Mɛsɛ́dó 21 - MAWUXÓWÉMA

¹ Ée mǐ wá jó yě dó ɔ́, mǐ byɔ́ tɔjíhún mɛ bo ɖidó tɔtɛ́ntinto e è nɔ ylɔ́ ɖɔ Kɔ́si ɔ́ mɛ tlɔlɔ. Ayǐhɔ́ngbe tɔn ɔ́, mǐ wǎ Hlodɛ́si, bó gosín fínɛ́ bo yi Patala.

² Mǐ ka mɔ tɔjíhún ɖé, bɔ é xwe Fenisíi, bɔ mǐ byɔ́ mɛ ɖidó.

³ Mǐ mɔ tɔtɛ́ntinto e è nɔ ylɔ́ ɖɔ Cíplu é sɛ́ dó, bó jó to énɛ́ ɔ́ dó nyi amyɔxwé, lobo yi Silíi; bó wá glín hǔn ɖó Tíi, ɖó fínɛ́ wɛ tɔjíhún ɔ́ ɖó ná ɖe agban ɖe.

⁴ Mǐ mɔ mɛ e ɖi nǔ nú Jezu lɛ́ɛ ɖo fínɛ́, bó nɔ yě gɔ̌n xɔ azǎn tɛ́nwe. Yɛsinsɛn sín hlɔ̌nhlɔ́n ɖe nǔ e ɖo te kpɔ́n Pɔ́lu ɔ́ xlɛ́ yě, bɔ yě ɖɔ nú Pɔ́lu ɖɔ ní ma yi Jeluzalɛ́mu ó.

⁵ Lo ɔ́, ée mǐ nɔ fínɛ́ xɔ azǎn tɛ́nwe ɔ́, mǐ lɛ́ wlí ali ɖidó; yě kpódó asi yětɔn lɛ́ɛ kpó, kpódó vǐ yětɔn lɛ́ɛ kpó bǐ wá nyi mǐ káká jɛ toxo ɔ́ gúdo. Ée mǐ jɛ xutó ɔ́, mǐ jɛ kpo bó xo ɖɛ.

⁶ Énɛ́ ɔ́ gúdo ɔ́, mǐ dó yibowá nú mǐɖée, bɔ mǐ byɔ́ tɔjíhún mɛ, bɔ yědɛɛ lɛ́ɛ lɛ́ kɔ ɖidó xwé yětɔn lɛ́ɛ gbe.

⁷ Ée mǐ gosín Tíi ɔ́, Putolemayísi wɛ mǐ wá glín hǔn dó, bɔ tɔjígbingbɔn yi tomɛ mǐtɔn nɔ te ɖo fínɛ́. Mǐ dó gbe nɔví mǐtɔn ɖo nǔɖiɖi mɛ lɛ́ɛ, bó nɔ kpɔ́ xá yě gbe énɛ́ gbe.

⁸ Ayǐhɔ́ngbe tɔn ɔ́, mǐ yi Sezalée, bó jɛ Filípu Wɛn Ɖagbejlátɔ́ ɔ́ xwé, bó nɔ fínɛ́. Filípu énɛ́ ɖo mɛ tɛ́nwe e è cyán ɖo Jeluzalɛ́mu lɛ́ɛ mɛ.

⁹ Filípu ɖó ɖyɔ̌vǐ ɛnɛ; yě ɖě tunwun súnnu ǎ; yě nɔ́ ɖo Mawuxó ɖɔ wɛ.

¹⁰ Mǐ ko nɔ fínɛ́ xɔ azǎn gěgé, bɔ gbeyíɖɔ Mawu tɔn e è nɔ ylɔ́ ɖɔ Agabusi ɔ́ gosín Judée wá.

¹¹ É wá mɔ mǐ, bó zé gǒjíblánú Pɔ́lu tɔn dó blá afɔ kpódó alɔ kpán nú éɖée, bó ɖɔ: “Nǔ e Yɛsinsɛn ɖɔ ɔ́ ɖíe: mɛ e tɔn nyí gǒjíblánú élɔ́ ɔ́, lě e Jwifu lɛ́ɛ na blá ɛ gbɔn ɖo Jeluzalɛ́mu, bó ná jó e nú mɛ e ma nyí Jwifu ǎ lɛ́ɛ é ɖíe.”

