Nǔɖexlɛ́mɛ 3 - MAWUXÓWÉMA

Wěma e è wlán sɛ́ dó agun Klísu tɔn e ɖo Sadu é

¹ Wlǎn wěma sɛ́ dó agun Klísu tɔn e ɖo Saadu ɔ́ sín wɛnsagun, bó ɖɔ n'i ɖɔ: “Mɛ e sí yɛ Mawu tɔn tɛ́nwe lɛ́ɛ kpódó sunví tɛ́nwe lɛ́ɛ kpán ɖe ɔ́, xó e é ɖɔ ɔ́ ɖíe: Un tunwun nǔ e wa wɛ a ɖe ɔ́ bǐ; un tunwun ɖɔ è nɔ mɔ we dó mɔ mɛ gbɛɖe; lo ɔ́, a ko kú.

² Fɔ́n, bó dó wǔsyɛ́n lanmɛ nú nǔ e lɛ́ kpo ɖo así towe é, bónú é ma kú bǐ gbídígbídí ó, ɖó un mɔ ɖɔ azɔ̌ e a wa lɛ́ɛ kún nyí azɔ̌ e nyɔ́ bɔ nǔ vɔ ɖ'é wú ɖo Mawu ce nukɔn ɔ́ ó.

³ Hǔn, bó flín kplɔ́n e a yǐ ɔ́, bó flín lě e a se gbɔn é; se tónú nú kplɔ́n énɛ́ ɔ́, bó lɛ́ kɔ sín hwɛ towe lɛ́ɛ gúdo. Ényí a ma fɔ́n ǎ ɔ́, un ná wá fyán we ajotɔ́ ɖɔhun, a nǎ tunwun gan e mɛ un ná wá dó é ǎ.

⁴ É ka ɖo mɔ̌ có, ɖo Saadu ɔ́, mɛ towe lɛ́ɛ ɖě tíin, bó hɛn awu yětɔn lɛ́ɛ blí ǎ. Yě ná dó awu wěwé, bó ná zɔn xá mì, ɖó yě nyí mɛ e jɛ xá é.

⁵ “Mɔ̌ wɛ mɛ e ná ɖu ɖ'é jí ɔ́ ná dó awu wěwé gbɔn; un ná súnsún nyǐkɔ tɔn sín gbɛwéma ɔ́ mɛ ǎ . Un ná ɖɔ ɖo Tɔ́ ce kpó wɛnsagun tɔn lɛ́ɛ kpó nukɔn ɖɔ ce wɛ é nyí.

⁶ “Mɛ e ɖó tó bó ná dó se nǔ ɔ́, ní se nǔ jɛ nǔ e ɖɔ nú agun Klísu tɔn lɛ́ɛ wɛ Yɛsinsɛn ɖe ɔ́ mɛ ganjí!”

Wěma e è wlán sɛ́ dó agun Klísu tɔn e ɖo Filadɛlufíi é

⁷ “Wlǎn wěma sɛ́ dó agun Klísu tɔn e ɖo Filadɛlufíi ɔ́ sín wɛnsagun, bó ɖɔ n'i ɖɔ: “Mɛ e nyí mɛ mímɛ́, bó nyí mɛ titewungbe ɔ́, mɛ e sí axɔ́sú Davídi sín cávi ɔ́ ɖe ɔ́, mɛ e nɔ hun hɔn bɔ mɛ ɖěbǔ ma nɔ sixú sú ǎ é, mɛ e nɔ sú hɔn bɔ mɛ ɖěbǔ ma nɔ sixú hun ǎ é ɔ́, xó e é ɖɔ ɔ́ ɖíe:

⁸ Un tunwun nǔ e wa wɛ a ɖe ɔ́ bǐ; un tunwun ɖɔ hlɔ̌nhlɔ́n kpɛɖé jɛ́n a ɖǒ; é ka ɖo mɔ̌ có, a blǒ ɖó xó ce jí; a nɔ gbejí nú mì; un hun hɔn ɖé ɖo nukɔn towe bɔ mɛ ɖěbǔ sixú sú ǎ.

⁹ Mɛ e ɖo Satáan sín kplɔ́ngbasá lɛ́ɛ ɔ́, yě mɛ adingbannɔ énɛ́ lɛ́ɛ e nɔ ɖɔ émí nyí Jwifu, bó ma ka nyí ǎ lɛ́ɛ ɔ́, nǔ e un ná wa xá yě ɔ́ ɖíe: un ná dɔn yě gǎnnugǎnnu, bɔ yě ná wá jɛ kpo ɖo nukɔn towe, bó ná wlí yɛ̌yi nú we. Yě ná tunwun ɖɔ un yí wǎn nú we.

¹⁰ Đó xó e un ɖɔ nú we ɖɔ hwi ní ɖó kan dó nǔ wú ɔ́, a hɛn dó ayi mɛ; énɛ́ wútu ɔ́, hwenu e awě e ná wá xo gbɛ ɔ́ bǐ, bó ná tɛ́n mɛ e ɖo ayǐkúngban jí lɛ́ɛ kpɔ́n ɔ́ ná wá ɔ́, nyɛ lɔ ná cyɔ́n alɔ jǐ we.

