Mɛsɛ́dó 24 - MAWUXÓWÉMA

¹ Azǎn atɔ́ɔ́ngɔ́ ɔ́ gbe ɔ́, vɔ̌sánú-xwlémawutɔ́ ɖaxó Ananíyasi kpódó tomɛxó ɖé lɛ́ɛ kpó, kpódó ɖɛ̌mɛɖenúxótɔ́ e è nɔ ylɔ́ ɖɔ Tɛtulúsi é kpán wá Sezalée, bó wá jɛ Pɔ́lu sín hwɛ nú tokpɔngán ɔ́.

² Tokpɔngán ɔ́ ka ylɔ́ Pɔ́lu wá, bɔ Tɛtulúsi wlí xó, bó jɛ hwɛ dó Pɔ́lu jí ɖɔ: “Mɛsísí ce Felísi, hwi wɛ nyí mɔ̌, bɔ mǐ mɔ vivo; nǔnywɛ́ e a dǒ ɖo to élɔ́ sín azɔ̌ wa ná wɛ ɔ́ wɛ zɔ́n bɔ nǔ gěgé húzú nú nukɔn yiyi to ɔ́ tɔn.

³ Mǐ tunwun nǔ énɛ́ lɛ́ɛ bǐ nú we hwebǐnu, ɖo fí bǐ, bó ɖo kú tɔn dó nú we wɛ tlala.

⁴ Lo ɔ́, un jló ná yí hwenu towe gěgé ǎ, énɛ́ ɔ́ wútu wɛ un ɖo kɛnklɛ́n dó nú we wɛ, ɖɔ a ní nyɔ̌ xomɛ, bó ɖótó xó e ɖɔ nú we gbé un ja ɔ́ ɖo kléwún mɛ.

⁵ Nya élɔ́ ɔ́, mǐ mɔ ɖɔ azɔn nyanya ɖé wɛ é nyí; é nɔ́ dó avaja Jwifu e ɖo gbɛ ɔ́ mɛ lɛ́ɛ bǐ mɛ; sinsɛngbɛ́ Nazalɛ́tinu lɛ́ɛ tɔn sín gǎn wɛ.

⁶ É tlɛ lɛ́ jló ná ɖu su nú sinsɛnxɔ ɔ́, bɔ mǐ wlí i, [bó jló ná ɖɔ hwɛ xá ɛ lě e sɛ́n mǐtɔn zɔ́n gbɔn é.

⁷ Lo ɔ́, ahwangán ɖaxó Lizyási yí i sín mǐ sí kpó hlɔ̌nhlɔ́n kpó,

⁸ bó ɖɔ mɛ e ɖo hwɛ dó e wɛ lɛ́ɛ ní wá jɛ hwɛ nú we.] Hwi ɖésúnɔ kó kan nǔ byɔ́ ɛ ɔ́, a nǎ mɔ ɖɔ nǔ e mǐ ɖɔ dó wǔ tɔn ɔ́ bǐ wɛ nyí nǔgbó.”

⁹ Jwifu lɛ́ɛ ka nɔ xó e Tɛtulúsi ɖɔ ɔ́ jí, bó ɖɔ nǔ nyí mɔ̌ nǔgbó.

Pɔ́lu ɖɔ xó dó ba hwɛjijɔ ná ɖo tokpɔngán Felísi nukɔn

¹⁰ Tokpɔngán ɔ́ ka jó xó nú Pɔ́lu, bɔ é wlí xó bo ɖɔ: “Un tunwun ɖɔ a ɖo gǎn ɖu wɛ ɖo to élɔ́ nu din ɔ́, xwe tɔn ko sɛ yi; énɛ́ ɔ́ wú wɛ un ɖeji, bó ná gblɔ́n xó nú mɛ e ɖo hwɛ dó mì wɛ lɛ́ɛ.

¹¹ Un yi Aklúnɔ sɛn gbé ɖo Jeluzalɛ́mu din ɔ́, é sɔ́ hú azǎn wěwe ǎ; hwi ɖésúnɔ hɛn ɔ́, a nǎ ba do ná.

¹² È mɔ mì bɔ un ɖo nǔ dɔn xá mɛ ɖěbǔ wɛ ɖo sinsɛnxɔ mɛ ǎ, è ka mɔ mì bɔ un fɔ́n hun dó jǐ nú togun ɔ́ ɖo kplɔ́ngbasá lɛ́ɛ, abǐ fí ɖěvo ɖo toxo ɔ́ mɛ ǎ.

¹³ Nǔ e sín hwɛ dó mì wɛ yě ka ɖe din ɔ́, yě sixú ɖɔ xó ɖé, bó ná ɖe xlɛ́ we ɖɔ nǔgbó wɛ ǎ.

¹⁴ Amɔ̌, un yí gbe nú yě ɖɔ jí Mawu e tɔ́gbó mǐtɔn lɛ́ɛ nɔ sɛn ɔ́ sɛn wɛ un ɖe gbɔn ali yɔ̌yɔ́ e yě ɖɔ é kún sɔgbe ó é jí; lo ɔ́, nǔ e è wlán dó sɛ́nwéma ɔ́ mɛ lɛ́ɛ kpódó nǔ e gbeyíɖɔ Mawu tɔn lɛ́ɛ ɖɔ lɛ́ɛ kpán ɔ́, un ɖi nǔ nú bǐ sésé.

