Nɛɛmíi 13 - MAWUXÓWÉMA

Nɛɛmíi vɔ́ nǔ lɛ́ɛ to

¹ Gbe énɛ́ gbe ɔ́, è wǎ ɖo sɛ́nwéma Mɔyízi tɔn xa wɛ ɖo togun mɛ, bó mɔ ɖ'é mɛ ɖɔ mɛ e nyí Amumɔ́ɔ ví é kpó mɛ e nyí Mɔwabunu é kpó ɖě kún ná byɔ́ mavɔmavɔsɛntɔ́ lɛ́ɛ sín gbɛ̌ta mɛ gbeɖé ó.

² Đó ɖ'ayǐ xóxó ɔ́, yě hɛn nǔɖuɖu kpó sin kpó wá nú Izlayɛ́li ví lɛ́ɛ ǎ, bó ká lɛ́ ná nǔ Baláamu ɖɔ é ní dó nu Izlayɛ́li ví lɛ́ɛ. Lo ɔ́, Mawu sɔ́ nudómɛ énɛ́ ɔ́ dó húzú nyɔ̌ná nú Izlayɛ́li ví lɛ́ɛ.

³ Ée è xa sɛ́n ɔ́ lě bɔ è se ɔ́, è ɖe vǐ e yě ji ɖo toɖévomɛnu xomɛ lɛ́ɛ bǐ ɖó vo nú Izlayɛ́li ví lɛ́ɛ.

⁴ Cóbónú nǔ énɛ́ ɔ́ ká ná jɛ ɔ́, Eliyacivu vɔ̌sánú-xwlémawutɔ́ e è sɔ́ ɖó xɔ e ɖo Mawu mǐtɔn xwé lɛ́ɛ nu ɔ́ sɔ́ xɔ ɖaxó ɖokpó nú Toviya, ɖó mɛ tɔn wɛ.

⁵ Đ'ayǐ xóxó ɔ́, nǔ e è nɔ bɛ́ dó xɔ énɛ́ ɔ́ mɛ lɛ́ɛ ɖíe: nǔ e è nǎ Mawu lɛ́ɛ, zǎlínkpɔ́n, gannú lɛ́ɛ, mǎɖówǒ jinukún e è nɔ ylɔ́ ɖɔ blěe é tɔn, mǎɖówǒ vɛ̌ɛn yɔ̌yɔ́ tɔn, mǎɖówǒ ami tɔn, nǔ e sɛ́n ɔ́ ɖɔ è nǎ ná Levíi ví lɛ́ɛ é, kpó nǔ e sɛ́n ɔ́ ɖɔ è nǎ ná hanjitɔ́ lɛ́ɛ kpó é.

⁶ Hwenu e nǔ énɛ́ ɔ́ ɖo jijɛ wɛ ɔ́, nyɛ ɖo Jeluzalɛ́mu ǎ, ɖó un lɛ́ kɔ yi Babilɔ́nu Dadá Aatazɛɛzɛsi gɔ́n, hwenu e é ɖo xwe gban-nukún-we (32) bló wɛ ɖo axɔ́súzinkpo tɔn jí é.

⁷ Ée xwe e mɛ un yi dɔ̌n ɔ́ fó ɔ́, Dadá ɔ́ ná gbe mì ɖɔ nyi ní lɛ́ wá yi Jeluzalɛ́mu. Ée un wá ɔ́, un wá mɔ nǔ e Eliyacivu dó sin é: é sɔ́ xɔ ɖokpó ná Toviya ɖo Mawu sín xwé gbe.

⁸ Nǔ nɛ́ ɔ́ vɛ́ nú mì káká bɔ un bɛ́ nǔ e nyí Toviya tɔn ɖo xɔ ɔ́ mɛ ɔ́ bǐ kɔn nyi gbě.

⁹ Un ná gbe ɖɔ è nǐ slá wǔ nú xɔ lɛ́ɛ, bó lɛ́ bɛ́ gannú e è nɔ zán ɖo Mawu xwé lɛ́ɛ, nǔ e è nǎ Mawu lɛ́ɛ kpó zǎlínkpɔ́n lɛ́ɛ kpó ɖó tɛn yětɔn mɛ.

¹⁰ Un lɛ́ se ɖɔ nǔ e è ɖǒ ná ná Levíi ví lɛ́ɛ ɔ́, è kún sɔ́ nɔ ná yě ó, bɔ Levíi ví lɛ́ɛ kpó hanjitɔ́ e ɖo azɔ̌ wa wɛ lɛ́ɛ kpó bǐ hɔn yi ayǐkúngban yětɔn yětɔn jí.

¹¹ Un gblé hwɛ dó ta nú tonukún lɛ́ɛ bó ɖɔ: “Étɛ́wú mi ka jó xwé Mawu tɔn dó?” Un kplé Levíi ví lɛ́ɛ kpó hanjitɔ́ lɛ́ɛ kpó, bó lɛ́ sɔ́ azɔ̌ dó así nú yě.

