Mɛsɛ́dó 26 - MAWUXÓWÉMA

¹ Aglipa ka ɖɔ nú Pɔ́lu ɖɔ: “A ɖó xó ɖé ná ɖɔ, bó ná dó ba hwɛjijɔ nú hwiɖée hǔn, bó ɖɔ; un ná gbe tɔn we.” Pɔ́lu ka dlɛ́n alɔ, bó wlí xó, bó ɖɔ:

² “Axɔ́sú Aglipa, é víví nú mì tlala, bɔ nǔ e sín hwɛ dó mì wɛ Jwifu lɛ́ɛ ɖe ɔ́, má sixú ɖɔ xó dó ba hwɛjijɔ nú nyɛɖée ɖo nukɔn towe égbé;

³ ɖó a mɔ nǔ jɛ Jwifu lɛ́ɛ sín hwɛndo wú ganjí, bó tunwun nǔ e yě nɔ dɔn xá yěɖée lɛ́ɛ. Énɛ́ wú ɔ́, kɛnklɛ́n ɖǒ suúlu, bó ɖótó mì.

⁴ “Lě e un zán gbɛ ce gbɔn sín wǐnnyáwínnyá mɛ ce, lě e un nɔ togun ce tɛ́ntin gbɔn sín hwenu e è ji mì ɔ́, lě e un nɔ Jeluzalɛ́mu gbɔn é ɖésú ɔ́, Jwifu lɛ́ɛ bǐ wɛ tunwun.

⁵ Yě tunwun mì din ɔ́, é ko lín, bɔ ényí yě jló wɛ ɔ́, yě ná ɖe kúnnu nú mì ɖɔ un nyí gbɛ̌ví sinsɛngbɛ́ e syɛ́n hú ɖě lɛ́ɛ bǐ ɔ́ tɔn. Sinsɛngbɛ́ énɛ́ ɔ́ wɛ nyí Falizyɛn lɛ́ɛ tɔn.

⁶ Akpá e Mawu dó nú tɔ́gbó mǐtɔn lɛ́ɛ, bɔ un ɖo nukún ɖó wɛ ɔ́, é wútu wɛ è ɖo hwɛ ɖɔ xá mì wɛ din.

⁷ Akɔta mǐtɔn wěwe lɛ́ɛ lɔ ɖo nukún ɖó akpá énɛ́ sín ɖiɖe wɛ, bó nɔ́ ván kan bó nɔ́ sɛn Mawu kpódó lǐnsyɛ́nsyɛ́n kpán zǎn kéze. Axɔ́sú e! Nukúnɖíɖó énɛ́ wɛ zɔ́n bɔ Jwifu lɛ́ɛ ɖo hwɛ dó mì wɛ.

⁸ Étɛ́wú mi ka nɔ lin ɖɔ è kún sixú ɖi ɖɔ Mawu ná fɔ́n mɛkúkú lɛ́ɛ ó?

⁹ “Nyɛ ɖésúnɔ ɔ́, un ko lin ɖɔ un ná bló nǔ e ɖo gbɛ ɔ́ bǐ, dó tɔ́n ahwan Jezu Nazalɛ́tinu ɔ́ sín nyǐkɔ.

¹⁰ Nǔ e un wa ɖo Jeluzalɛ́mu ɔ́ nɛ́. Un yí acɛ ɖo vɔ̌sánú-xwlémawutɔ́gán lɛ́ɛ sí, bó nɔ wlí mɛ e ɖi nǔ nú Jezu lɛ́ɛ gěgé dó gan, bɔ hwenu e è nɔ ɖo yě hu wɛ ɔ́, un nɔ yí gbe ná.

¹¹ Hwɛhwɛ wɛ un nɔ dɔn tó nú yě gbɔn kplɔ́ngbasá Jwifu lɛ́ɛ tɔn bǐ; un nɔ zín yě jí ɖɔ yě ní nylá nu dó Mawu wú; xomɛ yětɔn nɔ sin mì ɖaxó, bɔ un nɔ hun káká yi to ɖěvo lɛ́ɛ mɛ, bó nɔ yi dó ya nú yě.

Pɔ́lu ɖɔ lě e é ɖi nǔ nú Jezu gbɔn é

¹² “Azɔ̌ énɛ́ wa gbé wɛ un xwe ɖo Damási, bɔ vɔ̌sánú-xwlémawutɔ́gán lɛ́ɛ ná gbe mì, bó ná acɛ mì bɔ un ɖidó.

