Nɛɛmíi 8 - MAWUXÓWÉMA

^1-2 Azǎn nukɔntɔn e ɖo sun ɔ́ mɛ ɔ́ gbe ɔ́, yě bǐ ɖó gbe kpɔ́, bó kplé ɖo Jeluzalɛ́mu, ɖo fí e Sinhɔntogbó ɖe é. Yě byɔ́ Ɛsidlási sɛ́nkplɔ́nmɛtɔ́ ɔ́ ɖɔ ní yi sɔ́ sɛ́n e Mawu Mavɔmavɔ ná Izlayɛ́li ví lɛ́ɛ gbɔn Mɔyízi jí ɔ́ sín wěma wá. Bɔ Ɛsidlási yi sɔ́ wěma ɔ́ wá togun ɔ́ nukɔn. Yě mɛ e kplé ɖo fínɛ́ lɛ́ɛ ɔ́, súnnu ɖ'é mɛ, nyɔ̌nu ɖ'é mɛ, yɔkpɔ́vú e ko ɖó xwe e ná mɔ nǔ jɛ nǔ mɛ ɔ́ ɖ'é mɛ.

³ Sín ayǐtéhɔ̌nnu káká wá jɛ gan wěwe mɛ ɔ́, Ɛsidlási ɖo te ɖo fí e Sinhɔntogbó ɖe ɔ́, bó sɔ́ gbe dó jǐ, bó xa sɛ́n ɔ́ nú yě, bɔ mɛ bǐ ɖótó ganjí.

⁴ È hwlǎ kpo bɔ Ɛsidlási xá jí bónú mɛ bǐ na sixú mɔ ɛ. Matitia, Cɛma, Anaya, Wuliya, Ilukya kpó Maaseya kpó ɖo ɖisíxwé n'i, bɔ Pedaya, Micaɛ́li, Malukíya, Hacúmu, Hacibadidana, Zekaliya kpó Mɛculamu kpó ɖo amyɔxwé n'i.

⁵ Hǔn Ɛsidlási ɔ́, fí e é ɖe ɔ́ yi jǐ hú togun ɔ́ bǐ, bɔ hwenu e é hun sɛ́nwéma ɔ́ é ɔ́, mɛ bǐ mɔ ɛ bó sí te.

⁶ Ɛsidlási dó kú nú Mawu Mavɔmavɔ, Mawu Ajalɔ̌nlɔn, bɔ mɛ bǐ sɔ́ alɔ dó jǐ, bó yí gbe ɖɔ: “Amǐ, amǐ, bó jɛ kpo bo ɖe kɔ́, bó sɛn Mawu Mavɔmavɔ.”

⁷ Yě wá jlɔ́ bɔ Levíi ví Yecúwa, Bani, Celeviya, Yamini, Akúvu, Cabutáyi, Hodya, Maaseya, Kelita, Azalya, Yozavadi, Hanáni, kpó Pelaya kpó jɛ sɛ́n lɛ́ɛ kplɔ́n yě jí.

⁸ Yě nɔ́ hun ɖɛ̌ bó nɔ xa Mawusɛ́n ɔ́ céɖécéɖé, bó nɔ́ tínmɛ, bónú mɛ ɖokpó ɖokpó ná mɔ nǔ jɛ nǔ e è xa é mɛ.

⁹ Ée kplékplémɛ ɔ́ se nǔ e xa wɛ è ɖe nɛ́ ɔ́, yě bǐ bɛ́ avǐ. Énɛ́ ɔ́ wú wɛ tokpɔngán Nɛɛmíi kpó Ɛsidlási sɛ́nkplɔ́nmɛtɔ́ ɔ́ kpó, kpódó Levíi ví e ɖo nǔ e è xa ɔ́ tínmɛ wɛ lɛ́ɛ kpó ɖɔ nú yě ɖɔ: “Azǎn égbé tɔn ɔ́, Mawu Mavɔmavɔ, Mawu mǐtɔn wɛ è sɔ́ ɖó te ná. Mi ma nɔ aluwɛ mɛ ó, mi ma y'avǐ ó.”

¹⁰ Ɛsidlási lɛ́ ɖɔ nú yě ɖɔ: “Mi yi xwé mitɔn lɛ́ɛ gbe, bó ɖu nǔ ɖagbe, bó nu ahan ɖagbe lɛ́ɛ. Ényí mɛɖé tíin bó má kó ɖó nǔɖé ɖo fínɛ́ bó ná ɖu ǎ hǔn, mi má ée ɖo mi sí ɔ́ xá ɛ, ɖó azǎn égbé tɔn ɔ́, Aklúnɔ mǐtɔn wɛ è sɔ́ ɖó te ná. Mi ma nɔ aluwɛ mɛ ó. Awǎjijɛ e nɔ gosín Mawu Mavɔmavɔ gɔ́n ɔ́ ná ná hlɔ̌nhlɔ́n mi.”

