Nɛɛmíi 9 - MAWUXÓWÉMA

Izlayɛ́li ví lɛ́ɛ ɖɔ hwɛ yětɔn lɛ́ɛ nú Mawu ɖo togun mɛ agbawungba

¹ Sun ɖokpó énɛ́ ɔ́ sín azǎn ko-nukún-ɛnɛgɔ́ ɔ́ gbe ɔ́, Izlayɛ́li ví lɛ́ɛ kplé bó ná blá nu. Yě dó caki bo lɛ kɔ́, bó dó ɖe xlɛ́ ɖɔ hwɛ e émí hu ɔ́ vɛ́ nú émí.

² Yě yi cí vo nú mɛ e ma nyí Jwifu ǎ lɛ́ɛ, bó ɖɔ hwɛ yětɔn lɛ́ɛ nú Mawu; yě ɖɔ nú Mawu ɖɔ hwɛhutɔ́ wɛ émí kpó tɔ́gbó émítɔn lɛ́ɛ kpó nyí.

³ Énɛ́ ɔ́ gúdo ɔ́, yě sí te bo nɔ te mɔ̌, bó ɖótó sɛ́nwéma Mawu Mavɔmavɔ, Mawu yětɔn tɔn, bɔ è xa nú yě káká nú ganxixo atɔn. Yě lɛ́ sɔ́ ganxixo atɔn ɖěvo ɖó te, bó yi do ɖo Mawu Mavɔmavɔ, Mawu yětɔn nukɔn, bó byɔ́ hwɛsɔ́kɛ.

⁴ Kpo e è hwlǎ nú Levíi ví lɛ́ɛ ɔ́, Yecúwa, Bani, Kadimiyɛ́li Cevaniya, Buwunni, Celeviya, Bani kpó Kenani kpó sí te ɖ'é ji bó sú xó bó byɔ́ alɔgɔ́ Mawu Mavɔmavɔ, Mawu yětɔn tɔn.

⁵ Énɛ́ ɔ́ gúdo ɔ́, Levíi ví Yecúwa, Kadimiyɛ́li, Bani, Hacavunɛ́ya, Celeviya, Hodya, Cevaniya kpó Petaxiya kpó sú xó bó ɖɔ: “Mi sí te, mi dó kpɛ́ nú Mawu Mavɔmavɔ, Mawu mǐtɔn; mi dó kú n'i káká sɔ́yi.” “Mawu Mavɔmavɔ, mɛ ɖokpó ɖokpó ní kpa nyǐkɔ towe; nyǐkɔ towe ɔ́, susu tɔn hú gǎn nǔ e è ko sixú ɖɔ kpó nu kpó é bǐ.

Izlayɛ́li ví lɛ́ɛ xo ɖɛ ɖo togun ɔ́ nukɔn bɔ é vɛ́ jlɛ́

⁶ Hwi wɛ nyí Mawu Mavɔmavɔ, hwi ɖokpónɔ géé wɛ nyí Mawu Mavɔmavɔ. A blǒ jǐnukúnsin bɔ é d'agba, a blǒ sunví lɛ́ɛ bǐ. A blǒ ayǐkúngban, bo bló nǔ e ɖ'é jí lɛ́ɛ, bó bló xu kpó nǔ e ɖ'é mɛ lɛ́ɛ bǐ kpó. Hwi wɛ nɔ ná gbɛ nǔ e ko tíin lɛ́ɛ bǐ. Hlɔ̌nhlɔ́n sɛ́xwé tɔn lɛ́ɛ bǐ nɔ yi do ɖo nukɔn towe.

⁷ Mawu Mavɔmavɔ, hwi wɛ sɔ́ Ablámu. Hwi wɛ ɖe e sín Wúu, ɖo Kaludée, bó sun nyǐ ɖɔ Ablaxámu.

⁸ A mɔ lě e é ɖo gbejí nú we gbɔn é. Énɛ́ ɔ́ wútu ɔ́, a jɛ akɔ xá ɛ, bó dó akpá n'i ɖɔ émí ná ná ɛ Kanáanu lɛ́ɛ, Hitíti lɛ́ɛ, Amɔliti lɛ́ɛ, Pɛliziti lɛ́ɛ, Jebuzinu lɛ́ɛ kpó Giigacíti lɛ́ɛ kpó sín to, bónú vǐ tɔn lɛ́ɛ ná nɔ fínɛ́. Akpá e a dǒ ɔ́, a ka ɖe, a nɔ dó akpá bó nɔ gɔn ɖiɖe ǎ.

⁹ A mɔ ya e ji wɛ tɔ́gbó mǐtɔn lɛ́ɛ ɖe ɖo Ejípu tomɛ ɔ́, a se bɔ yě byɔ́ alɔgɔ́ ɖo Xu Vɔvɔ ɔ́ tó.

