Mɛsɛ́dó 23 - MAWUXÓWÉMA

¹ Pɔ́lu bɔ nukún nyi toxóɖɔtɔ́ lɛ́ɛ wú, bó ɖɔ: “Nɔví ce lɛ́ɛ mi, ayi ce xo hun xá mì ɖo nǔ ɖěbǔ mɛ ɖo Mawu nukɔn káká jɛ égbé ǎ.”

² Vɔ̌sánú-xwlémawutɔ́ ɖaxó Ananíyasi ka ɖɔ nú mɛ e ɖo Pɔ́lu kpá lɛ́ɛ ɖɔ yě ní gba nu n'i,

³ bɔ Pɔ́lu ɖɔ n'i ɖɔ: “Hwi mɛ e kwíji ɖo ayi mɛ, bó ka ɖo mɛ mímɛ́ bló wɛ ɖo wěxo ɔ́, dǒglin e è sá nǔ wěwé dó ɔ́ ɖɔhun wɛ a cí; Mawu wɛ ná xo we; a jínjɔ́n ayǐ, bó jló ná ɖɔ hwɛ xá mì lě e sɛ́n ɔ́ zɔ́n gbɔn é; sɛ́n ɔ́ ka zɔ́n ɖɔ è xo mì ǎ, bɔ hwɛ ka zɔ́n ɖɔ è ní xo mì.”

⁴ Mɛ e ɖo Pɔ́lu kpá lɛ́ɛ ka ɖɔ: “A zun vɔ̌sánú-xwlémawutɔ́ ɖaxó ɔ́!”

⁵ Pɔ́lu ka yí gbe ɖɔ: “Nɔví ce lɛ́ɛ mi, un tunwun ɖɔ vɔ̌sánú-xwlémawutɔ́ ɖaxó wɛ ǎ; ɖó è ko wlán ɖɔ: ‘Ma ɖɔ xó nyanya dó togán towe wú ó.’ ”

⁶ Ée Pɔ́lu ka mɔ ɖɔ, ɖo toxóɖɔgbɛ́ ɔ́ mɛ ɔ́, mɛ ɖě nyí Saduseɛn, mɛ ɖě ka nyí Falizyɛn ɔ́, é sú xó ɖo toxóɖɔgbɛ́ ɔ́ tɛ́ntin, bó ɖɔ: “Nɔví ce lɛ́ɛ mi, nyɛ ɔ́, Falizyɛn gbɛ́ta ɔ́ mɛ wɛ un ɖe, bó ka lɛ́ nyí Falizyɛn ví jiji. Fínfɔ́n mɛkúkú lɛ́ɛ tɔn e ɖó nukún wɛ un ɖe ɔ́ wútu wɛ è ɖo hwɛ ɖɔ xá mì wɛ.”

⁷ Ée é ɖɔ mɔ̌ ɔ́, nǔdindɔn byɔ́ Falizyɛn lɛ́ɛ kpódó Saduseɛn lɛ́ɛ kpó tɛ́ntin, bɔ agun ɔ́ klán.

⁸ (Đó Saduseɛn lɛ́ɛ nɔ ɖɔ mɛkúkú lɛ́ɛ kún ɖo ná fɔ́n wɛ ɖě ó; wɛnsagun ɖě kún tíin ó; yɛ ɖě kún ka tíin ó; Falizyɛn lɛ́ɛ ka nɔ ɖi nǔ nú nǔ énɛ́ lɛ́ɛ bǐ.)

⁹ Énɛ́ ɔ́, xósúsú ɔ́ lɛ́ syɛ́n d'é jí; Falizyɛn sɛ́nkplɔ́nmɛtɔ́ ɖé lɛ́ɛ sí te, bó gbɛ́ gbídígbídí ɖɔ jí: “Mǐ mɔ nǔ e nya élɔ́ wa nyi do ɔ́ ǎ; é sixú nyí ɖɔ yɛ ɖé abǐ wɛnsagun ɖé wɛ ná ko ɖɔ xó n'i.”

¹⁰ Zǐngídi ɔ́ ka wá ɖo syɛ́nsyɛ́n d'é jí wɛ, bɔ ahwangán ɖaxó ɔ́ jɛ xɛsi ɖi jí ɖɔ yě ma wá vúnvún Pɔ́lu ó, énɛ́ ɔ́ wú wɛ é ylɔ́ sɔ́ja lɛ́ɛ, bó zɔ́n ɖɔ yě ní wá ɖe Pɔ́lu sín mɛ lɛ́ɛ mɛ, bó kplá ɛ yi ɖó ahwankpá ɔ́ mɛ.

