Nɛɛmíi 11 - MAWUXÓWÉMA

Jwifu e è ɖe, bɔ yě ná nɔ Jeluzalɛ́mu lɛ́ɛ

¹ Mɛ e nyí gǎn ɖo togun ɔ́ nu lɛ́ɛ wá cí Jeluzalɛ́mu, bɔ è ɖe mɛ ɖo mɛ e kpo lɛ́ɛ mɛ. È nɔ sɔ́ xwédo wǒ ɖó te, bó nɔ́ nyi akɔ dó bó nɔ́ ɖe xwédo ɖokpó ɖo yě mɛ, bó nɔ́ ɖɔ é ní yi nɔ Jeluzalɛ́mu, toxo mímɛ́ ɔ́ mɛ. Énɛ́ ɔ́, mɛ tɛ́nnɛ ɖě lɛ́ɛ e kpo lɛ́ɛ hɛn ɔ́, yě ná nɔ toxo e kpo ɖo to ɔ́ mɛ lɛ́ɛ mɛ.

² Amɔ̌, ényí mɛɖé tíin bó zin alɔ d'akɔ́n ɖɔ émí ná yi nɔ Jeluzalɛ́mu ɔ́, è nɔ xo ɖɛ dó mɛ énɛ́ jí.

³ Tokpɔngán lɛ́ɛ nɔ́ nɔ Jeluzalɛ́mu, bɔ Izlayɛ́li ví ɖě lɛ́ɛ, vɔ̌sánú-xwlémawutɔ́ lɛ́ɛ, Levíi ví lɛ́ɛ, mɛ kpaa e nɔ wa azɔ̌ ɖo Mawu xwé gbe lɛ́ɛ, kpódó mɛsɛntɔ́ Salomɔ́ɔ tɔn lɛ́ɛ sín vǐ lɛ́ɛ kpó ɔ́, yědɛɛ lɛ́ɛ ɖokpó ɖokpó nɔ́ nɔ fí e nyí étɔn é.

⁴ Judáa ví ɖé lɛ́ɛ kpó Bɛnjamɛ́ɛ ví ɖé lɛ́ɛ kpó wá cí Jeluzalɛ́mu. Judáa ví e wá nɔ Jeluzalɛ́mu lɛ́ɛ ɖíe: Ataya Wuziya ví ɔ́; Wuziya nyí Zekaliya ví, Zekaliya nyí Amaliya ví, Amaliya ka nyí Cefátiya ví, bɔ Cefátiya nyí Maxalalɛ́li ví; Pɛlɛ́si Judáa ví ɔ́ wɛ dó kún yětɔn.

⁵ Yě kpó Maaseya Balúki ví ɔ́ kpó; Balúki ɔ́, Kɔlu-Hozée ví wɛ, bɔ Kɔlu-Hozée nyí Hazaya ví, Hazaya nyí Adaya ví, bɔ Adaya nyí Yoyalívu ví, bɔ Yoyalívu nyí Zekaliya ví, bɔ Zekaliya nyí Cela ví;

⁶ Pɛlɛ́si ví e wá nɔ Jeluzalɛ́mu lɛ́ɛ ɔ́, yě mɛ afɔwe kanɖé koatɔ́n-nukún-atɔn (468) wɛ. Súnnu akowunká wɛ yě nyí.

⁷ Bɛnjamɛ́ɛ ví e wá cí Jeluzalɛ́mu lɛ́ɛ ɖíe: Salúu Mɛculamu ví ɔ́, Mɛculamu ɔ́, Yoɛ́di ví wɛ, bɔ Yoɛ́di nyí Pedaya ví, Pedaya nyí Kolaya ví, Kolaya ka nyí Maaseya ví, Maaseya nyí Ityɛ́li ví, Ityɛ́li nyí Yecaya ví.

⁸ Gabayi kpó Salayi kpó gɔ́ nú yě. Yě bǐ kplékplé nyí afɛnɛ kantɔn tántɔn (928).

⁹ Yoɛ́li, Zikli ví ɔ́ wɛ kpa acɛ dó Bɛnjamɛ́ɛ ví lɛ́ɛ nu, bɔ Yexuda, Ha-Senúwa ví ɔ́ bɔdó gǎn e kpa acɛ dó toxo ɔ́ nu ɔ́ wú.

¹⁰ Vɔ̌sánú-xwlémawutɔ́ e wá nɔ Jeluzalɛ́mu lɛ́ɛ ɖěe sín nyǐkɔ ɖíe: Yedaya Yoyalívu ví ɔ́ kpó Yakíni kpó,

¹¹ kpó Selaya e nyí gǎn ɖo Mawu xwé gbe ɔ́ kpó. Selaya ɔ́, Ilukya ví wɛ. Ilukya ka nyí Mɛculamu ví, bɔ Mɛculamu nyí Sadɔ́ku ví, Sadɔ́ku ka nyí Mɛlajɔ́ti ví, bɔ Mɛlayɔ́ti nyí Axitúvu sín vǐ.