¹² Énɛ́ ɔ́, Judáa toxo ɔ́ bǐ bɛ́ mǎɖówǒ blěe tɔn, kpó vɛ̌ɛn yɔ̌yɔ́ tɔn kpó ami kpó tɔn wá xɔ e mɛ è nɔ bɛ́ agban dó lɛ́ɛ.

¹³ Un ɖe Cɛlɛmiya vɔ̌sánú-xwlémawutɔ́ ɔ́, Sadɔ́ku sɛ́nkplɔ́nmɛtɔ́ ɔ́ kpó Pedaya Levíi ví ɔ́ kpó, bɔ yě ná cɔ́ agbanxɔ lɛ́ɛ, un sɔ́ Hanáni Zakúu ví Mataniya vívú ɔ́ gɔ́ nú yě, ɖó yě mɛ énɛ́ lɛ́ɛ ɔ́, gbɛtɔ́ jijɔɖagbenɔ wɛ nú yě bɔ mɛ bǐ tunwun. Azɔ̌ e è sɔ́ dó así nú yě ɔ́ wɛ nyí ɖɔ yě ná nɔ má nǔ lɛ́ɛ nú nɔví yětɔn lɛ́ɛ.

¹⁴ “Mawu ce, flín mì, ɖó nǔ énɛ́ e un wa ɔ́ wú, ma wɔn sísí e un ɖó nú Mawu ce sín xwé ɔ́ kpódó nǔ e nyí nǔ bɔ è ɖǒ ná bló lɛ́ɛ kpó é ó.”

¹⁵ Hwe énɛ́ ɔ́ nu ɔ́, un mɔ súnnu ɖé lɛ́ɛ bɔ yě ɖo vǐwun li wɛ ɖo vǐwunto mɛ gbɔjɛzán gbe; mɛɖé lɛ́ɛ blá jinukúnkɔ, bó ɖo xwé gbe bɛ́ yi wɛ; mɛɖé lɛ́ɛ dó vɛ̌ɛn gban, vǐwun gban, fígi gban, kpódó nǔ tɛnmɛ tɛnmɛ lɛ́ɛ kpó sín agban nú tócí yětɔn lɛ́ɛ, bó ná bɛ́ nǔ énɛ́ lɛ́ɛ hɛn yi Jeluzalɛ́mu ɖo gbɔjɛzán gbe. Gbe e gbe yě ɖo nǔ yětɔn lɛ́ɛ sa wɛ ɔ́, un ɖɔ nú yě ɖɔ yě ní cɔ́ yěɖée, ɖó nǔ e wa wɛ yě ɖe ɔ́ kún nyɔ́ ó.

¹⁶ Tíinu ɖé lɛ́ɛ tíin, bó wá cí Jeluzalɛ́mu, bó nɔ́ hɛn hweví kpó nǔ tɛnmɛ tɛnmɛ kpó wá sa xá Judáa ví lɛ́ɛ ɖo Jeluzalɛ́mu gbɔjɛzán gbe.

¹⁷ Un gblé hwɛ dó ta nú tonukún Judáa tɔn lɛ́ɛ, bó ɖɔ nú yě ɖɔ: “Étɛ́ ká nyí nǔ baɖabaɖa énɛ́ ɔ́ bɔ mi ɖo wiwa wɛ, bó dó ɖo su ɖu nú gbɔjɛzán ɔ́ wɛ?

¹⁸ É má nyí nǔ e tɔ́gbó tɔgbo mitɔn lɛ́ɛ wa lɛ́ɛ jɛ́n ná! É má nyí nǔ énɛ́ lɛ́ɛ wú wɛ Mawu mǐtɔn dɔn nǔ nyanya énɛ́ lɛ́ɛ bǐ dó mǐ jí, bó dɔn dó toxo élɔ́ jí a? Bɔ midɛɛ lɛ́ɛ mi ko lɛ́ ɖo su ɖu nú gbɔjɛzán ɔ́ wɛ, bó lɛ́ ɖo xomɛsin Mawu tɔn dɔn dó Izlayɛ́li to ɔ́ jí wɛ.”

¹⁹ Bɛ́ sín gbe nɛ́ ɔ́ gbe ɔ́, un ná gbe ɖɔ nú zǎn jɛ bibɔ jí hǔn, è nǐ nɔ́ sú Jeluzalɛ́mu sín hɔntogbó lɛ́ɛ có nú gbɔjɛzán ɔ́ ná bɛ́; è ma ka nɔ hun yě có nú gbɔjɛzán ɔ́ fó ó; un sɔ́ mɛsɛntɔ́ ce lɛ́ɛ ɖě ɖó hɔntogbó lɛ́ɛ jí, bónú mɛɖé ná sɔ́ ajɔ̌nú byɔ́ Jeluzalɛ́mu toxo ɔ́ mɛ gbɔjɛzán gbe ɔ́, yě ná gbɛ́.