¹² Ée mǐ se mɔ̌ ɔ́, mǐ kpó to ɔ́ mɛ nu lɛ́ɛ kpó sa vo nú Pɔ́lu ɖɔ ní ma yi Jeluzalɛ́mu ó.

¹³ É ka yí gbe nú mǐ ɖɔ: “Nɛ̌ ka gbɔn bɔ mi ɖo avǐ ya wɛ bó ɖo ayi gba dó nú mì wɛ mɔ̌? Ényí è nǎ blá mì kɛ́ɖɛ́ wɛ un ɖo gbesisɔ mɛ ná ǎ; lo ɔ́, un lɛ́ ɖo gbesisɔ mɛ bo ná kú ɖo Jeluzalɛ́mu, ɖó Aklúnɔ Jezu wútu.”

¹⁴ Ée mǐ má sixú ɖɔ xó ɖé, bó dó hɛn ɛ ɖó te ǎ jɛ́n wɛ ɔ́, mǐ gbɔ bo jó e dó, bó ɖɔ: “Lě e Aklúnɔ jló gbɔn ɔ́, ní bo nyí mɔ̌.”

¹⁵ Mǐ nɔ fínɛ́ xɔ azǎn yɔywɛ ɖé, bó sɔ́nǔ, bó ɖidó Jeluzalɛ́mu.

¹⁶ Ahwanvú Jezu tɔn e ɖo Sezalée lɛ́ɛ ɖě zɔn xá mǐ, bó kplá mǐ yi ahwanvú Jezu tɔn xóxó lɛ́ɛ ɖokpó xwé; tɔtɛ́ntinto e è nɔ ylɔ́ ɖɔ Cíplu ɔ́ mɛ nu wɛ é nyí, bɔ è nɔ ylɔ́ ɛ ɖɔ Munasɔ́ɔn; xwé tɔn gbe wɛ mǐ ɖó ná nɔ.

Pɔ́lu yi ba Jaki kpɔ́n

¹⁷ Đěe mǐ wá Jeluzalɛ́mu ɔ́, nɔví mǐtɔn ɖo nǔɖiɖi mɛ lɛ́ɛ yí mǐ kpódó xomɛhunhun kpán.

¹⁸ Ayǐhɔ́ngbe tɔn ɔ́, Pɔ́lu kpó mǐ kpó yi Jaki xwé, bɔ agunmɛxó lɛ́ɛ bǐ kplé ɖo fínɛ́.

¹⁹ Pɔ́lu dó gbe yě, bɔ nǔ e Mawu jlɛ́ ɖo mɛ e ma nyí Jwifu ǎ lɛ́ɛ tɛ́ntin gbɔn gbla tɔn mɛ ɔ́, é wlí ɖokpó ɖokpó ɖɔ nú yě.

²⁰ Ée yě se xó nɛ́ lɛ́ɛ ɔ́, yě bǐ kpa susu nú Mawu, bó ka ɖɔ nú Pɔ́lu ɖɔ: “A mɔ a nɔví? Jwifu lɛ́ɛ afatɔ́n afatɔ́n donu nabí ɖé wɛ ɖi nǔ; yě bǐ ka lɛ́ ɖó kan dó Mɔyízi sɛ́n ɔ́ wú.

²¹ È ka wá ɖɔ nú yě ɖɔ hwi nɔ kplɔ́n nǔ Jwifu e ɖo to ɖěvo mɛ lɛ́ɛ ɖɔ yě ma sɔ́ nyi Mɔyízisɛ́n ɔ́ ɖě ó; yě má sɔ́ gbo ada nú vǐ yětɔn lɛ́ɛ ɖě ó, yě ma ka sɔ́ xwedó hwɛndo tɔ́gbó mǐtɔn lɛ́ɛ tɔn ɖě ó.