¹¹ Gbe énɛ́ gbe zǎn mɛ ɔ́, Aklúnɔ tɔ́n dó Pɔ́lu jí, bó ɖɔ n'i ɖɔ: “Kpan akɔ́n; a ɖe kúnnu nú mì ɖo Jeluzalɛ́mu fí; mɔ̌ ɖokpó ɔ́, a nǎ lɛ́ ɖe nú mì ɖo Hlɔ̌ma.”

Jwifu lɛ́ɛ blá Pɔ́lu gbé

¹² Ée ayǐ ka wá hɔ́n ɔ́, Jwifu lɛ́ɛ blá gbě; yě ɖɔ, bó xwlé nǔ d'é jí ɖɔ, émí ma hu Pɔ́lu ǎ ɔ́, émí kún ná ɖu nǔ ɖěbǔ ó, émí kún ka ná nu sin ó.

¹³ Yě mɛ e blá gbě énɛ́ ɔ́ hú gbɛtɔ́ kanɖé (40).

¹⁴ Yě yi mɔ vɔ̌sánú-xwlémawutɔ́gán lɛ́ɛ kpódó agunnukɔntɔ́ lɛ́ɛ kpán, bó ɖɔ nú yě ɖɔ: “Mǐ ɖó gbe kpɔ́, bó xwlé nǔ d'é jí ɖɔ mǐ ma hu Pɔ́lu ǎ ɔ́, mǐ kún ná ɖu nǔ ó.

¹⁵ Hǔn din ɔ́, midɛɛ lɛ́ɛ kpódó toxóɖɔgbɛ́ lɛ́ɛ kpó ní byɔ́ ahwangán ɖaxó ɔ́ ɖɔ ní kplá Pɔ́lu wá nú émí; mi ná ɖɔ n'i ɖɔ émí jló ná gbéjé xó tɔn kpɔ́n céɖécéɖé. Cóbónú é ná wá mi gɔ́n ɔ́, mǐdɛɛ lɛ́ɛ ɔ́, mǐ nǎ ko ɖo gbesisɔ mɛ bó ná hu i ɖo alixo.”

¹⁶ Pɔ́lu sín nɔví nyɔ̌nu sín vǐ súnnu ɖokpó ka se gbě e blá dó nylɔ́ tɔn wú wɛ yě ɖe ɔ́, bó yi gɔ̌n tɔn ɖo ahwankpá ɔ́ mɛ, lobo wlí ɖɔ n'i.

¹⁷ Pɔ́lu ka ylɔ́ sɔ́ja lɛ́ɛ sín gǎn ɖokpó, bó ɖɔ n'i ɖɔ: “Kplá nyaví élɔ́ yi ahwangán ɖaxó ɔ́ gɔ́n; é ɖó xó ɖé ná ɖɔ n'i.”

¹⁸ Sɔ́jagán ɔ́ ka kplá nyaví ɔ́ yi ahwangán ɖaxó ɔ́ gɔ́n, bó ɖɔ n'i ɖɔ: “Gantɔ́ Pɔ́lu wɛ ylɔ́ mì, bó sɔ́ nyaví élɔ́ dó alɔ mɛ nú mì ɖɔ ma kplá ɛ wá nú we, ɖó é jló ná ɖɔ xó ɖé nú we.”

¹⁹ Ahwangán ɖaxó ɔ́ ka hɛn nyaví ɔ́ sín alɔ, bó kplá ɛ jɛ vo, bó kanbyɔ́ ɛ ɖɔ: “Étɛ́ a jlǒ ná ɖɔ nú mì?”

²⁰ Nyaví ɔ́ ka yí gbe ɖɔ: “Jwifu lɛ́ɛ ɖó gbe kpɔ́, bó ná byɔ́ we ɖɔ hwi ní kplá Pɔ́lu wá toxóɖɔgbɛ́ ɔ́ nukɔn sɔ, ɖi nǔ yě jló ná vɔ́ xó tɔn gbéjé kpɔ́n ganjí ɖɔhun.

²¹ Ma ka ɖótó xó yětɔn ó; ɖó mɛ yětɔn kanɖé (40) jɛjí ná tɔwu n'i. Mɛ énɛ́ lɛ́ɛ ko ɖɔ, bó xwlé nǔ d'é jí ɖɔ émí ma hu Pɔ́lu ǎ ɔ́, émí kún ná ɖu nǔ ó, émí kún ka ná nu sin ó; yě bǐ wɛ kó ɖo gbesisɔ mɛ din; gbeníná towe kɛ́ɖɛ́ jɛ́n kpo.”

