Micée 5 - MAWUXÓWÉMA

Bɛteleyɛ́mu wɛ axɔ́sú Mɛhwlɛ́ngántɔ́ ɔ́ ná tɔ́n sín

¹ Mawu Mavɔmavɔ ɖɔ: “Hwɛ Bɛteleyɛ́mu e ɖo Efláta tokpɔnla mɛ ɔ́, toxo kpɛví ɖokpó wɛ a nyǐ ɖo Judáa yíkúngban jí. Amɔ̌, hwi mɛ wɛ mɛ e ná ɖu axɔ́sú ɖo Izlayɛ́li nu nú mì ɔ́ ná tɔ́n sín. Kún e mɛ é jɔ ɖe ɔ́ ko ɖo te sín xóxó hwenu, bó ɖo te káká sɔ́yi.”

² Énɛ́ ɔ́ wú wɛ Mawu Mavɔmavɔ ná jó togun tɔn dó nú kɛntɔ́ lɛ́ɛ káká jɛ hwenu e nyɔ̌nu e ɖo ajidonu ɔ́ ná ji vǐ dó é. Yě mɛ e ná kpo ɖo gbɛ ɖo kannumɔgbénu lɛ́ɛ ná lɛ́ kɔ wá gɔ́ nú Izlayɛ́li ví e kpo ɖo xwé lɛ́ɛ.

³ Bɔ éyɛ́ axɔ́sú e sín akpá è dǒ é ná wá, bó ná kpa acɛ dó togun ɔ́ nu kpó hlɔ̌nhlɔ́n Mawu Mavɔmavɔ tɔn kpó, kpódó susu Mawu Mavɔmavɔ tɔn kpó, bɔ togun tɔn sín ayi ná jɛ ayǐ; ɖó mɛ e ɖo gbɛ ɔ́ mɛ lɛ́ɛ bǐ ná mɔ lě e é dó agba sɔ é.

⁴ É wɛ ná hɛn fífá wá. Ényí Asilíinu lɛ́ɛ wá tɔ́n ahwan mǐ, bó byɔ́ axɔ́sú mǐtɔn lɛ́ɛ sín xwé gbe ɔ́, mǐ ná sɛ́ ahwan gěgé dó yě.

⁵ Ahwanfunfun yětɔn ná zɔ́n bɔ yě ná kpa acɛ nú Asilíi, Nɛmulɔ́di sín to ɔ́. Yě ná hwlɛ́n mǐ gán sín Asilíinu lɛ́ɛ lɔ mɛ, hwenu e yě ná dó asá dogbó mǐtɔn, bó byɔ́ to mǐtɔn mɛ é.

Izlayɛ́li ví e kpo ɖo gbɛ ɖo akɔta gěgé tɛ́ntin lɛ́ɛ

⁶ Izlayɛ́li ví e kpo ɖo gbɛ ɖo kannumɔgbénu lɛ́ɛ ná ɖo to gěgé tɛ́ntin, bó ná cí ahǔn e Mawu Mavɔmavɔ nɔ sɛ́ dó bɔ é nɔ wa ɖagbe nú gbɛtɔ́ lɛ́ɛ ɔ́ ɖɔhun. É nɔ ɖó nukún gbɛtɔ́ ǎ, é ká ná ɖo gbɛtɔ́ sín acɛ mɛ ǎ.

⁷ Izlayɛ́li ví e kpo ɖo gbɛ ɖo akɔta gěgé tɛ́ntin lɛ́ɛ ná dó hlɔ̌nhlɔ́n kinnikínní ɖɔhun, ɖo kanlin e ɖo zungbó mɛ lɛ́ɛ tɛ́ntin, abǐ ée ɖo lɛ̌ngbɔ́hwan tɛ́ntin é ɖɔhun. É gbɔn fí ɖěbǔ ɔ́, é nɔ́ wlí nǔ, bó nɔ ɖo vǔnvún ɖu wɛ; mɛ ɖěbǔ ká sixú yí nǔ e é wlí ɔ́ sín así tɔn ǎ.

⁸ Izlayɛ́li, tɔ́n ahwan kɛntɔ́ towe lɛ́ɛ, bó vúnvún yě bǐ.

Mawu ná ɖe gǎnjɛwú Izlayɛ́li tɔn e má nyí gǎnjɛwú ǎ lɛ́ɛ bǐ síin

⁹ Mawu Mavɔmavɔ ɖɔ: “Ayǐ ɖé ná wá hɔ́n bɔ un ná vívá sɔ́ mitɔn lɛ́ɛ bǐ sín kún, bó ná sú ahwankɛkɛ́ mitɔn lɛ́ɛ bǐ sín kún dó.

¹⁰ Un ná gba toxo e ɖo ayǐkúngban mitɔn jí lɛ́ɛ bǐ, bó hɔ́ ahohó mitɔn lɛ́ɛ nyi ayǐ.

¹¹ Un ná sú bǒ mitɔn lɛ́ɛ dó, nǔkantɔ́ ɖě sɔ́ ná nɔ mi mɛ ǎ.

¹² Un ná gba vodún mitɔn lɛ́ɛ kpódó bǒcyɔ e mi kpa lɛ́ɛ kpó, bɔ mi sɔ́ ná nɔ sɛn nǔ e mi ɖésúnɔ sɔ́ alɔ mitɔn dó bló ná lɛ́ɛ ɖě ǎ.

¹³ Un ná hɔn atín e mi nɔ sɛn lɛ́ɛ nyi gbě, bó ná gba toxo ɖaxó mitɔn lɛ́ɛ.

¹⁴ Un ná sin xomɛ dó akɔta e ma nɔ se tónú nú mì ǎ lɛ́ɛ, bó ná dɔn tó nú yě.”