Mɛsɛ́dó 22 - MAWUXÓWÉMA

¹ “Nɔví ce lɛ́ɛ mi; tɔ́ ce lɛ́ɛ mi, mi ɖótó xó e un ɖó, bó ná ɖɔ nú mi din dó nǔ e sín hwɛ dó mì wɛ mi ɖe lɛ́ɛ wú é.”

² Ée yě mɔ ɖɔ alamugbe mɛ ɖɔ xó nú émí dó wɛ é ɖe ɔ́, yě bǐ lɛ́ cí tóó d'é jí, bɔ Pɔ́lu ɖɔ:

³ “Jwifu wɛ nú mì; Táasi wɛ è ji mì ɖe, ɖo Silisíi gbé jí, Jeluzalɛ́mu fí wɛ un nɔ bo su; Gamaliyɛ́li wɛ nyí mɛ̌si ce; é kplɔ́n lě e è ɖǒ ná nyi tɔ́gbó mǐtɔn lɛ́ɛ sín sɛ́n gbɔn é mì céɖécéɖé. Un nɔ jɛ hun dó Mawu jǐ, lě e mi lɔ ɖo hun jɛ dó jǐ tɔn gbɔn wɛ éhɔ́nmɛ din é.

⁴ Un ko dó ya nú yě mɛ e xwedó Aklúnɔ sín ali lɛ́ɛ, káká bɔ mɛ kú ɖo yě mɛ kpɔ́n; un ko wlí súnnu kpódó nyɔ̌nu kpán yi dó gankpá mɛ.

⁵ Vɔ̌sánú-xwlémawutɔ́ ɖaxó ɔ́ kpódó kplékplé agunnukɔntɔ́ lɛ́ɛ tɔn kpán hɛn ɔ́, yě nǎ ɖe kúnnu nú mì ɖɔ nǔgbó wɛ un ɖɔ; un tlɛ yí wěma ɖo yě sí nú nɔví ce Jwifu e ɖo Damási lɛ́ɛ; fínɛ́ wɛ un xwe, bó ná wlí nǔɖitɔ́ e ɖo dɔ̌n lɛ́ɛ, lobo ná kplá yě wá Jeluzalɛ́mu, bónú è nǎ dɔn tó nú yě.”

Pɔ́lu ɖɔ lě e é ɖi nǔ nú Jezu gbɔn é

^6-7 “Ali jí wɛ un ɖe, bó kó sɛkpɔ́ Damási, bɔ gǎn wěwe mɛ mɔ̌ ɔ́, wěziza ɖaxó ɖé gosín jǐxwé bó hɔ́n lɛ́ lɛ̌ dó mì, bɔ un jɛ ayǐ, bó se gbe ɖé, bɔ gbe ɔ́ kanbyɔ́ mì ɖɔ: ‘Sólu! Sólu! Étɛ́wú a ɖo ɖiɖe dó mì wɛ?’

⁸ Un kanbyɔ́ ɛ ɖɔ: ‘Hwi mɛ̌ ká wɛ Aklúnɔ?’ Bɔ é ɖɔ nú mì ɖɔ: ‘Nyɛ Jezu Nazalɛ́ti tɔn e ɖe dó wɛ a ɖe ɔ́ wɛ.’

⁹ Mɛ e kpódó nyi kpó zɔ́n lɛ́ɛ mɔ wěziza ɔ́, yě ka se mɛ e ɖo xó ɖɔ nú mì wɛ ɔ́ sín gbe ǎ.

¹⁰ Un ka lɛ́ kanbyɔ́ mɛ e ɖo xó ɖɔ nú mì wɛ ɔ́ ɖɔ: ‘Ani un ɖó ná wa Aklúnɔ?’ Aklúnɔ ɔ́ ká ɖɔ nú mì ɖɔ: ‘Sí te, yi Damási; a ko yi dɔ̌n ɔ́, è nǎ ɖɔ nǔ e Mawu ɖɔ hwi ná wa ɔ́ bǐ nú we.’