¹⁰ A jlɛ̌ nǔ dó dɔn tó nú axɔ́sú Ejípu tɔn kpó gǎn hɔn-yitɔ́ tɔn lɛ́ɛ kpó, kpódó togun tɔn bǐ kpó, ɖó a tunwun go e Ejípunu lɛ́ɛ nɔ yí tɔ́gbó mǐtɔn lɛ́ɛ wú é. È sɔ́ nyǐkɔ towe su ɖaxó hwenɛ́nu, bɔ nyǐkɔ towe sín susu lɛ́ kpo ɖo te káká jɛ égbé.

¹¹ A mǎ Xu ɔ́ ɖó we ɖo Izlayɛ́li ví lɛ́ɛ nukɔn, bɔ yě gbɔn ayǐ xúxú jí dín. A ka kpíkpé mɛ e ɖo yě nya wɛ lɛ́ɛ dó xu gɔngɔn mɛ, bɔ yě syɔ́ awǐnnya ɖɔhun, bó yi káká xuzan jí.

¹² Kéze ɔ́, azizɔ wɛ a nɔ dó kplá togun towe. Azizɔ ɖé wɛ, bó nɔ́ ɖo hwǐn mlí wɛ ɖo nukɔn yětɔn. Zǎn mɛ ɔ́, a nɔ sɔ́ myɔ dó kplá yě, bɔ myɔ ɔ́ nɔ́ ná yě wěziza, bó nɔ́ ɖo hwǐn mlí wɛ ɖo nukɔn yětɔn.

¹³ A jɛ te bo wá ɖɔ xó nú yě ɖo Sinayíi só jí. A ɖɔ lě e yě ná wa nǔ gbɔn bɔ é ná sɔgbe é nú yě. A nǎ sɛ́n nǔgbó nǔgbó lɛ́ɛ yě. Kplɔ́n e a nǎ yě kpó nǔ e a ɖɔ yě ní wa lɛ́ɛ kpó nyɔ́ bɔ nǔ bǐ vɔ ɖ'é wú.

¹⁴ A gbɔn mɛsɛntɔ́ towe Mɔyízi jí, bó xlɛ́ yě gbɔjɛzán e nyí azǎn bɔ è sɔ́ ɖó vo nú we ɔ́. A ɖɔ lě e yě ná wa nǔ gbɔn ɔ́ nú yě; a nǎ yě kplɔ́n; a ɖɔ nǔ e yě ná wa lɛ́ɛ nú yě; a nǎ sɛ́n ɖokpó yě.

¹⁵ A nǎ yě nǔɖuɖu sín jǐxwé, bó ná dó gbɔ adɔ nú yě. A dɔn sin sín só mɛ, dó fá kɔ nú yě. A sɛ́ yě dó bɔ yě yi gba to e a zin alɔ d'akɔ́n ɖɔ émí ná ná yě é.

¹⁶ Lo ɔ́, tɔ́gbó mǐtɔn lɛ́ɛ kpó goyíyí yětɔn kpó ɔ́, yě fɔ́n gǔ. Yě ɖótó nǔ e a zɔ̌n yě lɛ́ɛ ǎ.

¹⁷ Yě gbɛ́ tónú se. Yě wɔn nǔ ɖagbe ɖagbe e a wa nú yě lɛ́ɛ. Yě tlí tó, bó ɖe gbeta tɔ́n ɖɔ émí ná lɛ́ lɛ́ kɔ yi kannumɔgbénu émítɔn ɖo Ejípu. Lo ɔ́, hwɛ ka jó yě dó ǎ, ɖó Mawu wɛ a nyǐ; a nɔ sɔ́ hwɛ kɛ mɛ. Mawu nǔbláwǔkúnúmɛtɔ́, xomɛnyɔ́tɔ́, hǔnkútɔ́ wɛ a nyǐ, bɔ xomɛfífá towe ɖó dogbó ǎ.

¹⁸ Yě sínsín gan bo dó bló nyibúví ná, bó sú xó bo ɖɔ: ‘Mawu mǐtɔn ɖíe! É wɛ ɖe mǐ sín kannumɔgbénu ɖo Ejípu.’ Yě nylá jijɔ dódó!

¹⁹ Có, ɖo wǎn yíyí towe maɖódogbó ɔ́ mɛ ɔ́, a jǒ yě dó nyi gbětótló mɛ ǎ. Azizɔ e ɖo mlǐmlí ɖo nukɔn yětɔn wɛ, bó nɔ́ ɖo ali xlɛ́ yě wɛ kéze ɔ́ jó yě dó ǎ.

