Mɛsɛ́dó 6 - MAWUXÓWÉMA

¹ Hwenɛ́nu ɔ́, ahwanvú lɛ́ɛ wá ɖo kpɔ́ sú d'é jí wɛ, bɔ Jwifu e nɔ xwedó walɔ Glɛ̌sinu lɛ́ɛ tɔn lɛ́ɛ wá jɛ nǔ hlún ɖɔ dó Jwifu e nɔ xwedó walɔ Eblée lɛ́ɛ tɔn lɛ́ɛ wú jí. Yě nɔ́ ɖɔ è nɔ dó vɛ̌ nú asúkúsi émítɔn lɛ́ɛ ɖo nǔmímá hwenu ayǐhɔ́ngbe ayǐhɔ́ngbe.

² Énɛ́ wú wɛ mɛsɛ́dó wěwe lɛ́ɛ wá ylɔ́ ahwanvú lɛ́ɛ bǐ kplé, bó ɖɔ nú yě ɖɔ: “É jɛ xá ɖɔ mǐ ní jó Mawuxó jlájlá dó, bó wá yi ɖo nǔɖuɖu má wɛ ǎ.

³ Énɛ́ ɔ́ wú ɔ́, nɔví ce lɛ́ɛ mi, mi gbɔ bo kpɔ́n miɖée mɛ, bó cyán súnnu tɛ́nwe e ɖó jijɔ ɖagbe, bɔ Yɛsinsɛn kpó nǔnywɛ́ kpó gɔ́ ayi mɛ ná lɛ́ɛ é, bónú mǐ ná sɔ́ yě ɖó azɔ̌ énɛ́ ɔ́ nu.

⁴ Énɛ́ ɔ́, mǐdɛɛ lɛ́ɛ ɔ́, mǐ ná kpé nukún dó ɖɛxixo kpódó Mawuxó jlájlá kpó wú.”

⁵ Xó énɛ́ nyɔ́ agun ɔ́ bǐ nukún mɛ, bɔ yě cyán mɛ tɛ́nwe élɔ́ lɛ́ɛ: Etyɛ́ni, nya nǔɖitɔ́ titewungbe ɖé wɛ, bɔ Yɛsinsɛn gɔ́ ayi mɛ n'i; Filípu kpó Plokɔ́ɔ kpó, Nikanɔ́ɔ kpó Timɔ́ɔ kpó, Pamɛnási kpódó Nikoláa Antyɔ́cinu e ko byɔ́ Jwifu lɛ́ɛ sín sinsɛn mɛ ɖ'ayǐ ɔ́ kpán.

⁶ Yě wá kplá yě mɛ tɛ́nwe lɛ́ɛ yi mɛsɛ́dó lɛ́ɛ gɔ́n, bɔ mɛsɛ́dó lɛ́ɛ xo ɖɛ, bó ɖó alɔ yě jí.

⁷ Mawuxó ɔ́ ka jɛ gbigba kpé jí, bɔ ahwanvú lɛ́ɛ ɖo kpɔ́ sú d'é jí wɛ ɖo Jeluzalɛ́mu, bɔ vɔ̌sánú-xwlémawutɔ́ wɔ̌buwɔ́bú ɖé lɛ́ɛ jɛ nǔ ɖi nú Jezu jí ɖo Jwifu lɛ́ɛ mɛ.

È wlǐ Etyɛ́ni

⁸ Mawu tún acɛ dó Etyɛ́ni jí, bó ná ɛ hlɔ̌nhlɔ́n, bɔ é nɔ́ ɖo nǔdábaɖa ɖe tɔ́n wɛ, bó nɔ́ ɖo nǔ ɖaxó ɖaxó lɛ́ɛ jlɛ́ wɛ ɖo togun ɔ́ tɛ́ntin.

⁹ Jwifu ɖé lɛ́ɛ ka gosín kplɔ́ngbasá e è nɔ ylɔ́ ɖɔ “Kannumɔ e jɛ yěɖée sí lɛ́ɛ tɔn é” bó wá, bó jɛ nǔ dɔn xá Etyɛ́ni jí; to vovo mɛ wɛ Jwifu énɛ́ lɛ́ɛ gosín; mɛ ɖě gosín Silenɛ́ɛ, Alɛsándli, Silisíi kpódó Azíi yíkúngban jí kpó.

¹⁰ Lo ɔ́, yě nɔ́ sixú nɔ te Etyɛ́ni nukɔn ǎ, ɖó é nɔ́ ɖo xó ɖɔ wɛ kpódó nǔnywɛ́ e Yɛsinsɛn ná ɛ ɔ́ kpó.

¹¹ Bɔ yě gbɔ bó dɔn mɛɖé lɛ́ɛ dó awo mɛ, bó ná akwɛ́ yě, bónú yě ná ɖó adingban dó Etyɛ́ni kɔ ɖɔ: “Mǐ se nya élɔ́ ɖo nu nylá dó Mawu kpódó Mɔyízi kpán wú wɛ.”

¹² Xó énɛ́ e yě kpá ɖɔ ɔ́ zɔ́n bɔ togun ɔ́ kpódó tomɛxó lɛ́ɛ kpó, kpódó sɛ́nkplɔ́nmɛtɔ́ lɛ́ɛ kpán bǐ xo zǐn, bó zɔn Etyɛ́ni jí bó wlí, lobo kplá ɛ hɛn yi toxóɖɔgbɛ́ ɔ́ nukɔn.

¹³ Yě lɛ́ kplá kúnnu-agɔɖetɔ́ ɖěvo lɛ́ɛ wá, bɔ yě ɖɔ: “Nya élɔ́ nɔ́ gɔn nu nylá dó sinsɛnxɔ mímɛ́ mǐtɔn élɔ́ kpódó Mɔyízi sɛ́n ɔ́ kpán wú ǎ.

¹⁴ Đó mǐ se bɔ é ɖɔ Jezu Nazalɛ́tinu ɔ́ ná gba sinsɛnxɔ ɔ́, lobo ná húzú hwɛndo e Mɔyízi ɖó ayǐ nú mǐ é.”

¹⁵ Mɛ e ɖo ayǐjínjɔ́n ɖo toxóɖɔgbɛ́ ɔ́ mɛ lɛ́ɛ bǐ bɔ nukún nyi Etyɛ́ni wú, bɔ nukún mɛ tɔn cí wɛnsagun Mawu tɔn lɛ́ɛ sín nukún mɛ ɖɔhun ɖo yě nukún mɛ.