¹¹ Lo ɔ́, wěziza ɔ́ sín hlɔ̌nhlɔ́n zɔ́n, bɔ un sɔ́ nɔ sixú mɔ nukúnnú ǎ, bɔ gbɛ̌ ce e kpódó nyi kpó zɔn lɛ́ɛ wɛ gbɔ bo hɛn alɔ ce káká bo kplá mì yi Damási.

¹² “Nya ɖé ka ɖo Damási fínɛ́, bɔ è nɔ ylɔ́ ɛ ɖɔ Ananíyasi; nya ɖé wɛ é nyí, lobo nɔ xwedó Mawusɛ́n, bó ɖó sísí nú Mawu, bɔ Jwifu e ɖo to ɔ́ mɛ lɛ́ɛ bǐ nɔ ɖɔ xó tɔn ɖagbe.

¹³ Nya énɛ́ wá gɔ̌n ce, bó nɔ te ɖo akpá ce, bó ɖɔ nú mì ɖɔ: ‘Sólu, nɔví ce, nukún towe lɛ́ɛ ní hun, bónú a ní lɛ́ mɔ nukúnnú.’ Azɔn ɖokpó ɔ́, nukún ce lɛ́ɛ hun, bɔ un mɔ Ananíyasi.

¹⁴ É ka ɖɔ: ‘Mawu tɔ́gbó mǐtɔn lɛ́ɛ tɔn ɔ́ ko sɔ́ we, bónú a na tunwun jló tɔn, bó ná mɔ mɛsɛntɔ́ Mawu tɔn hwɛjijɔnɔ ɖokpó géé ɔ́, bó ná se xó e na tɔ́n sín nu tɔn mɛ é.

¹⁵ Đó a ɖǒ na nyí kúnnuɖetɔ́ tɔn, bó ná ɖɔ nǔ e a mɔ, bó se ɔ́, ɖo gbɛtɔ́ lɛ́ɛ bǐ nukɔn.

¹⁶ Din ɔ́, étɛ́ nɔ te kpɔ́n wɛ a ka lɛ́ ɖe? Sí te, bónú è nǐ ylɔ́ nyǐkɔ tɔn dó lɛ yɛhwesin nú we, bó ná ɖe we sín hwɛ towe mɛ.’ ”

Pɔ́lu ɖɔ lě e è sɛ́ ɛ dó mɛ e ma nyí Jwifu ǎ lɛ́ɛ gɔ́n gbɔn é

¹⁷ “Ée un lɛ́ kɔ wá Jeluzalɛ́mu ɔ́, un wá ɖo ɖɛ xo wɛ gbe ɖokpó, ɖo sinsɛnxɔ mɛ, bó jɛ nǔ mɔ jí.

¹⁸ Un mɔ Aklúnɔ, bɔ é ɖɔ nú mì ɖɔ jí: ‘Hwlɛ̌ndó, bó yá wǔ tɔ́n sín tomɛ fí, ɖó kúnnu e a nǎ ɖe nú mì ɖo fí ɔ́, to élɔ́ mɛ nu lɛ́ɛ ɖo nǔ ná ɖi ná wɛ ǎ.’

¹⁹ Un ka yí gbe ɖɔ jí: ‘Aklúnɔ, yě ka tunwun ganjí ɖ'ayǐ ɖɔ un ko nɔ gbɔn kplɔ́ngbasá lɛ́ɛ, bó nɔ́ zɔ́n bɔ è nɔ wlí mɛ e nɔ ɖi nǔ nú we lɛ́ɛ dó gankpá mɛ, bó nɔ́ xo yě.

²⁰ Hwenu e è ɖo kúnnuɖetɔ́ towe Etyɛ́ni hu wɛ ɔ́, nyɛ lɔ ɖo fínɛ́, bó yí gbe ná; nyɛ wɛ tlɛ yí mɛ e hu i lɛ́ɛ sín awu hɛn.’

