛ nɔ ji han dó kpá susu, dó wlí yɛ̌yi, dó dó kú nú mɛ e ɖo ayǐjínjɔ́n ɖo axɔ́súzinkpo ɔ́ jí, bó ɖo gbɛ káká sɔ́yi é. Nú yě ɖo mɔ̌ bló wɛ hweɖěbǔnu ɔ́,

¹⁰ mɛxó ko-nukún-ɛnɛ lɛ́ɛ nɔ jɛ kpo ɖo mɛ e ɖo axɔ́súzinkpo ɔ́ jí, bó ɖo gbɛ káká sɔ́yi ɔ́ nukɔn, bó nɔ sɛn ɛ. Yě nɔ zé axɔ́súgbákún yětɔn lɛ́ɛ nyi axɔ́súzinkpo ɔ́ nukɔn, bó nɔ ɖɔ:

¹¹ “Aklúnɔ mǐtɔn, Mawu mǐtɔn, susu, yɛ̌yi kpó hlɔ̌nhlɔ́n kpó jɛ xá we, ɖó a blǒ nǔ bǐ; hwi wɛ jló bɔ yě tíin; hwi wɛ jló bɔ yě ɖo gbɛ.”