Mɛsɛ́dó 27 - MAWUXÓWÉMA

¹ Hwenu e è wǎ ɖe gbe bɔ mǐ ná dó tɔjíhún bo yi Italíi ɔ́, è ɖǒ Pɔ́lu kpódó gantɔ́ ɖěvo lɛ́ɛ kpán nú sɔ́ja kanwekogán ɖé, bɔ è nɔ ylɔ́ ɛ ɖɔ Juliwusi, bɔ é ɖo ahwangbɛ́ e è sun nyǐ ɖɔ ahwangbɛ́ Ogwísi ɔ́ tɔn mɛ.

² Mǐ dǒ Adlamitiwɔmu sín tɔjíhún ɖé, bɔ é ko ɖo nǎ sún wɛ, lobo ná gbɔn tɔjíhúnglíntɛn Azíi tɔn dín. Alisitáki e gosín Tɛsaloniki ɖo Masedwani kanmɛ ɔ́ dó tɔjíhún ɔ́ xá mǐ.

³ Ayǐhɔ́ngbe tɔn ɔ́, mǐ jɛ Sidɔ́ɔn; Juliwusi ka nyɔ́ xomɛ dó Pɔ́lu wú, bó ná ɛ gbe ɖɔ ní yi kpɔ́n xɔ́ntɔn tɔn lɛ́ɛ, bónú yě gɔ̌ alɔ n'i ɖo nǔ e hudó e lɛ́ɛ mɛ.

⁴ Ée mǐ gosín fínɛ́ ɔ́, hǔn ɔ́ jɛ jɔhɔn kpé jí, bɔ mǐ gbɔn kɛ́nkɛ́n nú tɔtɛ́ntinto Cíplu tɔn ɔ́ bó ɖidó.

⁵ Ée mǐ ka xo xu e ɖo Silisíi kpódó Panfilíi kpán kpá ɔ́ zlɛ́ ɔ́, mǐ wá yi jɛ to e è nɔ ylɔ́ ɖɔ Míilu ɔ́ mɛ, ɖo Lisíi yíkúngban jí.

⁶ Sɔ́ja kanwekogán ɔ́ mɔ tɔjíhún Alɛsándli tɔn ɖé ɖo fínɛ́, bɔ é xwe Italíi, bɔ sɔ́ja kanwekogán ɔ́ kplá mǐ d'é mɛ.

⁷ Mǐ zɔn dɛ̌dɛ̌ xɔ azǎn; é bɔwǔ có mǐ wá jɛ Kinidi sín hǎ jí ǎ; jɔhɔn ka lɔn nú mǐ ná glín hǔn ɖó fínɛ́ ǎ, bɔ mǐ gbɔn kɛ́nkɛ́n nú Klɛ́ti, ɖo Salumɔnɛ́ɛ sín alɔxwé.

⁸ Mǐ jɛ tagba ɖésú dó kun tɔjíhún ɔ́ gbɔn xutó xutó wá jɛ fí ɖé, bɔ è nɔ ylɔ́ fí ɔ́ ɖɔ Tɔjíhúnglintɛn ɖagbe, bɔ é ɖo to e nyí Lazayia ɔ́ kpá.

⁹ Mǐ gǔ hwenu ɖo xu jí, bɔ tɔ jí gbingbɔn hwenɛ́nu ka bló awǒvinú ɖaxó ɖé, ɖó nubláblá hwenu ko dín wa yi; énɛ́ ɔ́ wú wɛ Pɔ́lu ɖɔ nú yě ɖ'ayǐ ɖɔ:

¹⁰ “Xɔ́ntɔn ce lɛ́ɛ mi, nyɛ mɔ ɖɔ mǐ jɛ tɔ jí hwe élɔ́ nu din ɔ́, mǐ ná yi kpé afɔkú ɖaxó, bɔ agban lɛ́ɛ kpódó hǔn ɔ́ kpán kɛ́ɖɛ́ wɛ ná dɔn ǎ, lo ɔ́, mǐ ɖésúnɔ sín gbɛ ɖo axɔ́ nu.”