²⁰ Nǔ ɖo mɔ̌ có, nǔ tɛnmɛ tɛnmɛ sa tɔ́ lɛ́ɛ nɔ́ wá dɔ́ Jeluzalɛ́mu dó ɔ́ kpá, ɖo toxo ɔ́ gúdo nú zǎn ɖokpó abǐ zǎn we.

²¹ Bɔ un wá gbɛ́ nú yě ɖɔ: “Étɛ́wú mi nɔ ɖo Jeluzalɛ́mu dó ɔ́ kpá? Ényí mi sɔ́ bló mɔ̌ ɖě ɔ́, alɔ ce ná jɛ mi wú.” Bɛ́ sín gbe nɛ́ ɔ́ gbe ɔ́, yě sɔ́ nɔ wá ɖě gbɔjɛzán gbe ǎ.

²² Un ka ɖɔ nú Levíi ví lɛ́ɛ ɖɔ yě ní slá wǔ, bó cɔ́ hɔntogbó lɛ́ɛ gbɔjɛzán gbe, nú gbɔjɛzán ɔ́ ná nyí nǔsísí. “Mawu ce, flín mì ɖó nǔ énɛ́ ɔ́ wú, bó kpɔ́n dó nǔbláwǔkúnúmɛ towe wú, bó cyɔ́n alɔ jǐ ce.”

²³ Hwe énɛ́ ɔ́ nu ɖokpó ɔ́, un mɔ ɖɔ Jwifu lɛ́ɛ da nyɔ̌nu Acidɔ́dinu lɛ́ɛ kpódó nyɔ̌nu Amumɔ́ɔ ví lɛ́ɛ kpó, bó da nyɔ̌nu Mɔwabunu lɛ́ɛ.

²⁴ Vǐ yětɔn lɛ́ɛ wevlɔ́ɖó nɔ́ dó Acidɔ́digbe. Yě se Jwifu gbe ǎ. Yě mǎ dó akɔta ɖě sín gbe ǎ ɔ́, yě ká ná dó ɖě sín gbe.

²⁵ Un gblé hwɛ dó ta nú yě bó dó nu yě. Un xo mɛɖé lɛ́ɛ, bó sun ɖa yětɔn lɛ́ɛ ɖɔ yě ní xwlé Mawu ɖɔ émí kún ná ná vǐ nyɔ̌nu émítɔn toɖévomɛnu lɛ́ɛ nú yě ná da ó; émí kún ná da vǐ yětɔn nú vǐ súnnu émítɔn lɛ́ɛ ó, émí ɖésúnɔ kún ká ná da ó.

²⁶ Nǔ énɛ́ ɔ́ wɛ dɔn Salomɔ́ɔ Izlayɛ́li xɔ́sú ɔ́ dó hwɛ mɛ ǎ cé? Axɔ́sú étɔn ɖɔhun tíin ɖo to ɖěbǔ mɛ ǎ. Mawu tɔn yí wǎn n'i, bó sɔ́ ɛ axɔ́sú ɖó Izlayɛ́li to ɔ́ nu. Nǔ ɖo mɔ̌ có, toɖévomɛ nyɔ̌nu lɛ́ɛ dɔn ɛ dó hwɛ mɛ,

²⁷ bɔ è na lɛ́ se din ɖɔ mi da toɖévomɛ nyɔ̌nu, bɔ é nyí hwɛ ɖaxó bɔ mi hu dó Mawu mǐtɔn.

²⁸ Yoyada ví súnnu ɖokpó tíin, Eliyacivu vɔ̌sánú-xwlémawutɔ́ ɔ́ vívú wɛ, bó nyí Sanbaláti, Holonayímunu ɔ́ sín vǐsú; énɛ́ wú wɛ un nya ɛ sín Jeluzalɛ́mu.

²⁹ Mawu ce, ma wɔn nǔ e yě wa ɔ́ gbeɖé ó, ɖó vɔ̌sánú-xwlémawutɔ́zɔ́ ɔ́, yě ɖu su ná, bó gba akɔ e vɔ̌sánú-xwlémawutɔ́ lɛ́ɛ kpó ée Levíi ví lɛ́ɛ kpó jɛ xá we é.

³⁰ Un ɖe mɛ e kó nyí jǒnɔ ɔ́ bǐ sín togun ɔ́ mɛ, bɔ sɛ́n e ko nyí sɛ́n, bɔ vɔ̌sánú-xwlémawutɔ́ lɛ́ɛ kpó Levíi ví lɛ́ɛ kpó ɖó ná nyi ɔ́, un lɛ́ vɔ́ flín mɛ ɖokpó ɖokpó ɖo azɔ̌ tɔn kɔn.

³¹ Nakí e è nɔ ná hwe ɖé lɛ́ɛ nu é, kpó jinukún nukɔntɔn e è nɔ ná lɛ́ɛ kpó ɔ́, un lɛ́ flín yě. Mawu ce, flín mì bó sɔ́ nukún ɖagbe dó kpɔ́n mì ná.