¹³ Axɔ́sú e! Ali jí wɛ un ɖe xweyǐgbe, bɔ gan wěwe mɛ mɔ̌ ɔ́, wěziza ɖé gosín jǐxwé, bó kɔ́n hú hwesivɔ́, bó wá hɔ́n lɛ́ lɛ̌ dó nyɛ kpódó gbɛ̌ ce e kpódó nyɛ kpó xweyǐgbe lɛ́ɛ kpán,

¹⁴ bɔ mǐ jɛ ayǐ. Un ka se gbe ɖé, bɔ gbe ɔ́ ɖo ɖiɖɔ nú mì dó Ebléegbe mɛ wɛ ɖɔ: ‘Sólu, Sólu, étɛ́wú a ka ɖo ya dó nú mì wɛ? Tamɛ e ti wɛ a ɖe ɔ́, nǔ wa dó hwiɖée wú wɛ a ɖe, lě e nyibú e sɛ́ hwɛ̌ kpo nuxwíɖíxwíɖí sín nuvínu ɔ́ nɔ́ wa nǔ dó éɖée wú é.’

¹⁵ Un ka kanbyɔ́ ɛ ɖɔ: ‘Hwi mɛ ka wɛ?’ Aklúnɔ ɔ́ ka yí gbe nú mì ɖɔ: ‘Nyɛ Jezu e dó ya ná wɛ a ɖe é wɛ.

¹⁶ Lo ɔ́, sí te, bó nɔ te; nǔ e wú un ka tɔ́n dó jǐ towe ɔ́ ɖíe: un ná sɔ́ we dó bló mɛsɛntɔ́ ce ná; a nǎ nyí kúnnuɖetɔ́ ce, bɔ nǔ e a mɔ din lɛ́ɛ kpódó ɖěe un ná lɛ́ wá sɔ́ xlɛ́ we lɛ́ɛ kpán ɔ́, a nǎ ɖɔ nú mɛ ɖě lɛ́ɛ.

¹⁷ Un ná hwlɛ́n we gán ɖo togun Jwifu lɛ́ɛ tɔn e mɛ un ná sɛ́ we dó ɔ́ sí, bó ná lɛ́ hwlɛ́n we gán ɖo mɛ e ma nyí Jwifu ǎ, bɔ un ná sɛ́ we dó yě mɛ lɛ́ɛ sí.

¹⁸ Un sɛ́ we dó, bónú a nǎ hun nukún nú yě; bónú a nǎ kplá yě sín zǐnflú mɛ wá wěziza nu; bó ná ɖe yě sín Satáan sín acɛ mɛ wá Mawu gɔ́n, lobo nú yě ɖi nǔ nú mì ɔ́, Mawu ná sɔ́ hwɛ yětɔn lɛ́ɛ kɛ yě, bɔ yě ná mɔ tɛnmɛ ɖo mɛ e nyí étɔn lɛ́ɛ tɛ́ntin.’

Pɔ́lu ɖɔ xó dó lě e é wa azɔ̌ gbɔn ɔ́ wú

¹⁹ “Axɔ́sú Aglipa e! Ée nǔ nyí mɔ̌ ɔ́, un vɛ́ tóli nú nǔ e Mawu sɔ́ xlɛ́ mì lɛ́ɛ ǎ.

²⁰ Lo ɔ́, un to yi ɖɔ Mawuxó ɔ́ nú Damásinu lɛ́ɛ kpódó Jeluzalɛ́munu lɛ́ɛ kpó hwɛ̌, bó lɛ́ wá yi ɖɔ nú mɛ e ɖo Judée gbé jí lɛ́ɛ bǐ, kpódó mɛ e ma nyí Jwifu ǎ lɛ́ɛ kpán, bó ɖɔ nú yě ɖɔ yě ní lɛ́ kɔ sín hwɛ yětɔn lɛ́ɛ gúdo; yě ní wá Mawu gɔ́n; yě ní nɔ wa nǔ e ná ɖe xlɛ́ ɖɔ yě lɛ́ kɔ sín hwɛ yětɔn lɛ́ɛ gúdo nǔgbó é.