¹¹ Sɔ́ja kanwekogán ɔ́ ka ɖeji dó xó e ɖɔ wɛ hǔnkuntɔ́ ɔ́ kpódó hǔnnɔ ɔ́ kpán ɖe é wú hú xó e ɖɔ wɛ Pɔ́lu ɖe lɛ́ɛ.

¹² Tɔjíhúnglíntɛn énɛ́ nyɔ́ nɔ avivɔ hwenu ǎ; énɛ́ ɔ́ wú wɛ mɛ hǎbǔ gbɔ bó yí gbe ɖɔ émí ná ɖidó, bó ná tɛ́nkpɔ́n bónú yě kpé wú ɔ́, yě ná yi Fenísi e nyí tɔjíhúnglíntɛn Klɛ́ti tɔn ɔ́, bó nɔ fínɛ́ avivɔ hwenu; ɖó to énɛ́ kpan nukɔn tofɔligbé-gbadahwe jí, kpódó totaligbé-gbadahwe jí kpó.

Jɔhɔn ɖaxó ɖé sí te ɖo xu jí

¹³ Jɔhɔn flɛ́flɛ́ ɖé jɛ nyinyi jí sín tofɔligbé, bɔ yě vɛdó ɖɔ émí ná sixú yi lě e émí lin gbɔn ɔ́ wɛ sín; yě ɖe gandótɔnu lɛ́ɛ síin, bó sún hǔn, bó jɛ xutó xutó gbɔn jí, ɖo tɔtɛ́ntinto Klɛ́ti tɔn kpá.

¹⁴ Zaanɖé ɔ́, jɔhɔn ɖaxó ɖé jɛ nyinyi jí, sín tɔtɛ́ntinto ɔ́ sín só lɛ́ɛ jí, bɔ è nɔ ylɔ́ jɔhɔn ɔ́ ɖɔ “Totaligbé-zǎnzǎnhwe jí.”

¹⁵ Jɔhɔn ɔ́ d'alɔ hǔn ɔ́ mɛ, bó dɔn ɛ ɖidó, bɔ è sixú kun hǔn ɔ́ kpán nukɔn jɔhɔn ǎ, bɔ mǐ gbɔ bó jó miɖée dó nú jɔhɔn ɔ́.

¹⁶ Mǐ wá gbɔn tɔtɛ́ntinto kpɛví ɖé kpá, bɔ è nɔ ylɔ́ to ɔ́ ɖɔ Kodáa. Mǐ jɛ tagba ɖésú, cóbó wá kpé akló ɔ́ wú.

¹⁷ Yě zé akló ɔ́ dó tɔjíhún ɔ́ mɛ, bó sin kan lɛ́ lɛ̌ dó tɔjíhún ɔ́; yě ka ɖo xɛsi ɖi wɛ ɖɔ hǔn ɔ́ ní ma yi gba dó nyɛ̌kɛ́n wú ɖo Libíi xuta ó, bó ɖe gandótɔnu e nɔ gbɔn sin nukún mɛ ɔ́, bó jó yěɖée dó mɔ̌, bɔ jɔhɔn ɔ́ dɔn yě ɖidó.

¹⁸ Jɔhɔn ɖaxó ɔ́ kpo ɖo mǐ dán wɛ baɖabaɖa, bɔ ayǐhɔ́ngbe tɔn ɔ́, yě jɛ agban lɛ́ɛ bɛ́ kɔn nyi xu mɛ jí.

¹⁹ Azǎn atɔngɔ́ ɔ́ gbe ɔ́, yě sɔ́ alɔ yě ɖésúnɔ tɔn lɛ́ɛ dó ɖe nǔ kpinkpɛn e ɖo hǔn ɔ́ wú lɛ́ɛ kɔn nyi xu mɛ.

²⁰ Ée mǐ ma sɔ́ mɔ hwesivɔ́ kpódó sunví lɛ́ɛ kpán sín azǎn mɔ̌kpán ɖíe ǎ, bɔ jɔhɔn ɖaxó ɔ́ ka kpo ɖo nyinyi wɛ syɛ́nsyɛ́n jɛ́n wɛ ɔ́, mǐ sɔ́ ɖó nukún ɖěbǔ ɖɔ mǐ ná gán ǎ.

