Micée 4 - MAWUXÓWÉMA

Jeluzalɛ́mu toxo, tota fífá tɔn

¹ Ayǐ ɖé ná wá hɔ́n, bɔ só e jí sinsɛnxɔ ɔ́ ɖe ɔ́ ná yi jǐ hú só lɛ́ɛ bǐ, é ná hú ga só kpɛví kpɛví lɛ́ɛ bǐ, bɔ togun lɛ́ɛ ná nyi ahwan wá asá tɔn mɛ.

² Akɔta lɛ́ɛ ná nyi ahwan yi dɔ̌n, bó ná nɔ ɖɔ: “Mi wá nú mǐ ní yi xá Mawu Mavɔmavɔ só ɔ́ jí. Mi wá mǐ yi Mawu Jakɔ́bu tɔn sín xwé gbe, bónú é ná kplɔ́n nǔ e é jló ɖɔ mǐ ní wa lɛ́ɛ mǐ, bɔ mǐ na gbɔn ali tɔn lɛ́ɛ jí.” Đó Sinyɔ́ɔ wɛ Mawu Mavɔmavɔ sín nǔkplɔ́nmɛ nɔ gosín; Jeluzalɛ́mu wɛ xó tɔn nɔ gosín wá nú mǐ.

³ Mawu Mavɔmavɔ ná nyí hwɛɖɔtɔ́ nú togun gěgé. É ná ɖɔ hwɛ gbo nú akɔta syɛ́nsyɛ́n lɛ́ɛ, káká yi jɛ akɔta e ɖo zɔga lɛ́ɛ jí. Akɔta ɖě sɔ́ ná tɔ́n ahwan ɖě ǎ; yě ká tlɛ sɔ́ ɖo ahwanfunfun ná kplɔ́n wɛ ǎ. Yě ná sɔ́ hwǐ yětɔn dó tun alǐn ná, bó ná sɔ́ hwǎn yětɔn dó tun gyankpa ná.

⁴ Mɛ ɖokpó ɖokpó ná vo ɖo vǐwuntín tɔn kpó fígitín tɔn kpó sá, bɔ mɛ ɖěbǔ sɔ́ ná ɖe bó ná gba ayi dó nú yě ǎ. Xó e Mawu Mavɔmavɔ Nǔbǐwúkpétɔ́ ɔ́ ɖɔ ɔ́ nɛ́.

⁵ Togun ɖě lɛ́ɛ ɖokpó ɖokpó nɔ wa nǔ, bó ná nyɔ́ ɖo vodún yětɔn lɛ́ɛ gɔ́n. Amɔ̌, mǐdɛɛ lɛ́ɛ ɔ́, mǐ jló ná wa nǔ bó ná nyɔ́ ɖo Mawu Mavɔmavɔ, Mawu mǐtɔn gɔ́n káká sɔ́yi.

Mawu Mavɔmavɔ wɛ nyí axɔ́sú ɖo Jeluzalɛ́mu

⁶ Mawu Mavɔmavɔ ɖɔ: “Azǎn ɖé ná wá, bɔ un ná yí afɔkponɔ lɛ́ɛ. Un ná kplé mɛ e è nya ɖ'ayǐ lɛ́ɛ; mɛ e un dó ya ná ɖ'ayǐ lɛ́ɛ.

⁷ Un ná kplé afɔkponɔ lɛ́ɛ, bónú togun ɔ́ ná lɛ́ fɔ́n. Un ná zé yě mɛ e ɖo gbejí lɛ́ɛ dó bló togun syɛ́nsyɛ́n ɖé, bɔ nyɛ Mawu Mavɔmavɔ ɔ́ ná ɖu axɔ́sú ɖo yě nu, ɖo Sinyɔ́ɔ só ɔ́ jí, sín hwenɛ́nu káká sɔ́yi.

⁸ Bɔ hwi Jeluzalɛ́mu ɔ́, hwi só e ɖo toxo ɔ́ cɔ́ wɛ mɛ ɖo tocɔ́kpe jí ɖɔhun ɔ́, a nǎ lɛ́ wá mɔ acɛkpikpa towe xóxó ɔ́ yí zaanɖé din; a nǎ lɛ́ húzú axɔ́súɖuto Mawu tɔn sín tota.”

Mawu hwlɛ́n Jeluzalɛ́mu toxo ɔ́ sín tɛ́nkpɔ́n tɔn lɛ́ɛ mɛ

⁹ Jeluzalɛ́munu lɛ́ɛ mi, étɛ́ sín xó sú wɛ mi ka ɖe din? Axɔ́sú ɖé sɔ́ ɖo mi nu ǎ wɛ a? Mi sɔ́ ɖó ɖɔxátɔ́ ɖé ǎ wú wɛ mi ɖo wǔvɛ́ mɔ wɛ nyɔ̌nu ɖo ajidonu ɖɔhun a?

¹⁰ Mi mɔ wǔvɛ́, bó wɛn azɔn nyɔ̌nu ɖo ajidonu ɖɔhun; ɖó din ɔ́, mi ná gosín toxo ɔ́ mɛ, bó yi cí gle lɛ́ɛ mɛ, bó ná lɛ́ yi káká Babilɔ́nu. Mawu Mavɔmavɔ ná hwlɛ́n mi gán, bó ná ɖe mi sín kɛntɔ́ mitɔn lɛ́ɛ sín acɛ mɛ ɖo Babilɔ́nu fínɛ́.

¹¹ Din ɔ́, akɔta gěgé ko sɛ ta kplé dó mi wú, bó nɔ ɖɔ è nǐ kɔ́n wi nú to mitɔn, bónú émí ná mɔ lě e Jeluzalɛ́mu toxo ɔ́ ná gba gbɔn é.

¹² Mɛ énɛ́ lɛ́ɛ tunwun linlin Mawu Mavɔmavɔ tɔn ǎ. Yě mɔ nukúnnú jɛ tito tɔn lɛ́ɛ wú ǎ; yě tunwun ɖɔ kplé wɛ é kplé yě ɖó fí ɖokpó ɔ́, bó ná só yě lě e è nɔ kplé jinukún dó kɔ́xota, bó nɔ só ɔ́ ɖɔhun ǎ.

¹³ Jeluzalɛ́munu lɛ́ɛ e mi, mi sí te bó ná só kɛntɔ́ mitɔn lɛ́ɛ. Un ná ná hlɔ̌nhlɔ́n mi, nyibúsú e ɖó ganzo, bɔ afɔkpa tɔn lɛ́ɛ nyí ganvɔ é ɖɔhun. Mi ná gba togun gěgé hánnyá, bɔ nǔ e mi ná yí sín yě sí lɛ́ɛ kpó dɔkun yětɔn kpó ɔ́, mi ná sɔ́ wá xwlé nyɛ Aklúnɔ e kpa acɛ nú gbɛ ɔ́ bǐ é.

¹⁴ Amɔ̌, din ɔ́, mi sɛ miɖée kplé; kɛntɔ́ mǐtɔn lɛ́ɛ ján go dó mǐ, bó zé kpo dó ɖo nukún mɛ gba nú Izlayɛ́li togán ɔ́ wɛ.