Nɛɛmíi 3 - MAWUXÓWÉMA

¹ Eliyacivu vɔ̌sánú-xwlémawutɔ́ ɖaxó ɔ́ jɛ azɔ̌ jí, é kpódó gbɛ̌ tɔn vɔ̌sánú-xwlémawutɔ́ lɛ́ɛ kpó. Yě bló Lɛ̌ngbɔ́hɔntogbó lɛ́ɛ ɖó. Ée yě jó hɔntogbó énɛ́ ɔ́ nú Mawu ɔ́, yě wá dó hɔn lɛ́ɛ. Yě bló dǒ ɔ́ ɖó káká yi kpe gaga e è nɔ ylɔ́ ɖɔ kanwe ko (100) lɛ́ɛ kɔn, bó lɛ́ dín d'é nu káká wá kpe gaga e è nɔ ylɔ́ Hananɛ́li ɔ́ kɔn.

² Jelikonu lɛ́ɛ bɔdó yě wú fínɛ́ tlóló bó ɖo azɔ̌ wa wɛ, bɔ Zakúu Imulíi ví ɔ́ bɔd'é wú.

³ Hweví Hɔntogbó ɔ́, Ha-Senáa ví lɛ́ɛ wɛ bló. Ée yě bló hɔntogbó ɔ́, yě gbá xɔ ɖ'é ta, bó dó gan e è nɔ dó sú hɔn lɛ́ɛ, kpódó sɛxlo lɛ́ɛ kpó.

⁴ Mɛlemɔti Wuliya ví, Hakɔ́si vívú ɔ́ wɛ ɖo azɔ̌ wa wɛ ɖo Ha-Senáa ví lɛ́ɛ kpá, bɔ Mɛculamu Bɛlɛkya ví, Mɛcezaveɛli vívú ɔ́ jɛ fínɛ́, bɔ Sadɔ́ku Baana ví ɔ́ bɔ d'é wú.

⁵ È mɔ mɛ énɛ́ lɛ́ɛ ɔ́, è nǎ mɔ Tekowanu lɛ́ɛ. Tekowanu lɛ́ɛ ɔ́, tonukún yětɔn lɛ́ɛ gbɛ́ ɖɔ émí kún ná nɔ mɛ e ɖo azɔ̌ ɔ́ nu lɛ́ɛ glɔ́ bó ná wa azɔ̌ ó.

⁶ Hɔntogbó Yecana tɔn ɔ́, Yoyada Paseyaxi ví ɔ́ kpódó Mɛculamu Besodiya ví ɔ́ kpó wɛ bló. Ée yě bló hɔntogbó ɔ́, yě dó hɔnvǐnɔ ná, bó dó gan e è nɔ dó sú hɔn ná lɛ́ɛ kpódó sɛxlo lɛ́ɛ kpó.

⁷ Bɔ Mɛlatia Gabawɔ́ɔnnu ɔ́ kpódó Yadɔ́ni Mɛlɔnɔtinu ɔ́ kpó ɖo azɔ̌ wa wɛ ɖo mɛ énɛ́ lɛ́ɛ kpá. Mɛ ɖěvo lɛ́ɛ lɛ́ ɖo fínɛ́ bó gosín Gabawɔ́ɔn kpó Misipa kpó bó ɖo azɔ̌ wa wɛ dó tokpɔngán Efláti zǎnzǎnhwe jí tɔn ɔ́ sín acɛ mɛ.

⁸ È sɛ yi zaan ɔ́, è nǎ mɔ ganvɔzɔ́watɔ́ Wuziyɛ́li Haaxáya ví ɔ́, bó ná mɔ céluzɔ́watɔ́ Hananiya. Ée yě wá fí e dǒ ɔ́ gbló ɖe é ɔ́, yě fó azɔ̌ yětɔn ɖo Jeluzalɛ́mu.

⁹ È mɔ yědɛɛ lɛ́ɛ ɔ́, è nǎ mɔ Hlefaya Uu ví e kpa acɛ dó tokpɔnla Jeluzalɛ́mu tɔn vlɔ̌ nu é.