²¹ Mǐ ma sɔ́ ɖu nǔ ǎ ɔ́, é kó lín. Pɔ́lu ka sí te ɖo mɛ lɛ́ɛ tɛ́ntin, bó ɖɔ nú yě ɖɔ: “Mɛ ce lɛ́ɛ mi, mi ná ko se xó ce, bó gɔn Klɛ́ti gosín; énɛ́ ɔ́, mǐ ná wá ɖo afɔkú élɔ́ kpé wɛ, bɔ nǔ mǐtɔn lɛ́ɛ ná ɖo dindɔn wɛ ǎ.

²² Amɔ̌, din ɔ́, mi ɖó akɔ́nkpinkpan, mɛ ɖěbǔ ná kú ɖo mǐ mɛ ǎ; hǔn ɔ́ kɛ́ɖɛ́ jɛ́n ná lá mɛ.

²³ Đó Mawu e tɔn un nyí, bó nɔ́ sɛn ɔ́ sín wɛnsagun ɖokpó sɛ yá mì égbé zǎn mɛ,

²⁴ bó ɖɔ nú mì ɖɔ: ‘Pɔ́lu, ma ɖi xɛsi ó, ɖó a nǎ yi Dadá Hlɔ̌ma tɔn nukɔn dandan, bɔ hwi wútu ɔ́, Mawu ná ná gbɛ mɛ e ɖo tɔ jí xá we lɛ́ɛ bǐ.’

²⁵ Énɛ́ wú ɔ́, mɛ ce lɛ́ɛ mi, mi bo kpán akɔ́n, ɖó un ɖeji dó Mawu wú ɖɔ nǔ e é ɖɔ nú mì ɔ́ jɛ́n wɛ ná jɛ.

²⁶ Lo ɔ́, tɔjíhún mǐtɔn ɖó ná yi gba ɖo tɔtɛ́ntinto ɖé jí.”

²⁷ Azǎn wɛ̌nɛgɔ́ ɔ́ gbe zǎn mɛ ɔ́, jɔhɔn ɖaxó ɔ́ kpo ɖo mǐ dɔn wɛ bɔ mǐ yi xu e è nɔ ylɔ́ ɖɔ Adliatíki é wa jí; ée zǎn vlɔ́ ɖó we mɔ̌ ɔ́, tɔnúwatɔ́ lɛ́ɛ vɛdó ɖɔ mǐ ɖo ayǐkúngban ɖé sɛ yá wɛ sín,

²⁸ bó sin nǔ kpinkpɛn ɖé dó kan nu, bó sɔ́ dó tɔ ɔ́ mɛ kpɔ́n, bó mɔ ɖɔ tɔ ɔ́ sín do yiyi ɖo mɛ̌tlu gbantɔ́n-nukún-we (37). Ée mǐ sɛ yi nukɔn kpɛɖé ɔ́, yě lɛ́ sɔ́ kan ɔ́ dó tɔ ɔ́ mɛ kpɔ́n, bó mɔ mɛ̌tlu koatɔ́n-nukún-atɔn (28).

²⁹ Yě ka ɖo xɛsi ɖi wɛ ɖɔ hǔn ɔ́ ma wá yi gba dó só ɖé wú ó; énɛ́ ɔ́ wú wɛ yě dó gandótɔnu ɛnɛ xu ɔ́ mɛ, ɖo hǔn ɔ́ sín gúdo; yě ka ɖo vo sa wɛ ɖɔ ayǐ ní vɛ́ yá wǔ hɔ́n.

³⁰ Tɔnúwatɔ́ lɛ́ɛ kó jló ná hɔn jó hǔn ɔ́ dó, bó ɖe tɔjíhún ɔ́ nyi xu jí; yě bló nǔ ɖi mɛ e xwe gandótɔnu e ɖo hǔn ɔ́ nukɔn lɛ́ɛ sɔ́ gbé ɖɔhun.

³¹ Pɔ́lu ka ɖɔ nú sɔ́ja kanwekogán ɔ́ kpódó sɔ́ja lɛ́ɛ kpán ɖɔ: “Ényí mɛ énɛ́ lɛ́ɛ ma nɔ hǔn ɔ́ mɛ ǎ ɔ́, mi ná gán ǎ.”

³² Bɔ sɔ́ja lɛ́ɛ sɛ́n kan nú tɔjíhún ɔ́, bó jó dó, bɔ tɔ dɔn ɛ yi.