¹¹ Un ná wá ɖo malín málín mɛ din. Hɛn nǔ e ɖo así towe ɔ́ syɛ́nsyɛ́n, bónú mɛɖé ma yí ɖuɖéjí towe sín ajɔ ɔ́ sín así towe ó.

¹² “Mɛ e ná ɖu ɖ'é jí ɔ́, un ná sɔ́ ɛ dó bló dotín ná ɖo sinsɛnxɔ Mawu ce tɔn mɛ, bɔ é sɔ́ ná tɔ́n ǎ. Un ná wlán Mawu ce sín nyǐkɔ kpódó Mawu ce sín toxo sín nyǐkɔ kpán dó wǔ tɔn; Mawu ce sín toxo ɔ́ wɛ nyí Jeluzalɛ́mu yɔ̌yɔ́ e Mawu ce ná sɛ́ dó, bɔ é ná jɛ te sín sɛ́xwé wá é. Un ná wlán nyǐkɔ ce yɔ̌yɔ́ ɔ́ lɔ dó wǔ tɔn.

¹³ “Mɛ e ɖó tó bó ná dó se nǔ ɔ́ ní mɔ nǔ jɛ nǔ e ɖɔ nú agun Klísu tɔn lɛ́ɛ wɛ Yɛsinsɛn ɖe ɔ́ mɛ ganjí.”

Wěma e è wlán sɛ́ dó agun Klísu tɔn e ɖo Lawodisée é

¹⁴ “Wlǎn wěma sɛ́ dó agun Klísu tɔn e ɖo Lawodisée ɔ́ sín wɛnsagun, bó ɖɔ n'i ɖɔ: “Mɛ e nɔ nyí Amǐ , bó nyí Kúnnuɖetɔ́ gbejínɔtɔ́ titewungbe, bó nyí mɛ e jí Mawu blǒ nǔ bǐ sésé gbɔn ɔ́, xó e é ɖɔ ɔ́ ɖíe:

¹⁵ Un tunwun nǔ e a wa ɔ́ bǐ; un tunwun ɖɔ a kún fá ó, a kún ka hun zo ó; é jló mì ɖésú ɖɔ a nǐ nyí ɖokpó ɖo we lɛ́ɛ mɛ.

¹⁶ Lo ɔ́, ée é ka nyí ɖɔ gblɔ̌ wɛ a gblɔ̌ xɛ́ɛ́ ɔ́, a hun zo ǎ, a ka fá ǎ; un ná vi we sín kɔ!

¹⁷ A nɔ ɖɔ: ‘Un jɛ dɔkun, un mɔ akwɛ́, nǔɖé hwe dó mì ǎ.’ Lo ɔ́, a tunwun ɖɔ gbɛ̌dónánɔ wɛ émí nyí, lobo nyí lelenɔ ǎ. Wamamɔnɔ wɛ a nyǐ; nukúntíntɔ́nnɔ wɛ nú we; mɛ̌ wɛ a ɖe.

¹⁸ Énɛ́ ɔ́ wú wɛ un ɖo nǔ kplɔ́n we wɛ ɖɔ hwi ní xɔ siká e è ko zé dó myɔ mɛ, bɔ nǔblíblí ɖé ma sɔ́ ɖ'é mɛ ǎ ɔ́ ɖo así ce, bó ná dó nyí dɔkunnɔ. Xɔ awu wěwé lɛ́ɛ lɔ ɖo así ce, bó ná dó, dó mɛ̌ towe e ɖo winnyá hu nú we wɛ ɔ́ jí. Mɔ̌ ɖokpó ɔ́, xɔ nukúntínkɛn ɖo así ce, bó ná dó nukún towe lɛ́ɛ jí, bó ná sixú mɔ nukúnnú.

¹⁹ Mɛ e un yí wǎn ná lɛ́ɛ ɔ́, un nɔ gbɛ́ nǔ nú yě bǐ, bó nɔ kplɔ́n nǔ yě bǐ. Hǔn, bo ɖe bǐbí dó nǔ wú towe xlɛ́, bó lɛ́ kɔ sín hwɛ towe lɛ́ɛ gúdo.

²⁰ Đǒtó, un ɖo te ɖo hɔn jí, bó ɖo hɔn xúxú wɛ; ényí mɛɖé se gbe ce, bó hun hɔn ɔ́, un ná byɔ́ xwé tɔn gbe; un ná ɖu nǔ xá ɛ, bɔ é ná ɖu nǔ xá mì.

²¹ “Mɛ e ná ɖu ɖ'é jí ɔ́, un ná ná ɛ gbe, bɔ é ná jínjɔ́n axɔ́súzinkpo ce jí, lě e un ɖu ɖ'é jí, bó jínjɔ́n Tɔ́ ce kpá ɖo axɔ́súzinkpo tɔn jí é ɖɔhun.

²² “Mɛ e ɖó tó bó ná dó se nǔ ɔ́ ní se nǔ e ɖɔ nú agun Klísu tɔn lɛ́ɛ wɛ Yɛsinsɛn ɖe ɔ́ ganjí.”