¹⁰ È yi zɔ zaan ɔ́, è nǎ mɔ Yedaya Halumafu ví ɔ́, bɔ fí e wa azɔ̌ ɖe wɛ éyɛ́ ɖe ɔ́ kpan nukɔn xwé tɔn, bɔ Hatúci Hacavunɛ́ya ví ɔ́ bɔ dó wǔ tɔn.

¹¹ Malukíya Halimu ví ɔ́ kpó Hacúvu Paxáti-Mɔwabu ví ɔ́ kpó ká ɖo azɔ̌ wa wɛ ɖo akpá e xwé kpe gaga myɔkpó lɛ́ɛ tɔn ɖe é.

¹² Calúmu Ha-Lohɛci ví e nyí gǎn nú tokpɔnla Jeluzalɛ́mu tɔn vlɔ̌ é ɖo azɔ̌ wa wɛ ɖo yě kpá, é kpódó vǐ tɔn nyɔ̌nu lɛ́ɛ kpó.

¹³ Dodomɛ Hɔntogbó ɔ́ Hanúni kpódó Zanɔwáxinu lɛ́ɛ kpó wɛ bló. Ée yě bló hɔntogbó ɔ́, yě dó hɔnvǐnɔ ná, bó dó gan e è nɔ dó sú hɔn ná lɛ́ɛ kpó sɛxlo lɛ́ɛ kpó. Yě lɛ́ wa azɔ̌ ɖo dǒ ɔ́ wú. Fí e yě wa azɔ̌ ɖo dǒ ɔ́ wú gbɔn lɛ́ɛ ná ɖó nǔjlɛ́kpo afɔwe kanwe ko (500) mɔ̌; yě wa azɔ̌ káká wá Zunkɔ́ Hɔntogbó ɔ́ kɔn.

¹⁴ Zunkɔ́ Hɔntogbó ɔ́, Malukíya Hlekávu ví e nyí tokpɔnla Bɛti-Kɛlɛ́mu sín gǎn ɔ́ wɛ vɔ́ bló ɖó. Ée é vɔ́ bló ɖó ɔ́, é dó hɔnvǐnɔ ná, bó dó gan e è nɔ dó sú hɔn ná lɛ́ɛ, bó dó sɛxlo lɛ́ɛ.

¹⁵ Tɔjɔtɛn Hɔntogbó ɔ́, Calúmu Kɔlu-Hozée ví e nyí tokpɔnla Misipa tɔn ɔ́ sín gǎn ɔ́ wɛ bló. Ée é vɔ́ hɔntogbó ɔ́ bló ɖó ɔ́, é gbá xɔ ɖó ta tɔn, bó dó hɔnvǐnɔ ná, bó dó gan e è nɔ dó sú hɔn lɛ́ɛ kpódó sɛxlo lɛ́ɛ kpó. É lɛ́ wa azɔ̌ ɖo dǒ ɔ́ wú ɖo Silowée tɔ ɔ́ kpá, ɖo axɔ́sú ɔ́ sín jikpá kpódó kpekán e jí è nɔ gbɔn bo nɔ yi Davídi Toxo ɔ́ mɛ é kpán tɛ́ntin.

¹⁶ È sɛ yi zɔ zaan ɔ́, Nɛɛmíi Azubúki ví é nyí gǎn nú tokpɔnla Bɛti-Súu tɔn sín wevlɔ́ɖó ɔ́ wɛ ɖo azɔ̌ wa wɛ ɖo fínɛ́. É wa azɔ̌ káká yi Davídi kúxwé, káká gbɔn tɔ e è kun é kɔn káká yi ahwankpá sɔ́ja e nɔ cɔ́ axɔ́sú ɔ́ lɛ́ɛ é tɔn kɔn.

¹⁷ Levíi ví lɛ́ɛ wɛ bɔdó Nɛɛmíi wú bó ɖo azɔ̌ wa wɛ; yě wɛ nyí: Hlehúmu Bani ví ɔ́ kpódó Hacaviya e nyí gǎn nú tokpɔnla Keyila tɔn sín vlɔ̌ é kpó; tokpɔnla ɔ́ sín acɛ mɛ wa azɔ̌ dó wɛ é ɖe.