²² Nɛ̌ mǐ ná wa gbɔn din? Đó dandan mɛ ɔ́, yě ná se ɖɔ a lɛ́ kɔ wá.

²³ Hǔn, bó bló nǔ e mǐ ná ɖɔ nú we ɔ́. Nya ɛnɛ ɖé lɛ́ɛ ɖo mǐ mɛ, bó ko dó akpá nú Mawu.

²⁴ Kplá yě, bónú hwi kpódó yě kpán mi ná yi slá wǔ; a nǎ sú akwɛ́ e mi ná zán ɖo fínɛ́ ɔ́ bǐ, bónú yě ná sixú xwlɛ́ ɖa; énɛ́ ɔ́, mɛ bǐ ná tunwun ɖɔ nǔ e è ɖɔ dó wú we ɔ́ ɖě kún nyí nǔgbó ó, bó ná mɔ ɖɔ hwi lɔ nɔ nyi Mɔyízisɛ́n lɛ́ɛ.

²⁵ Mɛ e ma nyí Jwifu ǎ, bó ka ɖi nǔ nú Jezu lɛ́ɛ ɔ́, mǐ kó wlán nǔ e mǐ kplé bó ɖɔ ɔ́ sɛ́ dó yě ɖɔ yě ní má ɖu nǔ e è xwlé vodún ɔ́ ɖě ó; yě ní má ɖu hun ó; yě ní má ɖu kanlin e è glɔ̌n agbɔ̌n ná bo hu lɛ́ɛ ɖě sín lan ó, yě ní má ka lɛ aga ó.”

²⁶ Énɛ́ ɔ́, Pɔ́lu kplá nya ɛnɛ énɛ́ lɛ́ɛ, bɔ ayǐhɔ́ngbe tɔn ɔ́, é slá wǔ xá yě, bó byɔ́ sinsɛnxɔ mɛ. É ɖɔ gbe e gbe wǔsláslá ɔ́ ná fó dó, bɔ è nǎ xwlé vɔ̌sánú Mawu dó ɖokpó ɖokpó yětɔn tamɛ é nú yě ɖo fínɛ́.

È wlǐ Pɔ́lu ɖo sinsɛnxɔ ɔ́ mɛ

²⁷ Azǎn tɛ́nwe lɛ́ɛ wɛ ɖo ná vɔ wɛ kɛ́ɖɛ́, bɔ Jwifu Azíi gbé jí tɔn lɛ́ɛ wá mɔ Pɔ́lu ɖo sinsɛnxɔ ɔ́ mɛ, bó fɔ́n togun ɔ́ bǐ dó jǐ tɔn, lobo wlí i.

²⁸ Yě nɔ́ sú xó ɖɔ: “Izlayɛ́li ví lɛ́ɛ mi, mi wá lóóo! Nya e nɔ ɖɔ xó dó Izlayɛ́li togun ɔ́ wú, bó nɔ́ ɖɔ xó dó Mɔyízi sɛ́n ɔ́, kpódó sinsɛnxɔ élɔ́ kpó wú nú mɛ lɛ́ɛ bǐ gbɔn fí bǐ ɔ́ ɖíe! É tlɛ lɛ́ vɔ́ dɔn mɛ e ma nyí Jwifu ǎ lɛ́ɛ byɔ́ sinsɛnxɔ mɛ, bó ɖu su nú tɛn mímɛ́ élɔ́.”

²⁹ (Yě ɖɔ mɔ̌, ɖó yě ko mɔ Tlofímu Efɛ́zinu ɔ́ kpódó Pɔ́lu kpán ɖo toxo ɔ́ mɛ ɖ'ayǐ, bɔ yě vɛdó ɖɔ Pɔ́lu kplá ɛ byɔ́ sinsɛnxɔ ɔ́ mɛ wɛ sín.)

³⁰ Hunnyahunnya ɔ́ gba kpé to ɔ́ bǐ mɛ, bɔ mɛ lɛ́ɛ kán wezun sín awa lɛ́ɛ bǐ jǐ; yě wlǐ Pɔ́lu, bó dɔn ɛ tɔ́n sín sinsɛnxɔ ɔ́ mɛ, lobo dɔn hɔn lɛ́ɛ bǐ sú tlóló.