¹² Vɔ̌sánú-xwlémawutɔ́ lɛ́ɛ kpó nɔví yětɔn lɛ́ɛ kpó wɛ nɔ́ kpé nukún dó xwé ɔ́ wú. Yě bǐ kplékplé yi afɛnɛ ko-nukún-we (822). Adaya Yeloxámu ví ɔ́ lɔ nyí vɔ̌sánú-xwlémawutɔ́. Yeloxámu ɔ́, Pelaliya ví wɛ, bɔ Pelaliya nyí Amusi ví, Amusi nyí Zekaliya ví, Zekaliya nyí Pacehúu ví, bɔ Pacehúu nyí Malukíya ví.

¹³ Adaya kpó nɔví tɔn lɛ́ɛ kpó wɛ nyí hɛ̌nnugán. Yě bǐ bló gbɛtɔ́ afɔɖé kanɖé-nukún-we (242). Amacisayi Azalɛ́li ví ɔ́ lɔmɔ̌ nyí vɔ̌sánú-xwlémawutɔ́. Azalɛ́li ɔ́, Axizayi ví wɛ, bɔ Axizayi nyí Mɛcilemɔti ví, Mɛcilemɔti nyí Imumɛ́ɛ ví.

¹⁴ É kpó nɔví tɔn lɛ́ɛ kpó ɔ́, súnnu akowunká wɛ yě nyǐ. Yě bǐ bló gbɛtɔ́ kantɔn tántɔn (128). Zavúdiɛ́li, Ha-Gedolímu ví ɔ́ wɛ nyí gǎn yětɔn.

¹⁵ Levíi ví e wá cí Jeluzalɛ́mu lɛ́ɛ ɖěe sín nyǐkɔ ɖíe: Cemaya Hacúvu ví ɔ́; Hacúvu ɔ́, Azlikámu ví wɛ, bɔ Azlikámu nyí Hacaviya ví, bɔ Hacaviya nyí Buwunni ví.

¹⁶ Cabutáyi kpó Yozavadi kpó gɔ́ nú yě. Yě wɛ nɔ kpé nukún dó azɔ̌ e ma nyí Mawu xwé ɔ́ gbe sín azɔ̌ ǎ lɛ́ɛ wú; yě lɔ ɖo mɛ e nyí gǎn ɖo Levíi ví lɛ́ɛ nu lɛ́ɛ mɛ.

¹⁷ Mataniya Mika ví ɔ́, é wɛ nɔ́ dó susu kpa nú Mawu sín han lɛ́ɛ hwenu e é nɔ́ ja ɖɛ xo gbé é, bɔ nɔví tɔn Bakibukíya gɔ́ n'i. Mika ɔ́, Zavúdi ví wɛ, bɔ Zavúdi ka nyí Asáfu ví. Avuda Camumúa ví ɔ́ lɔ ɖo fínɛ́. Camumúa ɔ́, Galali ví wɛ, bɔ Galali nyí Yedutún ví.

¹⁸ Levíi ví e ɖo toxo mímɛ́ ɔ́ mɛ lɛ́ɛ bǐ kplékplé bló afɔɖé kanwe-nukún-ɛnɛ (284).

¹⁹ Hɔnjínɔtɔ́ e wá cí Jeluzalɛ́mu lɛ́ɛ ɖíe: Akúvu kpó Talumɔ́ni kpó, kpó nɔví yětɔn lɛ́ɛ kpó. Yě wɛ nɔ́ cɔ́ toxo ɔ́ sín hɔn lɛ́ɛ. Yě bǐ bló gbɛtɔ́ kɛnnɛ wěwe (172).

²⁰ Izlayɛ́li ví e kpo lɛ́ɛ ɖo Judáa sín toxo ɖě lɛ́ɛ mɛ. Vɔ̌sánú-xwlémawutɔ́ lɛ́ɛ kpó Levíi ví lɛ́ɛ kpó lɔ ɖo yě mɛ. Mɛ ɖokpó ɖokpó ɖo ayǐkúngban tɔn jí ɖo toxo tɔn mɛ.

²¹ Mɛ kpaa e nɔ wa azɔ̌ ɖo Mawu xwé lɛ́ɛ ɔ́, Ofɛ́lu wɛ yě nɔ́ nɔ. Gǎn yětɔn lɛ́ɛ wɛ nyí Siha kpó Gicípa kpó.