³³ Ée ayǐ ɖibla hɔ́n ɔ́, Pɔ́lu dó kɛnklɛ́n nú yě bǐ ɖɔ yě ní ɖu nǔ; é ɖɔ nú yě ɖɔ: “Sín azǎn wɛ̌nɛ ɖíe ɖokpóó wɛ mi ɖo adohu adohu jí, bó gbɛ́ nǔ ɖu.

³⁴ Énɛ́ wú wɛ un ɖo ɖiɖɔ nú mi wɛ ɖɔ mi ní ɖu nǔ, bó ná nɔ gbɛ, ɖó nǔɖé ná wa ɖa e ɖo ta mitɔn ɔ́ ɖokpó géé ǎ.”

³⁵ Ée Pɔ́lu ɖɔ mɔ̌ ɔ́, é zé wɔ̌xúxú, bó dó kú nú Mawu ɖo mɛ bǐ nukún mɛ, bó kán, lobo jɛ ɖuɖu jí.

³⁶ Nǔ énɛ́ dó wǔsyɛ́n lanmɛ nú yě bǐ, bɔ yě lɔmɔ̌ ɖu nǔ.

³⁷ Mǐ mɛ e ɖo hǔn ɔ́ mɛ lɛ́ɛ bǐ bló gbɛtɔ́ afɔɖé kanɖé gbantɔ́n-nukún-ɖokpó (276).

³⁸ Ée yě ɖu nǔ bó gɔ́ xo ɔ́, yě bɛ́ jinukún e kpo ɖo hǔn ɔ́ mɛ lɛ́ɛ kɔn nyi tɔ mɛ, bónú hǔn ɔ́ ná dó fúɖá.

Tɔjíhún ɔ́ syɔ́

³⁹ Đěe ayǐ hɔ́n ɔ́, tɔnúwatɔ́ lɛ́ɛ sɔ́ tunwun fí e yě ɖe ɔ́ ǎ; lo ɔ́, yě mɔ xugbado ɖé kpódó xuta ɖé kpó sɛ́ dó, bó ɖɔ émí ná dó gǎn, bó ná kpɔ́n ɖɔ émí ná sixú dɔn hǔn ɔ́ yi dɔ̌n a jí.

⁴⁰ Yě tún kan nú gandótɔnu lɛ́ɛ, bó jó yě dó nyi xu mɛ; azɔn ɖokpó ɔ́, yě tún kan nú zɛn e yě nɔ dó jlɔ́ ali nú hǔn ɔ́ lɛ́ɛ, bó dó avɔ ɖokpó dó nukɔn nú hǔn ɔ́, bɔ jɔhɔn dó alɔ mɛ, bó dɔn yě ɖidó agě.

⁴¹ Hǔn ɔ́ ka wá yi dó ta nyɛ̌kɛ́n mɛ, bó sɔ́ sixú sɛ tɛn ǎ; aslɔkɛ́ lɛ́ɛ sín zǐngídi ká hɛn hǔn ɔ́ gba ɖo gúdo.

⁴² Bɔ sɔ́ja lɛ́ɛ ɖó gbe kpɔ́, bó ná hu gantɔ́ e ɖo hǔn ɔ́ mɛ lɛ́ɛ bǐ, nú yě mɛ ɖě ma lin tɔ bó hɔn yi ó.

⁴³ Lo ɔ́, sɔ́ja kanwekogán ɔ́ lɔn nú yě ǎ, ɖó é jló ná hwlɛ́n Pɔ́lu gán. É ná gbe ɖɔ mɛ e nyɔ́ tɔ lin lɛ́ɛ ní jɛ tɔ dó nukɔn, bó lin tɔ yi agě jí.

⁴⁴ Mɛ e kpo lɛ́ɛ ɔ́, yědɛɛ lɛ́ɛ na zunfán xwlɛ, abǐ hǔn ɔ́ sín fínfɛ́n lɛ́ɛ, bó ná jɛ yě gúdo jɛ agě jí. Mɔ̌ wɛ yě bǐ wá yi jɛ agě jí gbɔn wǔyɛ́yɛ́ afɔyɛ́yɛ́.