¹⁸ É kpódó Binuyi Henadadi ví e nyí gǎn nú tokpɔnla Keyila tɔn sín vlɔ̌ é kpó,

¹⁹ kpódó Ezɛ́ɛ Yecúwa ví e nyí gǎn ɖo Misipa é kpó. Éyɛ́ wɛ bló dǒ ɔ́ ɖó ɖo fí e kpan nukɔn xɔ e mɛ ahwanlyánnú lɛ́ɛ nɔ é, bó lɛ́ wa azɔ̌ ɖo dǒ ɔ́ sín zwe jí.

²⁰ Balúki Zabáyi ví ɔ́ wɛ bɔdó Ezɛ́ɛ wú bó ván kan bo wa azɔ̌ bɛ́ sín dǒzwe ɔ́ jí káká yi hɔntogbó vɔ̌sánú-xwlémawutɔ́ ɖaxó Eliyacivu tɔn ta.

²¹ È yi zɔ kpɛɖé ɔ́, Mɛlemɔti Wuliya ví Hakɔ́si vívú ɔ́ wɛ wa azɔ̌ sín Eliyacivu sín hɔntogbó jí káká yi fí e xwé tɔn nɔ te ɖó é.

²² Vɔ̌sánú-xwlémawutɔ́ e ɖo Jeluzalɛ́mu kanmɛ lɛ́ɛ ɖo azɔ̌ wa wɛ ɖo Mɛlemɔti kpá.

²³ Bɛnjamɛ́ɛ kpó Hacúvu kpó wa azɔ̌ ɖo fí e kpan nukɔn xwé yětɔn é, bɔ Azalya Maaseya ví Ananíya vívú ɔ́ ka wa azɔ̌ ɖo xwé éyɛ́ tɔn kpá.

²⁴ Fí e jɛ fínɛ́ ɔ́ Binuyi Henadadi vívú ɔ́ wɛ wa azɔ̌ ɖo fínɛ́ ɖo Azalya xwé kpódó dǒzwe ɔ́ kpó tɛ́ntin.

²⁵ Palalu Wuzáyi ví ɔ́ ká wa azɔ̌ ɖo dǒzwe ɔ́ kpódó kpe gaga ɖaxó e ɖo axɔ́sú ɔ́ xwé nukɔn ɖibla yi fí e sɔ́ja e nɔ cɔ́ hɔn ɔ́ mɛ lɛ́ɛ nɔ́ nɔ é kpó. È yi zɔ kpɛɖé ɔ́, è nǎ mɔ Pedaya Palewɔ́ci ví ɔ́,

²⁶ kpódó mɛ kpaa e nɔ wa azɔ̌ ɖo Mawu xwé gbe, bó nɔ́ nɔ Ofɛ́lu lɛ́ɛ kpó. Yědɛɛ lɛ́ɛ wa azɔ̌ káká yi kpe gaga e ɖo dǒzwe e ɖo zǎnzǎnhwe jí nú Sinhɔntogbó é kɔn.

²⁷ Tekowanu lɛ́ɛ wɛ jɛ fínɛ́ bó wa azɔ̌ ɖo fí e kpan nukɔn tɛnmɛ e ɖo kpe gaga e ɖo zwe ɔ́ kpó Ofɛ́lu dó ɔ́ kpó tɛ́ntin é.

²⁸ Bɛ́ sín hɔntogbó sɔ́ lɛ́ɛ tɔn kɔn ɔ́, vɔ̌sánú-xwlémawutɔ́ lɛ́ɛ wɛ wa azɔ̌ ɖo fínɛ́. Mɛ ɖokpó ɖokpó wa azɔ̌ ɖo xwé tɔn nukɔn.

²⁹ Đo zɔ zaan ɔ́, Sadɔ́ku Imumɛ́ɛ ví ɔ́ wɛ wa azɔ̌ ɖo fínɛ́. É lɔ ɔ́, xwé tɔn nukɔn wɛ é wa azɔ̌ ɖe. Cemaya Cekaniya ví e nɔ́ cɔ́ hɔntogbó zǎnzǎnhwe jí tɔn ɔ́ lɔ wa azɔ̌ ɖo fínɛ́.