²¹ Aklúnɔ ka ɖɔ nú mì ɖɔ: ‘Yi, ɖó fí línlín ná sɛ́ we dó wɛ un ɖe, ɖo mɛ e ma nyí Jwifu ǎ lɛ́ɛ gɔ́n.’ ”

Pɔ́lu kpódó ahwangán ɖaxó Hlɔ̌manu ɔ́ kpán

²² Mɛ lɛ́ɛ ɖótó Pɔ́lu káká jɛ fínɛ́, lo ɔ́, yě jɛ xó sú jí ɖɔ: “Mi bú nya énɛ́; mi hu i; é nyí mɛ bó ná nɔ gbɛ ǎ!”

²³ Yě ɖo xó sú wɛ, bó ɖo avɔ yětɔn lɛ́ɛ nyi dó jǐ wɛ, lobo ɖo kɔ́gúdu nyi dó jǐ wɛ;

²⁴ bɔ ahwangán ɖaxó ɔ́ ɖɔ è ní kplá Pɔ́lu byɔ́ ahwankpá ɔ́ mɛ, bó xo e, bó kan nǔ byɔ́ ɛ, nú é ná ɖɔ nǔ e wútu mɛ lɛ́ɛ ɖo xó sú dó jǐ tɔn wɛ sɔ mɔ̌ é.

²⁵ Ée yě blá Pɔ́lu, bó ɖo nǎ xó e wɛ ɔ́, é kanbyɔ́ sɔ́ja kanwekogán ɔ́ ɖɔ: “Sɛ́n ɔ́ ná gbe ɖɔ è ní xo Hlɔ̌ma toví ɖó lanbá wú ma to ɖó hwɛ n'i a?”

²⁶ Ée sɔ́ja kanwekogán énɛ́ se mɔ̌ ɔ́, é yi mɔ ahwangán ɖaxó Hlɔ̌manu ɔ́, bó ɖɔ n'i ɖɔ: “Étɛ́ ná dó sin wɛ a ka ɖe nɛ́? Nya ɔ́ Hlɔ̌manu wɛ hǔn.”

²⁷ Bɔ ahwangán ɖaxó Hlɔ̌manu ɔ́ wá Pɔ́lu gɔ́n, bó kanbyɔ́ ɛ ɖɔ: “Hlɔ̌manu wɛ a nyǐ nǔgbó a?” Pɔ́lu ka yí gbe ɖɔ: “Ɛɛn Hlɔ̌manu wɛ un nyí.”

²⁸ Bɔ ahwangán ɖaxó Hlɔ̌manu ɔ́ ɖɔ: “Nyɛ ɔ́, akwɛ́ mɔ̌kpán wɛ un zán, cóbɔ è wǎ xa mì dó Hlɔ̌manu lɛ́ɛ mɛ.” Pɔ́lu ka ɖɔ: “Nyɛ ɔ́, Hlɔ̌ma ví jiji wɛ un nyí.”

²⁹ Tlóló ɔ́, mɛ e ko ɖo nǎ xo e wɛ lɛ́ɛ bǐ yá wǔ jó agɔ yi gǔdo bléwún. Xɛsi jɛ ahwangán ɖaxó Hlɔ̌manu ɔ́ ɖésú jí, ɖó é wá mɔ ɖɔ Hlɔ̌ma toví wɛ émí zɔ́n bɔ è blǎ.

Pɔ́lu yi toxóɖɔgbɛ́ ɔ́ nukɔn

³⁰ Ayǐhɔ́ngbe tɔn ɔ́, ahwangán ɖaxó Hlɔ̌manu ɔ́ jló ná tunwun nǔ e sín hwɛ dó Pɔ́lu wɛ Jwifu lɛ́ɛ ɖe tawun ɔ́; é zɔ́n bɔ è tun i, lobo zɔ́n, bɔ è kplé vɔ̌sánú-xwlémawutɔ́gán lɛ́ɛ kpódó toxóɖɔtɔ́ lɛ́ɛ kpó, bɔ é kplá Pɔ́lu, bó sɔ́ ɛ ɖó nukɔn yětɔn.