²⁰ Đo xomɛnyínyɔ́ towe mɛ ɔ́, a nǎ yě Yɛ towe, bónú é ná ná nukúnnú-mɔjɛnǔmɛ yě. A nɔ ná yě nǔɖuɖu e è nɔ ylɔ́ ɖɔ mǎna ɔ́ hwebǐnu bɔ yě nɔ́ ɖu, bó nɔ ná sin yě bɔ yě nɔ́ nu dó fá kɔ ná.

²¹ A kpé nukún dó yě wú xɔ xwe kanɖé (40) ɖo gbětótló mɛ. Nǔ ɖěbǔ hwe dó yě ǎ. Avɔ vún yě ǎ, afɔ yětɔn ká tɛ́ ǎ.

²² A jǒ axɔ́sú ɖé lɛ́ɛ nú yě, bó jó togun ɖé lɛ́ɛ nú yě, bɔ yě yí to e yá yě lɛ́ɛ. Yě yǐ Sihɔ́ni axɔ́sú Hɛcibɔ́ni tɔn ɔ́ sín to, bó yí Ɔgu axɔ́sú Basáni tɔn sín to.

²³ A nǎ vǐ yě bɔ é sukpɔ́ káká sunví e ɖo jǐxwé lɛ́ɛ ɖɔhun. A kplá yě yi Kanáa tomɛ. Kanáa to ɔ́ wɛ a ko ná tɔ́gbó yětɔn lɛ́ɛ ɖɔ yě ní yí.

²⁴ Yě yi to ɔ́ mɛ, bo yí to ɔ́. A zɔ̌n bɔ Kanáa ví lɛ́ɛ jó gbe ɖo nukɔn yětɔn, bó byɔ́ acɛ yětɔn mɛ. Togun towe sɔ́ axɔ́sú e ɖo gbě énɛ́ ɔ́ jí lɛ́ɛ, kpó akɔta e ɖo gbě énɛ́ ɔ́ jí lɛ́ɛ bǐ kpó dó wa nǔ e jló yě ɔ́ ná.

²⁵ Yě yǐ toxo e è mɛ ahohó lɛ́ lɛ̌ dó lɛ́ɛ, bó yí ayǐkúngban ɖagbe lɛ́ɛ, xwé e dɔkun gɔ́ lɛ́ɛ, tɔ e è kun lɛ́ɛ, bó yí vǐwungbo kpó olívugbo kpó, bó yí atínsínsɛ́ngbo tɛnmɛ tɛnmɛ lɛ́ɛ kɔn nyi kpɔ́. Gbɔn xomɛnyínyɔ́ towe maɖódogbó ɔ́ mɛ ɔ́, yě mɔ nǔ bó ɖu, bó gɔ́ xo ganjí, bó ɖu gbɛ.

²⁶ Nǔ ɖo mɔ̌ có, yě gbɛ̌ tónú se. Yě fɔ́n gǔ dó jǐ we, bó dó gǔdo sɛ́n towe. Yě hu gbeyíɖɔ towe lɛ́ɛ; gbeyíɖɔ towe lɛ́ɛ wɛ nɔ ɖɔ nú yě ɖɔ yě ní lɛ́ kɔ wá gɔ̌n towe dandan. Yě nylá jijɔ dódó.

²⁷ Énɛ́ ɔ́ wútu ɔ́, a jǒ yě nú kɛntɔ́, bɔ kɛntɔ́ táfú yě. Ée yě wá ɖo wǔvɛ́ mɔ wɛ ɔ́, yě sú xó ylɔ́ we, bɔ hwɛ ɔ́, a se xósúsú yětɔn ɖo sɛ́xwé. Énɛ́ ɔ́, ɖo wǎn yíyí towe maɖódogbó ɔ́ mɛ ɔ́, a sɛ́ mɛ dó yě bɔ è yi ɖe yě sín kɛntɔ́ fɛn mɛ.

²⁸ Káká nú yě ká ná gosín kɛntɔ́ fɛn mɛ ɔ́, yě lɛ́ jɛ hwɛ hu dó we jí, bɔ a lɛ́ jó yě dó nú kɛntɔ́. Énɛ́ ɔ́, yě lɛ́ jɛ xó sú ylɔ́ we jí, bɔ hwɛ ɔ́, a se xósúsú yětɔn ɖo sɛ́xwé, bó ɖótó yě, bó lɛ́ hwlɛ́n yě ɖo wǎn yíyí towe mɛ, azɔn mɔ̌kpán.