³⁰ Fí e jɛ fínɛ́ ɔ́, Hananiya Cɛlɛmiya ví ɔ́ kpódó Hanúni Saláfu ví ayizɛ́ngɔ́ ɔ́ kpó wɛ wa azɔ̌ ɖo fínɛ́. Đo Hanúni kpá fínɛ́ ɔ́, Mɛculamu Bɛlɛkya ví ɔ́ wɛ wa azɔ̌ ɖo dǒ e ɖo xwé tɔn nukɔn é wú.

³¹ È lɛ̌ sɛ yi zɔ kpɛɖé ɔ́, ganvɔnútuntɔ́ Malukíya wɛ wa azɔ̌ káká wá xwé e è sɔ́ nú mɛ kpaa e nɔ wa azɔ̌ ɖo Mawu xwé lɛ́ɛ kpódó ajɔ̌watɔ́ lɛ́ɛ kpó, bɔ é ɖo Mifukadi sín hɔntogbó nukɔn é kɔn. É wa azɔ̌ káká wá fí e mɛcɔ́tɔ́ lɛ́ɛ nɔ́ nɔ ɖo dǒzwe ɔ́ jí é.

³² Ganvɔnútuntɔ́ ɖě lɛ́ɛ kpódó ajɔ̌watɔ́ lɛ́ɛ kpó wa azɔ̌ ɖo fí e kpo bó ɖo fí e mɛcɔ́tɔ́ lɛ́ɛ nɔ́ nɔ é kpódó Lɛ̌ngbɔ́ Hɔntogbó ɔ́ kpó tɛ́ntin.

Kɛntɔ́ lɛ́ɛ jló ná ɖó azɔ̌ ɔ́ te

³³ Ée Sanbaláti se ɖɔ mǐ Jwifu lɛ́ɛ jɛ azɔ̌ jí bó ná vɔ́ Jeluzalɛ́mu dó lɛ́ɛ bló ɖó ɔ́, é sin xomɛ n'i tlala, bɔ é jɛ mǐ ko jí.

³⁴ É nɔ́ ɖɔ ɖo to tɔn mɛ nu lɛ́ɛ kpódó sɔ́ja Samalíi tɔn lɛ́ɛ kpó nukɔn ɖɔ: Jwifu nǔvɔ́nɔ lɛ́ɛ ɔ́, étɛ́ ná tɛ́nkpɔ́n wɛ yě ká ɖe? Yě ná sixú kpé wú bó wa azɔ̌ ɔ́ kpé, bó ná sá vɔ̌ nú Mawu a? Awǐnnya e è ko gba hánnyá gbɔn myɔ mɛ lɛ́ɛ ɔ́, yě ná cyán bǐ, bó ná mɛ dǒ ɔ́ bǐ kpé égbé din ka wɛ a?

³⁵ Toviya Amumɔ́ɔ ví ɔ́ nɔ Sanbaláti kpá dɔ̌n, bó ɖɔ: “Étɛ́ mɛ wɛ yě ká ɖe? Ayǐsájɛ yǎyá na bo xá awǐnnyadó énɛ́ ɔ́ jí ɔ́, bǐ jɛ́n ná mu.”

³⁶ Un ka jɛ ɖɛ xo jí ɖɔ: “Mawu mǐtɔn, a se lě e kɛntɔ́ ɖo mǐ ko wɛ gbɔn é; nǔ nyanya e ɖɔ dó mǐ wú wɛ yě ɖe ɔ́, blǒ bónú bǐ ní mlɛ́ yě. Kɛntɔ́ ní vɔ yě. È nǐ bɛ́ yě bǐ yi kannumɔgbénu.

³⁷ Ma sɔ́ hwɛ yětɔn lɛ́ɛ kɛ yě ó; ma súnsún agɔ e yě jɛ dó we ɔ́ ó, ɖó dǒ e bló ɖó wɛ mǐ ɖe ɔ́ zɔ́n bɔ yě kpɔ́n nukún mɛ nú mǐ.”

³⁸ Lě e mǐ vɔ́ dǒ ɔ́ bló ɖó gbɔn é nɛ́. Mǐ bló dǒ ɔ́ ɖó mɔ̌ káká lɛ́ dó yi ɖó wevlɔ́ɖó, bɔ mɛ ɖokpó ɖokpó wa azɔ̌ kpó jlǒ ɖagbe kpó.