¹⁵ Un ka ɖo nukún ɖó Mawu wɛ, lě e yě lɔmɔ̌ ɖo nukún ɖó e wɛ gbɔn é. Mawu ná wá fɔ́n mɛ ɖagbe lɛ́ɛ, kpódó mɛ nyanya lɛ́ɛ kpó sín kú.

¹⁶ Énɛ́ ɔ́ wú wɛ un nɔ dó gǎn, bónú ayi ce ma xo hun xá mì ɖo nǔ ɖěbǔ mɛ, ɖo Mawu kpódó gbɛtɔ́ lɛ́ɛ kpán nukɔn ó.

¹⁷ “Hwenu e un yi xɔ xwe mɔ̌kpán ɖo gbějí, bó lɛ́ kɔ wá Jeluzalɛ́mu ɔ́, un hɛn akwɛ́ bó ná dó dó alɔ mɛ ce lɛ́ɛ, bó ná lɛ́ xwlé vɔ̌sánú Mawu.

¹⁸ Nǔ énɛ́ ɔ́ kɔn wɛ un ɖe ɖo sinsɛnxɔ mɛ, bɔ Jwifu lɛ́ɛ wá mɔ mì; un ko slá wǔ nɛ́; ahwan ɖé ɖo fínɛ́ ǎ; zǐngídi ɖé ka tíin ǎ,

¹⁹ lo ɔ́, ényí Jwifu Azíi tɔn lɛ́ɛ ko mɔ nǔɖé ná ɖɔ dó wú ce wɛ ɔ́, yě wɛ ná kó wá gɔ̌n towe, bó jɛ hwɛ ce nú we.

²⁰ Abǐ, mɛ e ɖo fí din lɛ́ɛ ɔ́, yědɛɛ lɛ́ɛ ní bo ɖɔ nǔ nyanya e un dó sin bɔ yě mɔ bo ɖɔ hwenu e un ɖo toxóɖɔgbɛ́ ɔ́ nukɔn é.

²¹ Xó ɖokpó e un nɔ te ɖo nukɔn yětɔn, bó ɖɔ bɔ yě hɛn ɔ́, yě ná ɖɔ ɔ́ ɖíe: ‘Un ɖi nǔ ɖɔ mɛkúkú lɛ́ɛ ná fɔ́n wú wɛ è ɖo hwɛ dó mì wɛ ɖo nukɔn mitɔn égbé.’ ”

²² Felísi ɔ́ ka mɔ nǔ jɛ Aklúnɔ sín ali ɔ́ wú ganjí. É sɛ hwɛɖɔzán ɔ́ dó nukɔn, bó ɖɔ nú yě ɖɔ: “Ényí ahwangán ɖaxó Lisiyási ko wá ɔ́, un ná gbéjé xó mitɔn kpɔ́n.”

²³ É ka ɖɔ nú sɔ́jagán ɔ́ ɖɔ é ní cɔ́ Pɔ́lu bó ka ná ɛ vivo, bó ná gbe xɔ́ntɔn tɔn lɛ́ɛ, nú yě ní nɔ wá gɔ́ alɔ n'i.

Pɔ́lu ɖɔ xó nú tokpɔngán Felísi kpódó Dlusíla kpó

²⁴ Azǎn ɖé jɛ ǎ, bɔ Felísi wá, é kpódó asi tɔn Dlusíla e nyí Jwifu ɔ́ kpán. É zɔ́n, bɔ è ylɔ́ Pɔ́lu wá, bɔ é ɖótó xó e Pɔ́lu ɖɔ dó nǔɖiɖi ɖó nú Jezu Klísu wú é.

²⁵ Lo ɔ́, ée Pɔ́lu ɖo xó ɖɔ dó lě e è nǎ zán gbɛ ɖagbe gbɔn é wú wɛ, bó ɖo xó ɖɔ dó lě e è nǎ ɖu ɖo mɛ ɖésúnɔ jí gbɔn é wú wɛ, bó lɛ́ ɖo xó ɖɔ dó lě e Mawu na wá ɖɔ hwɛ xá gbɛtɔ́ lɛ́ɛ gbɔn ɔ́ wú wɛ ɔ́, xɛsi jɛ Felísi jí, bɔ é ɖɔ nú Pɔ́lu ɖɔ: “To yi hwɛ̌; un ko wá mɔ vivo ɔ́, un ná lɛ́ ylɔ́ we.”

²⁶ É ɖo akwɛ́ lɔmɔ̌ ɖó nukún wɛ ɖo Pɔ́lu sí; énɛ́ wútu wɛ é nɔ zɔ́n, bɔ è nɔ ylɔ́ ɛ wá n'i hwɛhwɛ, bɔ yě nɔ ɖɔ xó.

²⁷ Xwe we gúdo ɔ́, Pɔsiwusi Fɛsitúsi wá ɖyɔ́ Felísi. Felísi ka jló ná wa nǔ, bó ná dó xomɛhunhun nú Jwifu lɛ́ɛ, bó jó Pɔ́lu dó nyi gankpá mɛ.