³¹ Yě ɖo biba ná hu i wɛ, bɔ è wá ɖɔ nú ahwangán ɖaxó e kpa acɛ nú ahwankánɖó Hlɔ̌ma tɔn ɔ́ ɖɔ: “Jeluzalɛ́mu to ɔ́ bǐ xo zǐn.”

³² Azɔn ɖokpó ɔ́, ahwangán ɖaxó ɔ́ kplá sɔ́ja lɛ́ɛ kpódó sɔ́ja kanwekogán lɛ́ɛ kpán, bó kplɔ́ dó mɛ lɛ́ɛ. Ée mɛ e ɖo Pɔ́lu xo wɛ lɛ́ɛ mɔ ahwangán ɔ́ kpódó sɔ́ja lɛ́ɛ kpán ɔ́, yě ɖó alɔ te.

³³ Ahwangán ɖaxó ɔ́ sɛ yá Pɔ́lu, bó ɖe gbe ɖɔ è ní wlǐ i, bó sɔ́ wlɔ we bó dó e; é kan mɛ e Pɔ́lu nyí ɔ́ kpódó nǔ e é wa ɔ́ kpó byɔ́.

³⁴ Lo ɔ́, mɛ lɛ́ɛ ɖě nɔ́ sú xó, bó nɔ́ ɖɔ ɖě, mɛ ɖěvo lɛ́ɛ nɔ́ ɖɔ vo. Ée ahwangán ɔ́ má sixú mɔ ta nú xó ɖé ɖo hunnyahunnya énɛ́ ɔ́ mɛ ǎ ɔ́, é ɖe gbe ɖɔ è nǐ kplá Pɔ́lu yi ahwankpá ɔ́ mɛ.

³⁵ Hwenu e Pɔ́lu wá kpekán lɛ́ɛ jí ɔ́, sɔ́ja lɛ́ɛ gbɔ bó sɔ́ ɛ dó kɔlivla mɛ, ɖó adǎn e jí mɛ lɛ́ɛ ɖe ɔ́ wútu,

³⁶ ɖó yě bǐ nyi ahwan jɛ gǔdo tɔn, bó nɔ́ ɖo xó sú wɛ ɖɔ: “È hu i, è hu i!”

Pɔ́lu ɖɔ xó dó ba hwɛjijɔ nú éɖée

³⁷ Ée yě ɖo Pɔ́lu ná kplá byɔ́ ahwankpá ɔ́ mɛ wɛ ɔ́, é kanbyɔ́ ahwangán ɖaxó ɔ́ ɖɔ: “Un hɛn ɔ́, un ná ɖɔ xó nú we a?” Ahwangán ɔ́ ka kanbyɔ́ ɛ ɖɔ: “A se Glɛ̌sigbe wɛ a?

³⁸ Hǔn hwi wɛ tlɛ nyí Ejípunu e nɔ nukɔn nú gǔfɔ́ndótojítɔ́ lɛ́ɛ, bó kplá mɛhutɔ́ děgba (4.000) yi gbětótló mɛ azǎn nabí ɖé ɖíe ɔ́ lɔ ǎ mɛ?”

³⁹ Pɔ́lu ka yí gbe n'i ɖɔ: “Jwifu wɛ nú mì; è ji mì ɖo Táasi ɖo Silisíi yíkúngban jí: to nukúnɖéjí ɖé sín vǐ wɛ un nyí; kɛnklɛ́n ná gbe mì, nú má ɖɔ xó nú togun ɔ́.”

⁴⁰ Ahwangán ɔ́ ka ná gbe tɔn ɛ, bɔ Pɔ́lu nɔ te ɖo kpekán lɛ́ɛ jí, bó bló alɔ nú togun ɔ́, bɔ mɛ bǐ xwɛ. Pɔ́lu ka wlí xó dó alamugbe mɛ, bó ɖɔ: