Nɛɛmíi 4 - MAWUXÓWÉMA

¹ Lo ɔ́, ée Sanbaláti kpó Toviya kpó Alabíinu lɛ́ɛ kpó, kpódó Amumɔ́ɔ ví lɛ́ɛ kpó, kpódó Acidɔ́dinu lɛ́ɛ kpó se ɖɔ è ɖo Jeluzalɛ́mu dǒ lɛ́ɛ bló ɖó wɛ, bɔ azɔ̌ ɖo nukɔn yi wɛ ganjí, bɔ fí e dǒ ɔ́ mu ɖe lɛ́ɛ ɔ́, è ɖo bǐ sú wɛ ɔ́, xomɛ sin yě tlala,

² bɔ yě ɖó gbe kpɔ́, bó ná wá tɔ́n ahwan Jeluzalɛ́mu toxo ɔ́, bó ná dó hunnyahunnya to ɔ́ mɛ.

³ Énɛ́ wú ɔ́, mǐ sa vo nú Mawu mǐtɔn, bó ɖe gbɛtɔ́, bɔ mɛ ɖě nɔ́ nya xɛ ɖo mǐ jí zǎn mɛ, bɔ mɛ ɖě nɔ́ nya kéze, bónú kɛntɔ́ lɛ́ɛ ja ahwan tɔ́n mǐ gbé ɔ́, yě ná ɖɔ nú mǐ.

⁴ Mǐ ɖ'é wú mɔ̌ có Judáanu lɛ́ɛ ɖɔ: “Nǔ e gblé lɛ́ɛ sukpɔ́ dín, bɔ agbɔ̌n ká kó kpé azɔ̌watɔ́ lɛ́ɛ. Mi sixú kpé wú bó bló bǐ kpé gbeɖé ǎ.”

⁵ Kɛntɔ́ mǐtɔn lɛ́ɛ ɔ́, yědɛɛ lɛ́ɛ ɖo linlin wɛ ɖɔ mǐ ná ɖo manywɛ́ mɛ, bɔ émí ná wá fyán mǐ ajijimɛ bó ná vívá kún nú mǐ bɔ azɔ̌ xó ná fó.

Nɛɛmíi sɔ́ ahwannú nú azɔ̌watɔ́ lɛ́ɛ

⁶ Jwifu e ɖo akpá e xwé kɛntɔ́ mǐtɔn lɛ́ɛ ɖe lɛ́ɛ wá mǐ gɔ́n azɔn wǒ, bó wá gba akpá nú mǐ; yě ɖɔ ali ɖěɖě e gbɔn gbé kɛntɔ́ mǐtɔn lɛ́ɛ ja bó ná wá kpé mǐ wú ɔ́ nú mǐ.

⁷ Un wá mɔ fí ɖé lɛ́ɛ ɖo dǒ ɔ́ gúdo, fí e è ma ná mɔ mɛ ɖe ǎ é, bó ɖó sɔ́ja lɛ́ɛ fínɛ́. Un nɔ kplé akɔta ɖokpó ɔ́ sín mɛ lɛ́ɛ ɖó fí ɖokpó ɔ́, bɔ yě hɛn hwǐ kpó hwǎn kpó, kpódó aɖǐgá kpó.

⁸ Ée un ɖó mɛ fí tɛnmɛ tɛnmɛ énɛ́ lɛ́ɛ ɔ́, un wá ɖɔ nú tonukún lɛ́ɛ kpódó hwɛɖɔtɔ́ to ɔ́ mɛ tɔn lɛ́ɛ kpó, kpódó mɛ e ɖo fínɛ́ lɛ́ɛ bǐ kpó ɖɔ: “Mi ma ɖi xɛsi nú kɛntɔ́ mitɔn lɛ́ɛ ó; mi flín ɖɔ Aklúnɔ ɔ́, nǔɖaxó wɛ é nyí, bó nyí nǔsísí. Mi fun ahwan dó nɔví mitɔn lɛ́ɛ, vǐ mitɔn súnnu lɛ́ɛ, vǐ mitɔn nyɔ̌nu lɛ́ɛ, asi mitɔn lɛ́ɛ kpódó mɛ e ɖo xwé mitɔn gbe lɛ́ɛ kpó tamɛ.”

⁹ Kɛntɔ́ mǐtɔn lɛ́ɛ se ɖɔ gbě mǐtɔn e blá wɛ émí ɖe ɔ́, mǐ kó se, bɔ yě mɔ ɖɔ nǔ e lin dó mǐ wú wɛ émí ɖe ɔ́ Mawu kó flí xwe. Énɛ́ ɔ́, mǐ bǐ lɛ́ kɔ wá yi dǒ ɔ́ kɔn bɔ azɔ̌ ɔ́ lɛ́ bɛ́.

¹⁰ Amɔ̌, bɛ́ sín gbe énɛ́ gbe ɔ́, azɔ̌gbɛ́ ce vlɔ̌ɖówe jɛ́n nɔ́ ɖo azɔ̌ wa wɛ, bɔ mɛ e kpo lɛ́ɛ nɔ́ hɛn hwǎn kpó gǎglónú kpó gǎ kpó, bó nɔ́ dó ganwu. Gǎn lɛ́ɛ nɔ́ ɖo nukún kpé dó Judáanu e ɖo azɔ̌ wa wɛ ɖo dǒ ɔ́ wú lɛ́ɛ bǐ wú.

¹¹ Mɛ e hɛn agban lɛ́ɛ ɔ́, alɔ ɖokpó wɛ yě nɔ́ dó wa azɔ̌ ná, ɖó alǐnnyánú ɖo alɔ yětɔn wegɔ́ ɔ́ mɛ.

¹² Xɔtlɛ́tɔ́ e ɖo azɔ̌ wa wɛ ɖo dǒ ɔ́ wú lɛ́ɛ ɖokpó ɖokpó blá hwǐ tɔn dó alin. Mɛ ɖokpó xwedó mì bó ɖo gbesisɔ mɛ, bó ná kún kpɛn hwebǐnu.

¹³ Un ka ɖɔ nú tonukún lɛ́ɛ kpódó hwɛɖɔtɔ́ to ɔ́ mɛ tɔn lɛ́ɛ kpó, kpódó mɛ e ɖo fínɛ́ lɛ́ɛ bǐ kpó ɖɔ: “Azɔ̌ e kpo bɔ mi ná wa gbɔn dǒ ɔ́ wú káká yi fó ɔ́ sukpɔ́. Mǐ ɖíe ká má mǐɖée bó ɖo zɔzɔ bó lín dó mǐɖée e.

¹⁴ Ényí mi ɖo fí ɖěbǔ bó se kpɛn gbe hǔn, mi sɛ kplé dó wǔ ce, nú Mawu mǐtɔn ná fun ahwan xá kɛntɔ́ mǐtɔn lɛ́ɛ nú mǐ.”

¹⁵ Mǐ nɔ́ fɔ́n ayǐtéhɔ̌nnu bó nɔ́ jɛ azɔ̌ jí, bó nɔ́ wa azɔ̌ káká bɔ zǎn nɔ́ kú. Mǐ mɛ e ɖo azɔ̌ wa wɛ lɛ́ɛ wevlɔ́ɖó ká nɔ́ hɛn alǐnnyánú alɔ mɛ.

¹⁶ Hwe énɛ́ ɔ́ nu ɔ́, un ná gbe bɔ gǎn ɖokpó ɖokpó kpó mɛ e ɖo azɔ̌ wa xá ɛ wɛ lɛ́ɛ kpó nɔ́ nɔ Jeluzalɛ́mu toxo ɔ́ mɛ zǎn mɛ, bó ná sixú nya xɛ ɖo mǐ jí, bó ná wa azɔ̌ kéze.

¹⁷ Mɛ e kpó nyi kpó kpo ɖo kpɔ́ lɛ́ɛ, kpódó azɔ̌gbɛ́ ce lɛ́ɛ kpó, kpódó mɛcɔ́tɔ́ e nɔ kplá mì lɛ́ɛ kpó ɔ́, wǔ lɛ gbé jɛ́n mǐ nɔ́ ja bó nɔ́ ɖe awu mǐtɔn.