Nǔɖexlɛ́mɛ 12 - MAWUXÓWÉMA

Nyɔ̌nu ɖé kpódó kanlin baɖabaɖa ɖaxó ɖé kpó

¹ Xlɛ̌ ɖaxó ɖé tɔ́n ɖo jǐxwé: è mɔ nyɔ̌nu ɖé dó hwesivɔ́; sun ɖo afɔ tɔn lɛ́ɛ glɔ́; axɔ́súgbákún ɖokpó ɖo ta tɔn bɔ sunví wěwe ɖ'é wú.

² Nyɔ̌nu ɔ́ ɖo vǐ ná ji wɛ; é ɖo vǐjiji sín wǔvɛ́ lɛ́ɛ mɔ wɛ, bó ɖo xó sú wɛ.

³ Xlɛ̌ ɖěvo lɛ́ tɔ́n ɖo jǐxwé: è mɔ kanlin baɖabaɖa ɖaxó vɔvɔ ɖé; è nɔ ylɔ́ kanlin ɔ́ ɖɔ Dlagɔ́ɔn; é ɖó ta tɛ́nwe, bó ɖó zo wǒ, bɔ axɔ́súgbákún ɖokpó ɖokpó ɖo ta tɔn ɖokpó ɖokpó jí.

⁴ É sɔ́ sí tɔn dó kplɔ́ sunví lɛ́ɛ sín atɔnvlɔ́ɖó sín jǐxwé nyi dó ayǐkúngban jí. É nɔ te ɖo nyɔ̌nu e ɖo vǐ ná ji wɛ ɔ́ nukɔn, bónú é ji vǐ ɔ́ tlóló ɔ́, é ná vún vǐ ɔ́ ɖu.

⁵ Nyɔ̌nu ɔ́ ji vǐ súnnu ɖokpó. Vǐ ɔ́ ná kpa acɛ dó to lɛ́ɛ bǐ nu, bɔ acɛkpikpa tɔn ná syɛ́n gankpo ɖɔhun. È ka wá zé vǐ ɔ́ yi Mawu kpó axɔ́súzinkpo tɔn kpó kɔn;

⁶ bɔ nyɔ̌nu ɔ́ hɔn yi gbětótló mɛ, fí e Mawu ko bló tɛnmɛ ɖó ɖ'ayǐ n'i ɖe é, bónú è nǎ ná nǔɖuɖu i xɔ azǎn afatɔ́n afɔɖé kanɖé ko (1.260) .

⁷ Bɔ ahwan tɔ́n ɖo jǐxwé: wɛnsagun ɖaxó Micɛ́li kpódó wɛnsagun e ɖo glɔ́ tɔn lɛ́ɛ kpó fun ahwan xá Dlagɔ́ɔn ɔ́, bɔ Dlagɔ́ɔn ɔ́ kpódó wɛnsagun tɔn lɛ́ɛ kpó fun ahwan xá yě.

⁸ Lo ɔ́, yě ka ɖu ɖo Dlagɔ́ɔn ɔ́ jí, bɔ è sɔ́ ná gbe é kpódó wɛnsagun tɔn lɛ́ɛ kpó ɖɔ yě ní nɔ jǐxwé ǎ.

⁹ È zě Dlagɔ́ɔn ɖaxó ɔ́ nyi dó ayǐkúngban jí; é wɛ nyí dan xóxó e è nɔ ylɔ́ ɖɔ awǒvi abǐ Satáan é; é wɛ flú gbɛ ɔ́ bǐ. È zě e nyi dó ayǐkúngban jí, é kpódó wɛnsagun tɔn lɛ́ɛ kpó.

¹⁰ Énɛ́ ɔ́ gúdo ɔ́, un se gbe ɖaxó ɖé ɖi sín jǐxwé bó ɖɔ: “Hwlɛngán sín hwenu su lo! Mawu ɖe axɔ́súɖuɖu tɔn kpó hlɔ̌nhlɔ́n tɔn kpó xlɛ́ lo! Klísu tɔn ɖe acɛkpikpa e nyí étɔn ɔ́ xlɛ́ lo! Đó hwɛdómɛtɔ́ e ɖo te ɖo Mawu mǐtɔn nukɔn bó ná dó hwɛ nɔví mǐtɔn lɛ́ɛ zǎn kéze ɔ́, è ko zin i dɛ́.

¹¹ Lɛ̌ngbɔ́ví ɔ́ sín kanjɔ kpó xó e nɔví mǐtɔn lɛ́ɛ ɖe kúnnu ná ɔ́ kpán zɔ́n bɔ yě ɖu ɖo jǐ tɔn. Yě yí gbe bó ná sɔ́ gbɛ yětɔn jó; yě yí gbe bó ná kú.

¹² Énɛ́ wú ɔ́, sɛ́xwé kpó mi mɛ e ɖo sɛ́xwé lɛ́ɛ kpó ní jɛ awǎ. Amɔ̌ heelú ayǐkúngban kpó xu kpó. Đó awǒvi jɛ te wá mi gɔ́n kpódó xomɛsin ɖaxó ɖé kpó, ɖó é tunwun ɖɔ hwenu kpɛɖé jɛ́n wɛ kpo nú émí.”

¹³ Ée Dlagɔ́ɔn ɔ́ mɔ ɖɔ è nyi émí dó ayǐkúngban jí é ɔ́, é jɛ nyɔ̌nu e ji vǐ súnnu ɔ́ gúdo.

¹⁴ Lo ɔ́, è nǎ gangan ɖaxó sín awa we nyɔ̌nu ɔ́, bónú é ná zɔn yi tɛn tɔn mɛ ɖo gbětótló mɛ, fí e è nǎ ná ɛ nǔɖuɖu ɖe xɔ xwe atɔn adaɖé é; fí e dan ɔ́ ma ná wlí i ɖe ǎ é.

¹⁵ Bɔ dan ɔ́ tún sin sín nu mɛ bɔ é cí tɔsisa ɖɔhun ɖo nyɔ̌nu ɔ́ gúdo, bó ná dó dɔn nyɔ̌nu ɔ́ hɛn yi.

¹⁶ Lo ɔ́, ayǐkúngban hwlɛ́n nyɔ̌nu ɔ́ gán: ayǐkúngban ɔ́ hun nu, bó nu sin e Dlagɔ́ɔn ɔ́ tún sín nu mɛ é.

¹⁷ Énɛ́ ɔ́, xomɛ sin Dlagɔ́ɔn ɔ́ dó nyɔ̌nu ɔ́ wú tlala, bɔ é ɖidó ahwan fun xá nyɔ̌nu ɔ́ sín vǐ e kpo lɛ́ɛ gbé; mɛ e se tónú nú Mawusɛ́n ɔ́, bó ɖo gbejí nú nǔgbó e Jezu ɖe xlɛ́ lɛ́ɛ ɔ́, é ɖidó ahwan fun xá yě bǐ gbé.

¹⁸ Dlagɔ́ɔn ɔ́ yi cí xutó.