¹¹ Levíi ví lɛ́ɛ ɖésú xo hwihwɛ́ togun ɔ́; yě ɖɔ nú yě ɖɔ: “Mi xwɛ, azǎn égbé tɔn ɔ́, Mawu wɛ è sɔ́ ɖó te ná, mi ma nɔ aluwɛ mɛ ó.”

¹² Énɛ́ ɔ́, yě bǐ yi xwé yětɔn lɛ́ɛ gbe, bó ɖu nǔ bó nu ahan, bó ná nǔ e ɖo yě sí lɛ́ɛ ɖě mɛ e ma ɖó ɖě ǎ lɛ́ɛ, bɔ yě bǐ j'awǎ káká, ɖó yě mɔ nǔ jɛ Mawuxó e è ɖɔ nú yě ɔ́ mɛ.

Jwifu lɛ́ɛ ɖu Azavaxwe ɔ́

¹³ Ayǐhɔ́ngbe tɔn ɔ́, hɛ̌nnugán e ɖo Izlayɛ́li lɛ́ɛ bǐ kpó vɔ̌sánú-xwlémawutɔ́ lɛ́ɛ bǐ kpó sɛ kplé dó Ɛsidlási sɛ́nkplɔ́nmɛtɔ́ ɔ́ wú, bó ná lɛ́ gbéjé nǔ e sɛ́n ɔ́ ɖɔ é kpɔ́n céɖécéɖé.

¹⁴ Sɛ́n énɛ́ e Mawu Mavɔmavɔ ná yě gbɔn Mɔyízi jí ɔ́ mɛ ɔ́, yě mɔ fí e è ɖɔ nú Izlayɛ́li ví lɛ́ɛ ɖɔ yě ní nɔ́ nɔ azava sá ɖo Azavaxwe ɔ́ hwenu é. Xwe énɛ́ ɔ́, sun tɛ́nwegɔ́ ɔ́ mɛ wɛ è nɔ ɖu.

¹⁵ Cóbónú è ka ná ɖu xwe énɛ́ ɔ́, è nɔ to jlá gbɔn toxo lɛ́ɛ bǐ mɛ hwɛ̌; è nɔ jlá ɖo Jeluzalɛ́mu ɖésú. È nɔ ɖɔ nú mɛ bǐ ɖɔ yě ní yi só jí, bó yi ba olívu e è dǒ é kpó olívu gbě tɔn kpó sín ama kpó míiti sín ama kpó, kpó děma kpó, kpódó atín ɖěvo e dó ama lɛ́ɛ kpó sín ala, bó dó wá dó azava ná.

¹⁶ Bɔ Izlayɛ́li ví lɛ́ɛ yi ba ama bo dó dó azava ɔ́. Mɛ ɖé lɛ́ɛ dó azava ɖó xɔ yětɔn ta, mɛɖé lɛ́ɛ dó dó kɔ́xo yětɔn ta, mɛɖé lɛ́ɛ dó ɖó Mawu xwé ɔ́ sín kɔ́xota, mɛɖé lɛ́ɛ dó ɖó Sinhɔntogbó kpó Eflayímu hɔntogbó kpó ta.

¹⁷ Togun ɔ́ bǐ kpó mɛ e gosín kannumɔgbénu wá lɛ́ɛ bǐ kpó dó azava, bó nɔ sá. Awǎjijɛnú ɖaxó ɖé wɛ, ɖó Izlayɛ́li ví lɛ́ɛ ɔ́, sín Jozuwée Nuni ví ɔ́ hwenu ɖokpóó wɛ yě kó gɔn xwe énɛ́ ɔ́ ɖu.

¹⁸ Xwe ɔ́ sín azǎn lɛ́ɛ ɖokpó ɖokpó gbe ɔ́, sín azǎn nukɔntɔn ɔ́ gbe káká jɛ azǎn gǔdo tɔn ɔ́ gbe ɔ́, è nɔ xa fí ɖé ɖo sɛ́nwéma Mawu tɔn ɔ́ mɛ. Azǎn tɛ́nwe wɛ è nɔ ɖu xwe ɔ́ xɔ, bó nɔ wá bló kplé ɖaxó ɖokpó dó sú ta ná azǎn tántɔngɔ́ ɔ́ gbe lě e sɛ́n ɔ́ ɖɔ gbɔn é.