²² Ahwangán ɖaxó ɔ́ ka nyi nyaví ɔ́ sɛ́ dó xwé, bó dó sɛ́n n'i ɖɔ mɛɖé ní ma se nǔ e é wá ɖɔ nú émí din ɔ́ ɖo nu tɔn ó.

È nyi Pɔ́lu sɛ́ dó tokpɔngán Felísi gɔ́n

²³ Ahwangán ɖaxó ɔ́ ka wá ylɔ́ sɔ́ja kanwekogán we, bó ɖɔ nú yě ɖɔ: “Mi kplé sɔ́ja afɔɖé (200), sɔ́ja sɔ́xátɔ́ kanɖé gban (70), kpódó sɔ́ja e nɔ hɛn hwǎn lɛ́ɛ afɔɖé (200) kpán ɖó te. Mi ná gosín fí gan tɛ́nnɛ mɛ zǎn mɛ, bó ná hun káká yi Sezalée.

²⁴ Mi blá akpa nú sɔ́ ɖé lɛ́ɛ ɖ'ayǐ nú Pɔ́lu lɔmɔ̌, bó kplá ɛ yi tokpɔngán Felísi gɔ́n wǔyɛ́yɛ́ afɔyɛ́yɛ́.”

²⁵ É ka wlán wěma ɖokpó sɛ́ dó tokpɔngán ɔ́, bó ɖɔ d'é mɛ ɖɔ:

²⁶ “Nyɛ Klódiwusi Lisiyási ɔ́, un ɖo gbe dó sɛ́ dó mɛsísí ce tokpɔngán Felísi wɛ.

²⁷ Nya élɔ́ e un sɛ́ dó we ɔ́, Jwifu lɛ́ɛ wɛ wlí i, bó ɖo nǎ hu i wɛ, bɔ nyɛ kpódó ahwan ce lɛ́ɛ kpó yi tɛn tɔn mɛ, bó yí i sín alɔ yětɔn mɛ, ɖó un se ɖɔ Hlɔ̌manu wɛ.

²⁸ Un jló ná ba do nú xó ɔ́, bó ná tunwun nǔ e sín hwɛ dó e wɛ yě ɖe tawun ɔ́, bó kplá ɛ yi toxóɖɔgbɛ́ yětɔn nukɔn.

²⁹ Un wá mɔ ɖɔ nǔɖé lɛ́ɛ wú dó hwɛ ɛ dó wɛ yě ɖe, ɖo sɛ́n yětɔn mɛ. Lo ɔ́, nǔ e na zɔ́n bɔ è nǎ ɖó kúhwɛ n'i, abǐ è nǎ wlí i dó gankpá mɛ ɔ́, un mɔ ɖě ɖo wǔ tɔn ǎ.

³⁰ Ée è lɛ́ wá ɖɔ nú mì ɖɔ Jwifu lɛ́ɛ blá gbě tɔn ɔ́, un yǎ wǔ bo sɛ́ ɛ dó we, bó ka ɖɔ nú mɛ e ɖo hwɛ dó e wɛ lɛ́ɛ azɔn ɖokpó ɖɔ yě ní wá ylɔ́ hwɛ ɛ ɖo gɔ̌n towe.”

³¹ Sɔ́ja lɛ́ɛ ka bló nǔ e è zɔ́n yě lɛ́ɛ, bó kplá Pɔ́lu yi Antipatlisi zǎn énɛ́ mɛ.

³² Ayǐhɔ́ngbe tɔn ɔ́, sɔ́ja e zɔn afɔ bo ɖo yě nyi wɛ lɛ́ɛ lɛ́ kɔ wá yi ahwankpá ɔ́ mɛ, bɔ yě mɛ e xá sɔ́ lɛ́ɛ kplá Pɔ́lu hɛn yi to ɔ́ mɛ.

³³ Ée sɔ́xátɔ́ lɛ́ɛ yi Sezalée ɔ́, yě sɔ́ wěma ɔ́ nú tokpɔngán ɔ́, lobo kplá Pɔ́lu jó n'i.

³⁴ Tokpɔngán ɔ́ ka xa wěma ɔ́, bó kan tokpɔn e mɛ nu Pɔ́lu nyí ɔ́ byɔ́. Ée é se ɖɔ Silisíinu wɛ é nyí ɔ́,

³⁵ é ɖɔ n'i ɖɔ: “Mɛ e ɖo hwɛ dó we wɛ lɛ́ɛ ko wá ɔ́, un ná kan nǔ byɔ́ we.” Énɛ́ gúdo ɔ́, é ná gbe ɖɔ è ní sɔ́ ɛ dó axɔ́sú Elódu sín hɔnmɛ, bó cɔ́ ɛ.