²¹ Énɛ́ ɔ́ wú wɛ Jwifu lɛ́ɛ wlí mì ɖo sinsɛnxɔ mɛ, bó jló ná hu mì.

²² Mawu ka wa nǔ, bɔ un kpo ɖo afɔte káká jɛ égbé; un nɔ ɖo Wɛn Ɖagbe ɔ́ sín kúnnu ɖe wɛ ɖo gbɛtɔ́ kpaa lɛ́ɛ kpódó gbɛtɔ́ nukúnɖéjí lɛ́ɛ kpán nukɔn; un ka nɔ ɖɔ nǔɖé zɛ nǔ e gbeyíɖɔ Mawu tɔn lɛ́ɛ kpódó Mɔyízi kpán ko ɖɔ é ná jɛ é wú ǎ;

²³ é wɛ nyí ɖɔ: Klísu ná kú; é wɛ ka nyí mɛ nukɔn nukɔntɔn e ná fɔ́n sín kú ɔ́, bó ná jlá wěziza hwlɛngán tɔn ɔ́ mǐ mɛ Jwifu lɛ́ɛ kpódó mɛ e ma nyí Jwifu ǎ lɛ́ɛ kpán.”

Pɔ́lu jló ɖɔ Aglipa ní ɖi nǔ nú Jezu

²⁴ Ée Pɔ́lu ɖo xó ɖɔ dó ba hwɛjijɔ nú éɖée wɛ mɔ̌ ɔ́, Fɛsitúsi sú xó, bó ɖɔ: “Pɔ́lu! A hun taɖu wɛ a? A kplɔ́n wěma káká bɔ é dó taɖu we!”

²⁵ Pɔ́lu ka yí gbe n'i ɖɔ: “Mɛsísí ce Fɛsitúsi, un hun taɖu ǎ; xó e ɖɔ wɛ un ɖe ɔ́ sɔgbe, bó xwe ali ganjí.

²⁶ Axɔ́sú Aglipa mɔ do nú nǔ énɛ́ lɛ́ɛ bǐ; hǔn un hɛn ɔ́, un ná ɖɔ xó kpódó jiɖiɖe kpó ɖo nukɔn tɔn; ɖó un ɖó gǎnjɛwú ɖɔ é tunwun nǔ énɛ́ lɛ́ɛ ɖokpó ɖokpó, ɖó nǔ énɛ́ lɛ́ɛ ɖě jɛ ɖo nǔglɔ́ fí ɖé ǎ.

²⁷ Axɔ́sú Aglipa! A ɖi nǔ nú xó e gbeyíɖɔ Mawu tɔn lɛ́ɛ ɖɔ lɛ́ɛ a? Un tunwun ɖɔ a ɖi nǔ ná.”

²⁸ Axɔ́sú Aglipa ka ɖɔ nú Pɔ́lu ɖɔ: “A vɛdó ɖɔ émí ná ɖɔ xó nú mì káká bɔ un ná húzú klísusɛntɔ́ tlóló din wɛ sín a?”

²⁹ Pɔ́lu ka ɖɔ: “É ná bó nyí din oo, é ná bo lín oo, Mawu ní bló nú é ní ma nyí hwi ɖokpónɔ kɛ́ɖɛ́ ó; lo ɔ́, mɛ e ɖo tó ɖó mì wɛ égbé lɛ́ɛ ɔ́, bǐ sésé ní cí nyɛ ɖɔhun; Mawu ma ka lɔn bónú è wá dó wlɔ mi nyɛ ɖɔhun ó.”

³⁰ Aglipa kpódó Fɛsitúsi kpó, kpódó Belenísi kpó, kpódó mɛ e ɖo ayǐjínjɔ́n xá yě lɛ́ɛ bǐ kpán ka sí te.

³¹ Ée yě gosín fínɛ́ ɔ́, yě ɖo ɖiɖɔ ɖo yěɖée tɛ́ntin wɛ ɖɔ: “Nya élɔ́ wa nǔɖé, bɔ é byɔ́ ɖɔ è nǎ ɖó kúhwɛ n'i, abǐ è nǎ wlí i dó gan ǎ.”

³² Aglipa ka ɖɔ nú Fɛsitúsi ɖɔ: “Nya élɔ́ ma ko ylɔ́ hwɛ ɖaxó ɖo Dadá Hlɔ̌ma tɔn gɔ́n ǎ ɔ́, è nǎ jó e.”