²² Gǎn e kpa acɛ nú Levíi ví lɛ́ɛ ɖo Jeluzalɛ́mu ɔ́ wɛ nyí Wúzi Bani ví ɔ́. Bani ɔ́, Hacaviya ví wɛ, bɔ Hacaviya nyí Mataniya ví, bɔ Mataniya nyí Mika ví. Asáfu hɛ́nnu mɛ wɛ yě jɔ ɖe. Asáfu mɛ lɛ́ɛ wɛ nɔ́ ji han ɖo Mawu sinsɛn hwenu.

²³ Axɔ́sú ɖe gbetakɛ́n ɖé tɔ́n dó hanjitɔ́ lɛ́ɛ wú. Gbetakɛ́n ɔ́ ɖɔ xó dó lě e è nǎ kpé nukún dó yě wú gbɔn ɔ́ kpó lě e yě ná wa azɔ̌ yětɔn gbɔn ayǐhɔ́ngbe ayǐhɔ́ngbe ɔ́ kpó wú.

²⁴ Petaxiya Mɛcezaveɛli ví ɔ́ ɖo axɔ́sú Pɛ́si tɔn ɔ́ kpá, bó nɔ́ kpé nukún dó xó e kan togun ɔ́ lɛ́ɛ wú. Zeláxi Judáa ví ɔ́ wɛ dó kún tɔn.

Jwifu e ma ɖo Jeluzalɛ́mu toxo ɔ́ mɛ ǎ lɛ́ɛ

²⁵ Judáa ví ɖé lɛ́ɛ ɖo gbětótló e gbɔn zɔzɔ lɛ́ɛ mɛ; yě sá xwé ɖó Kiliyati-Aaba kpó gletoxo e lɛ́ lɛ̌ dó e lɛ́ɛ kpó mɛ, bó sá xwé ɖó Divɔ́ni kpó gletoxo e lɛ́ lɛ̌ dó e lɛ́ɛ kpó mɛ, bó sá xwé ɖó Yekavuseɛ́li kpó gletoxo e lɛ́ lɛ̌ dó e lɛ́ɛ kpó mɛ,

²⁶ bó sá xwé ɖó Yecúwa, bó sá ɖó Mɔlada, bó sá ɖó Bɛti-Pɛlɛ́ti,

²⁷ bó sá xwé ɖó Hasáa-Cuwáli, bó sá ɖó Bɛ̌-Ceva kpó gletoxo e lɛ́ lɛ̌ dó e lɛ́ɛ kpó mɛ,

²⁸ bó sá xwé ɖó Siklági, bó sá ɖó Mɛkona kpó gletoxo e lɛ́ lɛ̌ dó e lɛ́ɛ kpó mɛ,

²⁹ bó sá xwé ɖó Eyinu-Hlimumɔ́ni, bó sá ɖó Soléa, bó sá ɖó Yaamúti,

³⁰ bó sá ɖó Zanɔwáxi, bó sá ɖó Adulámu kpódó gletoxo e lɛ́ lɛ̌ dó e lɛ́ɛ kpó mɛ, bó sá xwé ɖó Lakíci kpó gletoxo e lɛ́ lɛ̌ dó e lɛ́ɛ kpó mɛ, bó sá xwé ɖó Azeka kpó gletoxo e lɛ́ lɛ̌ dó e lɛ́ɛ kpó mɛ. Hǔn yě sá xwé sín Bɛ̌-Ceva káká wá tɔdo Hinnɔ́mu tɔn mɛ, ɖo Judáa sín ayǐkúngban jí.

³¹ Bɛnjamɛ́ɛ ví lɛ́ɛ sá xwé ɖó Gɛva, bó sá ɖó Mikumasi, bó sá ɖó Aya, bó sá ɖó Betɛ́li kpó gletoxo e lɛ́ lɛ̌ dó yě lɛ́ɛ kpó mɛ.

³² Yě sá xwé ɖó Anatɔ́ti, bó sá ɖó Nɔvu, bó sá ɖó Ananíya,

³³ bó sá xwé ɖó Hasɔ́ɔ, bó sá ɖó Hlama, bó sá ɖó Gitayímu,

³⁴ bó sá xwé ɖó Hadídi, bó sá ɖó Sevoyímu, bó sá ɖó Nɛbaláti,

³⁵ bó sá ɖó Lodi, bó sá ɖó Onɔ, tɔdo azɔ̌watɔ́ lɛ́ɛ tɔn mɛ. Bɛnjamɛ́ɛ yíkúngban jí wɛ gletoxo énɛ́ lɛ́ɛ bǐ ɖe.

³⁶ Levíi ví ɖé lɛ́ɛ gosín Judáa yíkúngban jí wá cí Bɛnjamɛ́ɛ yíkúngban jí.