²⁹ A ɖɔ nú yě ɖɔ yě ní yá wǔ lɛ́ kɔ wá jɛ sɛ́n émítɔn nyi jí; lo ɔ́, yědɛɛ lɛ́ɛ ɔ́, kpódó goyíyí yětɔn kpó ɔ́, yě ká bló nǔ e a zɔ̌n yě ɔ́ ɖ'é ji ǎ. Yě gba sɛ́n towe lɛ́ɛ; sɛ́n towe lɛ́ɛ ká nɔ ná gbɛ mɛ e nɔ nyi yě lɛ́ɛ. Yě ɖe nǔ e yě nyí ɔ́ xlɛ́ we. Yě ɖe xlɛ́ ɖɔ tótlítɔ́ wɛ émí nyí, bó nyí gǔfɔ́ntɔ́. Yě gbɛ́ gbídígbídí ɖɔ émí kún ná se xó towe ó.

³⁰ A dɛ bo hɛn yě káká nú xwe mɔ̌kpán. Gbeyíɖɔ towe lɛ́ɛ ɔ́, Yɛ towe ɖo yě jí, bó nɔ ɖɔ xó towe lɛ́ɛ nú yě; lo ɔ́, yě ɖótó yě ǎ. Énɛ́ wu ɔ́, a jǒ yě nú togun ɖěvo lɛ́ɛ.

³¹ Nǔ ɖo mɔ̌ có, ɖo wǎn yíyí towe maɖódogbó ɔ́ mɛ ɔ́, a vǐvá kún yětɔn ǎ. A jǒ yě dó ǎ; Mawu nǔbláwǔkúnúmɛtɔ́ xomɛnyɔ́tɔ́ wɛ a nyǐ.

³² Hwɛ Mawu mǐtɔn, a kló bó d'agba. A ɖǒ hlɔ̌nhlɔ́n bó jí wǔ. Akɔ e a jɛ xá mǐ ɔ́, a hɛn ɖó alɔ jí. Kɛnklɛ́n bó kpɔ́n wǔvɛ́ e mɔ wɛ togun towe ɖe sín axɔ́sú Asilíi tɔn lɛ́ɛ hwenu káká wá jɛ din é; axɔ́sú mǐtɔn lɛ́ɛ, gǎn mǐtɔn lɛ́ɛ, vɔ̌sánú-xwlémawutɔ́ mǐtɔn lɛ́ɛ, gbeyíɖɔ mǐtɔn lɛ́ɛ, tɔ́gbó mǐtɔn lɛ́ɛ, kpó mɛ lɛ́ɛ kpó bǐ wɛ ɖo wǔvɛ́ mɔ wɛ.

³³ A wa nǔ kpó hwɛjijɔ kpó, ɖo nǔ e gbo mǐ lɛ́ɛ bǐ mɛ, ɖó a ɖe gbejíninɔ towe xlɛ́, mǐdɛɛ lɛ́ɛ ka hu hwɛ dó we.

³⁴ Axɔ́sú mǐtɔn lɛ́ɛ, gǎn mǐtɔn lɛ́ɛ, vɔ̌sánú-xwlémawutɔ́ mǐtɔn lɛ́ɛ kpó tonukún mǐtɔn lɛ́ɛ kpó ɖó sísí nú sɛ́n towe ǎ. Yě dó vɛ̌ nú nǔ e a zɔ̌n yě lɛ́ɛ, bó dó vɛ̌ nú sɛ́n e a nɔ flín yě lɛ́ɛ.

³⁵ Yě ɖo nyɔ̌ná towe lɛ́ɛ tɛ́ntin, ɖo axɔ́súɖuto yě ɖésúnɔ tɔn mɛ. Hwi ɖésú wɛ sɔ́ yě ɖó to ɖaxó nɛ́ ɔ́ mɛ, to e ayǐkúngban tɔn nyí ayǐkúngban ɖagbe é mɛ. Yě ká ɖɔ émí ná jó nǔ nyanya wiwa dó bó ná sɛn we ǎ.

³⁶ Din ɔ́, mǐ ɖíe wá húzú kannumɔ ɖó énɛ́ ɔ́ wú e; to e a nǎ tɔ́gbó mǐtɔn lɛ́ɛ, bɔ yě ná ɖu jinukún ɖagbe e nɔ nyɔ́ ɖ'é mɛ lɛ́ɛ bǐ é mɛ wɛ mǐ ká lɛ́ wá húzú kannumɔ ɖe.

³⁷ To énɛ́ ɔ́ nɔ ná nǔ ɖagbe bɔ é nɔ túnflá axɔ́sú e sín acɛ mɛ a sɔ́ mǐ dó, ɖó hwɛ mǐtɔn lɛ́ɛ wútu lɛ́ɛ. Mǐ kpódó kanlin mǐtɔn lɛ́ɛ bǐ kpó wɛ ɖo alɔ yětɔn mɛ, bɔ yě nɔ́ dó wa nǔ e jló yě lɛ́ɛ ná. Aluwɛ ɖaxó ɖé mɛ wɛ mǐ ɖe.”